Umkhosi Olungele Ukuhlasela!
“Sihlala kwidolophana esakhiwayo yaseBelize, eyenileyo lutyani. Ngenye intsasa, malunga nentsimbi yesithoba, ikhaya lethu lahlaselwa ngumkhosi. Kwagaleleka umkhosi weembovane, ezinye zazingena phantsi komnyango ukanti ezinye zazingena kuzo zonke iintanda, zikhangela amaxhoba azo. Kwafuneka sithi tyishi apho ekhaya isithuba esingangeyure okanye ezimbini ukuze ezo mbovane zenze umsebenzi wazo. Ekubuyeni kwethu, safika iimbovane zitshayele kwasinambuzane esasikuloo ndlu.”
ABANTU abaninzi abahlala kumazwe anemozulu efudumeleyo njengaseBelize baqhelene nale meko yaye le asinto bayichase ngokupheleleyo. Le yindlela yokutshayela amaphela nezinye izinambuzane eziyingozi. Yaye umkhosi weembovane ukhucula kungasali nento le.
Okubangel’ umdla kukuba, ezi mbovane kuthethwa ngazo apha zibizwa ngokuba ngumkhosi weembovane ngenxa yokuba zenza izinto ngokungathi ngumkhosi wamajoni.a Kunokuba wakhe iindlwane, lo mkhosi woonothwal’ impahlana ongamakhulu amawaka uzakhela iintente zokwexeshana, udibanisa imilenze yawo ukuze wakhe umkhusane, urhangqe imbovane engukumkanikazi namantshontsho ayo. Xa lo mkhosi ukule ntente, kukhutshwa imiqodi ngemiqodi yeembovane ukuba iye kuzingela ukutya yaye koko kutya kubakho izinambuzane nezinye izilwanyana ezincinane ezifana namacilikishe. Iimbovane eziphambili ziqalisa ukwakha uhlelo ukuze zibambise ixhoba. Xa zingeva vumba laxhoba, iimbovane eziphambili ziqalisa ukuthingaza zize zime ngxi. Ezo ziza ngasemva ziyatyhudisa ziphume emacaleni zize zithi saa kuhle okomkhosi usakha uhlelo.
Umjikelo womkhosi weembovane uthabatha iintsuku ezingama-36, uzingela ukutya kangangeentsuku ezili-16 yaye kwiintsuku ezingama-20 eziseleyo uhlala ententeni, ngelo xesha ukumkanikazi uqandusela amaqanda akhe. Emva koko, lo mkhosi weembovane undululwa yindlala kwakhona. Le miqodi yeembovane, eminye eba ziimitha ezili-10 ububanzi irhuqa izigcawu, oonomadudwane, ooqongqothwane, amasele namacilikishe yaye udla ngokulandelwa ziintaka ezinomdla kula maxhoba kungekhona kwiimbovane.
Xa ichaza iimbovane eziyinxalenye yendalo emangalisayo, kwiMizekeliso 30:24, 25, iBhayibhile ithi “ngethuku lemvelo zilumkile.”
[Umbhalo osemazantsi]
a Eli nqaku lithetha ngeembovane ezibizwa ngokuba zii-Eciton, ezifumaneka kuMbindi nakuMzantsi Merika.
[Umfanekiso okwiphepha 29]
Umfanekiso wenye yezi mbovane
[Inkcazelo]
© Frederick D. Atwood
[Umfanekiso okwiphepha 29]
Zakha ibhulorho ngokudibanisa imilenze yazo
[Inkcazelo]
© Tim Brown/www.infiniteworld.org