“AmaNgqina KaYehova AseRashiya—Ikamva Eliqaqambileyo”
LOWO yayingumxholo ophambili kwiphephandaba lesiNgesi iThe Warsaw Voice ka-Agasti 19, 1990, elipapashwa ePoland. Umbhali walo, uAnna Dubrawska, wathi gqaba-gqaba ngeNdibano yamaNgqina kaYehova “Yentetho Enyulu” eyayiseWarsaw ngoAgasti 1990. Wadlan’ indlebe namaNgqina avela eRashiya, amanye awo awayechithe iminyaka eli-15 ezintolongweni nakwiikampu zemisebenzi enzima ngenxa yeenkolelo zawo ezingokonqulo. Kodwa ngoku ayegxininisa kwiinguqulelo ezincumisayo neziqhubeka kwilizwe lawo.
UGrigor Goryachek, ongumakhi osuka kusinga-siqithi iCrimea owakhuliswa eliNgqina, wayebhacele eSiberia kangangeminyaka eli-15. Wathi: “Ngoku silindele ixesha elimnandi elizayo.” Elinye iNgqina, uAnton Pohanich, lathi: “Sele efikile amaxesha amnandi. Ngoku ndingasihambisa ngokukhululekileyo isigidimi sethu kwindlu ngendlu, ekubeni ngaphambili kwakungenakwenzeka oko.”
UDubrawska ucaphula amazwi kaIgor Cherny, iNgqina elineminyaka eli-17 ubudala nelivela eCaucasus njengowathi: “Kangangeminyaka engama-70 abantu, ingakumbi abaselula, bebekude kakhulu kuThixo kangangokuba ngoku bafuna ukubuyela Kuye kwangomlinganiselo omkhulu ngokufanayo, okanye ubuncinane bafuna ukuqala beve Ngaye.”
Impapasho yasePoland iDziennik Wieczorny (iEvening Paper), phantsi komxholo othi Radość braci okanye (Uvuyo Lwabazalwana) yanikela ingxelo yokuba umqeshwa webala lemidlalo iZawisza elikwisixeko saseBydgoszcz wathi: “Kuyandivuyisa ukuva intetho esulungekileyo esetyenziswayo nesimilo esibonakaliswa lulutsha.”
Ebhala kwiphephandaba lamihla le lasePoland iTrybuna phantsi komxholo othi Głosiciele Królestwa (Abavakalisi BoBukumkani), uZofia Uszynska wathi ngokuphathelele indibano: “Kwixesha lemizuzu engama-30 ndiye ndaphiwa amashwam-shwam nekofu kangangezihlandlo ezilishumi. Kangangezihlandlo ezihlanu othile ubefuna ukundisukela esihlalweni. Kangangeentsuku ezine ezilandelelanayo abantu abangaphezu kwama-30 000 bebekumsitho [ongokonqulo] kumaBala emidlalo aseDziesieciolecia eWarsaw. Abafazi abasele benethuba bekhulelwe, iintsapho ezinabantwana abancinane, abantu abakhulileyo nolutsha. Oyena mntu uselula wabhaptizwayo wayeneminyaka eli-11 ubudala, oyena mdala emalunga nama-80.”
Eli nqaku lahlabela mgama lisithi: “Amawaka aliqela abemi baseRashiya [enyanisweni abangaphezu kwabali-16 000] beza kwintlanganiso yalo nyaka. Kunyaka ophelileyo kwakukho abangama-6 000. Amagosa asemideni yaseRashiya abavumela ooduladula ukuba badlule kungakhange kufuneke ukuba beme kungcelele olude kangangeekhilomitha kuhlolwa. Kwakukho iindwendwe ezazisuka kulo lonke elo laseRashiya: eVladivostok, eKhabarovsk, eVorkuta. Zimbi zachitha iintsuku ezine okanye ezintlanu kuloliwe.”
Kwaeli phephandaba linye licaphula amazwi kaIvan M. Grevniak njengothi: “Ndakubona okungekho sikweni koko oopopu nabefundisi babekwenza ndaza ndaqalisa iphulo lokufuna ukunyaniseka.” Le ngxelo ihlabela mgama isenjenje: “Waphawula imvisiswano phakathi koko amaNgqina akuthethayo noko akwenzayo.” Wandula ke uIvan walek’ umsundulo esithi: “Ndiyambulela uThixo kuba wandivumela ndafunda inyaniso.”
ITrybuna inikela ingxelo yokuba uIvan ungumdala ebandleni eliseLvov, apho “kukho amabandla ali-13 namakholwa angaphezu kwama-2 000. . . . ‘Kuwo onke amaqela onqulo kukho umoya wobuhlanga. Noko ke awukho phakathi kwamakholwa angoowethu,’ utsho njalo uGrevniak.”
Olu manyano lwabonakaliswa kwindibano yamaNgqina kaYehova eyayiseWarsaw apho ucwangciso lwaluqhutywa ngaxeshanye ngolwimi lwasePoland nolwaseRashiya kwiindawo ezahlukeneyo zebala lemidlalo. Zazingekho nje kwaphela iingxwabangxwaba zobuhlanga.
UZofia Uszynska wakwachukunyiswa nalulungelelwano olwalufuneka ukuze kuhlaliswe abantu abangaphezu kwama-35 000 ababeze endibanweni, ukubalungiselela ukutya kwanokubanyamekela ngokwezamayeza. Waqukumbela ngokuthi: “Andizange ndibe kwingqungquthela yabantu abanobuhlobo kangaka.”
Iphephandaba lasePoland lamihla le iSztandar Młodych (Umgangatho Wolutsha) lavakalisa oku ngomsebenzi owenziwayo ukuze eli bala lemidlalo likwazi ukuginya iindwendwe ezininzi ngolu hlobo: “Benikela inkonzo yasekuhlaleni . . . abalandeli bakaYehova bazakha kwakhona izihlalo, balungisa iitonela nezindlu zangasese, bacoca ibala lengca. Banikela kwiindleko zale ndibano ngokuphuma ezingxoweni zabo. AmaNgqina kaYehova aye alungiselela iindawo zokuhlala ezinokuba ngama-22 000 emakhayeni abantu ukuze kuhlale iindwendwe, alungiselela abemi baseRashiya iindawo zokuhlala aze anelungiselelo lawo lamayeza.”
Ngokuqinisekileyo amaNgqina kaYehova sele enandipha “ikamva eliqaqambileyo” eMpuma Yurophu yaye athandazela ukuba ukwamkeleka okutsha okungokwasemthethweni kumazwe anjengelaseRomania, eHungary nasePoland kungekudala kuza kufikelela naseCzechoslovakia, eAlbania, eBulgaria naseRashiya.—2 Tesalonika 3:1; 1 Timoti 2:1, 2.
[Imifanekiso ekwiphepha 31]
Indibano “Yentetho Enyulu” yamaNgqina aseRashiya eWarsaw, kuquka nababeza kubhaptizwa (ngasentla nakumfanekiso oshicilelweyo), isithethi saseRashiya, ucwangciso neendwendwe ezityelele eRashiya ngaphambi kooduladula bazo