Iminikelo Eya Kumsebenzi WoMbutho Owenziwa Ehlabathini Lonke Ixhasa Ulwando
Njengoko kwaxelwa kwangaphambili kuIsaya 54:2, 3, unqulo lukaYehova olunyulu luyaqhubeka lusanda kumhlaba wonke. Oku kuquka amazwe awahlukahlukeneyo akwilizwekazi laseAfrika nakwiziqithi ezingabamelwane. Kule minyaka ilishumi idluleyo, umsebenzi woBukumkani uye wavulwa kwiindawo ezinjengeAngola, iCameroon, iEquatorial Guinea, iMadagascar, iMalawi, iMozambique, iTogo neTopiya. Kula mazwe nakwamanye apho amasimi ebemhlophe elungele ukuvunwa, abavangeli basemazweni baseGiliyadi, abaphumelele kwiSikolo Sokuqeqesha Abalungiseleli, amalungu entsapho yaseBheteli nabanye baye banikela uncedo.—Mat. 9:37, 38.
Licacile elokuba, ukwanda kwabanquli kwintlangano kaYehova kufuna ukwakhiwa kwamakhulukhulu eeHolo zoBukumkani ezintsha. Kwakhona kwenze kwafuneka iiHolo zeNdibano namasebe amatsha okanye awandisiweyo. Ukuxhasa le misebenzi ngemali ndawonye nokugcina umsebenzi woBukumkani uhambela phambili kungekhona apha eAfrika nje kuphela kodwa nakwezinye iindawo zehlabathi kuye kwayixathula kanobom iminikelo yomsebenzi woMbutho owenziwa ehlabathini lonke.
Imifanekiso nemizobo ekumaphepha amabini esi sihlomelo ikunika umfanekiso-ngqondweni woko uMbutho ubuzabalazela ukukwenza kwintsimi eseAfrika. Oku kubonisiweyo yeminye yemisebenzi yokwakha eyenziwayo sithetha nje neminye imisebenzi eza kuqaliswa kungekudala. Isebe laseMzantsi Afrika belixakeke ngamandla kuninzi lwale misebenzi yenziwa kumazwe angabamelwane.
Ngokuhlola isicangca senkonzo yasentsimini kwi-1996 Yearbook, uya kukubona kakuhle oko kwenziwa ngabavakalisi kubulungiseleli kula mazwe. Kuye kwakho ulwando olukhulu kuninzi lwamazwe, yaye ulwando olungakumbi lubonakala kwinani elisemagqabini labebeze kwiSikhumbuzo. Xa sikhumbula oko kwenziwa kwamanye amazwekazi njengenxalenye yomsebenzi wokushumayela ngoBukumkani nowokwenza abafundi emhlabeni wonke, kubethelela ezingqondweni zethu ilungelo esinalo lokuxhasa ngezinto eziphathekayo usukelo lonqulo oluyinyaniso.—Luka 16:9; 1 Tim. 6:18.
[Picture on page 3]
IHolo yoBukumkani KwaZulu-Natal, eMzantsi Afrika, eyakhiwa ngeentsuku ezisi-9
[Picture on page 3]
IHolo yoBukumkani yaseNigeria eyakhiwe ngendlela eyonga imali
[Picture on page 3]
IHolo yeNdibano eMozambique enezihlalo ezili-1500, eza kugqitywa ngasekupheleni kowe-1996
[Picture on page 3]
Izakhiwo zesebe eMozambique, eziza kuba sezilungele ukuhlalwa ngentlakohlaza yowe-1996
[Picture on page 3]
Isebe laseSierra Leone, elicwangciselwe ukugqitywa kulo nyaka
[Picture on page 4]
IHolo yeNdibano eseyigqityiwe yaseMauritius enophahla nje kuphela, kunye nezakhiwo zesebe, eziza kugqitywa ebutsheni bowe-1997
[Picture on page 4]
Isebe laseZimbabwe lisakhiwa
[Picture on page 4]
IHolo yeNdibano enophahla kuphela nesebe elitsha elisakhiwayo eSenegal
[Picture on page 4]
Isebe elitsha laseKenya, elikwikomkhulu, iNairobi
[Picture on page 4]
Isebe laseMadagascar, eliza kugqitywa kungethuba lide
[Picture on page 4]
Izakhiwo zesebe ezisacetywayo eMalawi