Abaphambukeli Unokubanceda Njani?
UMCHOLACHOLI weendaba uGünter Wallraff wazenza umsébenzi ovela eTurkey waza wasebenza kwinkampani yeentsimbi yaseJamani. Xa wabhenca awakufumanisayo ngendlela abaphathwa ngayo abasebenzi bolunye uhlanga, okanye abasemzini, abantu ngokubanzi babamb’ ongezantsi yaye bacaphuka. Wabhala iingxelo ngeengxelo ezingocalucalulo olucacileyo nekhethe elithoba isidima elalijoliswe kubasebenzi abavela kwamanye amazwe. Ngesinye isihlandlo, wazibonela ngawakhe amehlo abasebenzi baseTurkey beyalelwa ukuba basebenze kwindawo enobungozi phezu kwako nje ukukhala kwezandi ezazisa ngengozi nezibane ezibomvu ezidanyazayo. Xa enye indoda yathi yoyika yaza yafuna ukuwushiya loo mmandla, yasongelwa ngokuphelelwa ngumsebenzi.
Amava okaWallraff abhenca ngokucacileyo intlungu yabaphambukeli. Njengokuba abemi basekuhlaleni abanovelwano besiya bezazi iingxaki abajamelana nazo abantu abavela kwamanye amazwe, abaninzi bayazibuza ngoko banokukwenza ukunceda umphambukeli nentsapho yakhe.
Sithabatheni Njengoko Sinjalo
Liphephe ikhethe. Ayikho into ebangela ukujongana ngezikhondo zamehlo nokuchukelana ngokukhawuleza ngakumbi phakathi kommi womthonyama nomphambukeli kunekhethe. Umbhali uBen Levitas uthi kwincwadi yakhe ethi Tribal Life Today: “[Izithethe] ziyayiphazamisa imbono yethu ngendlela abanye abantu abazenza ngayo izinto, ngokukodwa xa iindlela zabo zisahluka . . . kwiindlela zethu eziqhelekileyo.” Uthi oku kwahlukana “kusoloko kusikhokelela ekubeni siyihlab’ amadlala indlela abanye abaqhuba ngayo.” UHelen, umphambukeli waseKhanada ovela eKorea, ulukhumbula kakuhle usuku umfundisi-ntsapho wakhe awathi ngalo ngomsindo wamngxolisela ukusilela ukwenza umsebenzi ababecelwe ukuba bawenze njengeklasi. UHelen, owayekhathazeke gqitha ngelo xesha, uthi: “Akazange aqonde ukuba ndandingamva.”
Ukuqondana phosakeleyo nokuba neengcamango eziphosakeleyo nezicingwe kwangaphambili ngabantu bezinye iintlanga ngokufuthi kusekelwe entsomini kunakwinyaniso. Umbhali uMildred Sikkema noAgnes Niyekawa-Howard kwincwadi yabo ethi Cross-Cultural Learning & Self-Growth, bathetha ngomnye unjingalwazi waseMerika owavavanya abafundi bakhe abatsha ababevela kwamanye amazwe ngokuqhula kunye nabo. Emva koko wayebondela ukuze abone intsabelo yabo. Ukuba babengahleki, ngoko nangoko abo bafundi babethunyelwa kumagumbi okufundela abafundi abafunda isiNgesi. Aba babhali bathi: “[Unjingalwazi] wayengabonakali eyiqonda into yokuba ukuqonda isiqhulo saseMerika kufuna ukuba ubani aqhelane nezithethe nolwimi lwaseMerika . . . Oko abantu abaphila ngolunye uhlobo bakugqala njengento ehlekisayo kunokugqalwa [ngabanye] njengemfitshimfitshi.” Izenzo ezinjalo ezenziwa ngabemi basekuhlaleni beneenjongo ezintle zibonisa ukuswela ukuqonda ekuqhubaneni nabaphambukeli.
Ukuba umphambukeli umamkela kanye ngendlela ayiyo, ngaphandle kwekhethe, uya kukuxabisa ngako oko. Ikhondo elinjalo liyavisisana nomgaqo okhokelayo owavakaliswa nguYesu: ‘Uze umthande ummelwane wakho njengoko uzithanda ngako.’ (Luka 10:27) UYasushi Higashisawa, igqwetha laseTokyo, eJapan, oqhubana gqitha nabaphambukeli, uncomela into yokuba “ukusondelelana gqitha nabantu abaphila ngezinye izithethe kuyeyona ndlela ilungileyo yokuphelisa ikhethe.” Olu hlobo lolwalamano lwenza umphambukeli ukuba ancedakale nangezinye iindlela.
Uncedo Olusebenzisekayo
Kuninzi umphambukeli afuna ukukwazi ngelizwe lakhe elitsha—indlela yokufumana indawo yokuhlala, ukufunda ulwimi, ukusa abantwana esikolweni, ukusebenzisa amalungiselelo empilo nawentlalo. Unokumongela inkathazo nomgudu omninzi ongeyomfuneko ngokwabelana naye ngoko ukwaziyo.
Ngokomzekelo, ngaba unokumnceda umphambukeli azi iindawo akuzo amaziko okanye iintlangano zasekuhlaleni ezinokumnceda ukuba aqhelane nolwimi nezithethe zasekuhlaleni? Okanye ngaba mhlawumbi unokukhapha ibhinqa elingumphambukeli ukuya kuthenga okokuqala ukuze ulincede lizazi izinto ezityiwayo nezinto zendlu? Kuthekani ngokunikela icebiso kwintsapho yabaphambukeli ethubeleza kubugocigoci obudla ngokuntsonkotha bokubhalisa ubume babo ngokwasemthethweni, ukufumana umsebenzi, ukuzalisa iifomu zerhafu nezinye izinto ezinjalo?—Bona umbhalo osemazantsi kwibhokisi.
Ubani Onokuthembela Ngaye
Kusoloko kuluncedo ukuzibuza oku: ‘Ukuba bendikwelinye ilizwe, bendiya kuthanda ukuphathwa njani?’ UYesu wathi kuMthetho Omkhulu owaziwayo: “Zonke izinto ngoko enisukuba ninga bangazenza abantu kuni, yenzani ezikwanjalo nani kubo.” (Mateyu 7:12) Ukuba nomhlobo onokuthembela ngaye ebudeni bamava alingayo okuzivisisanisa nokuqhelana nelizwe elitsha kuluncedo abangaluvuyela abaphambukeli abaninzi. Ukubuk’ iindwendwe okulolo hlobo kwabemi basekuhlaleni kuzisa iingenelo macala omabini. Omnye umgaqo weBhayibhile uthi: “Ukupha kunoyolo ngaphezu kokuphiwa.”—IZenzo 20:35.
Ukuba ungomnye wamaNgqina kaYehova, esona sipho silungileyo onokumpha sona umphambukeli lithemba lobuzalwana obumanyeneyo. Phantse ngokuqinisekileyo uya kuba nako ukufumana umbandela oshicilelweyo onokwabelana ngawo naye ngolwimi lwakhe lwemveli.
Kambe ke, imbopheleleko yokuzinza ngokunempumelelo kwilizwe elitsha ilele ngokuyintloko kumphambukeli. Kodwa ngokucinga nje kancinane kwangaphambili, kuninzi onokukwenza ukumenza azive esekhaya, ngaloo ndlela uwenza amava okufuduka kwakhe angabi mabi gqitha, amzisele kwanolwaneliseko.
[Amagama acatshulweyo akwiphepha 11]
“Sicinga ukuba abantu abanezithethe zabo . . . babona, bavakalelwa yaye bacinga njengathi. . . . Ukuqondana phosakeleyo okuninzi kubangelwa kukucinga ukuba izinto esizenzayo zenziwa kuyo yonke indawo.”—Cross-Cultural Learning & Self-Growth
[Amagama acatshulweyo akwiphepha 12]
Omnye umfundi wathi emva kokuba echithe ixesha kwisiqithi saseGuam: ‘Ndiye ndakwazi ukuzinyamezela ngakumbi iindlela ezintsha okanye ezahlukahlukeneyo zokwenza izinto.’—Cross-Cultural Learning & Self-Growth
[Ibhokisi ekwiphepha 12]
Unokumnceda umphambukeli ukuba . . .
▶ azinze ngokuba ngummelwane obuk’ iindwendwe
▶ aqhubane nabasemagunyeni ngoxa ezama ukubhalisa ngokwasemthethweni ubukho bakhea
▶ azalise iifomu zerhafub
▶ adibane neentlangano ezifundisa ngezithethe nolwimi lwasekuhlaleni
▶ afumane iindawo zokuhlala
▶ asebenzise amalungiselelo ezonyango nawasentlalweni
▶ ase abantwana esikolweni
▶ athenge izinto eziyimfuneko ngamaxabiso afanelekileyo
▶ afumane umsebenzi
[Imibhalo esemazantsi]
a Wambi amazwe, njengeJamani, anemithetho engqongqo ngabo banokunikela amacebiso ngemibandela yomthetho, yokufuduka neyerhafu. Le ifanele ihlolwe ngaphambi kokunikela uncedo kubaphambukeli mayela nobume babo obungokomthetho.
b Wambi amazwe, njengeJamani, anemithetho engqongqo ngabo banokunikela amacebiso ngemibandela yomthetho, yokufuduka neyerhafu. Le ifanele ihlolwe ngaphambi kokunikela uncedo kubaphambukeli mayela nobume babo obungokomthetho.