Abantu Abaselula Bayabuza . . .
Ngaba Kunomsebenzi Ukuba Luhlobo Luni Lwemifanekiso Eshukumayo Endiyibukelayo?
IMIFANEKISO eshukumayo ayinampembelelo ingako kum,’ utsho njalo omnye okwishumi elivisayo ogama linguKaren, ‘kuba ndiya kwimifanekiso eshukumayo ukuze ndothuswe ndize ndoyikiswe, ukuze nje ndizonwabise.’ Ulutsha oluninzi luthetha okufanayo ngokungaphenjelelwa kwalo ziifilimu. Noko ke, uGeorgia oselula, akavumelani noko. Ekubeni ebone imifanekiso eshukumayo emininzi abangavunyelwayo ukuba bayibone abo bangaphantsi kweminyaka eli-17, uthi: “Akunakuze uyilibale loo miboniso . . . Okukhona ucinga ngayo, kokukhona uzifumanisa ufuna ukwenza oko ukubonileyo.”a
Imifanekiso eshukumayo ithandwa kakhulu lulutsha. Komnye unyaka wakutshanje, ama-36 ekhulwini abangaphezu kwezigidi ezili-113 ababenze ungcelele kwizindlu ekuboniselwa kuzo imifanekiso eshukumayo eUnited States babe kwiminyaka yabo yeshumi elivisayo. Abazizigidi ezingakumbi banandipha ukubukela ezi filimu ngasese emakhayeni abo ngokusebenzisa iikhasethi zevideo okanye imifanekiso eshukumayo abayibona kwiinkqubo ezithile zikamabonwakude onecable. Kambe ke, sonke siyakufuna ukuphumla nokuzonwabisa amaxesha ngamaxesha. Ukuziyolisa okunjalo kunokuhlaziya yaye kunokuyivuselela ingqondo. Kulutsha oluninzi, ukubukela umfanekiso oshukumayo ngandlel’ ithile kuyakuphumeza oku kuze kuhlaziye imva-kwemini okanye urhatya oludakumbisayo. Kodwa kanye kanye yiyiphi imifanekiso eshukumayo oza kuyibukela? Ngaba ngokwenene kunomsebenzi ukuba yiyiphi?
Imifanekiso Eshukumayo—Utyekelo Oluqhubekayo
“Inkolelo yokuba ulonwabo yeyona nto ibalulekileyo ebomini bomntu, isini, ugonyamelo, ukubawa, ukuzingca.” Ngokutsho kukagqirha wezifo zengqondo ebantwaneni uRobert Coles, le yimilinganiselo ebalaseliswa kwinkoliso yemifanekiso eshukumayo eboniswa namhlanje. Kuphengululo olwalukhokelwa nguGqr. Vince Hammond ngokufanayo kwagqitywa kwelokuba “inkoliso yeefilimu eziboniswa kumazwe anenkqubela ubuncinane zinogonyamelo oluthile, ezininzi zinogonyamelo olulinganiselweyo okanye ugonyamelo olugqithiseleyo.” Abaphengululi bakaHammond bahlolisisa iifilimu ezili-1 000 kumazwe awahlukahlukeneyo. Baphetha ngelithini? “Ukuveliswa kweefilimu ezinogonyamelo kuyingxaki esehlabathini lonke.”
Iifilimu ezithandwa ngokukhethekileyo lulutsha zezo zoyikisayo, ezibonisa ukusebenzelana needomon, ukudlwengula, nokuphalazwa kwegazi okwenziwa ngeyona ndlela ikhohlakele gqitha. Njengokuba uGqr. Neil Senior, ocatshulwe kwiphephancwadi iSeventeen, ekubeka, ezi filimu “zibonisa nantoni na ebiya kuthi nayiphi na intsapho ingafuni yenzeke kuyo.” Kanti, ulutsha oluninzi lwenza ungcelele ukuya kuzibukela.
Kwakhona kuye kwakho ulwando oluphawulekayo kwiifilimu ezibalaselisa isini. Yaye ngokutsho kwenye injingalwazi yaseyunivesithi, “abona babukeli abaphambili beevideo ezibalaselisa isini eKhanada ngabantu abaselula abaphakathi kweminyaka eli-12 neli-17 ubudala yaye oku kusenokuba kuyazonakalisa izimo zabo zengqondo ngokuziphatha okungokwesini.”
Phofu ke, amaziko avelisa imifanekiso eshukumayo awabonakali enenkxalabo engako. Iphephancwadi iVariety linikela ingxelo yokuba iifilimu ezibonisa ugonyamelo nesini ngokucacileyo ziyanda, ngoxa iifilimu ezicocekileyo, zentsapho kunzima ukuba zenziwe. Ngoko, ngaba kunokwenzeka ukuba, ukubukela iifilimu ezimbi kube kungakuchaphazela ngendlela eyingozi?
Ukuhlaselwa Kwamehlo Neendlebe Zakho
Imifanekiso eshukumayo izihlasela ngamandla iziva-mvo. UYesu wathi “isibane somzimba liliso.” (Mateyu 6:22) Yaye oko ukubonayo kunokuba nomphumo onzulu gqitha kuwe. Kunjengokuba enye intyilalwazi ikubeka ngale ndlela oku, “ingqondo ilandela amehlo.” Ngokuqhelekileyo, ingqondo yakho isebenzisa oko amehlo akho akhetha ukukondela nokukubona. Kodwa xa wondele imifanekiso yabantu abanobukhulu obungaphezu kobemvelo ishukuma kudonga ekuboniselwa kulo, unokuphantse uyinikele ingqondo yakho ekwenzeni ukuthanda komenzi womfanekiso oshukumayo. Bambi baba nomdla ogqithiseleyo kwiifilimu kangangokuba basenokufuna ukubethwa ngamandla ngengqiniba ukuze kuphazanyiswe umtsalane obangelwa ngumfanekiso oshukumayo.
“Indlebe evayo” nayo iziphembelela ngamandla iingcinga nezenzo zakho. (IMizekeliso 20:12) Imifanekiso enomtsalane ogqithiseleyo namazwi athethwayo yomelezwa ngumculo onokuchukumisa iimvakalelo, ibangele uloyiko, imincili, umsindo, iimvakalelo zothando. Ngenxa yoko, ifilimu inokudlulisela ingcamango yokuba ezo zinto uzibonayo ziyinyaniso kangangokuba abanye ababukeli banobunzima bokwahlula kuzo ezokwenene nezo zingenjalo.
Ukuhlaselwa Kwengqondo Nemilinganiselo Yakho Yokuziphatha
Imbono yomfanekiso oshukumayo ikwanokuyiphembelela ngokukhulu indlela osabela ngayo kuwo. Ngaloo ndlela abenzi bemifanekiso eshukumayo bazama ukwenza ababukeli ukuba bazive beneempawu ezifanayo nezo ziboniswayo—kwanaxa umdlali ophambili isisaphuli-mthetho okanye umntu okhohlakeleyo, olifuna ngamehl’ amnyama igunya.b Ukuba akulumkanga, usenokuzifumanisa ukhulela ekubeni sisaphuli-mthetho!
Qwalasela indlela esinye isihlwele sababukeli esasabela ngayo kwinkohliso eyoyikisayo yakutshanje eyayibandakanya umntu ophambeneyo oneminwe esikayo owaphumelela kungcelele lwezihlandlo ezinzima. Bamqhwabel’ izandla loo mbulali uphalaz’ igazi! Sikhohliswe sisithabathi-mifanekiso esasiyiphembelela ngobuchule ingqondo, isihlwele esasingababukeli sabonakala silahlekelwa yimilinganiselo yaso—kwaye siphelelwa luvelwano ngamaxhoba.
Hayi indlela okwahluke ngayo oku kwisiluleko seBhayibhile sokungavuyeli inkxwaleko eyehlela omnye! (IMizekeliso 17:5) Kuyinto eyahluke ngokucacileyo kuMthetho Omkhulu KaYesu—‘wokwenza oko unga abanye bangakwenza kuwe.’ (Mateyu 7:12) Ngaphezu koko, ngaba ukumqhwabela izandla umbulali kunokuvisisana nezibongozo zeBhayibhile zokuba “nemfesane kakhulu”? (Efese 4:32) Ngaba akuthethi ukuzidibanisa kukabani ‘nebandla labenzi bobubi’?—INdumiso 26:4, 5.
Imiphumo Echuliweyo
Noko ke, usenokuvakalelwa kukuba, umphumo womfanekiso oshukumayo ungowokwexeshana, ngowethutyana elifutshane. Ibe kuyavunywa ukuba, usenokungaqalisi ukusika wonke umntu ombonayo ngenxa yokuba oku bekuboniswe kumfanekiso oshukumayo othile. Phofu ke, iphephandaba laseNew Zealand linikela ingxelo yokuba kukho “ubungqina obandayo obunxibelelanisa iifilimu zogonyamelo neevideo ezibonisa ihambo yogonyamelo yabathile kwabo bazibukelayo.” Ngokukwanjalo incwadi ethi Adolescence yabhekisela kuhlolisiso oluninzi olwenziwayo lonxibelelwano phakathi “kogonyamelo olwenzeka kumabonwakude nehambo yobundlobongela” yaye yavuma ukuba kukho “ubungqina obandayo” bonxibelelwano phakathi kwezi zinto zimbini.
Kuye kwakho kwaneendaba ezineengxelo zezenzo ezimanyumnyezi nezokungakhathali ezenziwa ngenxa yoko kubonwa kwimiboniso ekwimifanekiso eshukumayo. Ngokomzekelo, omnye oselula, wafa ngenxa yokwenzakala kwilinge lokuma ngezandla eluphahleni lwelori eyayihamba ngesantya esiphezulu. Wayesandul’ ukuwubona lo mbono unomtsalane uboniswa kumfanekiso oshukumayo othandwayo. Ngoko asikuko okungekho ngqiqweni ngokupheleleyo ukuthi ifilimu isenokuzichaphazela izenzo zakho.
Noko ke, ngokufuthi ngakumbi, iifilimu zibangela impembelelo echulwe gqitha. Ngokomzekelo, ngaba uninzi loontanga bakho aluzami ukuthetha, ukunxiba nokuzilungisa njengezithixo ezithile ezibonakala kolo donga kuboniselwa kulo? Ngaba oku akubobungqina bempembelelo enamandla yemifanekiso eshukumayo? Kwezinye iimeko, ukubukela imifanekiso eshukumayo engafanelekanga kubonakala kunomphumo owonakalisayo kwimilinganiselo yolutsha yokuziphatha. Ngaloo ndlela umphengululi uGqr. Thomas Radecki uthi ukuyibukela ngokuzingisileyo imifanekiso eshukumayo enogonyamelo “kukhokelela ekuphelelweni okwandileyo ziimvakalelo ngogonyamelo.”
IBhayibhile ithi: “UYehova uyalicikida ilungisa; ke yena ongendawo nothanda ukugonyamela, umthiyile umphefumlo wakhe.” (INdumiso 11:5) Ngaba ukuzondla ngokuthe ngcembe ngeefilimu ezinogonyamelo bekungasichaphazela isimo sakho sengqondo ngakugonyamelo? Ngaba ubungaqalisa ukufumanisa ugonyamelo lusonwabisa, lukwaloluhlekisayo? Yaye ngaba akunto ibinokwenzeka ukuba uzifumanise utyekele ngakumbi kunanini na ngaphambili ekuzinziseni iingxaki neengxabano ngomsindo? Inyanisile IMizekeliso 10:23 xa isithi: “Ulwaphulo-mthetho luyinto yokuzonwabisa esidengeni.”—New American Bible.
Yaye kuthekani ngemilinganiselo yakho yobuKristu? Ngaba ukuchanabeka kwisini nobuze obucacileyo bekunokukwenza ukuba ukubethe ngoyaba ukungafaneleki nemiphumo elusizi yokubandakanyeka kwiintlobano zesini ngaphambi komtshato? Ngaba bekunokukuphelisa ‘ukuthiya kwakho okubi’?—INdumiso 97:10.
Umbhali uJane Burgess-Kohn usixelela ngamava entombazana ebizwa ngokuba nguJeanie. Emva “kokubukela umfanekiso oshukumayo obalaselisa isini ngokugqithiseleyo” ekunye nomntu awayethandana naye, uJeanie wakuvumela ukuba “enziwe avuseleleke” ukusa kwinqanaba lokubandakanyeka ekuphathaphathaneni okunzulu. Noko ke akazange akwazi ukuphelela apho. UJeanie uthi, “Ndilusizi ukuthi, ngobo busuku kwaba lula ukuba ndiphenjelelelwe ekubeni neentlobano zesini. Nangoku andikwazi oko kwenzekayo ukuba ndilahlekane nengqiqo. Ndandingamthandi nakangako loo mfana!”
Ngoko, ngokungathandabuzekiyo, imifanekiso eshukumayo inamandla okuphembelela intliziyo yakho, iingcinga zakho nendlela yakho yokuziphatha. Ngoko ke ngaba akufanele ube ngokukhethayo oko ukubukelayo? Inqaku elilandelayo liza kukuxubusha oku.
[Imibhalo esemazantsi]
a EUnited States, akukho bani ongaphantsi kweminyaka eli-17 ofanele avunyelwe (ngaphandle kokuba uhamba nomzali okanye umgcini wakhe) ukuba abukele nayiphi na ifilimu abangayibukeliyo abo baneminyaka engaphantsi kweli-17, okanye epheleliselwe kwabathile, ngokomgaqo woMbutho Wemifanekiso Eshukumayo WaseMerika. Iifilimu ezinjalo ngokuqhelekileyo ziba nogonyamelo olucacileyo, intetho engamanyala, okanye isini nobuze obucace gca. Noko ke, ngokufuthi ngakumbi, le miqathango ayigxininiswa, yaye ulutsha luyavunyelwa ukuba lubukele.
b Ingxelo eyanikelwa kwiScience News ngohlolisiso olwenziwayo yabonisa ukuba ababukeli batyekela ekuchatshazelweni ngokunzulu gqitha koko bakubonayo “ingakhathaliseki indlela umboniso obonakala ungaqhelekanga ngayo” oko nje ‘beneempawu ezisondeleyo kwezo zomdlali okumabonwakude okanye kumfanekiso oshukumayo.’
[Amagama acatshulweyo akwiphepha 11]
“Akunakuze uyilibale loo miboniso . . . Okukhona ucinga ngayo, kokukhona uzifumanisa ufuna ukwenza oko ukubonileyo”
[Amagama acatshulweyo akwiphepha 12]
Kukho “ubungqina obandayo obunxibelelanisa iifilimu ezinogonyamelo neevideo ezibonisa ihambo yogonyamelo yabathile kwabo bazibukelayo”
[Umfanekiso okwiphepha 10]
Sibanjiswe koko kwenzeka kumfanekiso oshukumayo, isihlwele esibukeleyo ngokufuthi sikuqhwabela izandla ukubulala, ubusela nokuziphatha okubi ngokwesini