Kufuneka Abazalwana Abangakumbi Kwinkonzo Yobuvulindlela
1 UPawulos wasibongoza ukuba ‘sisoloko sinokuninzi kokwenza emsebenzini weNkosi.’ (1 Kor. 15:58) Kwabaninzi, oku kuthetha ukungenela inkonzo yobuvulindlela. Kulo nyaka wenkonzo udluleyo, bangaphezu kwama-800 abantu abaye bongezelelwa kwizintlu zoovulindlela kweli loMzantsi Afrika nje kuphela!
2 Sithetha nje uninzi lwabo bakhonza njengoovulindlela kweli lizwe ngoodade. (INdu. 68:11) Hayi indlela ebekuya kuba luvuyo ngayo ebandleni ukuba abazalwana abangakumbi bebenokuthelela izintlu zabakhonzi bexesha elizeleyo! (INdu. 110:3) Siyaqonda ukuba uninzi lwabazalwana kufuneka lusingathe iimbopheleleko ezinzima zempangelo nezentsapho. Kwakhona abanye basebenza nzima ukuze banyamekele iintswelo zebandla. Siyawaxabisa la madoda azibhokoxayo ngenxa yoBukumkani.—1 Tim. 4:10.
3 Nakuba kunjalo, ngaba abangakumbi kuni bazalwana banokungenela inkonzo yobuvulindlela? Ukuba umkakho unguvulindlela, ngaba ungamthelela? Ukuba udla umhlala-phantsi, ngaba akulivumi kusini na elokuba ayikho enye indlela eyanelisayo onokulisebenzisa ngayo ixesha lakho kunobulungiseleli bexesha elizeleyo? Ukuba uyagqibezela esikolweni kulo nyaka, ngaba ukhe wakucinga nzulu nangomthandazo ngokungenela le nkonzo yobuvulindlela njengomchankcatho okhokelela kumalungelo enkonzo awongezelelekileyo?—Efe. 5:15-17.
4 Omnye umzalwana wathengisa ishishini lakhe elaliqhuba kakuhle waza wafuna umsebenzi wesingxungxo ukuze abe nguvulindlela. Ngenxa yokhokelo lwakhe oluhle, abathathu kubantwana bakhe abane baba ngoovulindlela bakuba nje begqibile esikolweni. Owesine kubo wayekulangazelela kakhulu ukubathelela. Lo mzalwana nentsapho yakhe baye basikelelwa kakhulu.
5 Kuvulwe Umnyango Omkhulu: Inkonzo yobuvulindlela inokuvula “umnyango omkhulu okhokelela emsebenzini.” (1 Kor. 16:9) Abazalwana abangoovulindlela basenokusetyenziswa ngamandla ebandleni. Ukuba nenzondelelo ngomsebenzi wasentsimini kongezelela kwimeko yabo yokomoya kuze kufak’ isandla kwinkqubela yabo yobuthixo. Ubuvulindlela bunokuvula ithuba elikhokelela kumalungelo awongezelelekileyo enkonzo. Emva konyaka wokuqala unguvulindlela, kukho intsikelelo yokuya kwiSikolo Senkonzo Yobuvulindlela. Izicaka zolungiselelo nabadala abangatshatanga basenokuzabalazela ukuya kwiSikolo Sokuqeqesha Abalungiseleli. Izibini ezitshatileyo ezifanelekayo zinokufaka isicelo kwiSikolo SaseGiliyadi. Ekugqibeleni abazalwana basenokufanelekela umsebenzi wokuhambahamba. Ewe, ubulungiseleli bobuvulindlela buvula umnyango okhokelela kula malungelo angakumbi enkonzo kwintlangano kaYehova.
6 Abazalwana abanokungenela inkonzo yobuvulindlela obuthe ngxi banokufumana uvuyo olungenakuthelekiswa nanto oluhambisana nokupha kakhulu.—IZe. 20:35.