Icawa Yamakatolika Espeyin—Kutheni Ijamelene Namanqam Nje?
“Ngokuba behlwayele umoya, baya kuvuna isaqhwithi.” Hoseya 8:7.
NGOMEYI 20, 1939, kwicawa yaseSanta Bárbara, eMadrid, uNjengele Franco wanika uBhishophu Omkhulu uGomá, ongubhishophu omkhulu waseSpeyin ikrele lakhe loloyiso. Umkhosi kunye necawa zalubhiyozela kunye olu loyiso upopu awaluchaza ‘njengoloyiso olunqwenelwayo lwamaKatolika.’ Imfazwe yamakhaya yayiphelile, ibe kuyabonakala ukuba kwakuqalisa inkqubo entsha yobuKatolika eSpeyin.
Icawa eyayizuze uloyiso yafumana inkxaso yobubele eyayivela kuRhulumente, ukulawula imfundo, nenkqubo ebanzi yamagunya okuhlolisisa nantoni na eyayingeloncedo kuhlanga lwamaKatolika. Kodwa imfazwe yomnqamlezo enempumelelo eyayisiliwa ngumkhosi wezonqulo nayo yayihlwayele imbewu yokudodobala kwecawa.
Ngokwendlela abantu abaninzi baseSpeyin ababebona ngayo, icawa yayibekek’ ityala ngezenzo zenkohlakalo zemikhosi eyoyisayo. Enyanisweni, ebudeni beminyaka eyalandelayo yasemva kwemfazwe, uninzi lwabantu lwaya kwidini leMisa. Ukuze ufumane umsebenzi okanye unyuselwe, kwakububulumko ukuba ube ngumKatolika olungileyo. Kodwa ngaba ukholo lokwenyaniso lwakhuthazwa ngamandla ezixhobo nayingcinezelo yezobupolitika?
Kwiminyaka engamashumi amane kamva, ungcelele lwamanqam lwaluza kuwuphendula loo mbuzo.
Amanqam Okholo: Ngowe-1988 yayingabantu baseSpeyin abathathu kuphela kwabalishumi ababeluqhelisela ngokuthe rhoqo unqulo lobuKatolika, ibe inkoliso yabantu yayizigqala “ingengobantu bonqulo kunokuba yayinjalo kwiminyaka elishumi edluleyo.” Uhlolisiso, olwalukwiEl Globo, iphephancwadi leeveki ngeeveki laseSpeyin, lwabonisa ukuba nangona abantu abaninzi baseSpeyin bekholelwa kuThixo, abangaphantsi kwesiqingatha kubo beyisekile kukuba kukho ubomi emva kokufa. Okwamangalisa ngokona kona yayikukufumanisa ukuba abaninzi kangangeshumi ekhulwini kwabo babezigqala bengamaKatolika bathi babengakholelwa kuThixo ongumntu.
Amanqam Obizo: ElaseSpeyin lalikade lithumela abefundisi kwiimbombo zone zomhlaba. Kwiminyaka engamashumi amathathu eyadlulayo, kwakuthanjiswa abangama-9 000 nyaka ngamnye. Ngoku elo nani liye lehlela kwiwaka, ibe izikolo ezikhulu zabefundisi zikhal’ ibhungane. Ngenxa yoko, umlinganiselo wobudala babefundisi baseSpeyin uyanda—ngoku i-16 ekhulwini lingaphezu kweminyaka engama-70 ubudala, ngoxa ingabathathu kuphela ekhulwini abangaphantsi kwama-30.
Amanqam Engxowa-mali: Umgaqo-siseko omtsha waseSpeyin uyayahlula icawa kuRhulumente. Ngaphambili, inkxaso yesisa eyenziwa nguRhulumente ngokuzenzekelayo yayisabelwa iCawa yamaKatolika. Urhulumente okhoyo ngoku uye waqalisa inkqubo entsha apho inxalenye encinane yerhafu yomntu ngamnye yabelwa icawa okanye enye injongo ethile exabisekileyo engokwasekuhlaleni, kuxhomekeka kwiminqweno yomrhafi. Okumangalisayo kukuba, ngumrhafi omnye kuphela kwabathathu baseSpeyin owakhetha ukuba imali yakhe inikwe icawa. Oku kwathetha intlekele kumagunya obuKatolika, awayecinga ukuba phantse inani eliphindwe kabini laloo mali laliya kuyinikela le “rhafu yonqulo” ecaweni. Oku kuthetha ukuba kusekude ukuba icawa izixhase.
Okwangoku, kuyabonakala ukuba urhulumente ethanda engathandi kuya kufuneka eyixhasile icawa ngemali efikelela kwizigidi zeedola ezili-120 ngonyaka. Asingawo onke amaKatolika ayivuyelayo le meko. Esinye isazi ngonqulo saseSpeyin, uCasiano Floristán, walatha ukuba “icawa engafumani minikelo yaneleyo kubantu abathembekileyo kusenokwenzeka ukuba ayinabo abantu abathembekileyo okanye asiyocawa leyo.”
Amanqam Okuthobela: La manqam achaphazela abefundisi namarhamente. Abefundisi abaselula nezazi ngonqulo ngokufuthi baxhalabele imibandela engokwentlalo kunokuxhalabela imibandela engokonqulo. Utyekelo lwabo “lwenkqubela” luyangqubana noobhishophu nabanye abaphathi becawa yaseSpeyin abasadla ngendeb’ endala nabakwangqubana neKomkhulu likapopu. Umzekelo woku nguJosé Sánchez Luque, ongumfundisi waseMálaga, ovakalelwa kukuba “iCawa ayinalungelo lilelayo yodwa ngenyaniso” nokuba ifanele “ikhokele abemi, kodwa ngaphandle kokubacinezela.”
Inkoliso yamaKatolika aseSpeyin icinga ngendlela efanayo—sisithathu kuphela kumaKatolika aseSpeyin ngokuqhelekileyo esivumelanayo noko upopu akuthethayo. Ibe ulawulo loobhishophu baseSpeyin lugqalwa ngendlela ede ibe yengamkelekanga ngakumbi. KumaKatolika ekwaye kwadliwan’ indlebe nawo kuhlolisiso lwakutshanje, isine sawo sacacisa ukuba ‘sasingenakubonakalisa inyameko enganeno’ ngoobhishophu, ngoxa i-18 ekhulwini lathi bebengenakubaqonda nangayiphi na indlela.
“Ukushumayela Ivangeli Okwesibini”
Ngenxa yale meko yothusayo, ngowe-1985 oobhishophu baseSpeyin bapapasha ungcelele lwamazwi angaqhelekanga okuzohlwaya. Phakathi kwezinye izinto, bavuma bathi:
“Siye sayisitha kunokuba siyityhile
imbonakalo yokwenyaniso kaThixo.”
“Mhlawumbi siye salibambezela
iLizwi likaThixo.”
“Asisithi sonke abaye basicacisa
isigidimi sikaYesu esingangxengwanga.”
“Siye sathembela kancinane kuThixo saza
sathembela kakhulu kumagunya eli hlabathi.”a
Kwakhona oobhishophu bavuma ukuba ilizwe lalisiba lelingabophelelekanga elunqulweni ngakumbi nangakumbi, okanye lalisiba lelingabonakalisi mdla kulo. Bancomela ukuba “kwenziwe umsebenzi wokushumayela okwesibini” eSpeyin. Noko ke, bambalwa abasiphulaphulayo isimemo sabo. Amanenekazi amabini angamaKatolika awayehamba kwindlu ngendlu amangaliswa kokuthile. Ixesha alichithela ekucaciseleni abaninimzi ukuba ayengengawo amaNgqina kaYehova lalingaphezulu kunelo alichithela ekunikeleni isigidimi sawo sobuKatolika.
Oku kwakungafanele kumangalise, kuba amaNgqina kaYehova achitha iiyure ezingaphezu kwezigidi ezili-18 kunyaka odluleyo etyelela amakhaya abantu baseSpeyin kumsebenzi wokwenene wokushumayela owenziwa kuzo zonke iintlanga. Onke amaNgqina—njengamaKristu enkulungwane yokuqala—aziva ebophelelekile ‘ukwenza umsebenzi womshumayeli weendaba ezilungileyo.’ (2 Timoti 4:5) Ibe nangona esenokufumanisa ukuba abantu abaninzi abayikhathalele icawa, ivangeli, okanye iindaba ezilungileyo ezingoBukumkani bukaThixo azishumayelayo, ziphulaphulwa ngabantu abaninzi.
Enye indoda eseyikhulile abadibana nayo nguBenito. Xa kwathi kwaqhambuka imfazwe yamakhaya, wazifumanisa ekummandla olawulwa ngabavukeli bomkhosi. Wanyanzelelwa ukuba abhalise njengejoni, kodwa wavakalelwa kukuba kwakuphosakele ukuphatha izixhobo. Wala ukuyamkela into yokuba leyo ‘yayiyimfazwe engcwele.’ Kunokuba abulale uwabo, wazidubula esandleni ngabom ukuze angakwazi ukusebenzisa umpu.
Kwiminyaka engamashumi amane kamva, yena nomfazi wakhe baqalisa ukufundisisa iBhayibhile namaNgqina kaYehova. UBenito wavuyiswa kukufunda ukuba uThixo ubongoza abantu bakhe ukuba ‘bawakhande amakrele abo abe ngamakhuba,’ kanye njengokuba isazela sakhe saye samshukumisela ukwenza oko kwiminyaka emininzi ngaphambilana. (Isaya 2:4) Phezu kwayo nje impilo eyayimkhathaza, kwakamsinya naye wayesenza umsebenzi womshumayeli weendaba ezilungileyo.
“Iqamza Elibukekayo”
UGloria wayengumKatolika owayezimisele ukunqula uThixo ngendlela yakhe. Kangangeminyaka, ubomi bakhe wayebunikele ecaweni njengomvangeli wasemazweni ongunongendi eVenezuela. Kodwa wayedidekile ngethuba laxa wayengakwazi ukufumana iimpendulo kwimibuzo awayenayo eyayiphathelele iimfundiso zecawa, ezinjengokuKhawula okuNgcwele kukaMariya, intlambululo-miphefumlo noBathathu Emnye.
Xa wathi wafuna inkcazelo, wayesoloko exelelwa ukuba yayiyimfihlelo leyo. Wazibuza esithi ‘Kutheni le nto uThixo esenza kube nzima kangaka ukuziqonda izinto?’ Ngesinye isihlandlo walunyukiswa ngokuba ukuba wayephila ngexesha leNkundla YamaRoma yokuNcina amakholwa wayeya kutshiswa. Wacinga wenjenje, ‘Oko kusenokuba kuyinyaniso.’
Ngenxa yoku kutyhafiswa, xa wathi watyelelwa ngamaNgqina kaYehova wayenamathandabuzo. Kodwa xa wathi waqonda ukuba konke ababekufundisa kwakungqinwa ziZibhalo, nokuba ekugqibeleni wayenako ukusiqonda isigidimi sikaThixo ngoluntu, wazaliswa yimincili. Ngoku unikela ixesha lakhe elininzi ekushumayeleni iindaba ezilungileyo zoBukumkani bukaThixo.
UGloria uthi, “Ngoku, xa ndicinga ngawo onke amatiletile onqulo eCawa yamaKatolika, ndiwathelekisa neqamza elibukekayo elibengezela yimibala emininzi, kodwa elingenanto—ukuba uzama ukuliqwalasela ngokubhekele phaya, lisuka nje liphele.”
UBenito, uGloria namawaka amaNgqina kaYehova afana nabo eSpeyin, aye afumana ukuhlaziyeka kokwenene ngokomoya ngokuguqukela kumanzi angangxengwanga enyaniso equlethwe kwiZibhalo Ezingcwele. Ukuhlaziyeka okunjalo kwakungekho kwiziko elibekekileyo laseIberia, icawa yaseSpeyin—eyayityebe kangako kwisithethe kodwa ihlwempuzeke kangako ngokomoya, eyayinamandla angako kangangeenkulungwane kodwa ngoku engakwazi kangako ukuzinceda ekupheliseni ukungabi nankxalabo ngomhlambi wayo onciphayo.
UYesu Kristu wakha wathi, ebhekisela kwimfuneko yokufanisa nokuphepha isiphoso sonqulo: “Ke kaloku balumkeleni abaprofeti ababuxoki, abeza kuni ngezambatho zeegusha, ngaphakathi ke beziingcuka eziqwengayo. Nobaqonda ngeziqhamo zabo. . . . Ngoko ke nobaqonda ngeziqhamo zabo.”—Mateyu 7:15-20.
Sishiyela kumfundi ukuzigqibela ngeziqhamo zobuKatolika baseSpeyin.
[Umbhalo osemazantsi]
a Amanye amazwi okuzohlwaya athethwa kwintlanganiso emanyeneyo yabefundisi noobhishophu ngowe-1971. Nangona ingazange idluliselwe ngabantu abaninzi ababini kwabathathu ababefuneka, abangaphezu kwesiqingatha bayamkela le nkcazelo: “Ngokuzithoba siyakuqonda yaye sikucelela uxolo ukusilela kwethu ukwazi indlela, ngoxa oko kwakuyimfuneko, yokuba ‘ngabalungiseleli boxolelwaniso’ phakathi kwabantu bethu abadlavulwe yimfazwe yempambano.”
[Amagama acatshulweyo akwiphepha 12]
Oobhishophu bama-Katolika bacela ukuba kushunyayelwe ivangeli okwesibini eSpeyin. Bambalwa abasabelayo kubizo lwabo
[Umfanekiso okwiphepha 9]
Ngabantu abathathu kuphela kwabalishumi kubantu baseSpeyin abaya ngokuthe rhoqo ecaweni
[Umfanekiso okwiphepha 10]
ICawa iSagrada Familia eseBarcelona ayikagqitywa nangoku emva kweminyaka elikhulu isakhiwa yaye icela imali
[Inkcazelo]
Photo: Godo-Foto