Lisebenzise Ngobulumko Ixesha Lakho
1 Ekubeni sifuna ukukholisa uYehova siyaqiniseka ukuba izinto zokomoya ziza kuqala kubomi bethu. ILizwi lakhe lisiyalela ukuba ‘sifune kuqala ubukumkani’ size ‘siqiniseke ngezinto ezibaluleke ngakumbi.’ (Mat. 6:33; Fil. 1:10) Sinokuzipha njani ixesha lezilangazelelo zoBukumkani size ezinye izinto ezingabalulekanga sizibeke endaweni yazo?—Efe. 5:15-17.
2 Izinto Zokomoya Mazize Kuqala: Cwangcisa ixesha lakho ukuze ungalichithi kwizinto ezingabalulekanga. Abanye baqalisa nyanga nganye ngokuceba amaxesha athile kwikhalenda yabo becwangcisela intsimi. Emva koko bayaqiniseka ukuba abavumeli ezinye izinto ziphazamisane nocwangciso lwabo. Sinokwenza okufanayo nangexesha leentlanganiso, lesifundo sobuqu neleendibano. Abaninzi balungiselela ukufunda iBhayibhile ekuqaleni okanye ekupheleni kosuku. Zibekele ixesha lento nganye ebalulekileyo, uze ungavumeli ezinye izinto zikuphazamise ngokungeyomfuneko.—INtshu. 3:1; 1 Kor. 14:40.
3 Lisebenzise Ngokulinganiselweyo Ihlabathi: Kwamanye amazwe, kulula ukuba abantu baxakeke yimidlalo, ukuzonwabisa nezinye izinto. Abaninzi bachitha ixesha elininzi bebukele umabonwakude okanye besebenzisa ikhompyutha. Noko ke, ukuthi phithi kukuzonwabisa nazizixhobo ezitsha ezifumaneka kweli hlabathi ekugqibeleni kuya kungqineka kulilize. (1 Yoh. 2:15-17) Ngoko, iZibhalo zisibongoza ukuba singalisebenzisi ngokupheleleyo ihlabathi. (1 Kor. 7:31) Ngokuphulaphula eso siluleko sobulumko, unokubonisa uYehova ukuba unqulo lwakhe luza kuqala ebomini bakho.—Mat. 6:19-21.
4 Sele iza kuphela le nkqubo yezinto. Abo babeka izilangazelelo zoBukumkani kuqala baya kuvuya yaye baya kumkholisa uThixo. (IMize. 8:32-35; Yak. 1:25) Ngoko ke, ngamana singalisebenzisa ngobulumko ixesha lethu elibaluleke kakhulu.