ICawa YamaKatolika ESpeyin—Iimpikiswano

Ngumbhaleli kaVukani! eSpeyin

“Izinto azisoloko zinjengokuba sizibona.” Oku kwaphawulwa nguMhlekazi uWilliam Gilbert kuyichaza kakuhle itempile iSagrada Familia eseBarcelona (eboniswe kwiphepha 10). Izakhiwo zayo ezingamapomakazi zifihle umngaphakathi ongenanto​—⁠emva kweminyaka elikhulu yakhiwe, le tempile iseligobhogobho nje. UbuKatolika baseSpeyin nabo budityaniswe ngenyameko namandla nokungabi nto yanto, njengokuba amagqabaza awenziwa ngabantu baseSpeyin abalandelayo ekutyhila oku:

“UJohn XXIII? Eli gama livakala liqhelekile. Ngaba wayengukumkani?” Watsho njalo uCristina, ongumntwana okwishumi elivisayo waseSpeyin, nongazange eve nento le ngaloo popu uthandwayo ngabantu.

Umqhubi weteksi waseMadrid uJosé Luis nomfazi wakhe, uIsabel, babefane baye ngaloo mini kule cawa yamarhamente ukuze nje unyana wabo aphehlelelwe. Babuzwa oku, “Kutheni le nto nifuna unyana wenu aphehlelelwe nje?” Utata waphendula esithi, “Kungokuba singamaKatolika.” Noko ke, xa wangcanjaziswayo, wavuma ukuba isizathu esiyintloko sasikukuphepha iingxaki nentsapho yakhe.

UMNTU otyelela eSpeyin ebudeni beVeki eNgcwele usenokuchukunyiswa ngokupheleleyo liqela labantu elenza ungcelele nelihamba ngokulandelelana ezixekweni kulo lonke eli ilizwe. Kodwa bambi kubantu baseSpeyin​—⁠ngokukodwa abaselula⁠—​basenolwazi nje olungephi, ukuba kukho nto bayaziyo ngonqulo abazibabaza bekulo.

Ukungazi nto ngonqulo ngokufuthi kuhambisana nokungabi namdla elunqulweni. Nangona inkoliso yabemi baseSpeyin iphehlelelwa, itshatiswa, ize ingcwatywe yicawa​—⁠ibe ngokwenene izigqala ingamaKatolika⁠—​ukuphila ngokuvisisana nemimiselo yaseRoma kuyenye into.

Abazali basenokubaphehlelela abantwana babo kodwa kunqabile ukuba bazive bebophelelekile ukubafundisa imfundiso yobuKatolika. Kunokwenzeka ukuba izifungo zomtshato ezenziwa zizibini ezitshatileyo ziqhutywa yicawa kodwa akufane kwenzeke ukuba ezo zibini zizive zibophelelekile ukulandela imfundiso yecawa kwimicimbi engomtshato. Ibe abantu abalishumi ekhulwini kwabo bathi bangamaKatolika abakholelwa kwaukukholelwa kuThixo ongumntu.

Le meko ayimangalisi kangako, xa kuqwalaselwa unxibelelwano olusoloko lukho kodwa olungqubanayo phakathi kwelizwe laseSpeyin necawa. Ichazwa njengeyayisakuba “kukukhanya [kwebhunga] kwaseTrent, isando sabakreqi nekrele laseRoma,” iSpeyin yakwabangela “eyona ntshutshiso enophalazo-gazi eyafunyanwa yiCawa yamaKatolika ukususela kubukho bayo,” uchaza njalo unjingalwazi wembali yale mihla weYunivesithi yaseDeusto, eVizcaya.

Ngenkulungwane ye-16, imali nemikhosi yaseSpeyin yakhusela inkqubo yobuKatolika yaseYurophu nxamnye neliza lobuProtestanti, kodwa ngowe-1527 iRoma neKomkhulu lepopu ngokwalo zaphangwa ngokungenanceba yimikhosi yokumkani waseSpeyin nomlawuli oNgcwele waseRoma uCharles V.a UCharles, njengabanye abalawuli baseSpeyin, wakuchwayitela ukungayisiso nayiphi na imimiselo kapopu awayengayithandi.

Uhlobo olukhethekileyo nolunomoya wokuzilawula lobuKatolika baseSpeyin lwaba nezi mpikiswano ngenxa yolwalamano olukhethekileyo lweCawa noRhulumente, olwaqaliswa xa iCawa norhulumente zazikwelona nqanaba liphezulu kwigunya lazo.

[Umbhalo osemazantsi]