Imbono YeBhayibhile
“Intonga Yokuqeqesha”—Ngaba Iphelelwe Lixesha?
“Ukumatha kubotshiwe entliziyweni yomntwana; intonga yokuqeqesha yokumkisa kuye.”—IMizekeliso 22:15.
“Nakuphi na ukohlwaya emzimbeni kuyenzakalisa ngokweemvakalelo ibe akufanale kwenziwe.”—Umbutho weParents Anonymous.
UKUKHANKANYA kweBhayibhile “intonga yokuqeqesha” kuqhwaya impikiswano eshushu. Oku kuyaqondakala, kuba nyaka ngamnye kufa amawakawaka abantwana ngenxa yokuxhatshazwa ngokoqobo emzimbeni ngumzali. Mhlawumbi kungesi sizathu enye incwadi echaza ngeBhayibhile iwuchaza phosakeleyo umyalelo weBhayibhile wesohlwayo esingokwasemzimbeni ngokuthi ‘yingcamango nje esekelwe kwizithethe zabantu ababephila ngexesha lokubhalwa kwayo.’
Kodwa iBhayibhile ayizange iphefumlelwe ziingcamango ezingokwesithethe—yaphefumlelwa nguThixo. (2 Timoti 3:16) Ngaba ukuthetha kwayo ‘ngentonga yokuqeqesha’ akukho ngqiqweni? Kubalulekile ukuba sihlolisise “intonga” ngokomongo wayo. Ukuzekelisa singathi: Iziqwengana zomdlalo wokucombulula ijigsaw puzzle zikhangeleka zingabangeli ngqiqo. Kuphela kusemva kokuzidibanisa ngokweendawo zazo anokuthi umntu abone umfanekiso opheleleyo. Ngokufanayo, “intonga” isisiqwengana nje esinye somfanekiso. Ukuze sibone umfanekiso opheleleyo, sifanele sidibanise “intonga” neminye imigaqo yeBhayibhile enokuthanani noqeqesho.
Imbono Elungeleleneyo
Ngaba iBhayibhile ikhuthaza kuphela isohlwayo esingokwasemzimbeni? Qwalasela eli cebiso lilandelayo:
• “Musani ukubenza bacaphuke abantwana benu.”
• “Musani ukubalungisa ngokugqithiseleyo abantwana benu, okanye niya kubaphul’ intliziyo.”
‘Oko kusengqiqweni gqitha kunecebiso leBhayibhile,’ bambi basenokutsho. Kodwa eli licebiso leBhayibhile. Libhalwe kwabase-Efese 6:4 (The New Jerusalem Bible) nakweyabaseKolose 3:21 (Phillips).
Ewe, imbono yeBhayibhile isengqiqweni. Iyavuma ukuba ngokuqhelekileyo isohlwayo esingokwasemzimbeni asiyondlela eyeyona inempumelelo yokufundisa. IMizekeliso 8:33, (NW) ithi, “Phulaphulani uqeqesho” ayithi, ‘Luveni [emzimbeni] uqeqesho.’ Yaye IMizekeliso 17:10 ibonisa ukuba “ukukhalinyelwa kuyangena konengqondo ngaphezu kwemivumbo elikhulu kosisinyabi.” Ngokubhekele phaya, iDuteronomi 11:19 incomela uqeqesho oluthintelayo, ukusetyenziswa ngokuyingenelo kwamathuba angacwangciswanga ukufaka imilinganiselo yokuziphatha kubantwana bakabani. Ngaloo ndlela, imbono yeBhayibhile ngoqeqesho ilungelelene.
Kuthekani ‘Ngentonga’?
Sekunjalo, iBhayibhile iyayikhankanya “intonga” yokuqeqesha. (IMizekeliso 13:24; 22:15; 23:13, 14; 29:15) Oku kufanele kuqondwe njani?
Igama elithi “intonga” liguqulelwe ukusuka kwigama lesiHebhere elithi sheʹvet. KumaHebhere, igama elithi sheʹvet lithetha induku okanye umsimelelo, onjengalowo usetyenziswa ngumalusi. Kulo mongo intonga yegunya ibonisa ukhokelo lothando, kungekhona ubungqwabalala.—INdumiso 23:4.
Ngokufuthi igama elithi sheʹvet lisetyenziswa ngokufuziselayo eBhayibhileni, limela igunya. (2 Samuweli 7:14; Isaya 14:5) Xa libhekisela kwigunya labazali, igama elithi “intonga” alibhekiseli ngokukodwa kwisohlwayo esingokwasemzimbeni. Libandakanya zonke iintlobo zoqeqesho, ngokufuthi ekungeyomfuneko ukuba lube lolwasemzimbeni. Ibe xa kusetyenziswa ukohlwaya okungokwasemzimbeni, ngokuqhelekileyo oko kungenxa yokuba ezinye iindlela zingqineke zingaphumeleli. IMizekeliso 22:15 ithi ukumatha “kubotshiwe” (“kutshele,” NJB; “kwendele nzulu,” The New English Bible) entliziyweni yalowo ufumana uqeqesho olungokwasemzimbeni. Kubandakanyeke okungakumbi kunokufeketha kobuntwana.
Lufanele Luphunyezwe Njani Uqeqesho?
EBhayibhileni, uqeqesho lusoloko ludityaniswa nothando nobulali, ingenguwo umsindo nobungqwabalala. Umluleki onobuchule umele abe “nokuthantamisa kubantu bonke, . . . enyamezela ububi, ebaqeqesha ngobulali abo baphikayo.”—2 Timoti 2:24, 25.
Ngoko ke, uqeqesho alukokukhutshwa kwemvakalelo ngumzali. Kunoko, luyindlela yokufundisa. Ekubeni lunjalo ke, lufanele lufundise umntwana owonayo. Xa luphunyezwa ngomsindo, uqeqesho olungokwasemzimbeni lufundisa isifundo esiphosakeleyo. Luphumeza imfuno yomzali, ingeyiyo eyomntwana.
Ngokubhekele phaya, uqeqesho olunempumelelo lunemiqathango. KuYeremiya 46:28 uYehova uthi kubantu bakhe: “Ndokuthethisa ngokusesikweni.” Oku kubaluleke ngokukhethekileyo xa siphumeza uqeqesho olungokwasemzimbeni. Ukumbetha nokumdlikidla umntwana kunokukhokelela kumonakalo wengqondo kwanasekufeni.a Ukwenza ngaphaya kwenjongo yoqeqesho—ekukulungisa nokufundisa—kunokukhokelela ekuxhaphazeni umntwana.b
IBhayibhile Ayikukhuthazi Ukuxhaphaza
Ngaphambi kokuba abalungise abantu bakhe, uYehova wathi: “Musa ukoyika, . . . ngokuba ndingakuwe.” (Yeremiya 46:28) Uqeqesho alufanele lushiye umntwana eziva elahliwe. Kunoko, umntwana umele aqonde ukuba umzali ‘unaye’ njengokhuthazo lothando noluxhasayo. Ukuba ukuqeqesha okungokwasemzimbeni kujongwa njengokuyimfuneko, umntwana ufanele asiqonde isizathu soko. IMizekeliso 29:15 ithi “intonga nesohlwayo sinika ubulumko.”
Kusisibakala esibuhlungu namhlanje ukuba abaninzi bayisebenzisa kakubi “intonga” yegunya lobuzali. Kanti, akunakufunyanwa tyala ngemigaqo elungeleleneyo yeBhayibhile. (Thelekisa iDuteronomi 32:5.) Xa siqwalasela “intonga” ngokwalo mongo, sibona ukuba yenzelwe ukufundisa abantwana, ingekuko ukubaxhaphaza. Njengakweminye imibandela, iBhayibhile ingqineka ‘inceda ekufundiseni, ekohlwayeni, ekululekeni, ekuqeqesheni okusebulungiseni.’—2 Timoti 3:16.
[Imibhalo esemazantsi]
a Incwadi ethi Outgrowing the Pain: A Book for and About Adults Abused as Children ilumkisa ngelithi: “Ukubetha kunokuba kukumxhaphaza umntwana xa kusenziwa ngokungakhathali, ngamandla anokwenzakalisa. Ukusebenzisa izinto zokubetha, ukuntlitha ngenqindi, ukubetha abantwana abasebancinane gqitha nokubabetha kwiindawo ezenzakala lula (ubuso, intloko, isisu, umqolo, amalungu esini) kunokwandisa ukuba nokwenzeka kwento yokuba isohlwayo esingokwasemzimbeni sibe kukuxhatshazwa kwabantwana.”
b Incwadi ethi Father Power, nguGqr. Henry Biller noDennis Meredith, ithi: “Isohlwayo esingokwasemzimbeni sifanele sibe sesobulali ngokupheleleyo ukuze sisebenze. Ukuba sivela kumntu amthandayo nalowo amaziyo ukuba uyamthanda, impembelelo yeemvakalelo iya kwanela ekwenzeni umntwana acinge ngoko akwenzileyo.”
[Inkcazelo Ngomfanekiso okwiphepha 16]
The Bettmann Archive