“Zonke Izinto Zenu Mazenzeke Ngothando”
1 “Kuluvuyo ngokwenene ukuba namalungu enu; aziphatha ngembeko nangentlonelo engathethekiyo.” La magqabaza avela kwiziko eliququzelela indibano nabakhenkethi eUnited States eyayiqhutyelwe kulo enye yeendibano zethu zesithili. Kuyasikhuthaza ukunconywa okunjalo ngenxa yehambo yethu phakathi kwabantu. Oku kubonisa ukuba sonke senza ‘ukuba zonke izinto zenzeke ngothando.’ (1 Kor. 16:14) Kwangaxeshanye, kukho izinto ezixhalabisayo ekunokuthi ukuba azilungiswa zonakalise igama elihle labantu bakaThixo.
2 Amagumbi: Kwisixeko ngasinye sendibano, iSebe Lamagumbi lithetha neehotele, iihostele nabantu ngabanye ngamaxabiso afikelelekayo ukuze wonke ubani akwazi ukuya endibanweni. Abanye bade bahlaliswe kwiiHolo zoBukumkani. Abazalwana bethu bachitha ixesha baze benze nomgudu omkhulu ngenxa yethu. Ngenxa yoko kufanele kubonakaliswe uxabiso ngendawo yokuhlala elungiselelweyo.
3 Ncedani nikhumbule ukuba xa ihotele ilungiselela iindwendwe zayo isidlo sakusasa, sifanele sijongwe njengokuba sinjalo—isidlo sakusasa esisisipho kubantu abahlala kuyo. Injongo asikukuba sihambe nako oku kutya ukuze sikutye ngelinye ixesha okanye nabahlobo bethu endibanweni.
4 Ukusebenza Okulungileyo Kubo Bonke: Imbeko nehambo engumzekelo zikhuthazwa luthando ngoYehova nabamelwane bethu. (Mat. 22:37-39; Yak. 3:13) IBhayibhile isibongoza ukuba sibe nothando yaye sibe nolwazelelo kubantu bonke. (Gal. 6:10) Ngokuqinisekileyo lo mgaqo uyasebenza xa sihleli kwiihotele. Ukungabi nantsebenziswano kungcolisa igama lethu, konakalise amalungiselelo ethu okuhlawula amaxabiso aphantsi, ukungabi nantsebenziswano kubangela intiyo phakathi kwabazalwana.
5 AmaNgqina aziwa kakhulu ngokucoceka okukumgangatho ophezulu. IKomiti YeNdibano yanikela le ngxelo, “Kwenye ihostele indoda eyayiphethe ekuqaleni yayingenantsebenziswano. Xa yabona ihambo yabazalwana noodade isimo sayo sengqondo saguquka ngokuthe ngcembe. Ekuseni yeza neqela elalize kucoca ihostele, icinga ukuba iza kushiywa imdaka izele yinkunkuma, njengokuba eqhele ukwenjenjalo amanye amaqela. Hayi indlela eyothuka ngayo kukufumanisa ukuba abazalwana baye bayishiya le ndawo icocekile. Yagqabaza yathi, ‘andizange ndibabone abantu abanje. Ndicela ukuba wenze esi saziso endibanweni yenu, undibulelele kubo ngokuba bengabantu abanje.’” Ngamana sonke singaqinisekisa ukuba silondoloza lo mlinganiselo uphakamileyo wokucoceka kwindawo yendibano nakwindawo esihlala kuyo.
6 Unobhala kwibandla ngalinye ufanele aodole iifomu zezicelo zamagumbi kuMbutho, ukuba akakakwenzi oko. Ezi fomu zifanele zizaliswe ngumvakalisi zize zibuyiselwe kunobhala, oya kuzithumela kwindibano efanelekileyo. Ileta eyayisiya Kuwo Onke Amabandla yomhla kaJulayi 31, 2000 ineenkcukacha ezifanelekileyo.
7 Ngolangazelelo silungiselela ukuya kwiNdibano yeSithili ‘Yabenzi Belizwi LikaThixo.’ Ngaba sele uwenzile onke amalungiselelo akho okubakho, kuquka indawo yokuhlala namalungiselelo okuhamba? Ngamana ihambo yethu nendawo yethu yokuhlala kwisixeko sendibano ingasoloko ibonisa inyaniso esezintliziyweni zethu nothando ngoMdali wethu.