“Yilwa Umlo Omhle Wokholo”
1 Umpostile uPawulos wabongoza uTimoti ukuba ‘alwe umlo omhle wokholo.’ (1 Tim. 6:12) Yena ngokwakhe uPawulos wayephila ngokuvisisana naloo mazwi. Kamva ebomini bakhe, watsho ngolweyiseko ukuba yena uye walwa umlo omhle. (2 Tim. 4:6-8) Ngazo zonke iindlela, waqhubeka nobulungiseleli ngenkalipho nonyamezelo. Ngokuxelisa umzekelo wakhe, sinokuba nolweyiseko lwangaphakathi olufanayo lokuba senza okona kusemandleni kumlo wethu wokholo lobuKristu.
2 Yandisa Umgudu Ofunekayo: UPawulos wayezibhokoxa kubulungiseleli. (1 Kor. 15:10) Nathi senza njalo ekubeni sifuna ukufumana bonke abafanelekayo kwintsimi yethu. (Mat. 10:11) Ukuze sifikelele abanye babo, kunokuthetha ukuvuka kusasa ukuze sinikele ubungqina kwabo sidibana nabo esitratweni. Okanye kunokuthetha ukusebenza emva kwemini okanye ngorhatya ukuze sidibane nabantu emva kokuba bebuyele emakhayeni abo.
3 Kufuneka ukuziqeqesha nokucwangcisa kakuhle ukuze sibambe ixesha xa siza kuhlanganisana kwinkonzo yasentsimini neqela lesifundo sencwadi sethu. Ngokomzekelo, wambi amalungu entsapho yaseBheteli ahamba imizuzu engama-45 ukuze abe nesabelo kubulungiseleli namabandla abelwe kuwo ngeempela-veki. Kwakhona, singabothulel’ umnqwazi abavakalisi neentsapho zabo kwibandla lethu abahamba umgama omde kodwa bafike ngexesha. Imizekelo enjalo yokuzibhokoxa neyolungelelwano lobuqu ifanele ukuxeliswa.
4 Sifanele sishukunyiselwe ukuba sibuyele kuye wonke umntu onomdla esimfumanayo. Kwanaxa sihambisa uncwadi esitratweni okanye kwiimeko ezingacwangciswanga, kufuneka senze umgudu ukuze sigcine idilesi yomntu okanye inombolo yomnxeba. Sinokwandula ke simtsalele umnxeba ukuze sikhulise umdla size sizabalazele ukuqalisa isifundo seBhayibhile.
5 Yibakho Rhoqo Kubulungiseleli: UPawulos wayezingisa kwaye ecokisa xa eshumayela. (Roma 15:19) Kuthekani ngawe? Ngaba unesabelo rhoqo kubulungiseleli? Ngaba sele unenxaxheba kubulungiseleli kule nyanga? Abaqhubi Bezifundo Zencwadi Zebandla banomdla wokuqinisekisa ukuba wonke ubani okwiqela labo abe nesabelo kubulungiseleli ebudeni buka-Agasti. Baya kukunceda wenjenjalo.
6 Ngokuxelisa umzekelo kaPawulos wokuxhasa iindaba ezilungileyo ngokuzeleyo, siya kuqhubeka ‘nokulwa umlo omhle wokholo.’