Amaphecana Amatsha Anomtsalane!
1. Ziziphi izixhobo ezitsha zentsimi ezenziwe zanomtsalane?
1 KwiNdibano YeSithili ka-2013, eyayinomxholo othi, ‘ILizwi LikaThixo Liyinyaniso!’ kwakhululwa amaphecana amahlanu amatsha. Kula maphecana, kuye kongezwa iKingdom News No. 38 enomxholo othi, “Ngaba Abafileyo Bangaphinda Baphile Kwakhona?” Onke la maphecana mathandathu matsha enziwe anomtsalane. Kutheni enziwe ngale ndlela? Le ndlela intsha enziwe ngayo sinokuyisebenzisa njani xa siwahambisa kwindlu ngendlu?
2. Yintoni injongo yala maphecana matsha?
2 Kutheni Etshintshiwe?: Intshumayelo ephumelelayo kwindlu ngendlu idla ngokuquka ezi zinto zine: (1) Ukubuza imbono yomninimzi ukuze uqale incoko. (2) Ukufunda iSibhalo. (3) Ukumshiyela incwadi ukuze azifundele. (4) Nokubuza umbuzo oza kuwuphendula kwixesha elizayo, uze wenze namalungiselelo okubuyela kuye. La maphecana matsha enza kube lula ukuzenza zone ezi zinto.
3. Sinokulihambisa njani elinye la lamaphecana matsha entsimini?
3 Indlela Yokuwasebenzisa: (1) Emva kokubulisa, bonisa umninimzi imibuzo eyahlukahlukeneyo esekuqaleni, uze ucele imbono yakhe. (2) Vula iphecana nize nifunde indawo ethi, “Oko Kuthethwa YiBhayibhile.” Ukuba iimeko ziyavuma, sifunde ngqo eBhayibhileni isibhalo. Ukuba umninimzi unexesha, fundani indawo ethi, “Indlela Ekunokukunceda Ngayo Oku.” (3) Mshiyele eli phecana, uze umkhuthaze ukuba alifunde xa engaxakekanga. (4) Ngaphambi kokuba umshiye, mbonise umbuzo ophantsi kwendawo ethi, “Khawucinge Ngoku,” uze wenze amalungiselelo okubuyela ukuze nixubushe ngempendulo yawo.
4. Sinokuwasebenzisa njani amaphecana amatsha xa sibuyela?
4 Nokubuyela yinyam’ ethole. Mbonise nje isibhalo esingasemva kwiphecana ukuze uphendule umbuzo obuwubuze kutyelelo lokuqala. Ngaphambi kokuba umshiye, mbonise umfanekiso wencwadana ethi Iindaba Ezilungileyo, umbonise le ncwadana nesahluko esinenkcazelo engakumbi ngaloo mxholo, uze umshiyele yona. Ukuba uyayithatha, yenza amalungiselelo okubuyela kuye ukuze niyixubushe. Ube usiqalile ke isifundo seBhayibhile ngaloo ndlela! Okanye ukuba akumnikanga incwadana, unokumshiyela elinye iphecana uze wenze amalungiselelo okubuyela kuye nize nilixubushe.
5. Amaphecana aluncedo njani entsimini?
5 Sekudlule iminyaka engaphezu kweyi-130 kusetyenziswa amaphecana entsimini. Nangona ubukhulu nendlela enziwe ngayo ibingafani, ebesoloko esisixhobo esihle sokushumayela. Ngamana singawasebenzisa kakuhle la maphecana matsha njengoko sisasaza ulwazi lweBhayibhile emhlabeni wonke.—IMize. 15:7a.