Abantu Abaselula Bayabuza . . .

Kutheni Ndimele Ndithethe NgoThixo?

“Wonke umntu unonqulo lwakhe. Awufanele uzame ukunyanzela abanye ngoThixo wakho.”—URacish oneminyaka eli-14 ubudala, waseGuyana.

“Ndiyathandabuza ukuthetha ngoThixo kuba ndoyika ukuhlekwa emva koko.”—URohan oneminyaka eli-17 ubudala, waseGuyana.

“Sifanele sithethe ngoThixo kuba unguMdali wethu yaye wasinika ubomi.”—UMarco oneminyaka eli-13 ubudala, waseJamani.

HAWUBEKE indlebe nje kwiqela labantu abaselula lincokola yaye mhlawumbi uya kufikelela kwesi sigqibo silusizi: Ngokuqinisekileyo ulutsha oluninzi alukuthandi ukuthetha kakhulu ngoThixo. Ukuba ukhankanya imidlalo, iimpahla, imifanekiso eshukumayo yamvanje, okanye abantu besini esahlukileyo ngokuqhelekileyo uya kuqalisa ingxubusho ebangela umdla. Noko ke, khawufane nje ngenkalipho ukhankanye uThixo, kuya kuthi cwaka ngokukhawuleza.

Lumbi ulutsha alukholelwa nje konke konke kuThixo. Lusenokuqiqa ngelithi ekubeni lungenakumbona, umele ukuba akakho—ukuthetha ngaye kubonakala kuyinkcitha-xesha. Sekunjalo, abo bangakholelwayo kuThixo ngokuqinisekileyo baligcudwana phakathi kwabantu abaselula. Ngokutsho kohlolisiso olwenziwa nguGallup, lumalunga nama-95 ekhulwini ulutsha lwaseUnited States olukholelwayo kuThixo. Eneneni, lo kaGallup wagqiba ngelithi: “Kuninzi lwabantu abaselula uThixo abamkholelwayo akangomgaqo nje ungacacanga noqikelelwayo, kodwa nguThixo wobuqu ohlola izenzo zabo aze abavuze okanye abohlwaye xa kuyimfuneko.” Ngoko, kutheni ulutsha oluninzi kangaka luthandabuza ukuthetha ngoko lukukholelwayo?

Isizathu Sokuba Bambi Barhoxobise

Kubonakala ukuba abaninzi bacinga ukuba bubukrwada ukuthetha ngemicimbi yokholo nokuba kuhle iingcamango zonqulo zigcinwe ziyimfihlelo. Lumbi ulutsha lubonakala luneentloni ngengcamango nje yokuxubusha ngoThixo. ‘Ngumjojo ukwenjenjalo,’ luqiqa ngelitshoyo.

Enoba iyintoni na imbono yoontanga bakho, wena umi phi kule mbambano? Lo mbuzo ufaneleke ngokukodwa ukuba wawukhuliswe njengomnye wamaNgqina kaYehova. Ngoba? Kuba ukunikela ubungqina, ukuxelela abanye ngoThixo, yeyona nto ibalulekileyo kuwo!—Isaya 43:9, 10; Mateyu 24:14.

Nakuba kunjalo, ludinyazwa yinkcaso oluhlangabezana nayo maxa wambi, lumbi ulutsha olungamaNgqina luyarhoxobisa ekubeni nenxaxheba kumsebenzi wokushumayela esidlangalaleni—okanye luba nenxaxheba ngenxa yokucengwa ngabazali balo. Olunye luba nesabelo kulo msebenzi kodwa ngokufihlakeleyo lunqwenela ukuba lungabhaqwa lusenjenjalo ngabahlobo balo basesikolweni. Esikolweni, abanye bazama ukuzigcina ziyimfihlelo iinkolelo zonqulo lwabo. Ngokufuthi oku kungenxa yokuba besoyika ukuhlekwa ngabo bafunda nabo eklasini. URyan oselula uyavuma: “Ndandisoyika ukuthetha ngoThixo, ngenxa yokuba izinxulumani zam zaziya kundibiza ngamagama amabi yaye ndandingenayo inkalipho yokuqhubeka nencoko.”

Kwandule ke kubekho abo barhoxobisa ngenxa yokuba besoyika kuba bengenakuphila ngokuvisisana nemilinganiselo yeBhayibhile ngokuzeleyo. Besiva umtsalane ‘weenkanuko zobutsha,’ baqiqa ngelithi kulunge ngakumbi ukuba bangazifanisi njengamaKristu kuba benokwenza into ephosakeleyo.—2 Timoti 2:22.

Bambi abathethi ngoThixo ngenxa yokuba beziva bengakufanelekelanga oko. UWilton oneminyaka eli-19 ubudala ukubeka ngale ndlela oku: “Ndandikufumanisa kunzima ukuthetha ngoThixo kwabo ndisebenza nabo kuba ndandivakalelwa kukuba ndandingakufanelekelanga ukuzimela izinto endandizithetha ngaye. Ndandicinga ukuba ukuba ndicelwa umngeni ngeenkolelo zam, ndandingenakuba nayo impendulo eyanelisayo.”

Imbopheleleko YamaKristu

Ngaba kunokwenzeka ukuba nawe uye warhoxobisa ukuthetha ngoThixo ngenxa yezizathu ezifanayo? Ukuba kunjalo, akuwedwa. Olunye ulutsha luye lwalwisana kwanezi mvakalelo. Phofu ke, abaninzi baye baqonda ukuba, phezu kwazo nje zonke izinto ezisenokudimaza ubani ekwenzeni njalo, kukho izizathu ezisiqhubela ekuxeleleni abanye ngoThixo. Ziziphi ezinye zezi?

UMarco oselula, okhankanywe ekuqaleni, wakubeka kakuhle oku xa wathi uThixo “unguMdali wethu yaye wasinika ubomi.” (ISityhilelo 4:11) Ewe, ubomi sisipho esixabisekileyo. Umdumisi wathi ngoThixo: “Ngokuba likuwe ithende lobomi.” (INdumiso 36:9) Ekubeni ufumene esi sipho, ngaba awufanele ubonakalise umbulelo ngaso?

Enye indlela yokubonakalisa umbulelo kukudumisa uYehova uThixo phambi kwabanye. UnguMsunguli welanga, inyanga, imvula, umoya esiwuphefumlayo, nokutya esikutyayo. (IZenzo 14:15-17) Umfundi uYakobi wathi: “Sonke isipho esilungileyo, naso sonke isipho esigqibeleleyo, sesaphezulu.” (Yakobi 1:17) Ngaba uyambulela uThixo ngezi zipho? (Kolose 3:15) Yiyiphi indlela entle ngakumbi yokuvakalisa umbulelo wakho kunokuthetha ngoThixo?—Luka 6:45.

Noko ke, eneneni uThixo usiyalela ukuba sithethe ngaye. UNyana wakhe, uYesu Kristu, wawayalela oku amaKristu: “Hambani ngoko niye kuzenza abafundi zonke iintlanga.” (Mateyu 28:19, 20) Ulutsha alubekelwanga ecaleni kwimbopheleleko yokuba nenxaxheba kulo msebenzi. Umdumisi uyayalela: “Dumisani uYehova . . . umlisela kwanomthinjana, amadoda amakhulu kunye nabafana: Mabalidumise igama likaYehova, ngokuba liyingxonde igama lakhe yena yedwa; indili yakhe ingaphezu komhlaba nezulu.” (INdumiso 148:7, 12, 13) Kodwa awufanele usijonge njengoxanduva esi sabelo. Eneneni, sililungelo—ungangomnye wabo ‘basebenza noThixo.’—1 Korinte 3:9, NW.

Kuthekani ukuba uziva ungafanelekanga? Umprofeti uYeremiya wayeneemvakalelo ezinjalo kumaxesha okubhalwa kweBhayibhile. Wathi: “Kwowu, Nkosi Yehova, yabona, andikwazi ukuthetha, ngokuba ndingumntwana.” Wasabela njani uYehova? “Musa ukuthi, Ndingumntwana: ke uya kuya kubo bonke endikuthuma kubo; konke endikuwisela umthetho ngako, uze ukuthethe.” (Yeremiya 1:6, 7) Ngoncedo lukaYehova uYeremiya wenza kanye oko kangangeminyaka engama-40!

Ngokufanayo nakumaKristu namhlanje, “ukukulingana [“ukukufanelekela,” NW] kwethu oko kuphuma kuThixo.” (2 Korinte 3:5) Kwanokuba ngokwemvelo uluhlobo oluneentloni, uThixo unokukunceda ube nenkalipho yokuthetha. Kwibandla lamaKristu kukho amalungiselelo anokukunceda ‘ukufanelekele’ ngakumbi ukuba ngumfundisi weLizwi likaThixo. Ukuba uziva ufuna uncedo oluthile lobuqu, kutheni ungathethi nomnye wabaveleli bebandla? Kusenokwenzeka ukuba kufuneka nje uzenzele ucwangciso lwesifundo seBhayibhile sobuqu okanye usebenze kunye nothile onamava ngakumbi.

Oko Unokukuphumeza

Ukuthetha ngoThixo kunokukwenza uzive uphumeze okuthile. Phakathi kwezinye izinto, uninzi loontanga bakho lufuna iimpendulo, lufuna uncedo ngokwenene. Abanalo ulwalathiso yaye abanawo umbono ocacileyo wekamva. Bayazibuza, ‘Kutheni silapha? Sisinge phi? Kutheni ihlabathi lizele ziinkathazo kangaka nje?’ NjengomKristu, unazo iimpendulo, yaye usenokuba ukweyona meko ilungileyo yokudlulisela olo lwazi koontanga bakho. Kukho izinto ofana nabo ngazo yaye mhlawumbi banokukhetha ukuthetha nothile okubudala babo kunokuthetha nomntu omdala.

Kuyinyaniso ukuba, maxa wambi uya kujamelana nenkcaso. Kodwa kwakhona usenokufumana abantu abasamkelayo isigidimi seBhayibhile. Elinye iNgqina eliselula lalihleli kuduladula lifunda umbhalo walo wobuqu wencwadi ethi Imibuzo Yabantu Abaselula—Iimpendulo Eziluncedo.a Inkwenkwe eyayihleli ecaleni kwalo yaqalisa ukufunda nayo. Le nkwenkwe yadanduluka: “Le yincwadi entle! Le ncwadi ithetha kakhulu ngoThixo. Inkoliso yabantu ayinamdla kunqulo.” Eli Ngqina liselula lakusebenzisa oku njengethuba lokuba nengxubusho ebanzi ngombandela wegama likaThixo.

Kuyavunywa ukuba, xa uzifanisa njengomKristu, unyanzelekile ukuba uphile njengaye. (1 Petros 2:12) Kodwa ihambo entle yobuKristu iya kwenza ukuba isigidimi sakho samkelwe ngakumbi. Khawuqwalasele la mava oselula ogama linguEric. Wachukunyiswa yihambo entle yolutsha olungamaNgqina kwisikolo awayefunda kuso. Oku kwavusa umdla wakhe ekufundeni okungakumbi ngoThixo. Kwaqaliswa isifundo seBhayibhile kunye naye, yaye namhlanje ungumKristu obhaptiziweyo okhonza kwikomkhulu lehlabathi lamaNgqina kaYehova eNew York.

Ukuthetha ngoThixo kunokukunceda nawe! Kunokuba yinkuselo. Xa abahlobo bakho bekwazi ukuba ungomnye wamaNgqina kaYehova, uninzi luya kukuhlonela. Basenokungatyekeli kangako ekukunyanzeleni ukuba ube nenxaxheba ekwenzeni okuphosakeleyo xa beqonda ukuba unemilinganiselo ephakamileyo yokuziphatha yaye besazi ukuba usenokusabela ngokunikela ubungqina.

Kakade ke, oku akuthethi kuthi ngalo lonke ixesha uvula umlomo wakho umele ucaphule izibhalo. Uya kuqhubeka unomdla kwimidlalo, iimpahla, okanye umculo yaye maxa wambi uya kufuna ukuthetha ngezinto ezinjalo. Kodwa khumbula: “Umlomo uthetha ngokuphuphuma kwentliziyo.” (Mateyu 12:34) Ukuba uthando ngoThixo lusentliziyweni yakho ngenene, ngokuzenzekelayo uya kufuna ukuthetha ngaye. Kwinkupho elandelayo, siza kuxubusha ngeendlela ezithile onokukwenza ngazo ngokunempumelelo oko.

[Umbhalo osemazantsi]

[Umfanekiso okwiphepha 15]

Ngaba uneentloni kukubonwa ngabantwana ofunda nabo xa ukumsebenzi wokushumayela esidlangalaleni?