Zisebenzise Kakuhle Iincwadi Ezindala
1 Umntu uye wagcina izigidi zeencwadi ezindala kwimizi yogcino zincwadi emhlabeni wonke. Sekunjalo, ziye zaba nayiphi ingenelo ehlala ihleli ebantwini? (INtshu. 12:12) Iimpapasho ezinikela ingqalelo kuBukumkani bukaThixo noko buza kukwenzela uluntu zixabiseke kakhulu. Inkoliso yamabandla aneencwadi ezipapashwe ngaphambi kowe-1986. Ekubeni le iyinyanga yokugqibela kuhlaselo lomhlaba ongabelwanga bani, sifanele sicinge ngokuhambisa ezi ncwadi zindala ebantwini.
2 Zixabiseke Ngokwenene: Ngoxa abanye bethu besenokuvakalelwa kukuba ezi ncwadi ziphelelwe lixesha xa zithelekiswa neempapasho zethu ezintsha, simele sikhumbule ukuba ziqulethe inyaniso yeZibhalo. Ngoko ke, sifanele senze umgudu ongakumbi wokusebenzisa ezi ncwadi zindala kwintsimi yasekuhlaleni nakumhlaba ongabelwanga bani.
3 Ukubalaselisa ukubaluleka kwazo ngamava ebhinqa elithile elafumana iimpapasho eziliqela zeWatch Tower kumakhulu walo. Elinye iNgqina labuza eli bhinqa enoba liyayazi na indlela ezixabiseke ngayo ezi mpapasho. Eli bhinqa laphendula: “Andiyazi indlela ezixabiseke ngayo, kodwa ndinokukufumanisa njani oko?” Eli bhinqa lasamkela isifundo seBhayibhile, langena enyanisweni laza kamva lalixabisa ithala leencwadi likamakhulu walo. Elinjani lona ukuxabiseka ilifa lengqokelela yeencwadi ezindala!
4 Zisasaze: Ukongezelela ekuhambiseni iincwadi ezindala kwizindlu ngezindlu nakumhlaba ongabelwanga bani, qiniseka ukuba uyazihambisa xa usenza amabuyelo kubantu obaziyo ukuba bayakunandipha ukufunda iimpapasho zethu, kuquka nabo barhumela IMboniselo noVukani! nabakumzila wakho wamaphephancwadi. Kwabo ufundisisa iBhayibhile nabo, iincwadi ezindala ezikhethiweyo zinganikela isiseko solwazi oluya kwandisa ukuqonda kwabo ngenyaniso. Ungalibali ukuzifumanela naziphi na iincwadi ezindala ongenazo kwiincwadi zakho.
5 Kunokugcina iincwadi ezindala, masizisebenzise kakuhle ukuze sikhuthaze abantu esidibana nabo ukuba ‘boyike uThixo, bagcine imithetho yakhe.’—INtshu. 12:13.