Mbulele uYehova Ngobubele Bakhe Bothando
ISikhumbuzo Sokufa KukaKristu Esiza Kuba NgoMatshi 24
1. UYehova usibonise njani ububele bakhe bothando?
1 Umdumisi wathi: “Abantu mabambulele uYehova ngobubele bakhe bothando nangemisebenzi yakhe emangalisayo koonyana babantu.” (INdu. 107:8) Ububele bothando bukaThixo asikokuba novelwano nje kuphela ngabantu bakhe. Oko kwenziwe kwacaca kumazwi aphefumlelweyo endumiso athi: “Ububele bakho bothando, Yehova, buqhubeka bundixhasa.” (INdu. 94:18) Obunjani bona ububele bothando awabubonisayo uYehova ngokunikela ngoNyana wakhe okuphela kwamzeleyo ngenxa yethu!—1 Yoh. 4:9, 10.
2. Sinokuwubonisa njani umbulelo esinawo kuYehova?
2 Njengoko iSikhumbuzo sokufa kukaKristu sisemnyango, sinokumbulela njani “uThixo wobubele bothando”? (INdu. 59:17) Ngamnye wethu uza kufuna ukuzipha ixesha lokucamngca ngeentsuku zokugqibela zikaYesu emhlabeni. (INdu. 143:5) Kwakhona kuya kuba yingenelo ukulandela ucwangciso olukhethekileyo lofundo lweBhayibhile lweSikhumbuzo, olukwincwadi ethi Ukuhlolisisa IZibhalo Imihla Ngemihla—2005 uze, ukuba kunokwenzeka, ufunde okungakumbi yaye wenze uphando kwisahluko 112-16 sencwadi ethi Oyena Mntu Ubalaseleyo Wakha Waphila nakwezinye iincwadi ezisekelwe eBhayibhileni. Camngca ngoko ukufundayo, yaye wendele kuko. (1 Tim. 4:15) Ukuthandaza xa uza kufundisisa iLizwi likaThixo akomelezi nje iintliziyo zethu kuphela kodwa kukwabonisa indlela esimthanda ngayo uYehova.—Mat. 22:37.
3, 4. (a) Sinokuwuxelisa njani umoya wabazalwana bethu baseLiberia? (b) Ngubani oceba ukummemela eSikhumbuzweni?
3 Shukumisela Abanye Ekubeni Bambulele UThixo: Abantu abebekho kwiSikhumbuzo salo nyaka uphelileyo bebezizi-16 760 607 ehlabathini jikelele. Kwilali ethile yaseLiberia, abazalwana babhalela intloko-dolophu beyixelela ukuba baceba ukuqhuba iSidlo SeNkosi Sangokuhlwa kwidolophu yalapho. Le ntloko-dolophu yabavumela ukuba basebenzise ibala lasekuhlaleni lebhola ekhatywayo yaza yenza amalungiselelo okuba esi siganeko saziswe kuwo wonke loo mmandla, imema nabantu. Nangona babebahlanu kuphela abavakalisi kuloo lali, eSikhumbuzweni kwakukho abantu abangama-636!
4 Ngokufanayo, sifuna ukukhuthaza abaninzi kangangoko kunokwenzeka ukuba babe kunye nathi eSikhumbuzweni. Kutheni ungenzi uludwe lwabantu ofuna ukubamema? Izimemo zeSikhumbuzo zikwiphepha elingasemva likaVukani! kaMatshi 8 neMboniselo kaMatshi 15. Kunokusetyenziswa nezimemo ezishicilelweyo zeSikhumbuzo. Kwiphepha lesimemo chwetheza okanye ubhale ngokucacileyo ixesha nendawo esiza kuba kuyo iSikhumbuzo, uze unike ngamnye ommemayo. Xa uMatshi 24 esondela, bakhumbuze bonke obamemileyo nize nenze amalungiselelo okugqibela.
5. Sinokubakhuthaza njani abantu esibafundelayo ukuba babekho?
5 Sinokubanceda njani abantu esibafundelayo abangekayi ezintlanganisweni ukuba bangenelwe ngokupheleleyo kwesi siganeko? Xa uqhuba isifundo sebenzisa imizuzu embalwa usincede siqonde ukubaluleka kwesi siganeko. Unokufumana umbandela ocacileyo kwiMboniselo kaMatshi 15, 2004, iphepha 3-7, nakwincwadi ethi Ukuqiqa, iphepha 329-33.
6. Kutheni kubalulekile ukwamkela iindwendwe ezize eSikhumbuzweni?
6 Yamkela Iindwendwe: KwiSikhumbuzo, thetha neendwendwe yaye uzamkele. (Roma 12:13) Lungiselela ukuba uhlale nabantu obamemileyo uze uqiniseke ukuba banayo iBhayibhile neculo. Ngokukhethekileyo sinokuya kubazalwana noodade abapholileyo abenze umgudu wokubakho ukuze sibamkele ngokufudumeleyo. Umdla wethu oqhutywa luthando unokubanceda baphinde bathabathe apho babeyeke khona ukuza rhoqo ezintlanganisweni. (Luka 15:3-7) Ngesi sihlandlo sisesona singcwele, ngamana singenza konke okusemandleni ethu ukuze sikhuthaze abanye babe kunye nathi xa sibulela uYehova ‘ngobubele bakhe bothando obumangalisayo.’—INdu. 31:21.