Ziziphi Iifilimu Wena Oza Kuzibukela?

KUMASHUMI eminyaka akutshanje, abantu baye basabela ngeendlela ezahlukahlukeneyo kwimiboniso yesini, ugonyamelo namanyala aboniswa kwiifilimu. Abanye badla ngokuwujonga njengolizothe umboniso wesini, ngoxa abanye bewuncoma. Bambi bayalucekisa ugonyamelo oluboniswa kwiifilimu ezithile ngoxa abanye bevakalelwa kukuba lufanelekile. Bambi abakuthandi ukuphulaphula abantu bethuka, ngoxa abanye besithi leyo yinto eyenzeka kubomi bokwenene. Into omnye ayijonga njengengcolileyo, abanye bathi yinkululeko yokuthetha. Xa uphulaphule abantu bethetha ngale nto, kusenokuvakala ngathi yindlela nje yokuchaza izinto.

Kodwa oko kuboniswa kwiifilimu asiyompikiswano nje engenamsebenzi. Yinto abazali nabo bonke abo banomdla kwimigaqo ephakamileyo yokuziphatha abafanele bayixhalabele. Elinye ibhinqa libuhlungu lathi: “Nanini na ndisilwa nesazela sam ndize ndiye kubukela ifilimu ethandabuzekayo, ndiphuma apho ndikhathazeke gqitha. Ndiye ndibe neentloni xa ndicinga ngabantu abenze loo filimu nangesibakala sokuba nam ndiye ndayibukela. Ndiziva ndihlazekile xa ndicinga ngefilimu endisandul’ ukuyibukela.”

Ukumisela Imilinganiselo

Ayikho ntsha into yokukhathazeka kwabantu ngoko kuboniswa kwiifilimu. Xa kwakuqaliswa ukwenziwa kweefilimu abantu bakhathazeka yimiboniso yesini nobundlobongela obabuboniswa. Ekugqibeleni, ngeminyaka yee-1930, eUnited States kwamiselwa imithetho eyazinciphisa kanobom izinto ezazinokuboniswa kwiifilimu zangoko.

Ngokutsho kweThe New Encyclopædia Britannica, le mithetho mitsha yeefilimu, “yayingavumelani ngokupheleleyo nokuboniswa kwayo nantoni na efanele yenziwe kuphela ngabantu abaphilileyo abadala. Yayingakuvumeli ukubonakaliswa ‘kothando,’ ukukrexeza, ukuziphatha okubi ngokwesini, ukuhendela ubani kwiintlobano zesini, kwakungavumelekanga kwanokuthetha ngokudlwengula ngaphandle kokuba kwakufuneka ngokupheleleyo kuloo mboniso aze loo mntu agwetywe ngokuqatha ekupheleni kwaloo filimu.”

Ngokuphathelele ugonyamelo, “kwakungavumelekanga ukuba kwiifilimu kuboniswe okanye kuchazwe izixhobo ezinokuba yingozi nezisetyenziswayo, ukubonisa indlela olwenzeke ngayo ulwaphulo-mthetho, kuboniswe amapolisa ebulawa zizikrelemnqa, ukubonisa inkohlakalo okanye ukubulawa kwabantu, okanye ukubonisa ukubulawa okanye ukuzibulala kothile ngaphandle kokuba oko kufuneka ngokwenene kuloo mboniso. . . . Ulwaphulo-mthetho lwalungenakujongwa njengolufanelekileyo naphantsi kwaziphi na iimeko.” Ngamany’ amazwi, loo mithetho yayibethelela ukuba “akukho mfanekiso uya kuboniswa noya kuthoba imilinganiselo yabantu yokuziphatha.”

Ukushenxisa Imiqathango Nokumisela Inkqubo Yokuhlela

Ngeminyaka yee-1950, abenzi beefilimu abaninzi eHollywood babengasayithobeli le mithetho, besithi ishiywe lixesha. Ngenxa yoko, ngowe-1968 yashenxiswa le mithetho kwaza kwamiselwa inkqubo yokuhlela.a Le nkqubo yayivumela ukuba kuboniswe nantoni na kwifilimu, kodwa loo filimu iphawulwe ngonobumba olumkisa abantu ngobungakanani bombandela wabantu “abadala” okuyo. Ngokutsho kukaJack Valenti, owayengumongameli weMotion Picture Association of America, kangangeminyaka enokuba ngama-40, injongo ‘yayikukulumkisa abazali, ukuze benze isigqibo ngeefilimu ezinokubukelwa ngabantwana babo nabangafanele bazibukele.”

Yaqala ke intlekele ngale nkqubo yokuhlelwa kweefilimu. Iifilimu eziboniswa abantu bonke zaseHollywood zaqalisa ukuba nemiboniso emininzi yesini, ugonyamelo namanyala angathethekiyo. Le nkululeko intsha kwiifilimu yavelisa umrhiba owawungenakuphinda uvalwe. Sekunjalo, ngale nkqubo, abantu babeza kulunyukiswa. Kodwa ngaba le nkqubo yokuhlela ikuxelela yonke into ofanele uyazi?

Oko Ungakuxelelwa Yinkqubo Yokuhlela

Bambi bavakalelwa kukuba ekuhambeni kweminyaka inkqubo yokuhlela iye yayekelela gqitha. Uhlolisiso olwenziwe yiHarvard School of Public Health luyavumelana noku, kuba kulo kwafunyaniswa ukuba kwiifilimu ekuthiwa zivumelekile kwabo bakwishumi elivisayo ngoku kukho ugonyamelo nemiboniso ecacileyo yesini kuneefilimu ezaziboniswa kwiminyaka nje elishumi eyadlulayo. Olu hlolisiso lwaqukumbela ngokuthi “iifilimu ezikuhlelo olufanayo zinokuba nombandela owahluke gqitha ongavumelekanga eziwubonisayo” yaye “uhlelo oluphathelele iminyaka kuphela alunikeli nkcazelo yaneleyo ngobungakanani bogonyamelo, imiboniso yesini, namanyala nezinye izinto ezinokuboniswa kuloo filimu.”b

Abazali abathi ngokungakhathali bavumele abantwana babo ukuba baye kubukela ifilimu ethile basenokungayazi into egqalwa njengefanele kukubukelwa namhlanje. Ngokomzekelo, omnye umhlalutyi weefilimu uchaza umdlali oyintloko kwifilimu ethile eUnited States ekuthiwa inokubukelwa ngabakwishumi elivisayo. Lo mdlali “yintombazana eneminyaka eli-17 ubudala engakhathaliyo, inxila elisebenzisa iziyobisi nelithand’ iziyunguma neliba neentlobano zesini ngendlela endlongondlongo nenkwenkwe elisandul’ ukudibana nayo.” Le yinto exhaphake gqitha. IThe Washington Post Magazine ithi ukuba neentlobano zesini emlonyeni kuyinto “eyamkelwayo” kwiifilimu ekuthiwa zinokubukelwa ngabo bakwishumi elivisayo. Ngokucacileyo, inkqubo yokuhlela ayifanele ibe kuphela kwento yokwenza isigqibo ngefilimu ethile. Ngaba ikho enye into ebhetele enokuba lukhokelo?

“Kuthiyeni Okubi”

Inkqubo yokuhlelwa kweefilimu ayifanele ithabath’ indawo yesazela esiqeqeshwe ngeBhayibhile. Kuzo zonke izigqibo azenzayo—kuquka ezo zinokuthanani nokuzonwabisa—amaKristu afanele azabalazele ukusebenzisa isiluleko esifumaneka eBhayibhileni kwiNdumiso 97:10 esithi: “Kuthiyeni okubi.” Umntu okuthiyileyo okubi uya kukugqala kungafanelekanga ukuzonwabisa ngezinto uThixo azithiyileyo.

Abazali bafanele bazilumkele ngokukhethekileyo iifilimu abavumela abantwana babo ukuba bazibukele. Abafanele bakrwaqule nje uhlelo lwefilimu baze babavumele abantwana babo ukuba bayibukele. Kusenokwenzeka ukuba ifilimu ehlelelwe abantwana abakubudala bomntwana wakho ikhuthaza imilinganiselo wena njengomzali ongavumelaniyo nayo. Oku akuwothusi amaKristu, ekubeni ihlabathi liyamkela indlela yokucinga engqubanayo nemithetho kaThixo.c—Efese 4:17, 18; 1 Yohane 2:15-17.

Oku akuthethi kuthi zonke iifilimu azifanelekanga. Kodwa sifanele silumke. Ngokuphathelele oku, uVukani! kaJuni 8, 1997 wathi: “Ngamnye ufanele ayihlolisise kakuhle imibandela aze enze izigqibo eziya kumshiya enesazela esicocekileyo phambi koThixo nabantu.”—1 Korinte 10:31-33.

Ukufumana Indlela Efanelekileyo Yokuzonwabisa

Abazali banokuzikhetha njani iifilimu intsapho yabo enokuzibukela? Khawuqwalasele oku kuthethwa ngabazali ehlabathini liphela. Amazwi abo anokukunceda ukuze ufumanele intsapho yakho indlela ecocekileyo yokuzihlaziya.—Bona ibhokisi ethi “Ezinye Iindlela Zokuzihlaziya,” kwiphepha 14.

UJuan waseSpeyin uthi: “Mna nomfazi wam sasihamba nabo abantwana bethu xa besiya kubukela ifilimu. Abazange bahambe bodwa okanye nolunye ulutsha. Ngoku, ekubeni bekwishumi elivisayo, abayibukeli ifilimu okokuqala nje idlalwa; kunoko, sikhetha ukuba balinde de sifunde intshayelelo yayo okanye sive ngayo kwabanye abantu esibathembayo. Sandula ke njengentsapho senze isigqibo enoba siyafuna kusini na ukuyibukela loo filimu.”

UMark, waseMzantsi Afrika, ukhuthaza unyana wakhe ukuba athethe ngokuphandle ngeefilimu ezidlalayo. Uthi: “Mna nomfazi wam siyamcela ukuba asixelele into ayicingayo ngefilimu edlalayo. Oku kusinceda ukuba sive iimbono zakhe size siqiqe naye. Ngenxa yoku, siyakwazi ukukhetha iifilimu esinokuzibukela sonke.”

Kanti yena uRogerio, waseBrazil, uchitha ixesha nabantwana bakhe bephicotha iifilimu abafuna ukuzibukela. Uthi: “Ndifunda nabo oko kuthethwa ngabahlalutyi beefilimu. Ndiya nabo kwivenkile yeevidiyo ukuze ndibafundise indlela yokukhangela eqweqweni izinto ezinokubabonisa enoba ifilimu ethile ayifanelekanga.”

UMatthew, waseBritani ukufumanisa kuluncedo ukuthetha nabantwana bakhe ngeefilimu abafuna ukuzibukela. Uthi: “Besebancinane, abantwana bethu sasibaquka xa sithetha ngezinto eziboniswa kwifilimu esinomdla wokuyibukela njengentsapho. Xa sivakalelwa kukuba asinakuyibukela ifilimu ethile, mna nomfazi wam sasibacacisela, kunokuba sisuke nje singavumi.”

Ukongezelela, abanye abazali baye bakufumanisa kuluncedo ukuphanda ngeefilimu kwi-Internet. Kukho iiWeb sites eziliqela ezinikela iinkcukacha ngoko kuboniswa kwiifilimu ezithile. Oku kunokukunceda ukuze ukuqonde kakuhle oko kubalaseliswa yifilimu ethile.

Iinzuzo Zesazela Esiqeqeshiweyo

IBhayibhile ithetha ngabo “amandla abo okuqonda bawaqeqeshela ukwahlula okulungileyo nokubi.” (Hebhere 5:14) Ngoko ke, injongo yabazali ifanele ibe kukubethelela imilinganiselo emihle kubantwana babo eya kubanceda ukuba benze izigqibo zobulumko xa benenkululeko yokukhetha indlela abazonwabisa ngayo.

Ulutsha oluninzi olungamaNgqina kaYehova luye lwaqeqeshwa kakuhle ngabazali balo kule nkalo. Ngokomzekelo, uBill noCherie, eUnited States, bayahamba baye kubukela iifilimu namakhwenkwe abo amabini akwishumi elivisayo. Uthi uBill: “Emva kokuba sibukele ifilimu, sidla ngokuthetha ngayo siyintsapho—sithethe ngezinto esizifundileyo kuyo enoba siyavumelana enoba asivumelani.” Phofu ke, uBill noCherie bayaqonda ukuba bafanele bazikhethe iifilimu abazibukelayo. UBill uthi: “Siyafunda ngefilimu ngaphambi kokuba siyibukele, yaye asinantloni ukuphuma phakathi xa sifumanisa ukuba kuloo filimu kukho nto ithile engafanelekanga ebesingayilindelanga.” Ngokuquka abantwana babo xa besenza izigqibo, uBill noCherie bacinga ukuba bayabanceda oonyana babo bakwazi ukwahlula okulungileyo kokubi. UBill uthi: “Benza izigqibo zobulumko xa bekhetha iifilimu abafuna ukuzibukela.”

NjengoBill noCherie, abazali abaninzi baye babanceda abantwana babo ukuze baqeqeshe amandla abo okucinga xa kufikelelwa kumbandela wokuzonwabisa. Liyinyaniso elokuba inkoliso yeefilimu azifanelekanga. Kanti, xa ekhokelwa sisazela sawo esiqeqeshwe ngemigaqo yeBhayibhile, amaKristu anokuzonwabisa ngendlela efanelekileyo ecocekileyo nehlaziyayo.

[Imibhalo esemazantsi]

[Ibhokisi/Umfanekiso okwiphepha 10]

“ISIGQIBO SISENZA KUNYE”

“Xa ndandiselula, sasidla ngokuhamba njengentsapho xa sisiya kubukela ifilimu. Ekubeni ngoku ndikhulile, abazali bam bayandivumela ukuba ndizihambele. Noko ke, ngaphambi kokuba ndihambe, abazali bam bafuna ukwazi umxholo waloo filimu nento ethetha ngayo. Ukuba abazange beve ngayo, bafunda iimbalasane zayo okanye babukele imiboniso yayo ephambili kumabonwakude. Kwakhona bakhangela inkcazelo yayo kwi-Internet. Ukuba bavakalelwa kukuba ayifanelekanga, bayandicacisela isizathu soko. Bayandivumela nam ukuba ndivakalise uluvo lwam. Sithetha nje ngokuphandle, yaye isigqibo sisenza kunye.”—UHéloïse, waseFransi oneminyaka eli-19 ubudala.

[Ibhokisi/Umfanekiso okwiphepha 11]

WUTHETHENI LO MBANDELA!

“Ukuba abazali abavumi ukuba abantwana babo benze into ethile baze bangabeki enye into endaweni yayo, abantwana basenokuzama ukukwenza oko kodwa babafihlele abazali babo. Ngoko ke, xa abantwana befuna ukubukela nantoni na engafanelekanga, abanye abazali ababaleli ngoko nangoko, phofu ke ababavumeli. Kunoko, bawubekela ecaleni lo mbandela ithutyana ukuze babuye bawuxubushe ngomoya omhle. Kangangeentsuku ezimbalwa, bengacaphukanga, bayathetha ngalo mbandela, bembuza loo mntwana isizathu sokuba acinge ukuba olo hlobo lokuzonwabisa lufanelekile. Ngokuthetha ngalo mbandela, ngamaxesha amaninzi abantwana bayavumelana nabazali babo bade bababulele. Bandula ke bekunye nabazali bakhethe enye indlela yokuzonwabisa abaza kuyivuyela bebonke.”—UMasaaki, umveleli ohambahambayo eJapan.

[Ibhokisi/Imifanekiso ekwiphepha 12]

EZINYE IINDLELA ZOKUZIHLAZIYA

◼ “Ngokwemvelo abaselula bafuna ukuba nabanye abaziintanga zabo, ngenxa yoko sisoloko siqiniseka ukuba intombi yethu inabanye enokunxulumana nabo kodwa nathi sikho. Ekubeni ebandleni lethu kukho ulutsha oluninzi olungumzekelo, siye sakhuthaza intombi yethu ukuba inxulumane nalo.”—UElisa, eItali.

◼ “Siba nenxaxheba enkulu ekuzihlaziyeni kwabantwana bethu. Sicwangcisa iindlela zokubonwabisa, njengokuya nabo ezipakini, soje inyama, sibe nepikniki size sinxulumane namanye amaKristu aselula nakhulileyo. Ngale ndlela abantwana bethu abacingi ukuba bafanele bazihlaziye neentanga zabo kuphela.”—UJohn, eBritani.

◼ “Siye safumanisa ukuba ziyakha gqitha iimbutho namanye amaKristu. Abantwana bam bayakuthanda ukukhab’ ibhola, ngoko ke, ngamaxesha athile, siye silungiselele ukuba sidlale nabanye.”—UJuan, waseSpeyin.

◼ “Sikhuthaza abantwana ukuba bakuthande ukudlala izixhobo zomculo. Kwakhona sidlala kunye eminye imidlalo, njengentenetya, ivolleyball, sikhwele ibhayisikile, sifunde, size sibuthe nabahlobo.”—UMark, waseBritani.

◼ “Sidlala ibowling njengentsapho nabahlobo. Kwakhona, siye sizihlaziye nokuba kukanye ngenyanga. Eyona nto ibalulekileyo kukuba abazali babe neliso elibukhali ukuze baphephe iingxaki.”—UDanilo, wakwiiPhilippines.

◼ “Ukubukela izinto zisenzeka ngokoqobo kudla ngokuba mnandi ngakumbi kunokuya kubukela ifilimu. Sihlala sikulindele ukuva ngezinto ezenzeka ekuhlaleni njengemiboniso yezinto zobugcisa, eyeemoto okanye amaqela omculo. Ezi ndawo zenza sikwazi ukuncokola ngoxa sibukele. Kanti siyayilumkela nento yokusoloko sizonwabisa. Asiloxesha nje kuphela eliyingxaki kodwa ukuzonwabisa ngokugqith’ emgceni kwenza ukuba nasiphi na esinye isihlandlo solonwabo singabi mnandi kangako.”—UJudith, eMzantsi Afrika.

◼ “Asiyiyo yonke into eyenziwa ngabanye abantwana ebalungeleyo abantwana bam, yaye ndiyazama ukubanceda bakuqonde oko. Kwangaxeshanye, mna nomyeni wam siyazama ukubenza bonwabe ngendlela eyiyo. Sizama ukuba bangade bavakalelwe kukuba bona, ‘Ngathi babethelelwe ekhaya. Abenzi nto.’ Njengentsapho, siyahamba siye ezipakini size simeme nabazalwana bebandla lethu ekhaya.”d—UMaria, waseBrazil.

[Umbhalo osemazantsi]

[Inkcazelo]

James Hall Museum of Transport, Johannesburg, South Africa

[Umfanekiso okwiphepha 9]

Hlola amavandlakanya aloo filimu NGAPHAMBI kokwenza isigqibo

[Umfanekiso okwiphepha 10, 11]

Bazali, fundisani abantwana benu ukuba bangabukeli nje yonk’ into