Amaxhoba Okanye Abafeli-nkolo—Uyintoni Umahluko?
UKUTYHUBELA yonke imbali, inkohlakalo yoluntu endodeni, emfazini, nasemntwaneni iye yabangela ukubandezeleka okungenasiphelo waza umphumo waba kukubakho kwamawaka amaxhoba. Enoba kungenxa yezobupolitika, ubuzwe, ubuhlanga, okanye unqulo, kuye kwaphalazwa igazi labantu abamsulwa yaye lisaqhubeka liphalazwa. Kuye kwesamela intiyo ngaphezu kothando nokuqonda. Umoya womkhethe uyakuphelisa ukunyamezelana. Yaye ukubulalana kuyaqhubeka.
Kwiinkulungwane ezidluleyo, imikhosi iye yalwa, yaye ngokwentelekiso bambalwa abantu abangekho mkhosini abebebandakanyeka. Kwinkulungwane yethu yama-20, ngenxa yokuba kuye kwakho iziqhushumbisi, iinkanunu kunye nemijukujelwa, liye laphakama inani labantu abenzakala bengekho mkhosini kangangokuba olunye uhlolisiso luthi: “Abantu abangekho mkhosini ngoku ngomlinganiselo omkhulu ngabona baba ngamaxhoba emfazwe. Kule nkulungwane abantu abaninzi abangekho mkhosini nabebengaxhobanga baye bafa kakhulu ngaphezu kwamajoni aqeqeshiweyo.” Abantu abamsulwa baye bafa kwiimfazwe eziqhwaywe ziinkokeli zobupolitika. Kule nkulungwane yethu kuphela, inani lamaxhoba emfazwe liye landa, izigidi ezingaphezu kwekhulu zifile namakhulu ezigidi angxwelerhekile kukwenzakala nakukufelwa ngabathandekayo.
Ukongezelela kumaxhoba emilo yanamhla, kuye kwakho nabafeli-nkolo.a Uyintoni umahluko? Izigidi—amaYuda, amaSlav, iiGypsy, amafanasini, nabanye—zafa njengamaxhoba kwiJamani yamaNazi ngenxa nje yezo zinto ayezizo. Kwakungekho nto yayinokubanceda, kwakungekho ndlela yimbi babenokwenza ngayo. Phantsi kwaloo nkqubo ingendawo, ukufa kwabo kwakulusizi. Kwelinye icala, abanye kwakungeyomfuneko ukuba bafe. Ngebabekuphephile ukufa, ukanti, ngenxa yemigaqo yabo, bakhetha ukungakuphephi.
Omnye umzekelo odumileyo yayingulowo womfundisi ongumKatolika uMaximilian Kolbe, owayenceda iimbacu ezingamaYuda ebudeni beMfazwe Yehlabathi II. Ngowe-1941 “wathunyelwa [kwinkampu yoxinaniso yamaNazi] eAuschwitz, apho wanikela ngobomi bakhe endaweni yelinye ibanjwa ela-ligwetyelwe ukufa uFranciszek Gajowniczek. Okokuqala walanjiswa, ekugqibeleni watofwa ngetyhefu ebizwa ngokuba yiphenol waza umzimba wakhe watshiswa.” (IEncyclopædia Britannica) Waba ngumfeli-nkolo ozinikeleyo—into eyayahlukile ngokwembono yonqulo lwamaProtestanti nolwamaKatolika.
Ebudeni bexesha lamaNazi eJamani (ngowe-1933-45), amaNgqina kaYehova atshutshiswa ngokukrakra ngenxa yokuba akhalipha aza ahlala engoondilele yaye akwala ukungenelela imfazwe kaHitler. Amawaka athunyelwa kwiinkampu zoxinaniso ezoyikekayo, apho amaninzi abulawayo aza amanye afa ngenxa yokuphathwa kakubi. Kanti, kwakungeyomfuneko ukuba abandezeleke aze afe. Ayenikwe ukhetho. Ayenikwe ithuba lokukhululeka. Ukuba nje ayenokutyikitya iphepha elithi ayalulahla ukholo lwawo, ayenokukhululwa. Uninzi lwawo lwakhetha ukungalityikityi elo phepha ibe aluzange lube ngamaxhoba okuphathwa kakubi ngamaNazi kuphela kodwa lwaba ngabafeli-nkolo. Ngaloo ndlela, ngoxa bonke abafeli-nkolo bengamaxhoba, ngamaxhoba ambalwa kuphela awayenokuba ngabafeli-nkolo nawakukhethayo oko. Boyisa ngoxa babejamelene nokufa.
Ngaphandle kokukhetha icala abantu abaninzi abangengomaNgqina bayasingqinela esi sibakala. “UMfundisi waseSwitzerland uBruppacher ngowe-1939 waphawula ukuba ‘Ngoxa abantu abazibiza ngokuba ngamaKristu beye basilele xa bevavanywa, la mangqina kaYehova angaziwayo, njengabafeli-nkolo abangamaKristu, ngokungagungqiyo ayaqhubeka ekuchasa ukunyanzelelwa kwesazela ekwenzeni okuchaseneyo naso kwanokunqula izithixo kobuhedeni . . . Ayatshutshiswa ade afe kuba, njengamangqina kaYehova kwananjengabo bafuna uBukumkani bukaKristu, awafuni ukunqula uHitler kunye neSwastika.’”
Noko ke, akukho kwiJamani yamaNazi kuphela apho amaNgqina kaYehova aye agcina ingqibelelo yawo kwada kwasa ekufeni. Kuye kwafuneka abonise inkalipho yawo kubuKomanisi, kubuFasi, kwanakwezinye iintlobo zobuzwilakhe bezobupolitika, kwakunye nenkcaso evela kwiinkonzo zonqulo. Kwanakumazwe aseNtshona ekufane kuthiwe alawulwa ngenkqubo yolawulo-melo, amaNgqina aye ajamelana nogonyamelo. Inqaku lethu elilandelayo liya kuchaza ngokweenkcukacha ezinye iimeko ezibandakanya amaNgqina awafumana uloyiso ngoxa ayejamelene nokufa.
[Umbhalo osemazantsi]
a Ixhoba lichazwa “njengalowo uye wenzakaliswa okanye wabulawa ngomnye . . . Ubani oye wenzakaliswa okanye wabandezeleka ngenxa yesenzo, imeko, okanye uthunywashe othile.” Kwelinye icala, umfeli-nkolo “ngulowo ukhetha ukufa kunokuba alahle imigaqo yonqulo. . . . Ubani oncama izinto ezininzi okanye obandezeleka kakhulu ukuze ahambisele phambili inkolo, injongo, okanye umgaqo othile.”—IThe American Heritage Dictionary of the English Language, uHlelo Lwesithathu.
[Umfanekiso okwiphepha 3]
Emva kweMfazwe Yehlabathi II, iinkundla zaseMpuma Jamani zabamba amaNgqina kaYehova ngokuphosakeleyo ziwatyhola ngelithi aziintlola zaseMerika
[Inkcazelo]
Neue Berliner Illustrierte