Imbono YeBhayibhile

UKristu Ukho!

“UMANDELA uyeza! uMandela uyeza!” itsho njalo ingoma yabantwana baseSoweto, eMzantsi Afrika. Ukukhululwa kukaNelson Mandela entolongweni ngomhla we-11 Februwari 1990, kwakulangazelelwa gqitha kujongwa njengokuqalisa kokuguquka kwezinto eMzantsi Afrika. Phofu ke, kangangeminyaka emininzi ngaphambi kokukhululwa kwakhe, ubukho bakhe babuvakala. Ngoxa wayesesentolongweni, wayeqhubeka ngenkuthalo “nephulo elingayekeleliyo lokuphelisa ucalu-calulo.” Kunjengoko elinye iphepha-ncwadi leendaba lezizwe ngezizwe latshoyo, iminyaka engama-27 yokuvalelwa kwakhe ayizange ibuthomalalise “ubukho bakhe—okanye inkalipho yakhe.” Ukukhululwa kwakhe entolongweni kuwucacisa kakuhle umahluko phakathi kokuza nobukho.

Ngokufanayo, ngokubhekisele ekuthabatheni kukaYesu Kristu igunya lakhe lobukumkani, ababhali beBhayibhile benkulungwane yokuqala benza umahluko phakathi kokuza kwakhe nobukho bakhe. Ubukho bukaKristu Yesu esemandleni obukumkani babuya kubonakala buze buqondwe kwiminyaka emininzi ngaphambi kokuba ‘eze phezu kwamafu ezulu, enamandla, nobuqaqawuli obukhulu.’ (Mateyu 24:30) Ubukho bukaKristu obungabonakaliyo (ngesiGrike, pa·rou·siʹa) babuza kwandulela oku kuza (ngesiGrike erʹkho·mai) eze kugweba esi sizukulwana sinemvukelo nesingendawo.

UPa·rou·siʹa—Uthetha Ntoni?

Igama lesiGrike elithi pa·rou·siʹa ngokoqobo lithetha “ukuba ndawonye” yaye “laye laba ligama laseburhulumenteni lokubiza utyelelo lomntu okwisigxina esiphezulu, ngokukodwa olwabalawuli nookumkani abatyelela ilizwe elithile.” ITheological Dictionary of the New Testament ithi: “[IParousia] ibonisa ngokukhethekileyo ubukho obubonakalayo.” Yaye mayela nobukho bukaKristu Yesu, incwadi ethi The Parousia ithi: “IZibhalo azizange zithethe ‘ngeParousia yesibini.’ Nokuba yayiza kuba njani na, yayiyinto engaqhelekanga, eyayingazange ibekho ngaphambili, eyayingasayi kuphinda yenzeke. Yayiza kuba bubukho obahlukileyo nobungaphezu kwazo zonke iindlela awayebonakala ngazo ebantwini.”

Egqabaza ngamazwi kaYesu esiprofeto xa wayephendula imibuzo yabapostile kwiNtaba Yeminquma, uNjingalwazi A. T. Robertson kwiWord Pictures in the New Testament ubhala athi uYesu “wayesebenzisa ukutshatyalaliswa kwetempile neYerusalem okwenzeka ngexesha leso sizukulwana ngowama-70 A.D., kwakhona njengomqondiso wokuza kwakhe kwesibini nowesiphelo sehlabathi . . . okanye inzaliseko yexesha.” Yayisithini le mibuzo, yaye uYesu wayiphendula njani?

Umqondiso Wobukho BukaKristu

Njengoko kubhalwe kuMateyu 24:3, abapostile bambuza besithi: “Sixelele ukuba ziya kubakho nini na ezo zinto, uya kuba yini na umqondiso wokufika kwakho, nowokupheliswa kwephakade eli?” Ekuphenduleni kwakhe, uYesu waxelela abafundi bakhe umqondiso oya kuba bubungqina obubonakalayo bobukho bakhe obungabonakaliyo esemandleni oBukumkani. Umqondiso opheleleyo wawuquka iimfazwe ezingazange zibekho ngaphambili, ukunqongophala kokudla okwandayo, iinyikima zomhlaba ezitshabalalisayo, iindyikitya zokufa kunye nokwanda kolwaphulo-mthetho nokoyika. Ubukho bukaKristu buya kuba lixesha lesiphithiphithi nelibangela ixhala ehlabathini lonke. Oorhulumente babantu kunye neenkokeli zehlabathi aziyi kukwazi ukuhlangabezana ngempumelelo nenkqubo yehlabathi ewohlokayo.—Mateyu 24:7, 12; Luka 21:11.

Evuma indlela ayinyaniso ngayo amazwi kaYesu esiprofeto, unjingalwazi wezifundo zobupolitika, uJohn Meisel, wathi: “Elona xesha liphawulekayo lifikelela esiphelweni, ukuze lithatyathelwe indawo ngulowo ondlela zakhe zingekaqondwa kakuhle.” Emva kokuthetha ngokuphelelwa kobuKomanisi, ukusilela kobuSoshiyali nokunganelisi kobukhapitali, uNjingalwazi uMeisel wahlabela mgama esenjenje: “Iingxaki ezininzi zoluntu zingaphaya kolawulo lwenzululwazi ngezentlalo yaye zifuna ukuconjululwa ngezinye iindlela.” Kuthetha ntoni oko? “Izinto ekusekelwe kuzo iingcamango zabantu ngeli hlabathi ziyawohloka yaye zifuna ukuthatyathelwa indawo zezinye.”

Ubukho BukaKristu Obubonakalayo

Phezu kwazo nje iimeko ezimaxongo zeli hlabathi liwohlokayo, ubukho bukaYesu esemandleni obukumkani baqalisa kwiminyaka engaphezu kwama-75 edluleyo yaye buye beviwa ngendlela engathandabuzekiyo nengqalileyo.a Phezu kwawo nje umonakalo owabangelwa ziimfazwe ezimbini zehlabathi, uKumkani obekwe etroneni, uKristu Yesu, uye wanenxaxheba ngenkuthalo ekuveliseni uhlanga olutsha lwabantu—abantu begama likaYehova ‘abaphuma kuzo zonke iintlanga nezizwe nabantu neelwimi.’ Ubukho bukaKristu obubonakalayo buye balukhawulezisa ucwangciso lwazwenibanzi lokushumayela nokufundisa oluchukumise iintliziyo zezigidi zabantu ezityekele ebulungiseni. Baye bashukunyiselwa ukuba beme ngakwicala loBukumkani bukaYehova obulawulwa nguKristu Yesu.—ISityhilelo 7:9, 10.

Ngenxa yobungqina bamihla le obandayo bokuba umqondiso owahlukahlukeneyo wobukho bukaKristu uzalisekile, kumaKristu aphaphileyo kucacile ukuba sijongene nesiphelo sexesha. Ngoku lixesha lokuba ‘sinikele ingqalelo egqithisileyo’ kuKumkani obekwe etroneni, uKristu Yesu. (Hebhere 2:1) Uyasiyala: “Phaphani ngoko, amaxesha onke nikhunga, ukuze kuthiwe nikufanele ukuzisaba zonke ezo zinto ziza kuhla, nokumiswa phambi koNyana woMntu.”—Luka 21:36.

[Umbhalo osemazantsi]