Asizange Sibe Zizityebi Kangaka Ngokomoya!
1 Inkoliso yabantu ilangazelela imini eya kuze ithi ngayo, “Asizange sibe zizityebi kangaka!” Ezingqondweni zabo, loo mini iya kuze ifike xa benentabalala yezinto eziphathekayo, ezibenza ‘bakhululeke, badle, basele, baze baziyolise.’ (Luka 12:19) Ngokuchasene noko, kanye ngoku siyakwazi ukuthetha oko ngengqiqo yokomoya, ekubeni singaswele nanye into elungileyo. (INdu. 34:10) Yenzeka njani loo nto?
2 IMizekeliso 10:22 ithi “intsikelelo kaYehova, yiyo etyebisayo.” Thina banenkoliseko kaThixo enjalo sinokutsho sinyanisile ukuba uThixo ‘usinika zonke izinto ngokobutyebi ukuze siyoliswe.’ (1 Tim. 6:17) Oku kusenza abona bantu bazizityebi emhlabeni!
3 Ukuxabisa Iintsikelelo Esinazo: Bambalwa kuthi abanentabalala yezinto eziphathekayo. Sekunjalo, sisikelelekile kuba asizixhalabelanga ngokugqithisileyo iintswelo zethu zemihla ngemihla. UYehova uyazazi izinto esizisweleyo, yaye uthembisa ukusilungiselela zona. (Mat. 6:31-33) Isiqinisekiso sakhe sisinika uxolo lwengqondo oluxabiseke kunene.
4 Noko ke, iintsikelelo zokomoya esinazo zininzi gqitha. Ubomi bethu buxhomekeke kukudla kokomoya okuvela kuYehova. (Mat. 4:4) Abo bakholose ngemithombo yehlabathi ukuze bafumane ukudla kokomoya bayalamba ngoxa thina sisidla size sisele ngokwaneliseka. (Isa. 65:13) ‘Ikhoboka elithembekileyo’ lisilungiselela ulwazi olungapheliyo olukhokelela kubomi obungunaphakade.—Mat. 24:45; Yoh. 17:3.
5 Ubuzalwana bethu behlabathi lonke obuxabisekileyo busenza sibe nobudlelane obufudumeleyo nabazalwana noodade wethu abahlala kuzo zonke iindawo zomhlaba. (Yoh. 13:35) Ibandla lasekuhlaleni liyindawo yoxolo, apho sinokufumana intuthuzelo nokuhlaziywa. Abadala bavelela imiphefumlo yethu, besinceda ukuba sijamelane neengxaki ezahlukahlukeneyo. (Heb. 13:17) Ukusondelelana nabazalwana bethu kusenza sikhuthazane, kusomelezela ukunyamezela.—Roma 1:11, 12.
6 Kwanomsebenzi wethu uyintsikelelo. Imisebenzi emininzi iyadina yaye ayanelisi. Ukushumayela iindaba ezilungileyo kuyabavuyisa abanye nathi kusenza sonwabe. (IZe. 20:35) Ngenene siyakwazi ukubona okulungileyo kuyo yonke imigudu yethu.—INtshu. 2:24.
7 Ngaphezu kweento zonke, sinethemba elimangalisayo ngekamva. (Roma 12:12) Sikhangele phambili kwihlabathi elitsha eligqibeleleyo lobulungisa, apho siya kuthi sihlale nabantu esibathandayo ngolonwabo nangoxolo ngonaphakade! Eli themba libubutyebi obuxabiseke ngaphezu kwayo nayiphi na into enokunikelwa leli hlabathi.—1 Tim. 6:19.
8 Singalubonakalisa Njani Uxabiso Esinalo? Asinakuze simbuyisele nganto uYehova ngoko asenzele kona. Uxabiso esinalo singalubonakalisa kuphela (1) ngokumbulela yonke imihla ngobubele bakhe obungasifanelanga (Efe. 5:20), (2) ngokubonakalisa ukumthanda kwethu ngokumthobela (1 Yoh. 5:3), (3) ngokungcwalisa igama lakhe ngokushumayela iindaba ezilungileyo (INdu. 83:18), (4) nangokuxhasa ibandla lamaKristu ngokusebenzisana nalo ngentliziyo epheleleyo.—1 Tim. 3:15.
9 Sinezizathu ezininzi zokuba ngabona bantu bonwabileyo emhlabeni. (INdu. 144:15b) Ngamana isimo sengqondo sethu, ihambo yethu nenkonzo yethu ingabonakalisa uvuyo esinalo kule paradisi yokomoya. Asizange sibe zizityebi kangaka!