Abantu Abaselula Bayabuza . . .

Yintoni Endinokuyenza Ukuzilungiselela Ukuphangela?

“NDIZIVA ndisoyika yaye kwangaxeshanye ndinemincili!” Wadanduluka njalo uMaureen oneminyaka eli-16 ubudala xa wabuzwa ngendlela awayeziva ngayo ngokuqalisa ukuphangela. Kuyinto nje engokwemvelo ubuncinane ukuthiwa merhe luvalo xa ucinga ngokuba ufanele ufune umsebenzi​—⁠kwanaxa ujamelene nocelo-mngeni lokuwuqalisa. Ngaphambi nje kokuba uRené oselula agqibe esikolweni, wathi: “Emva kweminyaka eli-12 yokuxhinxwa ngomsebenzi wesikolo, ukuphangela kuya kuyolisa.”

Nokuba uvakalelwa njani na, mhlawumbi ngenye imini uya kuba ngomnye wabantu abaphangelayo. Ungayilungiselela njani loo mini? Ukuhamba isikolo kukunika ithuba lokuba uhlakulele imikhwa elungileyo, enjengokufika ngexesha. Ngaphezu koko, ulutsha olusesesikolweni lunokufumana amava ngokusebenza kwimisebenzi yesingxungxo. Noko ke, ukuze uzilungiselele kakuhle ukuphangela, kubaluleke ngokukhethekileyo ukuba ucingisise ngezifundo ozikhethayo esikolweni.

Imbono Elungeleleneyo Ngomsebenzi

Okokuqala, umele ukwazi oko ukufunayo emsebenzini. Lumbi ulutsha alukhangeli ngaphaya kobungakanani bemali oluyamkelayo. Kuyavunywa ukuba, “imali ingumthunzi” yaye ibalulekile ebomini. (INtshumayeli 7:​12) Kodwa iBhayibhile inyanisile xa isithi “ubomi bomntu abumi ngabuninzi bempahla yakhe.” (Luka 12:​15) Kwincwadi ethi Yes​—⁠I Can!, ebhalwe nguBarkai, noBarkai kunye noYeo, aba babhali banikela eli cebiso: ‘Musa ukuwela emgibeni wokukhangela kuphela imbuyekezo yemali eninzi.’ Bongezelela ngelithi: “Ukwaneliseka emsebenzini kunendima ebaluleke gqitha ekonwabeni kwakho kwikamva.” Ngaloo ndlela uPaulo oneminyaka elishumi elinesixhenxe ubudala wabonisa ulungelelwano xa wathi: “Bendingathanda nje ukwamkela umvuzo owaneleyo ngoxa ndikunandipha oko ndikwenzayo.”

Noko ke, ukuba ungumKristu kusekwakho ezinye izinto omele ucingisise ngazo. Kwanolona hlobo lomsebenzi lunandiphekayo nolubangel’ umdla alusayi kuyanelisa intswelo yakho yokomoya. Ngaphezu koko, “imfanelo yoluntu lonke” kukuba ‘loyike uThixo, lugcine imithetho yakhe.’ (INtshumayeli 12:​13) Ekubeni umyalelo kaThixo kumaKristu ‘ingowokwenza abafundi,’ amaNgqina kaYehova amaninzi aselula aceba ukusebenza njengoovulindlela, okanye abashumayeli bexesha elizeleyo. (Mateyu 28:​19, 20) Intombazana yaseMzantsi Afrika egama linguShulamite yenza kanye oko. Yaye ithi kuyizisela “ulwaneliseko olukhulu ukufak’ isandla ekuzaliseni intswelo yabantu yokomoya.”

Mhlawumbi nawe ukwanqwenela ukuba nesabelo kubulungiseleli bexesha elizeleyo. Sekunjalo, mhlawumbi kuya kufuneka uphangele ukuze uzixhase. Ngenye imini kuya kude kufuneke ukuba uxhase intsapho. Kwelinye icala, iimeko zisenokungakuvumeli ukuba ube nguvulindlela, yaye kusenokufuneka ukuba ufune umsebenzi wengqesho osisigxina. Nokuba imeko iyintoni na, ngaba ubungenakuthanda ukufumana umsebenzi wengqesho okwenza ukwazi ukuba nesabelo esizeleyo enkonzweni kaThixo kangangoko kunokwenzeka? Okuninzi kuya kuxhomekeka kwizifundo ozikhethayo esikolweni.

Khetha Izifundo Ezifanelekileyo

Kwamanye amazwe oselula usenokukhetha phakathi kwezifundo zenzululwazi, ezoshishino, ezobugcisa nezobuchule bomsebenzi othile. Ngokufuthi kububulumko ukuqwalasela iintlobo zemisebenzi ekhoyo ekuhlaleni. Kwangaxeshanye, usenokuthelekelela iziphiwo nezilangazelelo zakho. Njani? Ngokudwelisa phantsi zonke izinto onomdla kuzo okanye oqhuba kakuhle kuzo. Ngaba yimathematika? Ngaba yinzululwazi yeekhompyutha? Ngaba kukukhanda iinqwelo-mafutha? Quka imisetyenzana yakho yokuzonwabisa nezinye izinto onomdla kuzo nje. Ubuncinane oku kuya kukunika ingcamango ethile yohlobo lowona msebenzi unokuwufanelekela nohlobo lwezifundo ezinokukukhokelela kwelo cala. Ukuthetha nabazali bakho okanye abanye abantu abakhulileyo nako kusenokukunceda ukuba uthelekelele ubuchule bakho nezinto otyekele kuzo ngokwenene.​—⁠Thelekisa IMizekeliso 15:⁠22.

Ngokomzekelo, ngaba ungumntu othanda ukunxulumana nabantu? Mhlawumbi ke ngoko ubuya kufuna ukuqwalasela izifundo eziya kukwenza ukwazi ukufumana umsebenzi wokuthengisa okanye ezinye iintlobo zomsebenzi ezifuna ukuba uqhagamshelane ngokusondeleyo nabantu. Kwelinye icala, ukuba unesiphiwo sokusebenza ngezandla zakho, usenokucinga ngokuthabatha isifundo semisebenzi yezandla. Phofu ke, abashumayeli abaninzi bexesha elizeleyo bazixhasa ngobugcisa abaqalisa ukubufunda kwisikolo semfundo ephakamileyo (esekondari). Abanye baye bafumana isingxungxo kumsebenzi wokwakha, ekukhandeni izixhobo zokusebenza, ekuchweleni, emsebenzini wokwenza izinto zobugcisa ekhaya, kowokubhala ngekhompyutha (word processing) okanye kowokuba ngunobhala.

Ukufundela ukuchwetheza nogcino-ncwadi kwamvuza uDamaris, ibhinqa eliselula laseColombia, eMzantsi Merika. Wafumana umsebenzi wokuba ngumabhalana osebenza iziqingatha zemini nowawumxhasa kumsebenzi wakhe wokushumayela. Amanye amaKristu aye ahlangabezana neentswelo zawo ngokwenza umsebenzi wokucoca izakhiwo, owokunyamekela uhlaza njalo njalo.

Xa Ukhetho Lulinganiselwe

Noko ke, ayizizo zonke izikolo ezinezifundo ezifanelekileyo zokuqeqeshela umsebenzi; kwezinye abafundi abafundiswa kwanobuchule obusisiseko bokubhala nokufunda. Kwimimandla ethile kusenokufuneka imfundo eyongezelelekileyo ukuze ufumane phantse naluphi na uhlobo lomsebenzi wengqesho. Kwiimeko ezinjalo, usenokufumanisa enoba akho kusini na ekuhlaleni amalungiselelo okuqeqeshelwa nawuphi na umsebenzi okanye okufundela ubugcisa emsebenzini. Isifundo sesikolo esiqhuba ixeshana nje elifutshane esifundisa ubuchule bomsebenzi wokuthengisa sinokukhethwa. Okubangel’ umdla kukuba, abanye baye baqalisa uqeqesho olunjalo ukongezelela kumsebenzi wabo njengabashumayeli bexesha elizeleyo.

Kumazwe asakhasayo ulutsha lusenokufumanisa ukuba ukhetho lwezifundo omaluzithabathe nolwezikolo omalufunde kuzo lulinganiselwe ngokugqithiseleyo. UKatiti, ityendyana lomfana lenye idolophana yasemaphandleni ekumazantsi eAfrika, wayengenalukhetho kodwa kwafuneka afunde isiLatini, imathematika nezenzululwazi, nangona ezo zifundo zazingancedi kangako ekufumaneni umsebenzi ekuhlaleni. Sekunjalo, uKatiti waphumelela ekufumaneni umsebenzi. Njani? Ngokulungelelanisa ubuchule bakhe ngokweentswelo zasekuhlaleni. Xa uKatiti wagqibayo esikolweni, wazixhasa ngokulima aze athengise imifuno, enitha aze athengise izikhafu neminqwazi yewulu, ekwathengisa namayeza anokusetyenziswa ngaphandle kwemiyalelo kagqirha. Ngenxa yokuba isikolo sasimxhobise ngobuchule bokuthetha obuyimfuneko, wayenokuyisingatha ngokunempumelelo le misebenzi yahlukahlukeneyo ibangel’ umdla.

Incwadi ethi Choosing Your Career and Your Higher Education ithi ubuchule “bokunxibelelana, bokuqonda, nobokuqondwa bubaluleke kakhulu” kumsebenzi owenzayo. Inkoliso yemisebenzi, enoba yeyobugcisa, eyorhwebo okanye ephathelele ezenzululwazi ifuna ubuchule bonxibelelwano. Ngoko nokuba isikolo ofunda kuso asinazifundo eziqeqeshela umsebenzi othile, sebenza nzima ekubeni nobuchule ekubhaleni, ekuthetheni nasekuphulaphuleni. Ingcamango oyinikelayo kulowo unokukuqesha iya kuxhomekeka ubukhulu becala kubuchule bakho bokunxibelelana; isenokuba kanye yinto eya kubangela umqeshi akuqeshe kumsebenzi owufunayo. Phakathi kwamaNgqina kaYehova, ulutsha oluninzi luye lwaphucula ubuchule balo bonxibelelwano ngokuba nenxaxheba kwiSikolo Sobulungiseleli Sobuthixo ebandleni lobuKristu.

Ukuncama Izinto Ezithile

Incwadi ethi Your Child At School ithi: “Asidalwanga ngendlela efanayo sonke.” Olunye ulutsha lutyekele kwimisebenzi efuna ubuchule bezandla, ngoxa olunye lunesiphiwo kwefuna ingqondo ekrelekrele. Sekunjalo abanye baneziphiwo nobuchule kwicala lomculo, ukuzoba okanye kwezobumbaleki. Ukuzixhasa kukabani ngobuchule anabo okanye ngokuba ngumqeqeshi kwezomculo akunto iphosakeleyo, kodwa ukusukela ubunewunewu okanye udumo kwimisebenzi enjalo kunokubangela iingozi zokomoya kumKristu. Ukongezelela, ekubeni le misebenzi isenokukushiyela ixesha elilinganiselweyo lokwenza imisebenzi yobuKristu, enjengokuya kwiintlanganiso nokuba nesabelo kumsebenzi wokushumayela, ngaba bekuya kuba bubulumko ukuchitha iminyaka uzuza imfundo yaye ugqibelelisa nobuchule obuyimfuneko ukuze uphumelele kuyo?​—⁠1 Korinte 7:⁠29.

INgqina eliselula eligama linguPhilip lazama ukuzibekela usukelo lomsebenzi othembisayo womdlalo wentenetya. UPhilip uyavuma ukuba, “Ekugqibeleni, kwafuneka ndikhethe phakathi kobuKristu nomdlalo wentenetya. Kwakungekho xesha laneleyo konke konke lokuba ndizinikele ngokupheleleyo kuyo yomibini le misebenzi. Ndagqiba kwelokuba ndiwuyeke umdlalo wentenetya, yaye nangona kwakunzima ngelo xesha, andizange ndizisole.”

Umpostile uPawulos wenza isigqibo esifanayo. Nangona wayefundele ubugqwetha, wakhetha ukuzibekela usukelo kubulungiseleli bobuKristu, ezixhasa ngomsebenzi wokuthengisa iintente. (IZenzo 18:⁠3; 22:⁠3) Kodwa uPawulos akazange azisole ngokhetho lwakhe. Wathi: “Ndisuke, zona ezo zinto zabe ziyinzuzo kum, zona ezo ndazibalela ekuthini ziyinkxwaleko ngenxa kaKristu. . . . Ndonakalelwa zezi zinto zonke, ndizibalela ekuthini ziyinkunkuma, ukuze ndimzuze uKristu, ndifunyanwe ndikuye.”​—⁠Filipi 3:​7, 8.

Mhlawumbi uya kushukunyiselwa ekwenzeni ukhetho olufanayo. Kunokuba ukhulise ubuchule bakho kwezenzululwazi, kumculo, okanye kwimizobo, usenokugqiba kwelokuba uhlakulele ubuchule bakho bokomoya. Oku kusenokuthetha ukuba ufunde umsebenzi wezandla okanye uhlobo oluthile lomsebenzi ojongwa njengonganiki mdla yinkoliso yabantu. Ngamaxesha athile oselula usenokufunda umsebenzi wezandla ngokusebenza nabazali bakhe, mhlawumbi ukufunda ukuchwela, ukusebenza ngemibhobho yamanzi okanye eminye imisebenzi yezandla enjalo.

Nokuba ugqiba entwenini kulo mbandela, cinga ngekamva lakho. Khetha izifundo zakho ngobulumko nangenyameko. Ngoncedo lukaThixo, uya kuba ngoyilungele ngokupheleleyo impangelo!

[Umfanekiso okwiphepha 10]

Abaninzi bazixhasa ngobuchule obufundwa esikolweni