Ngubani Obafundisa Ngesini?

OLUNJANI lona uvuyo olubakho xa kuzalwa usana olutsha! Abazali bayaluvuyela, badlala nalo baze baxelele abahlobo babo phantse zonke izinto oluzenzayo. Kodwa kungekudala baqalisa ukuqonda ukuba lukwabazisela iimbopheleleko ezinkulu ezintsha. Enye imbopheleleko ebaluleke ngakumbi yimfuneko yokulufundisa ukuze luzikhusele kwihlabathi elinokuziphatha okubi okwandayo.

Abazali banokulunceda njani usana oluthandekayo ukuba lukhulele ekubeni ngumntu omkhulu oya kunandipha ubomi bentsapho obunothando nobonwabisayo aze mhlawumbi akhulise abakhe abantwana aboyika uThixo? Bambi abazali basenokukujonga oku njengomsebenzi ophantse ube ngaphaya kwamandla abo, ngoko ngokungathandabuzekiyo amacebiso athile aya kuxatyiswa.

Mhlawumbi abantwana bakho ubafundisa phantse ngendlela owafundiswa ngayo ngabazali bakho. Kodwa abazali abaninzi bafundiswa okuncinane, ukuba bafundiswa kwaukufundiswa, ngesini. Enoba wafundiswa kakuhle, ihlabathi liguqukile, yaye kunjalo nangeentswelo zabantwana. Ukongezelela, abafundi abaninzi beli phephancwadi baye bamkela imilinganiselo ephakamileyo nendlela elunge ngakumbi yobomi. Ngaloo ndlela, ufanele uzibuze: ‘Ngaba indlela endibafundisa ngayo abantwana bam iyavumelana neembono zam zangoku neentswelo ezandayo zabantwana bam?’

Bambi abazali bavumela abantwana babo ukuba baziphandele inkcazelo enjalo. Kodwa ukwenjenjalo kuphakamisa imibuzo exhalabisayo: Yintoni abaya kuyifunda? Baya kuyifunda nini? Baya kuyifunda kubani, yaye phantsi kwaziphi iimeko?

Oko Izikolo Zikufundisayo

Abazali abaninzi bathi: “Oko baya kukufunda esikolweni.” Izikolo ezininzi ziyafundisa ngesini, kodwa zimbalwa kuzo ezifundisa ngokuziphatha okuhle. Owayesakuba nguNobhala Wemfundo waseUnited States uWilliam J. Bennett ngowe-1987 wathi izikolo zibonakalisa “ukukuchasa ngabom ukwenza umahluko phakathi kwemilinganiselo yokuziphatha.”

UTom, uyise weentwazana ezimbini ezithandekayo, wabuza oku kummeli wesikolo ezifunda kuso: “Kutheni ningabaxeleli ngokuphandle ukuba iintlobano zesini ngaphandle komtshato ziphosakele?” Lo mmeli wathi yena ebengathanda ukubaxelela oko kodwa isikolo asinako ukubanyol’ esweni omama babantwana abangatshatanga noomasihlalisane babo. Ngaloo ndlela, izikolo ziyabaxelela abafundi ukuba banokhetho kodwa azifane zibaxelele ukuba luluphi na ukhetho olufanelekileyo.

‘Ndiza Kuthenga Incwadi’

Abanye abazali basenokuthi: “Ndiza kubathengela incwadi.” Mhlawumbi incwadi efanelekileyo isenokubanceda, kodwa ufanele uqinisekise ukuba uyavumelana noko ikuthethayo. Zimbalwa iincwadi ezingalo mbandela ezithetha ngemilinganiselo yokuziphatha okanye ezikukhankanya kwaukukukhankanya okulungileyo nokuphosakeleyo. Enyanisweni ezinye ziyakuncomela ukuziphatha okubi. Yaye eneneni unokuyifumana ngebhaqo incwadi ethi iintlobano zesini zifanele zipheleliselwe emtshatweni.

Ngaloo ndlela, imbopheleleko yokufundisa abantwana ngemilinganiselo yokuziphatha ibuyela kanye apho uThixo wayibeka khona kwasekuqaleni​—⁠kubazali babo abanothando. IBhayibhile yabaxelela oku ootata: “Uze uwatsolise [amazwi omthetho kaThixo] koonyana bakho, uthethe ngawo ekuhlaleni kwakho endlwini yakho, nasekuhambeni kwakho ngendlela, nasekulaleni kwakho, nasekuvukeni kwakho.”​—⁠Duteronomi 6:⁠7.

Enyanisweni, abazali banokuba ngabona bafundisi-ntsapho balungileyo babantwana babo. Akukho ncwadi okanye sikolo esinokuze siwathabathele indawo amandla abo okuqononondisa okanye awomzekelo ofanelekileyo wentsapho. Kunjengokuba uWilliam Bennett watshoyo: “Uphando lubonisa ukuba xa abazali bengumthombo oyintloko wemfundo engokwesini, abantwana abadli ngokubandakanyeka kwiintlobano zesini. . . . Abazali, ngaphezu kwakhe nawuphi na omnye umntu, banendima ebalulekileyo.”

Noko ke, bambi abazali boyikisela ukuba ulwazi lusenokukhokelela abantwana babo ukuba bafune ukuzivela. Ngokucacileyo oku kuxhomekeke ubukhulu becala koko kufundiswayo nakwindlela okufundiswa ngayo. Inyaniso ikukuba abantu abaselula baza kufunda ngesini. Ngaba akuyonto ilunge ngakumbi ngabo ukuba bafunde ngaso ngendlela echanileyo nendilisekileyo kubazali abaziphethe kakuhle nabanothando kunokuba bafunde ngaso esitratweni, esikolweni okanye kubantu abakhulu abangcolileyo?

Kodwa umbuzo usaphakama: Unokuzifundisa njani ezi zinto ngendlela yobuthixo nendilisekileyo? Xa abantu abaselula besiva ukuba “wonk’ ubani uyakwenza oku,” unokubeyisela njani kwelokuba abona bantu balungileyo nabonwabileyo abakwenzi? Unokubanceda njani baqonde ukuba ukuphila ngokuvisisana nomthetho weBhayibhile wokuba “nikhumke kulo uhenyuzo” akukhokeleli nje kuphela kobona bomi bulungileyo nobonwabisayo kodwa kwakhona kwekuphela kwendlela ekholisa uThixo? Amanqaku alandelayo aza kunikela iimpendulo eziluncedo kule mibuzo ibalulekileyo.​—⁠1 Tesalonika 4:⁠3.

[Amagama acatshulweyo akwiphepha 3]

“Imilinganiselo yokuziphatha abazali abayibethelela kubantwana babo isabonakala iyeyona ibalulekileyo.”—U.S.News & World Report