Abantu BaseRashiya Bayayixabisa Inkululeko Yonqulo

UKUSUSELA EKUPHELISWENI KWESOVIET UNION NGOWE-1991, ABANTU BALAPHO BAYE BANANDIPHA INKULULEKO ENGAKUMBI YOKUKHONZA UTHIXO. LOO NKULULEKO IYE YANANDITSHWA NANGABO BAYE BAFUDUKELA KWAMANYE AMAZWE.

KWABANINZI abahlala kwindawo eyayisakuba yiSoviet Union, inkululeko yokuhlanganisana ngokukhululekileyo ukuze banqule uThixo yinto abayixabisa kakhulu—into ebebengayifumani kangangamashumi eminyaka.

Emva kweMvukelo yamaBolshevik ngowe-1917, kwakuyingozi gqitha ukufunda iBhayibhile eRashiya, yaye bambalwa abantu ababeka esichengeni inkululeko yabo ukuze benze loo nto. AmaNgqina kaYehova ayahlukile. Enyanisweni, iphephancwadi iNewsweek lika-Aprili 16, 1956—malunga neminyaka engama-44 eyadlulayo—lacaphula oselula waseMpuma Jamani owayesithi: “Akakho omnye umntu ofunda iBhayibhile ngaphandle kwamaNgqina kaYehova.” Kodwa, xa eqhuba iintlanganiso zokufundisisa iBhayibhile naxa eshumayela ngesigidimi seBhayibhile, amaNgqina ayevalelwa aze asiwe kwiinkampu ekusetyenzwa nzima kuzo. Noko ke, naphi na apho ayesiya khona, ayenikela ingqalelo kwithemba lawo elisekelwe eBhayibhileni, njengoko ibhokisi ekweli nqaku ibonisa.

Xa iSoviet Union yaqalisa ukuphela ngowe-1991, amaNgqina alapho aqhuba iindibano ezisixhenxe ezinocwangciso lwemfundo yeBhayibhile. Bebonke ababekho babengama-74 252. Ngowe-1993, kwiminyaka nje emibini emva koko, kwahlanganisana abali-112 326 kwiindibano ezisibhozo ezinjengezo kwiindawo ezi-4 kwezili-15 ezazisakuba ziiriphabliki zeSoviet Union.a Uninzi lwaloo mawakawaka lwalusele luchithe iminyaka emininzi kwiintolongo neenkampu ekusetyenzwa nzima kuzo zaseSoviet. La maKristu athembekileyo ayenombulelo ongazenzisiyo ngenxa yenkululeko yawo yokukhonza uThixo ngaphandle kokuphazanyiswa.

Nyaka ngamnye ukususela ngowe-1993, abantu abasuka kwiiriphabliki ezazisakuba zezeSoviet baye balixabisa ilungelo lokuhlanganisana ngokukhululekileyo kwiintlanganiso zamaKristu kumazwe abo okuzalwa. Ngokomzekelo, kunyaka ophelileyo, sisimbuku samaNgqina kaYehova angaphezu kwama-282 333 nezihlobo zawo awavuyela ukunqula kunye kwiiNdibano ZeSithili ‘Zelizwi LikaThixo Lesiprofeto’ ezingaphezu kwama-80 ezaqhutywa kwiiriphabliki ezazisakuba zezeSoviet. Yaye kuye kwabhaptizwa isimbuku sabangaphezu kwe-13 452.

Njengoko oku kunokubonakala kusothusa, kunyaka ophelileyo kuye kwaqhutywa iindibano ngolwimi lwesiRashiya kwamanye amazwe ehlabathini. Isimbuku sabantu abangama-6 336 baye babakho kwezi ndibano kumazwe angaphandle kwendawo eyayisakuba yiSoviet Union! Zaziqhutyelwa phi kanye ezi ndibano? Yaye kutheni abantu abaninzi kangaka abathetha isiRashiya benomdla kangaka eBhayibhileni? Ngokufutshane nje makhe sihlolisise lo mbuzo wesibini.

Bayiphaphele Intswelo Yokomoya

IRashiya inembali ende yonqulo. Izindlu zayo zecawa ezimbejembeje, ezakhiwa kwiinkulungwane eziliqela ezadlulayo, ziphakathi kwezona zidumileyo kwiNgqobhoko. Sekunjalo, iCawa yobuOthodoki yaseRoma, kanye njengeCawa yamaRoma Katolika, iye yagcina abantu bengazi nto ngeBhayibhile.

Incwadi yakutshanje ethi The Russian Tragedy—The Burden of History ithi: “IBhayibhile ayizange ibe yeyona nto iphambili kubuOthodoki baseRashiya.” Ngokutsho komnye umphengululi waseRashiya uSergei Ivanenko, umphumo ube kukuba “ukungabi nalwazi lweBhayibhile kwabo bakholelwa kubuOthodoki kukhokelele ekubeni amarhamente amaninzi eecawa zobuOthodoki atyekele kakhulu kwiinkolelo, ubugqi nomlingo kunabantu abangakholwayo.”

Umbhali odumileyo waseRashiya uTolstoy waphawula into efanayo. Wabhala wathi: “Into endayibonayo mna yeyokuba iinkolelo zecawa [yobuOthodoki baseRashiya] ngokucacileyo nje yayingamaqhinga achuliweyo nayingozi, yaye zazikhuthaza ukusetyenziswa kweenkolelo ezininzi nobugqi, nto leyo eyisitha ngokupheleleyo yonke intsingiselo yeemfundiso zamaKristu.”

Le meko yaba ngoyena nobangela wokuvela kobuKomanisi baseSoviet obeza neengcamango zenkohliso zokungakholelwa kuThixo nesalelo esidumileyo esithi: “Unqulo lusisiyobisi sabantu.” Kodwa kungekudala, ubuKomanisi baba luhlobo oluthile lonqulo, olwaludla ngokubizwa ngokuba luNqulo Lwamaqaba. Kodwa uNqulo Lwamaqaba aluzange luhlale lukho. Ukuwa kwaMazwe eSoviet ngowe-1991, izigidi zabantu zadideka azazi ukuba maziye ngaphi. Ekhuthazwa ngamaNgqina kaYehova, amawakawaka abantu baseRashiya afumana iimpendulo eBhayibhileni.

Ngenxa yenkqubo esemagqabini yemfundo, abantu baseRashiya baphakathi kwabona bantu bafundileyo ehlabathini. Ngenxa yoko, abantu abaninzi baseRashiya abangobafundi beBhayibhile nje kuphela kodwa bakwangabathandi beemfundiso zayo. Kwangaxeshanye, ngakumbi ebudeni beshumi leminyaka yee-1990, amakhulu amawaka abantu abasuka kwindawo eyayisakuba yiSoviet Union bafudukela kwamanye amazwe, anjengeGrisi, iJamani, neUnited States. Loo nto yaphumela entwenini?

Akhululekile Ukuba Anganqula EJamani

Kwinkulungwane ye-18 neye-19, abantu abaninzi baseJamani bafudukela eRashiya. Oyena wayedumile kubo nguSophie oneminyaka eli-15 ubudala, owathi ngowe-1762, wangena ezihlangwini zomyeni wakhe njengomphathi waseRashiya. Ebudeni bolawulo lwakhe olwathabatha ixesha elide, uSophie, owathi kamva wabizwa ngokuba nguCatherine Omkhulu, wamema abalimi baseJamani ukuba baze kuhlala eRashiya. Emva koko, xa iJamani yahlasela iSoviet Union ebudeni beMfazwe Yehlabathi II, uninzi lwabo babesuka eJamani bathuthelwa eSiberia nakwiiriphabliki zeSoviet ezinjengeKazakhstan, iKyrgyzstan, neUzbekistan. Kutshanje uninzi lwabantu baseJamani abathetha isiRashiya, kwakunye nabanye abasuka kwindawo eyayisakuba yiSoviet Union, bafudukela eJamani ukuze baphile kwiimeko ezibhetele zezoqoqosho.

NgoDisemba 1992, eJamani kwamiselwa ibandla lokuqala labantetho isisiRashiya eBerlin. Kunyaka ophelileyo, amabandla angama-52 namaqela amancinane angama-43 aye amiselwa kwiziphaluka ezithathu ezintetho isisiRashiya eJamani. Incopho yababekho ibingama-4 920 kwiiNdibano ZeSithili ‘Zelizwi LikaThixo Lesiprofeto’ ebeziqhutywa ngesiRashiya eCologne, eziqale ngoJulayi 30 ukuya kutsho ngoAgasti 1, apho kuye kwabhaptizwa abali-164 ukuze bafuzisele uzahlulelo lwabo kuYehova. Ngaphambilana, ngoAprili 1, kumabandla aseJamani antetho isisiRashiya, bekukho abangama-6 175 abaze kubhiyozela iSikhumbuzo sokufa kukaYesu.

Abantu BaseRashiya EUnited States

Abantu abathetha isiRashiya baye bathontelana naseUnited States besuka kwindawo eyayisakuba yiSoviet Union. IThe New York Times yanikela le ngxelo: “Phakathi kowe-1991 nowe-1996, abantu baseRashiya babengabona baphambukeli baninzi eBrooklyn. Kwangelo xesha linye, i-Immigration and Naturalization Service yavumela abantu abangaphezu kwama-339 000 ukuba bafudukele eUnited States besuka kwiSoviet Union.”

Kamva, iTimes kaJanuwari 1999 yathi ebudeni beshumi leminyaka elidluleyo, amaYuda amalunga nama-400 000 awayesuka kwindawo eyayisakuba yiSoviet Union afudukela kwisiXeko saseNew York nakwiindawo ezikufutshane apho. Ukongezelela, amawakawaka abantu baseRashiya baye bahlala kwezinye iindawo zaseUnited States kwiminyaka yakutshanje. Ngokomzekelo, umntla Khalifoniya uye wazaliswa ngabaphambukeli abamalunga nama-35 000 abasuka eRashiya, nto leyo ewenze waliziko lesithathu ngobukhulu elinabaphambukeli abasuka kwindawo eyayisakuba yiSoviet Union emva kweNew York neLos Angeles. Aba bantu bathetha isiRashiya baye basabela kwithuba abalinikiweyo lokufundisisa iBhayibhile yaye amakhulukhulu abo aye aba ngabanquli boThixo oyinyaniso, uYehova.

NgoApril 1, 1994, ibandla lokuqala lamaNgqina kaYehova lakutshanje elintetho isisiRashiya eUnited States lasekwa eBrooklyn, eNew York. Ekugqibeleni, amabandla antetho isisiRashiya asekwa ePennsylvania, eKhalifoniya naseWashington. Kwaqaliswa amaqela okufundisisa iBhayibhile kwezinye iindawo ezininzi zelo lizwe.

Eyokuqala EUnited States

NgoAgasti 20 ukuya kowama-22 odluleyo, abayincopho yabangama-670 abasuka kulo lonke elaseUnited States naseKhanada baye bakuvuyela ukuya kwindibano yesithili yokuqala yolwimi lwesiRashiya ebiqhutywa kwisiXeko saseNew York. Zonke iintetho zazinikelwa ngesiRashiya, yaye nomdlalo owawunesinxibo samandulo nesala maxesha, owawubalisa ngebali leBhayibhile likaYakobi noEsawu, wawudlalwa ngamalungu ebandla elintetho isisiRashiya laseLos Angeles, eKhalifoniya. Ngokwenene, wawuyimbalasane yale ndibano.

Enye imbalasane yale ndibano yayikukubhaptizwa kwabantu abali-14, bonke abakumfanekiso okweli nqaku. Abaninzi kubo bahamba kangangeekhilomitha ezingama-4 000 besuka ePortland, eOregon naseLos Angeles naseSan Francisco, eKhalifoniya, ukuze babhaptizwe kule ndibano yayikwisiXeko saseNew York. Ngaphambili aba bali-14 bebehlala kwiiriphabliki zendawo eyayisakuba yiSoviet eziyiArmenia, iAzerbaijan, iBelarus, iMoldova, iRashiya neUkraine. Amava abo abonisa indlela aluxabisa ngayo ulwazi ngoThixo nenkululeko yokumnqula.

USvetlana (okumgca ongaphambili, ongowesithathu ukusuka ekhohlo) wakhulela eMoscow. Xa wayeneminyaka eli-17 ubudala watshata nemvumi edumileyo endala kakhulu kunaye, yaye ngowe-1989 bafika eUnited States benonyana oyinkwenkwe. Umyeni wakhe wayehamba gqitha, yaye kwiminyaka emihlanu kamva baqhawula umtshato.

Xa uSvetlana wadibana nelinye iNgqina awayesebenza nalo, abahlobo bakhe bamlumkisa ngokuzibandakanya nento ababeyibiza ngokuba “lihlelo elaliza kulawula ubomi [bakhe] lize limthathele yonke imali [yakhe].” Kodwa, wafuna ukufunda iimfundiso zeBhayibhile. Uthi ngokuphathelele ukuboniswa kwakhe igama likaThixo eBhayibhileni: “Ndachukumiseka ngokwenene kuba ngamaNgqina kuphela alivakalisayo.”

Eselula uAndrei (okumgca ongasemva, ongowesithathu ukusuka ekhohlo) washiya ikhaya lakhe iSiberia ukuze aqeqeshwe ngakumbi njengembaleki kwindawo namhlanje ebizwa ngokuba yiSt. Petersburg. Kungekudala emva koko, yaphela iSoviet Union, yaye ngowe-1993, uAndrei, owayeneminyaka engama-22, wafudukela eUnited States. Uthi: “Ndaqalisa ukucinga ngoThixo ndaza ndaya kwiCawa yobuOthodoki yaseRashiya. Kanye, ebudeni bokubhiyozelwa kweIsta eRashiya, ndahlala ecaweni ubusuku bonke, ndizama ukusondela kuThixo.”

Malunga nelo xesha uSvetlana wadibana noAndrei, yaye wambalisela ngoko wayekufunda kwisifundo sakhe seBhayibhile. Wavuma ukuba bahambe kunye ukuya ezintlanganisweni zamaNgqina kaYehova, emva koko wamkela isifundo seBhayibhile. NgoJanuwari 1999 batshata. Emva kokubhaptizwa kwabo kule ndibano bazimisela.

UPavel (okumgca ongasemva, ongowesine ukusuka ekhohlo) wazalelwa kufuphi naseQaraghandy, eKazakhstan, kodwa kamva wafudukela eNal’chik, eRashiya. Esi sixeko sikhulu sikufutshane eChechnya naseDagestan, ndawo ezo ekuye kwaliwa kakhulu kuzo. UPavel waqala wadibana namaNgqina apho ngoAgasti 1996, kodwa wafudukela eSan Francisco kwinyanga elandelayo. Wasebenzisa iziyobisi waza waba nomntwana oyintombazana, awamshiya eRashiya nonina.

Ngokukhawuleza emva kokuba efikile eUnited States, uPavel waqhagamshelana namaNgqina kaYehova waza wamkela isifundo seBhayibhile. Walungisa indlela yakhe yokuphila waza wabhalela unina womntwana wakhe oyintombazana ngeenkolelo zakhe asandul’ ukuzifumana. Naye ngoku ufundisisa namaNgqina, yaye bagqibe kwelokuba eze eUnited States ukuze atshate noPavel baze bakhonze uYehova kunye eKhalifoniya nentombi yabo.

UGeorge (okumgca ongasemva, ongowesibini ukusuka ekhohlo) wazalwa waza wakhulela eMoscow. Wafika eUnited States ngowe-1996, yaye ngonyaka olandela lowo watshata noFlora, owayesuka eAzerbaijan. UGeorge waya kwiCawa yobuOthodoki yaseRashiya, kodwa emva kokuba efunde umbhalo wephephancwadi IMboniselo, waba nemibuzo ngokuphathelele imfundiso kaBathathu Emnye. Xa kwakuphendulwa ileta yakhe awayeyibhalele iWatch Tower Society, wafumana incwadana enemifanekiso ethi Ngaba Ufanele Ukholelwe KuBathathu Emnye? Ngowe-1998 enoFlora baqalisa ukufundisisa iBhayibhile. Naye uceba ukubhaptizwa.

Enye imbalasane yendibano yayikukufumana imibuliso evela eMoscow, apho kwakuhlanganisene abangama-15 108 kwenye indibano kwimpelaveki efanayo. Hayi indlela ezavuya ngayo iindwendwe zesiXeko saseNew York zakuva isaziso sokuba apho kubhaptizwe abantu abangama-600! Oku kwenzeka ngenxa yeengxelo ezingentle zamaphephandaba noomabonwakude eUnited States nakwezinye iindawo ngeveki engaphambi komhla wendibano.

Okwakuqhubeka EMoscow

NgoJulayi 21, 1999, amaNgqina atyikitya isivumelwano sokusebenzisa iBala Lemidlalo leeOlimpiki elingakumbindi weMoscow kanye ngakwicawa enkulu yobuOthodoki yaseRashiya. Kodwa kwiveki engaphambi kokuqalisa kwendibano, kwacaca ukuba kuza kubakho inkcaso. NgoLwesithathu, Agasti 18, imvume yokusebenzisa ibala lemidlalo yayingekafumaneki, nangona lalisele lihlawulelwe. Yabethelelwa emagunyeni into yokuba, amaNgqina kaYehova alunqulo olusemthethweni eRashiya njengokuba ibhokisi ekwiphepha 28 ibonisa.

Ngenxa yokuba iindwendwe ezimalunga ne-15 000 ezize endibanweni zazilungiselela ukubakho ngentsasa yangoLwesihlanu, abameli abangamaNgqina baqalisa ukuxhalaba. Ezinye iindwendwe zazisiya eMoscow zisuka kwizixeko needolophu ezikumgama weekhilomitha eziliqela. Ekugqibeleni emva kokuba kuxutyushwe kangangeeyure eziliqela, malunga neyesi-8:00 ngokuhlwa, ngoLwesine, ngoAgasti 19, amagunya ebala lemidlalo akuvuyela ukwazisa abameli abangamaNgqina ukuba indibano ingaqhutywa. Abaphathi besixeko bathi abanangxaki ngokuqhutywa kwale ndibano.

Ngentsasa elandelayo kwathontelana amawaka kweli bala lemidlalo. AmaNgqina angamatsha-ntliziyo asebenza ubusuku bonke elungiselela ukufika kwawo. Abanye ababekho ngentsasa elandelayo ngamalungu amaziko eendaba, awayexelelwe ngaphambilana ngokwalelwa kokuqhutywa kweendibano. “Sithi huntshu!” wakhwaza watsho omnye wawo. “Siyayivuyela into yokuba indibano yenu iqhubeka.”

Umzekelo Wehambo Elungeleleneyo

Amagunya ebala lemidlalo akubona kufanelekile ukuba amisele ukhuseleko. Ngenxa yoko, amagosa ezokhuseleko kuzo zonke iindawo ekungenwa kuzo abeka izinto zokuhlola izixhobo ekudla ngokuhlolwa ngazo abakhweli kwizikhululo zeenqwelo-moya. Kwakukho namapolisa kuyo yonke indawo kumabala emidlalo. Indibano yaqhuba kakuhle ngolungelelwano phezu kwaso nje isisongelo esikhulu.

Emva kwemini ngoMgqibelo, mntu uthile watsala umnxeba esithi kutyalwe isiqhushumbisi kwelo bala lemidlalo. Eso sisongelo seviwa kanye ngasekupheleni kwentetho engaphambi kweyokuqukumbela yolo suku. Ngoko, ngesicelo samagunya ebala lemidlalo, kwenziwa isaziso esifutshane sokuba kuphunywe ngokukhawuleza kwelo bala lemidlalo. Xa wonke umntu wenza loo nto ngolungelelwano, amagunya ebala lemidlalo namapolisa othuka. Akazange ayibone into enje! Abuza enoba le nto ibilungiselelwe kusengaphambili.

Akuzange kufunyanwe siqhushumbisi yaye ngemini elandelayo ucwangciso lwandiswa ukuze kuqukwe izinto ebezingenziwanga ngoMgqibelo. Amagunya ebala lemidlalo ayanelisekile yile ndibano.

EGrisi Nakwezinye Iindawo

Ebudeni bempelaveki ka-Agasti neyokuqala kaSeptemba, kwaqhutywa ezinye iindibano zesithili ngolwimi lwesiRashiya eGrisi—kwaqalwa eAthene, kwagqityelwa ngeTesalonika. Kwakukho isimbuku sabangama-746, kwaza kwabhaptizwa abangama-34. Asi-8 amabandla antetho isisiRashiya eGrisi, yaye amancinane ali-17 abunjwe ngabaphambukeli abasuka kwiiriphabliki ezazisakuba zezomzantsi weSoviet Union. La maqela aqhuba iintlanganiso zawo ngesiRashiya nangezinye iilwimi ezithethwa ngaba baphambukeli.

Omnye wabo babhaptizwa eAthene yayinguVictor. Wayengakholelwa kuThixo, kodwa ngoAgasti 1998 waya kwindibano yezizwe ngezizwe yamaNgqina kaYehova eAthene, apho wabhaptizwa khona umfazi wakhe. Uthi wachukumiseka gqitha luthando olwaboniswa ziindwendwe ezazilapho kangangokuba washukunyiselwa ukuba afunde iBhayibhile.

Indoda egama linguIghor yafumana umbhalo wencwadi ethi Unokuphila Ngonaphakade KwiParadisi Esemhlabeni yaza emva kokuyifunda yalahla kude imifanekiso yayo eqingqiweyo. Yaqalisa nokuzibiza njengomnye wamaNgqina kaYehova. Emva kokuba ibhalele iofisi yesebe yaseAthene yaza yatyelelwa ngamaNgqina ngoNovemba 1998, ngokukhawuleza yaya okokuqala kwintlanganiso yebandla yaye ayizange iphose nanye ukususela ngoko. Ngoku, emva kokuba ebhaptiziwe, usukelo lukaIghor kukuba ngumlungiseleli wamaNgqina kaYehova wexesha elizeleyo.

Abantu abantetho isisiRashiya baye bafudukela kumazwe aliqela asehlabathini esingawakhankanyanga. Uninzi lwaba bantu nalo luyakuvuyela ukuba nenkululeko yokufundisisa iBhayibhile nokuhlanganisana esidlangalaleni ukuze lunqule uThixo. Kubo eli lilungelo abalixabisayo!

[Umbhalo osemazantsi]

[Ibhokisi ekwiphepha 22]

Abantu BaseRashiya Abathanda IBhayibhile

UNjingalwazi Sergei Ivanenko, umphengululi obekekileyo wonqulo waseRashiya, wawachaza amaNgqina kaYehova njengabantu abazinikele ngokwenene kufundisiso lweBhayibhile. Kwincwadi yakhe yesiRashiya yakutshanje ethi O lyudyakh, nikogda nye rasstayushchikhsya s bibliey (Abantu Abangahlukaniyo NeeBhayibhile Zabo), wathi xa wayebhala ngembali yawo yangaphambili eSoviet Union: “Nakuba aphelela entolongweni ngenxa yokunyaniseka kwawo kwiinkolelo zawo, amaNgqina kaYehova azama iindlela zokusebenzisa iBhayibhile.” Ezekelisa oku, wabalisa la mava alandelayo.

“Kwakungavumelekanga ukuba amabanjwa abe neBhayibhile. IiBhayibhile zathinjwa xa kwakugqogqwa. Kwenye yeenkampu ezisemantla, elinye iNgqina likaYehova laliligcisa kwezombane yaye lagcina iincwadi zeBhayibhile kwisixhobo sombane esinamandla ombane angaphaya kwengqondo. Nxalenye nganye yeBhayibhile wayibopha ngomtya kucingo oluthile yaye yayinguye kuphela owayesazi ukuba luluphi ucingo awayenokulutsala ukuze ayikhuphe—ngokomzekelo, iVangeli kaMateyu—ngaphandle kokubulawa ngumbane. Kambe ke akuzange kugqogqwe apho, nditsho abalindi sele bagqogqa bashiya indawo abangayaziyo abazange baphumelele, yaye le Bhayibhile ikhethekileyo ayizange ifunyanwe.”

[Ibhokisi ekwiphepha 28]

AmaNgqina KaYehova Aphinda Abhaliswa ERashiya

AmaNgqina kaYehova ebesoloko ebuvakalisa ngokuzimisela uBukumkani bukaThixo eRashiya ngaphezu kwenkulungwane. Noko ke, ngenxa yezithintelo zikarhulumente, amaNgqina akazange aqale amkelwe ngokusemthethweni de kwangoMatshi 27, 1991. Ngelo xesha, abhaliswa ngegama elithi Administrative Center of the Religious Organizations of Jehovah’s Witnesses in the U.S.S.R.

NgoSeptemba 26, 1997, kwamiselwa umthetho “Ongenkululeko Yesazela Nombutho Wonqulo.” Lo mthetho mtsha washukuxwa kakhulu ngamaziko eendaba ehlabathini lonke. Ngoba? Ngenxa yokuba abaninzi bakujonga ukuwiswa kwalo mthetho njengelinge lokuthintela ukunqula kweecawa ezincinane eRashiya.

Ngenxa yoko, phezu kwako nje ukubhalisa kwamaNgqina kaYehova ebunzimeni ngowe-1991, umthetho omtsha weNkululeko Yesazela eRashiya wafuna ukuba, wona neminye imibutho yonqulo aphinde abhalise. Oku kwaphakamisa imibuzo emininzi. Ngaba oku kwakubonisa ukuba amagunya aseRashiya ayebuyela ekucinezeleni amaNgqina kaYehova? Okanye ngaba kwakuya kuqhubeka ukunyanyezelwa kweembono zonqulo nenkululeko yonqulo eyaqinisekiswa ngaMazwe Amanyeneyo aseRashiya?

Impendulo yada yakho. Hayi indlela avuya ngayo amaNgqina xa aphinda amkelwa ngokusemthethweni ngokuthi iSebe Lezobulungisa eRashiya likhuphe isiqinisekiso sokubhalisa kwawo “seAdministrative Center for Jehovah’s Witnesses in Russia,” ngoAprili 29, 1999!

[Umfanekiso okwiphepha 23]

Indibano yokuqala eyaqhutywa ngesiRashiya eUnited States

[Umfanekiso okwiphepha 24]

Umdlalo weBhayibhile owawudlalwa eNew York libandla elintetho isisiRashiya laseLos Angeles

[Umfanekiso okwiphepha 25]

Aba bali-14 babhaptizwa eNew York basuka kwiiriphabliki ezintandathu ezazisakuba zezeSoviet Union

[Umfanekiso okwiphepha 26, 27]

Bangaphezu kwe-15 000 abahlanganisana kwiBala Lemidlalo yeeOlimpiki laseMoscow