Sebenzisa Iintshumayelo Eziphumelelayo
1. Yintoni esiyifunda kwiindlela ezahlukeneyo awayeshumayela ngazo amaKristu amandulo?
1 AmaKristu amandulo ayeshumayela kubantu beentlanga neenkonzo ezahlukeneyo. (Kol. 1:23) Nangona babenesigidimi esinye—uBukumkani bukaThixo—kodwa indlela ababeshumayela ngayo yayisahluka ngokwabantu. Ngokomzekelo, xa ethetha namaYuda awayezihlonela iZibhalo, uPetros watshayelela ngokucaphula umprofeti uYoweli. (IZenzo 2:14-17) Kwelinye icala, phawula indlela uPawulos awaqiqa ngayo namaGrike njengoko kubhalwe kwiZenzo 17:22-31. Namhlanje, abantu kwezinye iindawo bayazihlonela iZibhalo, yaye sinokukwazi ngaphandle kokulibazisa ukufunda iBhayibhile ngoxa sikwindlu ngendlu. Sekunjalo, kusenokungabi lula ukwenza njalo xa sithetha nabantu abangenamdla eBhayibhileni, kunqulo okanye abayinxalenye yonqulo olungelolwabuKristu.
2. Sinokukwazi njani ukusebenzisa uncwadi oluhanjiswayo ukuze sincede abo bayihlonelayo kunye nabo bangayihloneliyo iBhayibhile?
2 Sebenzisa Kakuhle Uncwadi Oluhanjiswayo: Uncwadi oluza kuhanjiswa kulo nyaka wenkonzo luza kutshintshwa rhoqo emva kweenyanga ezimbini yaye kuza kubalaseliswa amaphephancwadi, amaphecana neencwadana ezinemifanekiso. Enoba abantu kwintsimi yethu abanamdla kangako eBhayibhileni, siya kukwazi ukuncokola nabo ngento eya kubangela umdla kubo. Sisenokungakwazi ukufunda iBhayibhile kutyelelo lokuqala okanye sibhekisele kuyo ngokuthe ngqo, kodwa xa umninimzi ebonise umdla sinokubuyela ngenjongo yokumnceda akholose ngoMdali nangeLizwi lakhe. Kwelinye icala, ukuba sishumayela kwindawo enabantu abayihlonelayo iBhayibhile, sinokusebenzisa iimpapasho neendlela zokushumayela ezibonisa ukuba nathi siyayihlonela iBhayibhile. Sinokuhambisa incwadi ethi Okufundiswa YiBhayibhile, incwadana enemifanekiso ethi Listen to God okanye ethi Phulaphula UThixo Uze Uphile Ngonaphakade nangaliphi na ixesha, enoba ziziphi iimpapasho ezihanjiswa kuloo nyanga. Eyona nto ibalulekileyo kukushumayela ngendlela eya kwenza umninimzi abe nomdla kuYehova.
3. Iintliziyo zabantu esishumayela kubo zifana njani nomhlaba?
3 Lungisa uMhlaba: Intliziyo yomntu ifana nomhlaba. (Luka 8:15) Eminye imihlaba ifuna ukulungiswa ngokucokisekileyo ngaphambi kokuba imbewu yenyaniso eseBhayibhileni intshule ize ikhule. Abashumayeli benkulungwane yokuqala bakwazi ukutyala kuzo zonke iintlobo zemihlaba, yaye oku kwabenza bavuya baza baneliseka. (IZenzo 13:48, 52) Nathi sinokuba nempumelelo efanayo ukuba siphucula indlela esishumayela ngayo.