Kunokwenzeka Ukuchacha
“Sijongene nokhetho: Ukuyeka ukusela size sichache, okanye siqhubeke sisela size sife.”—Ikhoboka lotywala elichachayo.
KHAWUZITHELEKELELE uvuka ngequbuliso ngobunye ubusuku uze ufumanise ukuba indlu yakho iyatsha. Kwimizuzu embalwa kamva kufika uncedo, yaye ekugqibeleni umlilo uyacinywa. Ngaba unokusuka nje ubuyele ngaphakathi uze wenze ngathi akukho nto yenzekileyo? Ngokuqinisekileyo akunako. Indlu yonakalisiwe, yaye kuya kufuneka yakhiwe ngokutsha ngaphambi kokuba kuphilwe ubomi obuqhelekileyo kwakhona.
Ikhoboka lotywala lijongene nocelomngeni olufanayo xa liqalisa ukuchacha. Ubomi balo buye bonakaliswa butywala, mhlawumbi kangangeminyaka emininzi. Ngoku liyekile ukusela. “Umlilo” ucimile, kodwa iphulo elikhulu lokwakha ngokutsha isimo sengqondo, indlela eliphila ngayo nokuziphatha liya kuba yimfuneko ukuba ikhoboka lotywala liza kuhlala lingabuseli utywala. La macebiso alandelayo anokulinceda ikhoboka lotywala ukuba lihlale linganxilanga ngalo lonke ixesha.
1. Lwazi Utshaba
IBhayibhile ithi iinkanuko zenyama “ziwuphumele umkhosi umphefumlo.” (1 Petros 2:11) Igama lesiGrike eliguqulelwe ngokuthi “ziwuphumele umkhosi” ngokoqobo lithetha “ukwenza inkonzo yasemkhosini,” yaye linengcamango yemfazwe etshabalalisayo.—Thelekisa eyabaseRoma 7:23-25.
Kanye njengoko nalo naliphi na ijoni elinobuchule lithabatha ixesha lifundisisa amacebo otshaba lwalo, ikhoboka lotywala limele lizifundise ngento okuyiyo ukukhotyokiswa butywala nendlela okulitshabalalisa ngayo lona nabo basondeleyo kulo.a—Hebhere 5:14.
2. Guqula Indlela Osela Ngayo Kunye Nocinga Ngayo
Omnye ugqirha uthi: “Ukunganxili kuthetha ukuyeka ibhotile kunye nomntwana.” Ngamanye amazwi, kukho okungakumbi kunokusela okufanele kuguqulwe; nomntu ongaphakathi umele aguquke.
IBhayibhile iluleka ngobulumko: “Manibe kumila kumbi ngokuhlaziyeka kwengqiqo yenu.” (Roma 12:2) ‘Zihlubeni ubuntu obudala kunye nezenzo zabo.’ (Kolose 3:9) Ukuba kuguquka izenzo kodwa ubuntu bungaguquki, ikhoboka lotywala liya kusuka lidlulele komnye umkhwa oyingozi—okanye libuyele kumkhwa walo omdala.
3. Yiba Nomntu Oqondayo Onokuzityand’ Igila Kuye
Umzekeliso weBhayibhile uthi: “Ozahlulayo ufuna umnqweno wakhe; into yonke ezimasayo uyayivungamela.” (IMizekeliso 18:1) Naxa linganxili, ikhoboka lotywala lityekela ekubekeni izizathu ezibonakala zisengqiqweni. Ngoko ke, lifuna umntu oqondayo kodwa oqinileyo elinokuzityand’ igila kuye (ngokufuthi obizwa ngokuthi ngumxhasi). Kuba kuhle xa loo mntu lizityand’ igila kuye naye ngokwakhe echacha ekukhotyokisweni butywala yaye ehlangabezene ngokunempumelelo nocelomngeni lokunganxili. (Thelekisa IMizekeliso 27:17.) Loo mntu lizityand’ igila kuye ufanele azihlonele iinkolelo ezingokonqulo zekhoboka lotywala yaye umele azincame aze afumaneke ukuze alixhase ngamaxesha onke.—IMizekeliso 17:17.
4. Yiba Nomonde
Ukuchacha yinto eyenzeka ngokuthe ngcembe. Kuthabatha ixesha ngekhoboka lotywala ukwakha ngokutsha ubomi balo. Lisenokutsala nzima ngokwemali, kusenokubakho ubunzima emsebenzini, isiphithiphithi ekhaya. Ukuyeka ukusela utywala akuthethi ukungabi nazingxaki. Ekuqaleni ikhoboka lotywala elichachayo lisenokuziva linexhala njengoko lijongana nobomi ngaphandle ‘komcombululi weengxaki’ obutywala. Xa amaxhala anjalo ebonakala engenakoyiswa, ikhoboka lotywala elichachayo lifanele likhumbule amazwi athuthuzelayo omdumisi: “Umthwalo wakho wulahlele kuYehova; yena wokuzimasa; akayi kuliyekela ilungisa lishukunyiswe naphakade.”—INdumiso 55:22.
5. Fumana Izinxulumani Ezilungileyo
Ikhoboka lotywala lifanele ngokunyanisekileyo lizibuze: ‘Ngaba izinxulumani zam ziyakuxhasa ukunganxili kwam okanye ngaba zisoloko zithetha “ngezo mini zangaphambili zolonwabo,” zindenza ndivakalelwe kukuba ndilahlekelwa kokuthile?’ IMizekeliso 18:24 ithi: “Indoda enezihlobo iyachithwa; kukho sithandwa sinamathelayo kunomzalwana.” Kufuneka ingqiqo ukuze ubone abo bangabahlobo bokwenene nabo banokuba zizinxulumani ezonakalisayo.
6. Kuphephe Ukuzithemba Ngokugqithiseleyo
“Ndiziva ndibalasele—andinawo nomnqweno wokuphinda ndisele kwakhona!” Ikhoboka lotywala elithetha la mazwi liyayibaxa inkqubela eliyenzayo yaye liyithabatha kancinane imeko yalo yokukhotyokiswa butywala. Ukuvuyela inyathelo lokuqala lokuchacha, kuyakhohlisa, kokomzuzwana. Incwadi ethi Willpower’s Not Enough iyacebisa: “Zabalazela ukuba nembono elungeleleneyo. Ngaphandle kwayo uya kuba uzibeka esichengeni sokuphinda ube nengxaki yokusela, yaye ngumgama omde ukusuka phezulu emafini ukuza phantsi.”—Thelekisa IMizekeliso 16:18.
7. Kulumkele Ukukhotyokiswa Zezinye Izinto
Abaninzi bayayeka ukusela, kodwa ke baba nemikhwa engalungelelananga yokutya okanye bakhotyokiswe ngumsebenzi, kukungcakaza, njalo njalo. ‘Yintoni ingozi kwezo zinto? Ubuncinane ndiyekile ukusela,’ lisenokuqiqa ngolo hlobo ikhoboka lotywala elichachayo. Liyinyaniso elokuba, ezinye iindlela zokuzihlaziya zisenokuba yimpilo. Kodwa xa nayiphi na into okanye umsebenzi usenzelwa ukuthomalalisa iimvakalelo zakho, oko kukhokelela nje kwimvakalelo yokunqabiseka yobuxoki neyokwexeshana.
8. Zivisisanise Nendima Entsha Yentsapho
Amakhoboka otywala amaninzi ayayithintela inkqubo yokuchacha kwawo xa izinto ziqala ukulunga! Kutheni? Kungenxa nje yokuba ukunganxili kuyinto entsha kuwo. Ikhoboka lotywala lisenokutsaleleka kwindlela yentsapho eqhelekileyo yokuphila. Ukongezelela, xa ikhoboka lotywala lisiba sezingqondweni, libangela inguqulelo enkulu entsatsheni. Ngoko ke, lungu ngalinye lentsapho limele liguqule indima yalo. Incwadana ethi Recovery for the Whole Family iyaphawula: “Umbhalo womdlalo odlalwa yintsapho umele ulahlwe kuze kubhalwe omnye endaweni yawo.” Ngesizathu esilungileyo, ukuchacha kuye kwabizwa ngokuthi ngumcimbi wentsapho.—Thelekisa eyoku-1 kwabaseKorinte 12:26.
9. Kulumkele Ukubuyela Kumkhwa Wangaphambili
Ukuzithemba ngokugqithiseleyo, izinxulumani ezibi, ezinye izinto ezikhobokisayo nokusoloko ulikheswa kusenokuba ngamanqanaba akhokelela ekubuyeleni kumkhwa wangaphambili. Hlala uthetha ngokukhululekileyo nomntu omthembileyo ngalo naluphi na utyekelo olunjalo.
Elinye ikhoboka lotywala elichachayo lithi: “Onke amakhoboka otywala ayayeka ukusela. Abanye bethu banethamsanqa lokuyeka ngoxa sisaphila.”
[Umbhalo osemazantsi]
a Kukho amaziko onyango amaninzi, izibhedlele neenkqubo ezithile zokuchacha ezinokunikela inkcazelo enjalo. UVukani! akancomeli uhlobo oluthile olukhethekileyo lonyango. Abo banqwenela ukuphila ngemigaqo yeBhayibhile bamele balumke bangabandakanyeki kwizinto eziya kuthi zibangele ukuba balalanise kwimigaqo yeZibhalo. Umntu ongomnye wamaNgqina kaYehova uya kufumana imigaqo yokumkhokela eluncedo kwiMboniselo kaSeptemba 15, 1983, iphepha 7-11.
[Ibhokisi ekwiphepha 25]
Ukuba Kunyanzelekile Ukuba Usebenzise Amayeza
Naliphi na iyeza elinomchiza onxilisayo lisenokuvuselela ukurhalela utywala lize libangele ubani ukuba abuyele kumkhwa wangaphambili.
UGqr. James W. Smith ubhala oku: “Akunto ingaqhelekanga ngomguli onyangelwa ukukhotyokiswa butywala ukubuya asele kwakhona emva kweminyaka enganxili ngenxa yokusebenzisa iyeza lokukhohlela elinomchiza onxilisayo azikhethele ngokwakhe.” Ikhoboka lotywala lichanabekile kuzo zonke izithomalalisi. Ukuba kuyimfuneko ngokupheleleyo ukusebenzisa amayeza athomalalisayo, ikhoboka lotywala lifanele . . .
1. lidibane nengcali yamayeza ukuze liqonde iingozi ezinokubakho.
2. lazise umntu elimthembileyo, yaye ukuba kunokwenzeka limbize ngaphambi kokuba lisele ithamo ngalinye leyeza.
3. ligcine ingxelo yawo onke amathamo eyeza eliwaselileyo.
4. liyeke ukusebenzisa amayeza ngokukhawuleza kangangoko kunokwenzeka.
5. liwachithe amayeza angasetyenziswayo xa isigulo ebeliwasebenzisela sona siphilile.