Abantu Abaselula Bayabuza . . .

Ndinokuwukhetha Njani Umfanekiso Oshukumayo Ofanelekileyo?

OWAYESAKUBA ngumdlali obalaseleyo wonyaka ophelileyo kwifilimu wacatshulwa esithi: “Abantu . . . bandibuza isizathu sokuba ndingasayi ngoku kwimifanekiso eshukumayo. Kukho imifanekiso eshukumayo emininzi gqitha ethob’ isidima.” Wakhetha ukungayi kwaphela kwimifanekiso eshukumayo njengomthombo wokuzonwabisa.

Intwazana ekwishumi elivisayo egama linguDenise icinga ngendlela efanayo, kodwa inikela icebiso elisisicombululo ngandlel’ ithile elingenzima kangako. Iyacacisa, “Ngokuqhelekileyo akukho nto ingako enokubukelwa, kuba ubukhulu becala lugonyamelo. Ngoko ndikuphaphele gqitha oko ndikubukelayo.”

Alithandabuzeki elokuba nawe uyakunandipha ukubukela umfanekiso oshukumayo amaxesha ngamaxesha. Ngoko ke kuyaqondakala ukuba akufuni ukukuyeka kwaphela ukubukela imifanekiso eshukumayo njengohlobo lokuzihlaziya. Kodwa njengoko kubonisiwe kwinqaku lethu elandulelayo​—⁠yaye ukukhangela kumaphepha ezinto zolonwabo zalo naliphi na iphephandaba kuya kukungqina oku⁠—​kukho iifilimu ezimbalwa ezinesidima eziveliswayo namhlanje ezifanelekele ukubukelwa ngumKristu oselula.a Lo asingomcimbi wokuthatyathwa lula, kuba imifanekiso eshukumayo oyibukelayo ibonisa imilinganiselo oyithandayo. Ithetha okungakumbi ngohlobo lonxulumano ovuyiswa lulo, uhlobo lwentetho oyamkelayo, nemilinganiselo yokuziphatha okungokwesini onamathele kuyo.

IBhayibhile isibongoza ukuba ‘sikuthiye okubi.’ (INdumiso 97:​10) Ngaba ngokwenene unokwenjenjalo ukuba ngokuthe rhoqo ufuna ukubukela izinto ezinokuthanani noSathana, imbuqe nogonyamelo, okanye ukubonakaliswa okucacileyo kokuziphatha okubi ngokwesini? Nakanye. Oselula oyithanda ngokwenyaniso imigaqo kaThixo ufuna ukulandela isiluleko seBhayibhile esikweyabaseFilipi 4:⁠8 esithi: “Elokugqiba, bazalwana, ndithi, iinto zonke eziyinene, iinto zonke ezindilekileyo, iinto zonke ezibubulungisa, iinto zonke ezinyulu, iinto zonke ezithandekayo, iinto zonke eziludumo lulungileyo, ukuba kukho sidima, ukuba kukho ndumiso, zithelekeleleni ezo zinto.” Oko akuthethi kuthi ngokuyimfuneko umele ungayibukeli yonke imifanekiso eshukumayo, kodwa kuthetha ukuba umele ube ngokukhethayo gqitha oko ukubukelayo. Unokukwenza njani oku?

Ukubakho Kwemiqathango​—⁠Ngaba Kusisikhokelo Esingenakuze Sisilele?

EUnited States, imifanekiso eshukumayo ibekelwa imiqathango ngokwemilinganiselo ebekwa nguMbutho Wemifanekiso Eshukumayo YaseMerika. Umqondiso ongunobumba ubonisa enoba ifilimu leyo igqalwa ikufanelekele ukubukelwa ngabantu ngokubanzi, enoba kucetyiswa ukuba kubekho ukhokelo lomzali, okanye enoba ifanele ipheleliselwe ekubukelweni ngabantu abakhulileyo. Indlela umfanekiso oshukumayo oqhubana ngayo nesini nogonyamelo, ukusetyenziswa kakubi kotywala neziyobisi, intetho engamanyala nokufanayo, ngokuqhelekileyo isisizinzi sokuba ibukelwe ngabathile.

Ngoxa iinkqubo ezinjalo zokumisela imiqathango kuvunywa ukuba ziphosakele, yaye ngokufuthi ziguquguquka, zinika lowo uza kubukela ubuncinane imbono ethile ngoko kuqulethwe yifilimu leyo nokuba ikufanelekele kusini na ukubukelwa. Ukuba inkqubo efanayo ikho elizweni okulo, ngokungathandabuzekiyo uya kuyifumanisa isebenziseka. Ngokukwanjalo abazali bakho basenokusebenzisa imiqathango ekumiseleni imigaqo esisikhokelo ngokuphathelele iifilimu osenokuzibukela.

Noko ke, ukumiselwa kwemigaqo kusenokukulahlekisa. Khumbula: Abo benza izigqibo ngokumiselwa kwemiqathango kwimifanekiso eshukumayo basenokungayixhasi imilinganiselo esekelwe eBhayibhileni. Yaye ngenxa yokuwohloka kwemilinganiselo yokuziphatha yehlabathi, iifilimu ezininzi ebeziya kugqalwa zisothusa kwiminyaka nje embalwa edluleyo ngoku zigqalwa zamkelekile kubantu nje abeze kuzibonela.

UDeMarlo oselula wakufumanisa oku xa waya kwifilimu awayecinga ukuba yayimiselwe imiqathango ethile eyamkelekileyo. Kwafumaniseka ukuba izaliswe “zizithuko nogonyamelo.” Ngoko ngoxa ukuvakaliswa kwenkqubo zokubekwa kwemiqathango ngokweminyaka kusenokuba luncedo, akufanele kube kuphela kwesizinzi sokugqiba ngoko ukubukelayo. IBhayibhile iyaluleka: “Isiyatha sikholwa ngamazwi onke; onobuqili uyakuqonda ukunyathela kwakhe.”​—⁠IMizekeliso 14:⁠15.

Ukuhlolisisa Ifilimu

Yiyiphi eminye imigaqo esisikhokelo onokuyisebenzisa? Uhlalutyo nezibhengezo zemifanekiso eshukumayo nazo zinokukunika imbono ethile ngoko kuqulethwe ngumfanekiso oshukumayo. Kodwa kwakhona, kufuneka ulumke. Ukuhlalutywa komfanekiso oshukumayo kubonisa nje uluvo lomnye umntu. Yaye kwisibhengezo sisenokufihlwa ngabom isibakala sokuba umfanekiso oshukumayo lowo unemiboniso engafanelekanga.

Okwishumi elivisayo ogama linguConnie uthi: “Ndifumanise ukuba ukwazi ukuba bangoobani na abadlali abaphambili kumfanekiso oshukumayo ngokufuthi kukunika imbono ethile ngoko umfanekiso oshukumayo unokukubonisa.” Amaqabane angamaKristu anemilinganiselo esekelwe eBhayibhileni enjengeyakho asenokwazi enoba ifilimu ethile yeyamkelekileyo kusini na. Yaye ngokukwanjalo umphathi wendawo ekuboniselwa kuyo imifanekiso eshukumayo okanye umntu okwindlwana yokuthengisa amatikiti usenokukunika inkcazelo enyanisekileyo. Noko ke, ngokuqhelekileyo, abantu batyekela ekukuxeleleni oko bakunandiphe ngokwenene kumfanekiso oshukumayo othile. Kutheni ungabuzi oko kubi ngawo? Yiba ngongqalileyo. Buza enoba kukho imiboniso enogonyamelo lokuphalazwa kwegazi, ukubalaseliswa kwesini okanye ukusebenzelana needemon kuwo.

Abazali bakho basekwanokuba ngumthombo olungileyo wecebiso. UVanessa oselula uthi: “Ndibuza kubazali bam. Ukuba bacinga ukuba ndinokuyibukela, ndiyaya ukuya kuyibukela.”

Oku bekuya kusebenza ngokufanayo ekuqesheni iikhasethi zevideo. Ukongezelela, yihlolisise ngenyameko le bhokisi okanye olu qweqwe. Ngaba kukho nantoni na malunga nemifanekiso namagama abhaliweyo ebiya kubonisa ukuba le filimu ayifanelekanga? Yandula ke uyibuyisele! Kusekwanokunceda ukuthetha nomabhalana wevenkile leyo osele eyibonile le filimu. IMizekeliso 14:​16 ithi: “Isilumko siyoyika size sibunikel’ umva ububi; isidenge asilumkanga size siwe senzakale.”​—⁠The New English Bible.

Ukuphuma, Ukuyicima

Noko ke, kuthekani ukuba sele uyihlawulele ikhasethi yevideo, waza wafumanisa ukuba izinto ezikuyo azifanelekanga? Isicombululo silula: Yicime! Oku kusenokungabi lula. Unokuzifumanisa ubandakanyekile ngokweemvakalelo kulo mdlalo okanye kubadlali. Usenokuba nomdla gqitha ngendlela eza kuphela ngayo le filimu. Kodwa ukusuka entweni embi ngokucacileyo kuyinto entle omele uyenze.​—⁠Thelekisa uMateyu 5:​29, 30.

Imeko inokuba yechukumisa ngokomlinganiselo othile ukuba ukwindawo ekuboniselwa kuyo le mifanekiso nabahlobo yaye umfanekiso oshukumayo uguqukela ekubeni ngongafanelekanga. Oselula ogama linguJoseph wajamelana nale meko kanye. Izibhengezo zefilimu yakutshanje zayivakalisa ‘njengongamelwe uphoswe yiyo.’ Noko ke, uJoseph ukhumbula oku: “Kwimizuzu emihlanu yokuqala kwakukho imiboniso enogonyamelo nebonisa abantu abahamba ze.” UJoseph ngobuchule wabaxelela abahlobo bakhe iinjongo awayenazo waza waphuma. Ngaba wakufumanisa oku kubangela iintloni? UJoseph uthi: “Akunjalo konke konke. Ndacinga ngoYehova kuqala nangokumkholisa.”

Kuyavunywa ukuba, ingcinezelo yoontanga ngokunxamnye nokuthabatha ukuma okunjalo inokuba nkulu. Ingcinezelo isenokuza kwanangabaselula abakhuliswe ngabazali abangamaKristu, kodwa ulutsha olunjalo luye lwavumela izazela zalo zenzakaliswe kukubukela iifilimu ezininzi ezithandabuzekayo. (1 Timoti 4:⁠2) Lusenokukutyhola ngokuba ngongalungelelananga okanye olilungisa ngokugqith’ emgceni. Kodwa kunokunikezela kwingcinezelo yoontanga, yiba ‘nesazela esilungileyo.’ (1 Petros 3:​16) Okubalayo ngokwenene asikuko oko kucingwa ngamaqabane akho ngawe kodwa koko uYehova akucingayo ngawe! Yaye ukuba abahlobo bakho balwisana nawe kuba uvumelana nesazela sakho, lixesha lokuba ufumane abanye abahlobo abatsha. (IMizekeliso 13:​20) Ngokupheleleyo nguwe ofanele ulondoloze amehlo, iindlebe nentliziyo yakho yokomfuziselo.​—⁠Thelekisa uYobhi 12:​11; 31:⁠1; IMizekeliso 4:⁠23.

Ukulondoloza Isazela Esilungileyo

UGeorgia oselula wayenomkhwa wokungena engaqondanga kumfanekiso oshukumayo ngokunokwenzeka ababengavunyelwa ababekwiminyaka yakhe ukungena kuyo. Noko ke ekuhambeni kwexesha, waqalisa ukunqwenela ukuba nolwalamano oluhle noThixo. Wayeka ukubukela imifanekiso eshukumayo ethandabuzekayo waza wafumana ezinye izinto zokuzonwabisa anokuzenza nabahlobo bakhe abangamaKristu. UGeorgia uthi: “Andisenanto ecinezela isazela sam. Yaye ngoku ngokwenene ndilala yoyi kuba ndinemvakalelo ecoceke ngokwenene ngaphakathi.”

Ngaba ufuna ukuba ngococekileyo emehlweni oMcikidi weentliziyo, uYehova uThixo? (IMizekeliso 17:⁠3) Ngoko ke kulumkele oko ukufaka entliziyweni yakho. Kuphephe ukuzichanaba ngokungeyomfuneko kugonyamelo olungafunekiyo, ukuxhaphaza okungokwesini, okanye intetho engcolileyo; ezi zinto zinokuzidakumbisa iimvakalelo zakho koko kulungileyo zize zonakalise intliziyo yakho. Yiba njengomdumisi owathandaza esenjenje: “Dlulisa amehlo am angakhangeli inkohlakalo.”​—⁠INdumiso 119:⁠37.

Ngokulumka nangokuba ngokhethayo, akunakuzikhusela kwiimpembelelo ezenzakalisayo kuphela kodwa unokunandipha loo ‘mvakalelo yokucoceka’ awathetha ngayo uGeorgia oselula. Ibe akukho miphumo ikhethekileyo yaseHollywood inokuthelekiswa naloo mvakalelo!

[Umbhalo osemazantsi]

[Amagama acatshulweyo akwiphepha 10]

Iifilimu ezininzi ebezisothusa kwiminyaka embalwa edluleyo ngoku zigqalwa zamkelekile

[Umfanekiso okwiphepha 13]

Abazali bakho basenokwazi ukuba umfanekiso oshukumayo obhengezwayo awufanelekanga