Iyintoni Inkqubo YesiZukulwana Esitsha?

ASINGOMBUTHO, ukanti amakhulu emibutho axhasa iimfundiso zayo. Ayinazinkokeli zisendaweni ethile, ukanti izithandi zobulumko nabafundisi bayo mhlawumbi bangamawaka. Ayinancwadi isemthethweni yeemfundiso neenkolelo zayo, ukanti abo bathe phithi yiyo banokusifumana isivumo sabo sokholo phantse kuyo nayiphi na imizi yogcino-zincwadi kawonke wonke ehlabathini lonke. Ayinathixo wayo omele anqulwe, ukanti isoloko ikhuthaza ingcamango yokuba kukho uthixo onokufunyanwa kuyo yonke indawo.

Yintoni leyo? Yinkqubo yesiZukulwana Esitsha: umxube ongomelelanga weengcamango zonqulo, zempucuko, zentlalo, zezobupolitika nezenzululwazi, odityaniswe nentabatheko yempambano yesithethe saseMpuma, izinto ezingenakuchazwa yinzululwazi, ubugqi kwanezinye iintlobo zenzululwazi ngengqondo yanamhlanje. Kulo mxube kukwakho nenkolelo yokuvumisa ngeenkwenkwezi, ukuvela ngokutsha, ingcamango yokuba kukho izidalwa eziphila komnye ummandla ongengomhlaba, indaleko nobomi emva kokufa. Ukuxhalabela imekobume nempilo kukwayenye into ebalulekileyo ekhoyo kuwo.

Nabani na angalilungu lale nkqubo. Akukho sithethe sithile sokuyingenela okanye lubhaptizo. Ibe akukho nemfuneko yokuba abantu balahle iinkonzo zabo ukuze babe ngamalungu ayo. Kwelinye icala, abaninzi bakuthiyile ukubizwa njengamalungu enkqubo “yesiZukulwana Esitsha” kuba nje bekholelwa kwiingcamango ezithile ezamkelwayo yile nkqubo yesiZukulwana Esitsha okanye kuba benandipha oko kufane kubizwe ngokuthi bubugcisa okanye umculo wenkqubo yesiZukulwana Esitsha.

Kunqabile ukuba abo bazinikele kuyo bazichaze njengamalungu enkqubo yesiZukulwana Esitsha. Enyanisweni, eli binzana lithi “isiZukulwana Esitsha” ubukhulu becala lisetyenziswa ngamajelo osasazo. Kutshanje, iincwadi, iivenkile, iingqungquthela neenkqubo zokuqeqesha zenkqubo yesiZukulwana Esitsha ngokufuthi ziyaliphepha eli binzana. ILibrary Journal icacisa ukuba “ngasekupheleni kweminyaka yee-1980 ukubaxwa kwezinto ngamaziko osasazo kubangele imiphumo engathandekiyo kwezona nkolelo zenkqubo yesiZukulwana Esitsha (iiUFO, ukunxibelelana nemimoya, iikristale, njalo njalo); oku kubonakala kwisibakala sokuba iinkampani ezinkulu ezipapashayo . . . kwanabashicileli bezinto zesiZukulwana Esitsha ngokwandayo ziyalikhupha ibinzana elithi isiZukulwana Esitsha.” Ngaloo ndlela, abantu abaninzi basenokuphenjelelwa ziingcamango zenkqubo yesiZukulwana Esitsha bengakuqondi oko.

Yintoni Le Intsha Ngayo?

Inkqubo yesiZukulwana Esitsha igqalwa ngabaninzi njengeyona nto ibalaseleyo yala maxesha. Ngokutsho kukaNjingalwazi uCarl Raschke weYunivesithi yaseDenver, iingcamango zesiZukulwana Esitsha ngokusisiseko “zivela kwizithethe zeminyaka yee-1960 ezazingqubana.” Abanye abaphicothi nabo bakwalatha kwiminyaka yee-1960, ekwakukho kuyo amahippie awayekwiphulo lokufuna inkululeko nenyaniso, njengexesha eyaqala ngalo inkqubo yesiZukulwana Esitsha. Abaninzi ababesakuba ngamahippie, ngoku abakwiminyaka yama-40 nama-50 ubudala, basekwiphulo lokufuna loo nyaniso ifumaneka nzima. Kodwa iphulo labo alisachaswa ngelokuba liligugu nje labakwishumi elivisayo. Abaninzi babo ziingcaphephe kwimisebenzi ephambili efuna ulwazi, baphambili kwezobupolitika, yaye ngoku bagqalwa njengamalungu asezingqondweni ebutho labantu.

Ebudeni beminyaka yee-1970 neyee-1980, babesebenzisa izinto zabo zobukrelekrele nemali ukuze baqhubeke nephulo labo. Yaba yintoni imiphumo? Ingxubevange yeenkolelo zabo iye yamkelwa yaza yahlonelwa ngokubanzi. Amajelo osasazo ngokukhawuleza ayiqonda, nto leyo eyaphumela ekubeni intandabulumko yenkqubo yesiZukulwana Esitsha yaziwe ngokubanzi.

Enyanisweni, zimbalwa gqitha izinto ezintsha kwiinkolelo zenkqubo yesiZukulwana Esitsha. Ngokomzekelo, intandabulumko yayo ngokuyintloko isekelwe kwiintsomi zaseMpuma, ezineminyaka eliwaka ubudala. Khawuqwalasele nje iingcamango ezimbalwa zenkqubo yesiZukulwana Esitsha.

Ithemba LesiZukulwana Esitsha

Njengokuba unyaka wama-2000 usondela, ingcamango yokuba kuya kubakho ikamva elilunge ngakumbi, iwaka leminyaka elilunge ngakumbi, iya isiba ngundaba-mlonyeni. Eyona ngcamango iphambili yeyokuba ibutho labantu lezi mini njengokuba sisazi liya kuthatyathelw’ indawo libutho labantu beLizwe Lentelekelelo (Utopia).a Ngokutsho kwabafundisi benkqubo yesiZukulwana Esitsha, oku kuya kuphunyezwa ngokuthi kuguqulwe ngokupheleleyo indlela eqhelekileyo yokucinga ivumelane neentsomi ebezifihliwe okanye ebezityeshelwe de kwayiminyaka yakutshanje. Bathi eli xesha litsha lemvisiswano liya kuphelisa ubuchule babantu lize lizise uxolo lokomoya kwindalo iphela.

Eli themba libonakala ngokuyintloko lisekelwe kwizinto ezaxelwa kwangaphambili ngabavumisi ngeenkwenkwezi abathi umhla wethu uya kuba phakathi kwexesha elidlulayo likaPisces nexesha elizayo lika-Aquarius. Abacebi bale ngcamango bemi ngelokuba ingcamango kaPisces iye yanomphumo ombi kuluntu phantse iminyaka engama-2 000. Balatha kwiNgqobhoko njengebangele kwakho ibutho labantu elithanda izinto eziphathekayo nelingenankqubela. INgqobhoko ibekw’ ityala lokubambezela inkqubela yenyaniso. Kodwa namhlanje loo nyaniso kuthiwa inokufunyanwa kubugqi yaye iya kutyhilwa ebudeni bexesha elisondelayo lika-Aquarius, ixesha lokhanyo lokomoya, ixesha lesizukulwana esitsha.

Amalungu enkqubo yesiZukulwana Esitsha ayaphikisana ngelokuba eli butho litsha liya kuziswa ngamandla angengowamntu okanye ngomgudu womntu kusini na. Enye ingcamango ithi “uhlanga loLuntu oluguquguqukayo lwenkqubo yesiZukulwana Esitsha, oluvela kwimbewu yemfuza eyatyalwa ziinkcubabuchopho kwiminyaka engama-3 500 eyadlulayo, kungekudala luya kuntshula luze lusindise ihlabathi ekubaweni.”—The Wall Street Journal, Januwari 11, 1989.

Noko ke, elo themba lexesha loyolo, iLizwe Lentelekelelo, okanye ihlabathi elitsha, aliyonto intsha. Kwiintsomi zazo phantse zonke izithethe eziphambili ziquka ithemba lokuba kwikamva kuya kubakho ibutho labantu leLizwe Lentelekelelo. Iintsomi zamaSumer, amaGrike, amaRoma namaScandinavia zayiquka le nkolelo. IEncyclopedia of Religion ithi: “Ukulangazelelwa kwelizwe lentelekelelo apho ubani akhululekileyo kubuhlwempu nalapho kwesamele uxolo nendyebo kuye kwayinxalenye ebalulekileyo kunqulo lwaseTshayina ukususela kumaxesha aphambi kweCh‘in (ngaphambi kowama-221 BCE).” Eyona ncwadi ingcwele yamandulo, iBhayibhile, ithetha ngewaka leminyaka xa uluntu luya kwenziwa lufezeke, yaye imfazwe, ulwaphulo-mthetho, intlungu nokufa ziya kube ziphelisiwe.—ISityhilelo 21:1-4.

Ukunqula Isiqu Sakho

Kumfanekiso oshukumayo othi Out on a Limb ongebali lobomi bakhe alibhale ngokwakhe, umdlali odumileyo nongumbhali wezinto zenkqubo yesiZukulwana Esitsha uShirley MacLaine uma ngakulwandle oluvuthuzwa ngumoya olule izandla aze adanduluke athi: “NdinguThixo! NdinguThixo!” Njengaye, amalungu amaninzi enkqubo yesiZukulwana Esitsha akhuthaza iphulo lokufuna ukuziphakamisa nengcamango yokuba nguthixo wesiqu sakho. Afundisa ukuba abantu kufuneka kuphela bandise ulwazi lwabo ukuze bafumanise ukuba bangoothixo.

Athi, kwakuba kuphunyezwe oku ubunyaniso bento yokuba ulwalamano lwezinto zendalo luyafana buyacaca—yonke into inguthixo, yaye uthixo uyiyo yonke into. Le asiyongcamango entsha kwaphela. Iinkonzo zamandulo zaseMesopotami naseYiputa zazikholelwa ukuba izilwanyana, amanzi, umoya, nesibhakabhaka zingoothixo. Kutshanje, uAdolf Hitler kuthiwa wakhuthaza abanye ukuba bamkele “inkolelo enamandla yobugorha kuThixo okwiNdalo, uThixo okubantu bethu, kwikamva lethu, kwigazi lethu.”

Isithethe senkqubo yesiZukulwana Esitsha sizaliswe luncwadi, iingqungquthela neenkqubo zokuqeqesha ezixubusha ngobuchule bomntu siqu nokuziphucula. “Ukuziqonda mna siqu” ngowona mgaqo uthandwayo. Abantu bakhuthazwa ukuba bazame nantoni na enokubanceda bakhuphe ubuchule babo. Kunjengokuba omnye umbhali ekubeka oku kwiphephancwadi iWilson Quarterly, “imfundiso ephambili yale nkqubo yile ‘akukhathaliseki ukuba yintoni oyikholelwayo lo gama nje iluncedo kuwe kwanele.’”

UMargot Adler, umxhasi wenkqubo yesiZukulwana Esitsha, uchaza ukuba uninzi lwamabhinqa angenela inkqubo yesiZukulwana Esitsha akwenza oko “ngezizathu zokungenelwa ngokobuqu. . . . Ayithiyile imizimba yawo, ayazicaphukela. Angenela la maqela agxininisa isibakala sokuba ‘UnguThixokazi, umhle gqitha.’”

Iphephancwadi iNew York lichaza olunye usukelo lwelinye iqela lokuziphakamisa ngokuthi: “Elinye ibhinqa lidanduluka lithi, ‘Singabafundisi boKhanyo Olutsha. Singabona babalulekileyo.’ Abanye abanenxaxheba, abanxibe iiqhiya ezinonkontsho, amagxulushe aneentsiba, nezambatho ezibengezelayo, badanisa emahlathini, begquma besenza nezimbo zomzimba, begcuma.”

Ubugqi Obuphuculiweyo

Zimbi iingcamango zenkqubo yesiZukulwana Esitsha zikhuthaza imbono entsha nephuculiweyo yobugqi. Abaninzi abangamalungu enkqubo yesiZukulwana Esitsha abasabujongi ubuSathana njengobugqi. Umbhali wephephancwadi iFree Inquiry uthi: “Amagqwirha ayanda, akukho nalinye kuwo elinayo nayiphi na inkolelo eyamkela ubuSathana.”

Uhlolisiso olwenziwe kutshanje eJamani lwabonisa ukuba kwakukho iinkuntsela zamagqwirha angama-10 000 kwelo lizwe. Kwanabantwana ngokuchuliweyo barhwetyeshelwa kubugqi. Incwadi yaseJamani ethi Der Griff nach unseren Kindern (Ukunceda Abantwana Bethu Baqonde) ichaza ukuba kusetyenziswa “iikhasethi zabantwana zemidlalo, abantwana baqhelaniswa nomfanekiso omtsha wegqwirha elilibhinqa eliqhelekileyo elisebenzisa umlingo ukuze liphumeze iinjongo ezintle.” Le ncwadi ityatyadula ithi: “Ngaloo ndlela kwanengqalelo yabantwana abancinane itsalelwa kwindlela yenkqubo yesiZukulwana Esitsha esenokubakhokelela kubugqi.”

Kwiincwadi zakhe, uShirley MacLaine ukhuthaza ingcamango yokuba ubugqi bululwazi nje olufihlakeleyo ibe into yokufihlakala kwabo ayithethi ukuba abuyonyaniso. Le ntandabulumko ibambise abantu abaninzi ukuba balinge uqheliselo olungaqhelekanga lwemimoya, olunjengokuvumisa, ukuvumisa ngeenkwenkwezi, amandla okugqithisela iingcinga zakho komnye umntu ngaphandle kokusebenzisa nayiphi na imiqondiso nokunxibelelana nemimoya. Ukunxibelelana nemimoya kangangeminyaka engamawaka bekusaziwa njengokuba neshologu. Kodwa wona amalungu enkqubo yesiZukulwana Esitsha akubiza ngokuba lijelo lonxibelelwano. Ingcamango yawo ithi imimoya yabafileyo ikhetha abantu abathile ukuba babe ngamajelo okunxibelelana noluntu.

Aba kucingelwa ukuba ngamajelo angabantu balala obentlombe baze bathethe okanye babhale izigidimi “abazityhilelweyo,” ekuthiwa zivela kwabafileyo okanye kwizidalwa eziphila kummandla ongengomhlaba. Imimoya yabafileyo igqalwa njengoomakhwekhwetha beenkcuba-buchopho ezilindele ixesha elililo lokuvela ngokutsha. Okwangoku, kuthiwa ikhokelela uluntu kwixesha elitsha.

Amalungu amaninzi enkqubo yesiZukulwana Esitsha ahlanganisana rhoqo ngenjongo yokuphulaphula oko aba makhwekhwetha beenkcuba-buchopho bakuthethayo besebenzisa amajelo abo. Yaye abo bakholelwa kuyo bayazikhethela ukuba bafuna ukunxibelelana nayiphi na imimoya. Phakathi kwaleyo kuthiwa iyathetha namhlanje yimimoya kaJohn Lennon noElvis Presley, izidalwa eziphila kummandla ongengomhlaba ezinamagama anjengala uAttarro noRakorczy, negorha lemfazwe elineminyaka engama-35 000 ubudala lakwisiqithi sasentsomini iAtlantis eligama linguRamtha.

Inkqubo YesiZukulwana Esitsha Nempilo

Inani elandayo loogqirha bezonyango likholelwa kwelokuba abaguli abafanele banyangwe njengoomatshini abaphukileyo ibe bakholelwa kwelokuba kufanele kunikelwe ingqalelo kwimpilo yengqondo neyeemvakalelo kabani. Oku kwaziwa njengonyango lomzimba nengqondo, yaye akunanto yakwenza nenkqubo yesiZukulwana Esitsha. Noko ke, amalungu amaninzi enkqubo yesiZukulwana Esitsha alwamkele ngezandla ezishushu unyango lomzimba nengqondo. Incwadi ethi The Cosmic Self ichaza ukuba nangona engayichasanga indlela yezonyango eqhelekileyo, amalungu enkqubo yesiZukulwana Esitsha axhasa ukuba umguli anyangwe njengomntu opheleleyo, “isidalwa esiphilayo esinomzimba, ingqondo nomoya.”

Amalungu enkqubo yesiZukulwana Esitsha athi impilo entle inokufunyanwa ngaphandle konyango oluqhelekileyo. Iphephandaba laseBritani iThe Herald lithi, “Indawo apho inkoliso yabantu iqala khona ukufumana ingcamango yenkqubo yesiZukulwana Esitsha ikumazwe aneendlela ezizezinye zonyango.” Ibe ke kuzanywa ezona ngcamango zingaqhelekanga. Ngokomzekelo, ugqirha wezilwanyana nombhali waseOstreliya uIan Gawler uthi umhlaza usenokunyangwa ngokucamngca. Ezinye iindlela ezidume ngokuba zezenkqubo yesiZukulwana Esitsha ziquka ukuxilongwa ngokuvumisa ngeenkwenkwezi, ukuhlolwa ngokujongwa komoya okungqongileyo, unyango lokuyoba, utyando ngaphandle kokusebenzisa imela nonyango lobomi bexesha elidluleyo. Ezi ndlela zonyango ngokufuthi zibhengezwa kumaphephancwadi akhethekileyo athetha ngempilo, amayeza esintu, iivithamini, umthambo nokutya okunesondlo.

Inkqubo Yesizukulwana Esitsha Neekristale

Enye indlela ethandwayo yonyango yenkqubo yesiZukulwana Esitsha iquka ukusetyenziswa kweekristale namatye anqabileyo, anjengequartz, iametiste, itopazi, irubhi, iopal nesmarado. Umthengisi wamatye anqabileyo wenkqubo yesiZukulwana Esitsha u-Uma Silbey uthi: “Ukutyhubela imbali uya kufumana imizekelo yabantu bebutho elithile ababekholelwa kwelokuba iquartz inokwandisa amandla engqondo namandla okunyanga.” Wongezelela ngelithi: “AmaSumer, amaMaya nabanye abanezinye izithethe basebenzisa iikristale zequartz ngeenjongo zokunyanga.”

Zisetyenziswa njani ezi kristale? Abo basebenzisa ikristale ekunyangeni bathi izigulo ezisemzimbeni nasengqondweni zinokunyangwa ngokubeka iquartz namanye amatye anqabileyo kwiindawo ezithile zomzimba. UKatrina Raphaell, ongumxhasi wenkqubo yesiZukulwana Esitsha yokusetyenziswa kwekristale, uchaza ukuba iikristale “zinokubekwa phantsi komqamelo xa ulele ukuze zikwenze ube namaphupha akhuthazayo naneziprofeto. Zisenokusetyenziswa ekuphiliseni iimvakalelo eziguquguqukayo, zithuthuzele iingqondo ezikhathazekileyo zize zincede ziphilise ukungemi kakuhle komzimba. Zisenokufunjathwa ebudeni bokuphathwa yinimba nasebudeni bokuzala ukuze kufumaneke amandla awongezelelekileyo.”

Inkqubo YesiZukulwana Esitsha Nemekobume

Inkqubo yesiZukulwana Esitsha “iyakha, ixhalabele ukukhuselwa kwemekobume, isefashonini,” litsho njalo iphephancwadi labeshumi elivisayo laseBritani iTSBeat. Ukuba nenxaxheba ngenkuthalo ekukhuthazeni ukuba nolwazi ngomhlaba nezinto eziphila kuwo nokukhuselwa kwemekobume kuye kwafak’ isandla ekwenzeni inkqubo yesiZukulwana Esitsha ibonakale iyinto eyamkelekileyo, ibe into yokuba ibe nomdla kwimekobume iye yatsalela abaninzi kwiimfundiso zayo. Noko ke, iindlela zenkqubo yesiZukulwana Esitsha zokuxhalabela imekobume ngokufuthi zibonakaliswa ngendlela engqalileyo yokunqula indalo, zinezithethe ezifana nemisitho yakudala eyayisenzelwa uthixokazi womhlaba.

Ngaba le nto yokusetyenziwa kobugqi bakudala kumaxesha ethu ingazicombulula iingxaki zethu? Ngaba esi sijikelezi-langa siya kusindiswa bubulumko bamagqwirha nobezidalwa eziphila komnye ummandla ongengomhlaba? Ngaba siya kuze sibekho isizukulwana esitsha soxolo nempumelelo?

[Umbhalo osemazantsi]

[Ibhokisi ekwiphepha 23]

UMacLaine, Inkqubo YesiZukulwana Esitsha NoRamtha

“ELEMIMOYA laliyinto yokwenene nangona sasingaliboni okanye silinganise ubungakanani balo. Kukho izinto zokwenene ezininzi kunezo thina ‘sicinga’ ukuba zezokwenene. Loo nto yileyo iye yabizwa ngokuba lixesha elitsha lokucinga. Ixesha elitsha lokwazi. . . .

“Ndatyelela abaneshologu abavunyiweyo ababenxibelelana nabakwelemimoya abanikela ukhokelo. Ndakha ulwalamano naloo ‘mimoya.’ . . . Omnye wayo wawukrelekrele kakhulu kuneminye. Igama lawo . . . yayinguRamtha Okhanyiselweyo. . . . Wathi wayekhe waphila njengomntu ngexesha ekwakukho isiqithi sasentsomini esiyiAtlantis ibe wayesaziwa kakhulu ngexesha lakhe lobomi. . . . Njengokuba ndandijonge amehlo kaRamtha, ndaziva sele ndisithi, ‘Ngaba wawungumnakwethu ngokuya wawuphila kweloo xesha leAtlantis?’

“. . . Zathi waxa iinyembezi emehlweni akhe. ‘Ewe, ntanda,’ watsho njalo, ‘wena wawungumnakwethu.’”

UMacLaine utyatyadula athi: “Eyona nto iphambili yokomoya awayendifundisa yona yinyaniso yokuba thina sasinguThixo. Sasinolwazi njengaye.”—Dancing in the Light, nguShirley MacLaine.

Thelekisa iGenesis 3:5, apho iNyoka (uSathana) ixoka yathetha oku kuEva: “Kuba esazi uThixo ukuba, mhlana nithe nadla kuzo, oqabuka amehlo enu, nibe njengoThixo, nazi okulungileyo nokubi.” Abo banqwenela ukuba uThixo akholiswe ngabo bamele baphephe ukuzidibanisa nezidalwa zomoya ezingendawo nezinenkohliso. UMthetho kaMoses wathi: “Musani ukubheka kwabanemishologu; musani ukubafuna oosiyazi, ukuze nenziwe inqambi ngabo: ndinguYehova uThixo wenu.”—Levitikus 19:31.

[Ibhokisi ekwiphepha 26]

“Esinye Isiyobisi Kwibutho Labantu Elikhotyokiswe Ziziyobisi”?

“INKQUBO yesiZukulwana Esitsha—into entsha eyongezelela kwimpambano yokomoya neyonyango lwezifo zonke ebikho kwimbali yethu—ikhuthaza ukuxutywa kwezinto ezihlekisayo nezicaphukisayo. Ayikhuthazi nje kuphela ukungahlonelwa kukaThixo kodwa indlela ebhengezwa ngayo ngokubanzi yenza kuthandatyuzwe enoba oku akubandakanyi inkohliso egqithiseleyo engokonqulo kusini na. . . .

“Inkqubo yesiZukulwana Esitsha izama ukuquka ukucamngca, ukucinga okufanelekileyo, ukuphilisa ngokholo, . . . iintsomi, iyoga, ukuphilisa ngamanzi, iacupuncture, iziqhumiso, ukuvumisa ngeenkwenkwezi, iimfundiso zikaJung, ibiofeedback, iimvakalelo ezingaphaya kwezemvelo, ukukhafula, . . . ingcamango yendaleko, unyango lwezigulo zesini lukaReich, iintsomi zamandulo, . . . ukulalisa ngomlingo nentaphane yezinye iindlela ezicetyelwe ukwandisa ulwazi, kuquka nezinye izinto ezibolekwe kwizithethe eziphambili zonqulo. . . .

“Izinto zenkqubo yesiZukulwana Esitsha ezithabathele indawo unqulo zisenza isazela singasebenzi kunokuba zisikhathaze. Imfundiso yayo esisiseko ithi akukhathaliseki ukuba yintoni oyikholelwayo lo gama nje iluncedo kuwe kwanele. ‘Ukuba uyayikholelwa yinyaniso’: sitsho njalo isaci senkqubo yesiZukulwana Esitsha. . . .

“Ingongoma ayikho kwisibakala sokuba iindlela zonyango zenkqubo yesiZukulwana Esitsha ziyasebenza ngokwenene kodwa isekubeni enoba unqulo lumele luxutywe nezonyango kusini na. Ukuba lwenza abantu babe semqheleni ngokomoya, unqulo luba sesinye isiyobisi kwibutho labantu elikhotyokiswe ziziyobisi.”—“The New Age Movement: No Effort, No Truth, No Solutions, Notes on Gnosticism—Part V,” nguChristopher Lasch, Watson uNjingalwazi wezeMbali kwiYunivesithi yaseRochester, eNew York, eUnited States.

[Umfanekiso okwiphepha 24]

Phakathi kwezinye izinto, ubugqi benkqubo yesiZukulwana Esitsha benza ulingelo ngokuvumisa ngeenkwenkwezi, amandla okugqithisela iingcinga zakho komnye umntu ngaphandle kokusebenzisa nayiphi na imiqondiso, ukucamngca neekristale

[Umfanekiso okwiphepha 25]

Iindlela zokunyanga zenkqubo yesiZukulwana Esitsha ziquka ukusetyenziswa kweekristale