Ngaba Uxakeke Kakhulu?
1 UPawulos wasibongoza esithi ‘masisoloko sinokuninzi kokwenza emsebenzini weNkosi.’ (1 Kor. 15:58) Sibongozwa ukuba sihlale sinocwangciso lofundisiso lobuqu mihla le, sibe nesabelo rhoqo kubulungiseleli, sibekho rhoqo kwiintlanganiso, size sinyamekele izabelo zebandla ngenkuthalo. Ukongezelela koko, simele sincede nabanye abafuna uncedo lwethu. Ekubeni sinokuninzi kangaka esimele sikwenze, maxa wambi sisenokuziva sisindwa, sicinge ngokukhangela iindlela zokunciphisa umthwalo wethu womsebenzi.
2 Zikho iimeko ezisenokwenza kube bubulumko nento efanelekileyo ukushenxisa ezinye izinto okanye ukuphungula ubuninzi bazo. Abanye abantu bacinga ukuba kulindeleke ukuba benze yonke into abayicelwayo ngabanye. Ukungalungelelani kule nkalo kunokubangela ingcinezelo noxinezeleko olusenokuthi ekugqibeleni lukushiye udimazekile.
3 Lungelelana: Ukuze ulungelelane kufuneka usebenzise isiluleko sikaPawulos ‘sokuqiniseka ngezinto ezibaluleke ngakumbi.’ (Fil. 1:10) Oku kuthetha ukuba sinikele ingqalelo kwizinto ezibaluleke ngokwenene, yaye ukuba ixesha neemeko ziyavuma, sisingathe izinto ezingabalulekanga kangako. Ngokuqinisekileyo iimbopheleleko zentsapho ziphakathi kwezona zinto zibalulekileyo. Simele siphangele. Noko ke, uYesu wasifundisa ukuba izinto zethu ezimele zize kuqala zifanele zesekelwe kumgaqo wokufuna uBukumkani kuqala. Okokuqala simele senze izinto eziya kusivumela sizalise uzahlulelo lwethu kuYehova.—Mat. 5:3; 6:33.
4 Ekubeni sicinga ngoku, siya kuqinisekisa ukuba kucwangciso lwethu olusigcina sixakekile siphungula zonke izinto zobuqu ezingeyomfuneko, ukuzonwabisa okugqith’ emgceni, nokuzibophelela kwabanye okungeyomfuneko. Xa siceba izinto esiza kuzenza veki nganye, siya kubekela bucala ixesha elaneleyo ukwenzela ufundisiso lobuqu, ukuba nesabelo esisengqiqweni kwinkonzo yasentsimini, ukuza kwiintlanganiso nezinye izinto ezihlobene nonqulo lwethu. Ezinye izinto zisenokufakwa kwixesha eliseleyo, kuxhomekeka kwindlela ezinegalelo ngayo ekuphumezeni olona sukelo lwethu luphambili lokuba ngamaKristu alungeleleneyo abeka uBukumkani kuqala.
5 Sekunjalo, sisenokuwuva umthwalo wethu ukuba usenzima. Ukuba kunjalo, kufuneka sisabele kwisimemo sikaYesu esithi: “Yizani kum, nonke nina nixhamlekayo nenisindwa ngumthwalo, yaye ndiza kunihlaziya.” (Mat. 11:28) Kwakhona, kholosa ngoYehova, ‘othwala imithwalo yethu imihla ngemihla’ aze amnike amandla otyhafileyo. Uthembisa ukuba akanakuze aliyekele ilungisa lishukunyiswe. (INdu. 55:22; 68:19; Isa. 40:29) Sinokuba nentembelo yokuba imithandazo yethu iya kuphendulwa, nto leyo eya kusenza sizingise kubomi bokukhuthala emsebenzini wobuthixo.
6 Ngoxa siqinisekile kwelokuba siya kuhlala sixakekile ngenxa yezilangazelelo ezixabisekileyo zoBukumkani, sinokuba novuyo lokwazi ukuba ukubulaleka kwethu akulolize eNkosini.—1 Kor. 15:58.