UGawulayo—Uya Kuphela Njani?
“NDEYISEKE ngokupheleleyo lelokuba ngokuqinisekileyo siza kuba naso isitofu sokugonya kule minyaka ilishumi.”—UJorg Eichberg, oyinkokeli kwiphulo lokufuna isitofu sokugonya kwiZiko Lophando lakwaWyeth-Ayerst, ePhiladelphia, eUnited States.
Khawucinge nje ukuba belinokufunyanwa iyeza lokunyanga, okanye ke nelokumthintela uGawulayo. Hayi indlela ebekungakuhle ngayo oko! Kwiingcali ngoGawulayo ezingama-9 000 ezazihlanganisene eFlorence, eItali, nyakenye phantsi komxholo othi “Inzululwazi Icel’ Umngeni UGawulayo,” alithandabuzeki elokuba eyona nto zazicinga ngayo yayikukufuna unyango olunjalo.
Njengokuba ngoku abantu abasithoba kwabali-10 besosulelwa nguGawulayo kumazwe asakhasayo, kukho ingcinezelo yokufuna isicombululo esisebenzayo. Kodwa, ngokutsho kolindixesha iNew Scientist, abaninzi kwinkomfa eyayiseFlorence babonakala “beyekelele umxakatho.” “Mhlawumbi,” ucebisa ngelitshoyo lo lindixesha, le ntlekele yande gqitha kangangokuba abaninzi basuka nje “bayibetha ngoyaba le ngxaki.”
Isibakala esibuhlungu sesokuba izazinzulu ziya zixakana nemibuzo engakumbi kunokufumana iimpendulo. INew Scientist icacisa ngelithi “kwisithuba seminyaka eli-10 lo bhubhani ukho, iingxaki ezijamelene nezazi ngeentsholongwane nezazi ngenkqubo yokuzikhusela komzimba phantse zisenkulu kanye njengoko zazinjalo ngaphambili.” Ingcali ngezonyango ngoGawulayo yaseBritani uIan Weller walumkisa: “Unyango lwezamayeza olupheleleyo lokunyanga iintsholongwane alunakufunyanwa ngokukhawuleza.”
Kodwa ukuba belinokubakho iyeza lokugonya abantu bangasulelwa nguGawulayo, lingafumaneka ngokulula kangakanani? UGqr. Dennis Sifris, ingcali enamava obuqu ngokusebenza eAfrika, uyacacisa: “Sineyeza elisebenza gqitha lokuthintela isifo sephepha ngoko ukuba kuya ngomlomo isifo sephepha besifanele ukuba sitshayelwe kwathi tu [njengokuba kunjalo] ngemasisi neHepatitis B. Kodwa ezo zifo zithathu . . . zezona ziphambili eziye zabulala abantu eAfrika namhlanje. Ngoko nokuba lingaveliswa iyeza ingxaki eyintloko kukufumaneka kwalo ebantwini.”
Ekubeni kungekho themba lingako lokufunyanwa kweyeza, ekuphela kwendlela enokukhethwa eAfrika kukuba kubongozwe abantu baguqule indlela abaziphethe ngayo ngokwesini. Kodwa umbuzo ngulo—banokuyiguqula njani?
Indlela Eqhelekileyo Ekusatyelwa Ngayo
Indlela eqhelekileyo ekusatyelwa ngayo ekucombululeni uGawulayo eAfrika kukunikela ngeecondom, iicondom, iicondom ezingakumbi. Abaqhubi beelori bazifumana felefele kwimida yamazwe. Amaphephandaba azikhupha zikwizingxobo. Iikliniki nabasebenzi abanyamekela impilo bagcina intaphane yazo.
Ngoxa iindlela ezinjalo zisenokuba nempembelelo ethile ekusasazweni kukaGawulayo, nazo zineengxaki—ngokukodwa eAfrika. Umsébenzi onyamekela impilo uStefan van der Borght weMedecins Sans Frontieres eAngola uyacacisa ukuba xa unikele ngeecondom ezizizigidi ezithathu, loo nto ibonakala ilungile. Kodwa oko kuthetha ukuba amadoda asisigidi esinesiqingatha anokuba neentlobano zesini kabini zize ziphele.
Ngapha koko, ngaphandle kobunzima obubandakanyekileyo ekuzilungiseni nasekuzisasazeni, ukusasazwa kweecondom ngokungakhethiyo kunawuphi umphumo ekuziphatheni vakalala ngokwesini—esona sizeka-bani sikaGawulayo eAfrika? Zonke izibakala zibonisa ukuba izinto ezinjalo zikhuthaza ukuziphatha okubi ngokwesini kunokukudimaza. Kwanabasemagunyeni eburhulumenteni baqalisa ukusiqonda esi sibakala. Elinye ilizwe laseAfrika sele liyalele ijelo leendaba elilawulwa nguRhulumente ukuba liyeke ukubhengeza iicondom, ekubeni zikhuthaza ukuziphatha vakalala. Umbhali uKeith Edelston uhlabela mgama kwincwadi yakhe ethi AIDS—Countdown to Doomsday: “Ngenxa yale ngozi . . . efumaneka ngokusetyenziswa kweecondom, licace mhlophe elokuba ukuba neqabane elinye ngokungqongqo kokuphela kwendlela eza kukhuseleka ngokupheleleyo.”
Kodwa ngaba ukubuyela ekubeni umntu abe neqabane elinye lomtshato yingcamango esengqiqweni?
Ukupheliswa KukaGawulayo
UNjingalwazi Reuben Sher, oyingcali ngoGawulayo eAfrika, uthi: “Ukuba abantu banokuyeka ukuziphatha vakalala ngomso lo usayo, le ntsholongwane ingafa. Abantu abanayo bangafa ibe oko ibingakukuphela kwale ntsholongwane.” Ngokufanayo, inqaku lomhleli kwiThe Star, iphephandaba elipapashwa eRhawutini, eMzanti Afrika, lithi “umntu ongaziphethanga vakalala okanye ongasebenzisi iinaliti zomnye umntu zokutofela iziyobisi okanye ongalwamkeliyo utofelo-gazi, kunzima gqitha ukuba afumane intsholongwane [iHIV].”
Kanye ngoku, amaNgqina kaYehova aseAfrika angaphezu kwama-450 000 ayaziphepha izinto ezinjalo. Akholelwa ngokuqinileyo kwelokuba imilinganiselo yokuziphatha esekelwe eBhayibhileni iyingenelo. Khawuqwalasele indlela aqiqa ngayo: Ekubeni uMdali, uYehova uThixo, wenza abantu, ngoko imigaqo ayalela abantu ukuba baphile ngayo kusengqiqweni ukuyinikel’ ingqalelo. Umgaqo obhalwe kumaHebhere 13:4 ngumzekelo omhle: “Umtshato mawubekeke ngeendlela zonke, nesilili masingadyojwa.” Kunokuziva bebandezwa ulonwabo, abo baye bazisebenzisa izibhalo ezinjalo baye bazisindisa ekwenzakaleni ngokwasemzimbeni nangokweemvakalelo.—Thelekisa IZenzo 15:29; 2 Korinte 7:1; Efese 5:3-5.
Okubangel’ umdla kukuba ngokufuthi amajelo eendaba aye athetha kakuhle ngemilinganiselo yokuziphatha yamaNgqina kaYehova eAfrika: “[Aye] azibonakalisa . . . engabemi abafanelekileyo, abanocwangco abaphila ngemilinganiselo yokuziphatha ephakamileyo,” yatsho njalo iDaily Telegraph yaseLondon, eNgilani. Yongezelela ngelithi: “Ukuziphatha vakalala nokuba nesithembu okuthandwayo libutho labantu laseAfrika akucingwa nokucingwa ngamaNgqina.” Ngokufanayo, umbhali wencwadi ethi Contemporary Transformations of Religion, uBryan Wilson, wagqabaza esithi “kwibutho labantu laseAfrika, amaNgqina . . . aba ngabantu abakhethekileyo” kwaye “umphumo . . . wemilinganiselo [yawo] yokuziphatha ucacile phakathi kwawo.”
Oku akuthethi ukuba amaNgqina kaYehova akhuseleke ngokupheleleyo kwimiphumo kaGawulayo. Wambi aye asulelwa ngamaqabane awo omtshato angabambeleliyo kwimigaqo yobuKristu abambelela kuyo, yaye amanye angenwa sesi sifo ngaphambi kokuba abe ngamaNgqina. Kwakhona, ambalwa aye anyula ukubuyela emva kwiindlela zokuziphatha kakubi zehlabathi lanamhlanje, yaye iqaqobana lawo liye lafumana uGawulayo njengenxalenye yesiqhamo seendlela zalo. (Galati 6:7) Noko ke, abo ngabom baphuthuma indlela yobomi yokuziphatha okubi baye baphulukana kwanelungelo labo lokuhlala kwibandla lamaKristu. (1 Korinte 5:13; 6:9, 10) Kodwa ubukhulu becala uninzi lwamaNgqina kaYehova angaphezu kwezigidi ezine ehlabathini jikelele anandipha impilo entle ngokwasemzimbeni, ngokweemvakalelo nangokomoya ngenxa yokubambelela kwimigaqo yoMdali engokuziphatha.
Okuvuyisayo kukuba iBhayibhile ibonisa ukuba isicombululo esihlala sihleli kwizibetho ezinjengoGawulayo sisemnyango. (ISityhilelo 21:1-4) UYehova uThixo uthembisa ihlabathi elitsha apho ziya kususwa ngokupheleleyo zonke izenzo zokuziphatha okubi ezibangela izifo ezifana noGawulayo. Akuyi kubakho zimeko zinjengokubandezeleka komntu omsulwa, ekubeni wonk’ ubani eya kuphuthuma iindlela zobomi obuthe tye nobuyingenelo obuvelisa ulonwabo lokwenene.—Isaya 11:9; 2 Petros 3:13.
[Amagama acatshulweyo akwiphepha 9]
“Asimele sichithe izigidi zezigidi kuphando nakwimveliso . . . Sifanele sibuyele ekuziphatheni okuhle.”—UGqr. Mark Hendricks, isazi ngenkqubo yokuzikhusela komzimba kwizifo saseMzantsi Afrika
[Umfanekiso okwiphepha 9]
Ukuqinisekisa ukuba neqabane lomtshato elinye yindlela ebalulekileyo yokuphepha ubhubhani kaGawulayo
[Umfanekiso okwiphepha 10]
UThixo uthembisa ihlabathi elitsha elingenazo ngokupheleleyo izifo ezinjengoGawulayo