Thetha Inyaniso Kummelwane Wakho
1 Omnye wemithetho emikhulu emibini uthi: “Umele umthande ummelwane wakho njengawe siqu.” (Mat. 22:39) Olo thando luya kusishukumisela ekubeni sabelane nommelwane wethu ngeyona nto ibalulekileyo esinayo—inyaniso esiyifumene kwiLizwi likaThixo. Ekubeni IMboniselo noVukani! ivakalisa isigidimi senyaniso yeBhayibhile, ukusasaza la maphephancwadi ngoMeyi yenye indlela ‘yokuthetha inyaniso nabamelwane bethu.’—Efe. 4:25.
2 U-“Vukani!” kaMeyi 8 ufanele ahanjiswe de aphele. Intshumayelo yakho usenokuyiqalisa ngokubuza oku:
◼ “Uvakalelwa njani ngehlabathi elingenazimfazwe? [Vumela impendulo.] Ubusazi phofu ukuba iinkonzo zehlabathi ziyazikhuthaza iimfazwe nokubulalana? [Vumela impendulo.] Ngokwahlukileyo koko, phawula oko ithi iBhayibhile kuya kwenziwa ngabanquli bokwenyaniso bakaThixo.” Funda uIsaya 2:2-4 kumantla ephepha 4 leli phephancwadi, uze ufunde isiqendu sokuqala kwiphepha 10 phantsi komxholwana othi “Kuhlatyw’ Ikhwelo Kubathandi Boxolo.” Yandula ke ubuze oku: “Ngaba uyayazi indlela uThixo aya kukwenza ngayo oko? Impendulo uya kuyifumana kweli phephancwadi. Bendingathanda ukukushiyela la maphephancwadi mabini ngomnikelo wee-R2,00.”
3 Xa uhambisa “IMboniselo” kaMeyi 15, zama ukukhankanya iindaba zakutshanje eziye zashiya abantu beziva benganqabisekanga, uze ubuze oku:
◼ “Ucinga ukuba yintoni efunekayo ukuze sizive sinqabiseke ngokwenene kobu bomi? [Vumela impendulo.] Ngeliphandle, ngaba kufanelekile ukukholosa ngabantu ekucombululeni iingxaki olujamelana nazo uluntu? [Vumela impendulo; ufunde INdumiso 146:3.] Kwakhona umdumisi usinika isizathu sokuba nethemba ngekamva. [Funda INdumiso 146:5, 6.] Eli nqaku lithi, ‘Unqabiseko Lokwenene—Ngoku Nangonaphakade,’ licacisa isizathu sokuba sinokukholosa ngoYehova uThixo ekuziseni iimeko ezilunge ngakumbi kulo mhlaba.” Cela ukumshiyela amaphephancwadi amabini nokubuya ukuze nixubushe ngendlela esinokukwazi ngayo ukunandipha ubomi obunqabisekileyo kwanangoku.
4 Umxholo ongaphandle ku-“Vukani!” kaJuni 8 ufanele uthimbe ingqalelo yabantu kwindlu ngendlu nakwintsimi enamashishini. Unokuwutshayelela ngokuthi:
◼ “Uninzi lwamabhinqa luye lwahlangabezana nesihelegu sokukhathazwa ngokwesini kwiindawo zempangelo. Oku kuye kwathabath’ unyawo kangangokuba iinkundla ziye zaqalisa ukuzohlwaya ezo zaphuli-mthetho nokunika loo maxhoba imali-mbuyiselo. Ukuze sincede abantu, siye sapapasha le ngxelo, eziphelisa tu iintsomi ezithethwa ngalo mbandela. Kwakhona inikela amacebiso asebenzisekayo kumabhinqa nasemadodeni ngendlela yokuzikhusela ekubeni ngamaxhoba okanye ekubeni ngulowo utyholwa ngokukhathaza ngokwesini. Ngaba ubungethandi ukufunda le nkupho yephephancwadi uVukani!? [Vumela impendulo.] Singakushiyela aba lindixesha bethu ngomnikelo nje omncinane wee-R2,00.”
5 Ukuba ukhetha intshumayelo emfutshane, unokuzama le:
◼ “Uninzi lwabantu luvakalelwa kukuba inkoliso yamaphephancwadi athandwayo namhlanje alubalaselisa kakhulu urhwebo, isini, okanye ugonyamelo. [Mbonise IMboniselo noVukani!] Sisasaza aba lindixesha bafanelekileyo basekelwe eBhayibhileni. Banemfundiso kakhulu yaye basifundisa ukunqula uThixo, ukuthanda ummelwane wethu, nokuhlala sinehambo elungileyo. Ukuba uyathanda ukufunda ngezi zinto, ndiyazi ukuba uya kukunandipha oko uya kukufumana kwezi nkupho.”
6 Ukuba sinenzondelelo ekuthetheni inyaniso kubamelwane bethu, sisenokukwazi ukubazisela uvuyo olukhulu abanye.—IZe. 8:4, 8.