Imbono YeBhayibhile
Ngaba Sikho Isono Esingaxolelekiyo?
NGABA sikho isohlwayo esingaphezu kokufa? Ewe sikho, ukufa ungenathemba lovuko ngenxa yokuba wenze isono esingaxolelekiyo. UYesu wathi kukho uhlobo lwesono ‘olungayi kuxolelwa.’—Mateyu 12:31.
Noko ke, iBhayibhile ithi uThixo uyaxolela. Nangona abantu benotyekelo lokuba nenzondo baze bangaxoleli, yena uThixo ‘uxolela ngokukhulu.’ (Isaya 55:7-9) Eneneni, nangona uThixo wayeza kulahlekelwa nguNyana wakhe amthandayo, wamthumela emhlabeni ukuze ngedini lakhe kucanyagushelwe okanye kuhlawulelwe izono zethu.—Yohane 3:16, 17; IZenzo 3:19; 1 Yohane 2:1, 2.
Ngexesha lakhe, uThixo uza kuvusa abantu abaninzi ababenze izono ezinzulu kodwa uya kuba ebaxolele ngezo zono zabo. (IZenzo 24:15; Roma 6:23) Enyanisweni, uYesu wathi ‘abantu baya kuxolelwa ngalo lonke uhlobo lwesono nokunyelisa,’ ngaphandle kwabantu abenze isono esingaxolelekiyo. (Mateyu 12:31) Ngoko usenokuzibuza, ‘Sisono esinzulu kangakanani esingenakuxolelwa nguThixo?’
Abanakuze Baguquke
Isilumkiso sikaYesu sasibhekisela kumntu ‘onyelisa umoya’ ngabom. Isono esinjalo asixoleleki. Wada wathi: “Akayi kuxolelwa, kule nkqubo yezinto kwanakuleyo izayo.” (Mateyu 12:31, 32) Abantu abenze isono esinjalo abayi kuvuswa.
Kukuthini ukunyelisa umoya? Kuphuma entliziyweni yaye kubonisa ukuba loo mntu unesimo sengqondo esibi. Ukwenza izinto ezichasene nomoya oyingcwele kaThixo ngabom, kusisono esinzulu. Ngokomzekelo: Kwezinye iindawo, umthetho uthi kukho umahluko phakathi komntu obulele ngabom nomntu obulele ngengozi yaye ngumntu obulele ngabom onokugwetyelwa intambo (ukufa).
Umpostile uPawulos owayekade engumnyelisi wathi: “Ndenzelwa inceba, ngenxa yokuba ndandisenza ngokungazi.” (1 Timoti 1:13) Ukwenza izinto ezichasene nomoya oyingcwele ngabom kusisono. Yaye kubonisa ukuba umntu unentliziyo engendawo, leyo ekuhambeni kwexesha iba lukhuni kangokuba umntu angabi nakuguquka.
Ngokucacileyo, uPawulos wayebhekisela kolu hlobo lwesono xa wabhala wenjenje: “Kuba ngokubhekisele kwabo babeye bakhanyiselwa kwaba kanye qwaba, nabaye bangcamla isipho sesisa sasezulwini, nabaye baba nesabelo kumoya oyingcwele, nabaye balingcamla ilizwi elihle likaThixo namandla enkqubo yezinto ezayo, kodwa abaye baphambuka, akunakwenzeka ukuba babuyiselwe enguqukweni.” (Hebhere 6:4-6) Kwakhona lo mpostile wathi: “Ukuba siqhelisela isono ngabom emva kokufumana ulwazi oluchanileyo lwenyaniso, akusekho mbingelelo wezono useleyo.”—Hebhere 10:26.
Ngoxa wayelapha emhlabeni, uYesu washukunyiselwa ukuba alumkise abantu ngokuphathelele isono esingaxolelekiyo emva kokuba ebone ukuziphatha kweenkokeli zonqulo ezithile. Kodwa azizange zinikele ngqalelo kwisilumkiso sakhe. Eneneni zada zenza iyelenqe lokuba abulawe. Kodwa kamva zeva ubungqina bokuba umoya oyingcwele wenze into emangalisayo. Zeva ukuba uYesu uvusiwe ekufeni! Lazicacela elokuba uYesu unguKristu! Sekunjalo zenza into echasene nomoya oyingcwele xa zahlawula amajoni aseRoma ukuba axoke ngokuphathelele ukuvuswa kukaYesu.—Mateyu 28:11-15.
Isilumkiso KumaKristu Enyaniso
Kutheni amaKristu enyaniso esithabatha nzulu nje isilumkiso esiphathelele isono esingaxolelekiyo? Kaloku, nangona sinolwazi oluchanileyo ngoThixo nangendlela osebenza ngayo umoya wakhe, sinokuzibona sele sinentliziyo engendawo. (Hebhere 3:12) Sifanele silumke singacingi ukuba oku akunakwenzeka kuthi. Khawucinge nje ngoYuda Skariyoti. Wayekhe waba ngumlandeli kaYesu onyanisekileyo. Wanyulwa waba ngomnye wabapostile abali-12, ngoko ufanele ukuba wayenazo iimpawu ezintle. Kodwa wavumela iingcinga neminqweno engendawo ikhule entliziyweni yakhe, yaye ekugqibeleni zamongamela. Nangona wayeyibona imimangaliso kaYesu echukumisayo, wayesiba imali. Yaye ngenxa yothando ngemali, wangcatsha uNyana kaThixo ngabom.
Abanye abantu ababekade bengamaKristu anyanisekileyo, baye bakhetha ukuzikhwebula kuThixo, mhlawumbi ngenxa yengqumbo, ikratshi okanye ukubawa yaye ngoku bangabawexuki abalwa nomoya kaThixo. Bakhetha ukulwa nayo nantoni na ephunyezwa ngumoya. Ngaba aba bantu benze isono esingaxolelekiyo? NguYehova oya kuba nguMgwebi.—Roma 14:12.
Kunoba sigwebe abanye, masikulumkele ukwenza isono emfihlakalweni esiya kubangela ukuba ngokuthe ngcembe, iintliziyo zethu zibe lukhuni. (Efese 4:30) Yaye kuyasithuthuzela ukwazi ukuba xa siguquka, uYehova uza kusixolela ngokukhulu kungakhathaliseki ukuba senze isono esinzulu kangakanani na.—Isaya 1:18, 19.
[Umfanekiso okwiphepha 18, 19]
Abanye abaFarasi benza isono esingaxolelekiyo