“Yiya Embovaneni”

UKUMKANI uSolomon wabhala oku, “yiya embovaneni, vilandini; khangela iindlela zayo, ulumke.” Yintoni umntu olivila​—⁠okanye nawuphi na omnye umntu​—⁠anokuyifunda embovaneni? USolomon wahlabela mgama wathi: “Yona ithi, ingenamphathi, namongameli, namlawuli, isuka isilungise isonka sayo ehlotyeni, ikubuthe udla kwayo ngenxa lokuvuna.”​—⁠IMizekeliso 6:​6-⁠8.

Kuyabonakala ukuba lo kumkani ulumkileyo wayebhekisela kwimbovane engumvuni. KwaSirayeli, njengakwezinye iindawo, kuyinto eqhelekileyo ukubona imbovane engumvuni isihla inyuka, ithwele imbewu ephantse ilingane nayo ngobukhulu. (Bona ngasentla ekhohlo.) Ikuthabatha oko kudla ikuqokelele ikuse kwindawo yokugcina engaphantsi komhlaba.

Ekubeni engaphantsi komhlaba, lo “vimba” usenokufuma ngexesha lemvula, yaye ezi mbewu ziya kuntshula okanye zingunde ukuba azinyanyekelwanga. Ngaloo ndlela iimbovane zinomsebenzi ongakumbi ezimele ziwenze. Ngoko nangoko lakuphuma ilanga, iimbovane ezingaphantsi zikhuphela ezi mbewu ngaphezulu ukuze zomele ngaphandle. (Bona ngaphezulu.) Yaye ngaphambi kokuba ilanga litshone, ezi mbovane zithwalela ezo mbewu ngaphantsi kwakhona. Ezinye iimbovane zinobulumko kangangokuba ziyayiluma incam entsulayo yeembewu njengoko ziqokelela okanye xa ziqalisa ukuntshula.

Umsebenzi weembovane awupheleli ekulungiseleleni ukudla. Zikwanomsebenzi wokunyamekela inzala yazo. Amaqanda amele agcinwe eziimbumba. Imibungu ephuma kumaqanda aqanduselweyo imele ityiswe. Amaqombolokosha (pupae) amele alondolozwe. Ezinye iimbovane zikwalungiselela inkonzo yolungiso-moya (air-​conditioning service). Xa kusiba shushu emini, zithwalela amaqombolokosha ezantsi kwiindlwana zazo. Xa kuqalisa ukuphola ngokuhlwa, ziwabuyisela phezulu la maqombolokosha kwakhona. Ngaba oku akungomsebenzi mninzi?

Njengoko eli butho likhula, kumelwe kwakhiwe amagumbi amatsha. Iimbovane ezingabasebenzi zisebenzisa imihlathi yazo ukumba nokuthwalela umhlaba ngaphandle. Ngokuqhelekileyo oku zikwenza emva kwemvula xa umhlaba uthambile. Zikwabumba lo mhlaba ube “zizitena” ukwenzela imisebenzi yazo yobugcisa bezekhaya​—⁠ukwakha iindonga neesilingi zamatonela namagumbi azo angaphantsi komhlaba.

Konke oku iimbovane zikwenza ‘zingenamphathi, namongameli, namlawuli.’ Kuthekani ngokumkanikazi? Akaniki miyalelo. Uzala amaqanda kuphela yaye ungukumkanikazi ngengqiqo yokuba ungumama welo butho. (Bona ngasentla.) Ngaphandle komongameli wokuhlola abasebenzi okanye umphathi-basebenzi wokubaqhuba ngasemva, iimbovane ziqhubeka ngokungadinwa emsebenzini wazo. Enye imbovane yabonwa isebenza ukusukela ngentsimbi yesithandathu kusasa kwade kwayeyeshumi ebusuku!

Ngaba unokufunda isifundo ngokuqwalasela imbovane? Ngaba usebenza nzima uze uzame ukuphucula umsebenzi wakho enoba kukho umntu okujongileyo okanye akujongwanga? (IMizekeliso 22:29) Ekuhambeni kwethuba uya kubuyekezwa kwanokuba umqeshi wakho akakuphawuli ukusebenza nzima kwakho. Unokuba nesazela esicocekileyo nolwaneliseko lobuqu. Njengokuba uSolomon wathi: “Bumnandi ubuthongo bosebenzayo, nokuba incinane, nokuba ininzi into ayidlayo.”​—⁠INtshumayeli 5:12.

Oku asikuphela kwento esinokuyifunda kwimbovane. Iimbovane zisebenza nzima ngethuku. Enyanisweni, ezinye iimbovane ziphawulwa zilandela ngobuyatha umzila oshiywe zezinye. Ziphelela zijikeleza ndawonye, de ziwe zize zife.

Ngaba ngamanye amaxesha uvakalelwa kukuba ujikeleza ndawonye, usoloko uxakekile yaye udiniwe kodwa awuze ufike ndawo? Ukuba kunjalo, eli lixesha lokuba uhlolisise injongo yokusebenza nzima kwakho uze uhlolisise ukuxabiseka kokwenene kosukelo lwakho. Khumbula isiluleko sobulumko esanikelwa nguKumkani uSolomon: “Yoyika uThixo, ugcine imithetho yakhe; ngokuba indawo leyo yimfanelo yoluntu lonke.”​—⁠INtshumayeli 12:13.