Kutheni Ufanele Wenze Inguqulelo?
BAMBALWA kuthi abafane bavume ukuba sineentsilelo ezibalaseleyo. Hayi indlela ayinyaniso ngayo amazwi embongi yaseSkotlani uRobert Burns athi: “Akwaba besinganamandla esipho sokuzibona njengoko abanye besibona.” Ewe, sikufumanisa kulula ukubona iziphako zabanye yaye kusenokuba lula ukubacebisa nokubabonisa indlela yokuphucula. Kodwa naliphi na icebiso lokuba nathi kufuneka siguqule iimpawu zethu zobuntu linokusicaphukisa. Ngaba wena liya kukucaphukisa?
Makhe sinqumame kancinane size sibe nombono wehlabathi elifezekileyo apho bonke abantu bacocekileyo khona, besempilweni, bonwabile yaye benyanisekile; apho kwanabo baphetheyo ingabantu abanobubele nabanovelwano, benomdla wokubenzela okulungileyo abanye; apho kungekho kubawa yaye kungekho bani uxhaphaza abanye abantu; apho abantwana babathobelayo abazali babo abanothando nabanenyameko; apho kungekhoyo khona ukubhabhazela ngumsindo—kungekho bundlobongela, lwaphulo-mthetho nokuziphatha okubi; apho abantu ngokwemvelo unokubathemba yaye kuluyolo ukuba nabo; apho unokunandipha ubomi uziva unqabisekile yaye uhleli kakuhle.
Ngaba unokuzibona ukufanelekele ukuphila kwihlabathi elinjalo, ukuba ihlabathi elifezeke ngolo hlobo linokuze libekho? Ewe, iindaba ezilungileyo eziseBhayibhileni zezokuba ihlabathi elinjalo liyeza kulo mhlaba kungekudala. Ngoku ke umbuzo obalulekileyo ngulo: Ngaba unazo naziphi na iimpawu zobuntu ezinokukubangela ukuba ungakufanelekeli ukuphila kwihlabathi elihle ngolo hlobo? Ucinga ukuba bekuya kubanzima kangakanani na ukwenza umgudu ofanelekileyo wokuphila kwiparadisi enjalo?—Isaya 65:17-25; 2 Petros 3:13.
Kwanangoku, ngaphambi kokufika kwehlabathi elitsha elinjalo, ngaba ubomi bakho bunokuphuculwa ukuba wenza okuthile ngeempawu zakho zobuntu nangesimo sakho sengqondo? Ngoko, ukuba kunjalo, kutheni ungenzi inguqulelo efunekayo? Oko kunako ukwenzeka. Khumbula ukuba, ekuqaleni iimpembelelo ezithile ziye zabumba zaza zakha ubuntu bakho, ngoko ngokuzilawula nangomdla ongakumbi, unokukwazi ukubakha kwakhona ubuntu bakho kwanangoku.
Noko ke, usenokubuza uthi: ‘Kodwa ngaba ngokwenene ndinokuyenza inguqulelo? Ndizamile ngaphambili, izihlandlo ezininzi ndaza andaphumelela. Ndidalwe ngolu hlobo, yaye akukho nto ndinokuyenza ngako oku!’
Khawucinge ngoPawulos, umpostile kaYesu Kristu. (Roma 7:18-21) UPawulos waguquka ekubeni ngumchasi wamaKristu ondlongondlongo nozingcayo waza waba ngumKristu. Wayenza inguqulelo kuba ngokwenene wayefuna ukuyenza. Akazange ayekelele umxakatho ngenxa yeentsilelo okanye iimpembelelo zemfuza. Akazange akholelwe kwelokuba ubuntu bakhe obudala babungenakuguqulwa. Kwafuneka enze umgudu omkhulu. Kodwa wafumana uncedo olukhulu.—Galati 1:13-16.
Lwaluvela phi olu ncedo?