Xelisa UYehova Ngokubakhathalela Ngokwenene Abanye
1 UYehova Ungowona Mzekelo Ubalaseleyo Walowo Ubakhathalela Ngokwenene Abanye. Njengomongami Wendalo Iphela, Uyazazi Iintswelo Zezidalwa Zakhe Ezingabantu. (1 Pet. 5:7) UYesu Wakhuthaza Abalandeli Bakhe Ukuba Babonakalise Iimpawu Zikayise, Owenza Ukuba Kuphume Ilanga Kune Nemvula Phezu Kwabantu Abangamalungisa Nabangendawo. (Mat. 5:45) Unokumxelisa UYehova Ngokubaxhalabela Ngokwenene Abanye—Ngokukulungela Ukwabelana Ngesidigimi SoBukumkani Nabani Na Odibana Naye. Ngokuzazi Kakuhle Iincwadana Zethu Ezinemifanekiso Eziza Kuhanjiswa Kubulungiseleli Ngojulayi, Uya Kukwazi Ukubanceda Ngokomoya Abanye. La Macebiso Alandelayo Anikela Ezinye Zeengongoma Ngendlela Onokululungiselela Ngayo Utyelelo Lwakho Lokuqala Wandule Ke Ubuyele Kwabanomdla Ngokukhawuleza.
2 Xa uhambisa incwadana enemifanekiso ethi “Ngaba Ngokwenene UThixo Usikhathalele?” usenokuthi:
◼ “Ngaba wakha wazibuza isizathu sokuba uThixo avumele uluntu lubandezeleke ukuba ngokwenene ulukhathalele? [Vumela impendulo.] Le ncwadana inemifanekiso ayinikeli nje impendulo eyanelisayo kulo mbuzo kodwa ikwabonisa ukuba uThixo uthembisa ukulungisa wonke umonakalo owenziwe ngumntu kuye nakweli khaya lakhe lingumhlaba.” Funda isiqendu 23 kwiphepha 27. Mbonise umfanekiso ongezantsi kwaso, uze ufunde INdumiso 145:16 ngokuphuma kwisiqendu 22. Hambisa incwadana enemifanekiso nge-R1,00. Ukuba iyamkelwa, buza umbuzo onokuwuphendula kutyelelo oluzayo, njengalo: “Ngaba ubungathanda ukwazi indlela uThixo aya kuyifeza ngayo injongo yakhe yokuzisa iintsikelelo kuluntu nokuguqula lo mhlaba ube yiparadisi?”
3 Xa ubuyela kwabo ububashiyele incwadana enemifanekiso ethi “Ngaba Ngokwenene UThixo Usikhathalele?” usenokuyiqalisa ngolu hlobo enye ingxubusho:
◼ “Xa bendilapha kwixa elidluleyo, siye saxubusha ngelokuba ngokwenene uThixo usikhathalele yaye kuyinjongo yakhe ukulungisa wonke umonakalo owenziwe ngumntu kuye nakweli khaya lakhe lingumhlaba.” Tyhila kule ncwadana kumfanekiso okwiphepha 2-3 uze uthi: “Siye sayiqukumbela incoko yethu ngalo mbuzo, UThixo uya kuyifeza njani injongo yakhe yokuzisa iintsikelelo kuluntu nokuguqula lo mhlaba ube yiparadisi? Ucinga ntoni wena?” Vumela impendulo. Tyhila kwiphepha 17, ufunde isiqendu 2 noDaniyeli 2:44. Emva koko, funda isiqendu 12 kwiphepha 18. Buza umninimzi enoba ebengathanda na ukuhlolisisa kunye nawe icandelo 9 lale ncwadana inemifanekiso. Ukuba ebengathanda, lifundisise kunye naye.
4 Nantsi intshayelelo enokusetyenziswa ekuhambiseni incwadana enemifanekiso ethi “Xa Umntu Omthandayo Esifa.” Mbonise umphandle wayo uze uthi:
◼ “Namhlanje sihambisa le ncwadana inemifanekiso eye yanikela intuthuzelo nethemba kwizigidi zabantu eziye zafelwa ngabantu ezibathandayo. Ngaba wakha wazibuza enoba likho na ithemba ngabafileyo? [Vumela impendulo.] IBhayibhile ilichaza ngokucacileyo idinga likaThixo lovuko.” Funda uYohane 5:28, 29. Tyhila le ncwadana inemifanekiso uze ugqabaze ngeengongoma ezandlalwe kwisiqendu sokugqibela kwiphepha 28 nakwisiqendu sokuqala kwiphepha 31. Mbonise imifanekiso ehambisana nazo. Hambisa le ncwadana inemifanekiso nge-R1,00. Usenokuvula ithuba lokubuyela ngokubuza uthi, “Singaqiniseka njani ukuba ekugqibeleni ukufa kuza kupheliswa ngokupheleleyo?”
5 Apho ubuhambise incwadana enemifanekiso ethi “Xa Umntu Omthandayo Esifa,” usenokuthanda ukusebenzisa le ntshumayelo xa ubuyela:
◼ “Xa besincokola kwixa elidluleyo, sixubushe ngethemba elimangalisayo lovuko. Incwadana enemifanekiso ebendikushiyele yona icacisa isizathu sokuba sinokuqiniseka ukuba ekugqibeleni ukufa kuza kupheliswa ngokupheleleyo. Ngaba akuwafumanisanga ethuthuzela yaye esenza sibe nentembelo amadinga kaThixo?” Vumela impendulo. Tyhila kwiphepha 31 kule ncwadana inemifanekiso, ufunde isiqendu sesibini nesesithathu, kunye neSityhilelo 21:1-4. Balaselisa ithemba esinalo lokunandipha ubomi ngaphandle kokufa. Ngokuxhomekeka kumdla oboniswe nguloo mntu neemeko zakhe ngaloo mzuzu, usenokucela ukumqhubela isifundo seBhayibhile kwincwadi ethi Ulwazi okanye ubuze omnye umbuzo ukuvula ithuba lokubuyela kwakhona.
6 Xa uhambisa incwadana enemifanekiso ethi “Iyintoni Injongo Yobomi—Unokuyifumana Njani?” usenokuthetha oku kulandelayo:
◼ “Uninzi lwabantu luye lwazibuza oko ikuko injongo yobomi. Luye lwazibuza: ‘Kutheni ndilapha nje? Ndisingephi? Lindifumbathele ntoni ikamva?’ Ucinga ukuba singazifumana phi iimpendulo? [Vumela impendulo.] Phawula oko kuthethwa yiBhayibhile. [Funda INdumiso 36:9.] Ngaba akukho ngqiqweni ukugqiba kwelokuba uMdali womntu ungoyena unokusicacisela isizathu sokubalapha kwethu? [Vumela impendulo.] Le ncwadana inemifanekiso ibonisa injongo ezukileyo yoko uThixo asigcinele kona.” Tyhila kwiphepha 20-1, funda amagama angezantsi komfanekiso, uze ugqabaze ngomfanekiso lowo; wandule ke uhambise le ncwadana inemifanekiso nge-R1,00. Ukuba uyayamkela, buza oku: “Sinokuqiniseka njani ukuba kuseyinjongo kaThixo ukuba abantu baphile ngonaphakade kwiParadisi esemhlabeni?” Beka ixesha lokubuyela.
7 Ukuba ubuhambise incwadana enemifanekiso ethi “Iyintoni Injongo Yobomi?—Unokuyifumana Njani?,” usenokuthetha into efana nale xa ubuyela:
◼ “Xa bendilapha ngaphambili, ndikuthande kunene ukuxubusha nawe ngembono yeBhayibhile yokuba ubomi babantu bunayo ngokwenene injongo.” Mbonise umfanekiso okwiphepha 31 uze ubuze oku, “Sinokuqiniseka njani ukuba kuseyinjongo kaThixo ukuba abantu baphile ngonaphakade kwiParadisi esemhlabeni?” Funda isiqendu 3 kwiphepha 20. Xubusha ngeengongoma ezithile phantsi komxholwana othi, “Kuseyinjongo KaThixo,” kwiphepha 21. Tyhila ngasemva kule ncwadana inemifanekiso, uze umfundele isicelo sokumqhubela isifundo seBhayibhile sekhaya. Mbonise incwadi ethi Ulwazi, uze ucele ukumbonisa indlela esiyisebenzisa ngayo njengoncedo lokufundisisa iBhayibhile.
8 Ubulungiseleli bethu bufanele bubonakalise umdla ongazenzisiyo esinawo wokunceda abantu abantliziyo zinyanisekileyo ‘bafikelele elwazini oluchanileyo lwenyaniso.’ (1 Tim. 2:4) Ngoko ke, zibekele ixesha kucwangciso lwakho lwenkonzo ukuze ubuyele kumntu ngamnye omshiyele incwadana enemifanekiso. Ukubonakalisa kwakho inkxalabo yokwenene ngabo kunokuphumela ekuncedeni abo bancwinayo nabagcumayo ngenxa yamasikizi awenziwayo kunqulo lobuxoki ukuze baphawulelwe ukusinda. (Hez. 9:4, 6) Kwakhona uya kufumana uvuyo nolwaneliseko olubangelwa kukuxelisa kwakho uYehova ngokubakhathalela ngokwenene abanye.—Thelekisa eyabaseFilipi 2:20.