UYehova Uxolela Ngokukhulu
“Ongendawo makashiye indlela yakhe, indoda enobutshinga mayishiye iingcinga zayo, ibuyele kuYehova . . . ngokuba woxolela ngokukhulu.”—ISAYA 55:7.
1. Yintoni abasikelelwa ngayo ngoku abo baxolelwayo nguYehova?
UYEHOVA uyabaxolela abenzi-bubi abaguqukayo ibe ngoku ubavulela ithuba lokunandipha uxolo lwengqondo kwiparadisi yokomoya. Oku kungenxa yokuba bahlangabezana nezi mfaneleko: “Funani uYehova esenokufunyanwa; mbizeni esekufuphi. Ongendawo makashiye indlela yakhe, indoda enobutshinga mayishiye iingcinga zayo, ibuyele kuYehova: woba nemfesane kuyo; ibuyele kuThixo wethu ngokuba woxolela ngokukhulu.”—Isaya 55:6, 7.
2. (a) Kutheth’ ukuthiwani ‘ngokufuna uYehova nokubuyela kuye,’ njengoko kukhankanywe kuIsaya 55:6, 7? (b) Kutheni amaYuda awayesekuthinjweni eBhabhiloni kwakufuneka ebuyele kuYehova, ibe yintoni eyenzekayo kwamanye awo?
2 Ukuze ongendawo ‘amfune uYehova’ yaye ambize ngokwamkelekileyo, ufanele ayishiye indlela yakhe ephosakeleyo nayo nayiphi na ingcinga yokwenzakalisa abanye. Isibakala sokuba kufuneka umenzi-bubi ‘abuyele kuYehova’ sibonisa ukuba ebemshiyile uThixo, awayekhe wanolwalamano olusenyongweni kunye naye. Kwakunjalo ngabemi bakwaYuda, okwathi ukungathembeki kwabo kuThixo ekugqibeleni kwabakhokelela ekuthinjweni eBhabhiloni. Loo maYuda athinjiweyo kwakufuneka abuyele kuYehova ngokuthi aguquke kwizenzo zawo zokungalungisi ezabangela ukuba abe sebukhobokeni eBhabhiloni nelizwe lawo liphanziswe kangangeminyaka engama-70 nto leyo eyayixelwe kwangaphambili. Ngowama-537 B.C.E., elo lizwe laphinda lemiwa yintsalela yamaYuda awoyik’ uThixo awakhululwayo eBhabhiloni ngokommiselo karhulumente. (Ezra 1:1-8; Daniyeli 9:1-4) Oko kuhlaziywa kwelizwe lakwaYuda kwakuzuke ngohlobo lokuba lade lafaniswa neParadisi yase-Eden.—Hezekile 36:33-36.
3. Intsalela yamaSirayeli okomoya ibe nawo njani amava afana nalawo abathinjwa aboyik’ uThixo ababuyela kwelakwaYuda?
3 AmaSirayeli okomoya aye aba namava afanayo nalawo amaYuda awoyik’ uThixo awabuyela kwelakwaYuda emva kokuthinjelwa eBhabhiloni. (Galati 6:16) Intsalela yoSirayeli wokomoya yayiguqula indlela neengcinga zayo kanye emva kweMfazwe Yehlabathi I. Unyaka we-1919 waphawula ukuphela kwexesha lokuthinjwa kwayo kwinkoliseko epheleleyo kaThixo yiBhabhiloni Enkulu, ubukhosi behlabathi bonqulo lobuxoki. Ngenxa yokuba yaguqukayo kwizono ezibandakanya ukoyika umntu nokuyekelela ekukhonzeni uYehova, wayikhulula kwiBhabhiloni Enkulu, wayibuyisela kwimeko-bume yayo eyifaneleyo yokomoya, waza waphinda wayisebenzisa ekushumayeleni isigidimi soBukumkani. Iparadisi yokomoya iye yanda phakathi kwabantu bakaThixo ukususela ngoko, nto leyo eye yazisa uzuko kwigama lakhe elingcwele. (Isaya 55:8-13) Ngoko, kumfuziselo wamandulo noko ukufuziselayo namhlanje, sinobungqina obucacileyo bokuba emva kokuba uThixo exolele kulandela iintsikelelo kwanokuba ngokwenene uYehova ubaxolela ngokukhulu abo baguqukayo.
4. Luluphi uloyiko abanalo bambi babakhonzi bakaYehova?
4 Ngoko ke abakhonzi bakaYehova banamhlanje banokukholosa ekuxoleleni kwakhe. Ukanti, bambi babo badandathekile ziziphoso zexa elidluleyo, yaye bathwaxwa ziimvakalelo zokuba netyala. Abazigqali bekufanelekele ukuphila kwiparadisi yokomoya. Enyanisweni, bambi banoloyiko lokuba baye benza isono esingaxolelekiyo yaye abasayi kuze baxolelwe nguYehova. Ngaba kunjalo ngokwenene?
Zimbi Izono Azixoleleki
5. Kutheni kunokuthiwa zimbi izono azixoleleki?
5 Zimbi izono azixoleleki. UYesu Kristu wathi: “Konke ukona nokunyelisa bokuxolelwa abantu; kodwa khona ukumnyelisa uMoya oyiNgcwele abasayi kukuxolelwa.” (Mateyu 12:31) Ngoko ke, ukunyelisa umoya oyingcwele, okanye amandla asebenzayo kaThixo, akusayi kuxoleleka. Umpostile uPawulos wayebhekisela kwisono esinjalo xa wabhala esithi: “Kuba abo bakha bakhanyiselwa, . . . baza babuya bakreqa; akunakwenzeka ukuba babuye bahlaziyelwe enguqukweni; ekubeni bephinda ukuzibethelelela [“emthini,” NW] uNyana kaThixo, bamhlaze ekuhleni.”—Hebhere 6:4-6.
6. Yintoni egqibayo enoba isono siyaxoleleka okanye asixoleleki?
6 NguThixo kuphela owaziyo ukuba umntu wenze isono esingaxolelekiyo. Phofu ke, uPawulos wawukhanyisa lo mbandela xa wabhala wathi: “Xa sithi sone ngabom, emveni kokuba sakwamkelayo ukwazi inyaniso, akusasele dini ngenxa yezono; sekusele ke ukulinda okoyikekayo kakhulu, umgwebo.” (Hebhere 10:26, 27) Umntu owona ngabom ngozenzisayo, okanye “oneenkani yaye ngokufuthi ezigwagwisa ngobuntamo-lukhuni.” (Webster’s New Collegiate Dictionary) Nabani na othi ngabom nangeenkani aqhubeke eqhelisela isono emva kokuba eyazi inyaniso akaxolelwa. Ngenxa yoko, ukuxoleleka nokungaxoleleki kwesono kuxhomekeke ubukhulu becala kwimeko yentliziyo kungekhona kwisono ngokwaso kodwa, umkhamo wangabom obandakanyekileyo. Kwelinye icala, kusenokuba kubonisa ntoni ngomKristu onxaxhayo xa ekhathazeke gqitha bubugwenxa bakhe? Kusenokwenzeka ukuba inkxalabo yakhe enkulu ibonisa ukuthi, eneneni, akenzanga sono singaxolelekiyo.
Izono Zabo Zazingaxoleleki
7. Kutheni sinokuthi bambi babachasi bakaYesu bonqulo benza izono ezingaxolelekiyo?
7 Iinkokeli ezithile zonqulo lwamaYuda ezamchasayo uYesu zenza isono sangabom, ngenxa yoko esingaxolelekiyo. Nangona bakubonayo ukusebenza komoya oyingcwele kaThixo ngoYesu njengoko wayesenza okulungileyo kwanemimangaliso, abo befundisi bathi amandla akhe wayewafumana kuBhelezebhule, okanye uSathana uMtyholi. Bona ngabom ngokuthi bakukhanyele ukusebenza komoya kaThixo okwakuzicacele gca. Ngaloo ndlela, benza isono esingaxolelekiyo, kuba uYesu wathi: “Othe wathetha [ilizwi] elichasene noMoya oyiNgcwele, akasayi kuxolelwa yena, nakweli phakade, nakwelo lizayo.”—Mateyu 12:22-32.
8. Kutheni isono sikaYuda Sikariyoti sasingaxoleleki?
8 Isono sikaYuda Sikariyoti naso sasingaxoleleki. Ukungcatsha kwakhe uYesu kwakukokwangabom, iyelenqe langabom lohanahaniso nelokunganyaniseki. Ngokomzekelo, xa uYuda wabona uMariya ethambisa uYesu ngamafutha anexabiso elikhulu, wabuza: “Bekungani na ukuba la mafutha aqholiweyo angathengiswa ngeedenariyo ezimakhulu mathathu, kuphiwe amahlwempu?” Umpostile uYohane wongezelela esithi: “Watsho ke [uYuda], kungengakuba ebekhathalele mahlwempu; watsho kuba ebelisela, inaye ingxowa, ziphathwa nguye izinto ezifakwa kuyo.” Kungabanga thuba lide emva koko, uYuda wagcatsha uYesu ngama-30 eengqekembe zesilivere. (Yohane 12:1-6; Mateyu 26:6-16) Liyinyaniso elokuba, uYuda wadliwa sisazela waza wazibulala. (Mateyu 27:1-5) Kodwa akazange axolelwe, ekubeni ikhondo lakhe elizingisileyo langabom, nelokuzingca kwanesenzo sakhe sobuqhophololo zabonisa ukuba wayesona nxamnye nomoya oyingcwele. Asikuko nokuba wayechan’ ucwethe uYesu ngokubiza uYuda ngokuthi ‘ngunyana wentshabalalo’!—Yohane 17:12; Marko 3:29; 14:21.
Izono Zabo Zaxolelwa
9. Kutheni uThixo wazixolelayo izono zikaDavide ngokuphathelele uBhatshebha?
9 Izono zangabom zahluke mpela kwiziphoso zabo baxolelwayo nguThixo. Ngokomzekelo khawucinge ngoKumkani uDavide wakwaSirayeli. Wakrexeza noBhatshebha, umfazi kaUriya, waza kamva wayalela uYowabhi ukuba abulalise u-Uriya edabini. (2 Samuweli 11:1-27) Kwakutheni ukuze uThixo abonise inceba kuDavide? Ngokuyintloko kwakungenxa yomnqophiso woBukumkani kodwa kwakhona kwanangenxa yenceba kaDavide nenguquko yakhe yokwenene.—1 Samuweli 24:4-7; 2 Samuweli 7:12; 12:13.
10. Nangona uPetros wona ngokunzulu, kutheni uThixo wamxolelayo?
10 Kwakhona, qwalasela umpostile uPetros. Wona ngokunzulu ngokumkhanyela ngokuphindaphindiweyo uYesu. Kwakutheni ukuze uThixo amxolele uPetros? Ngokungafaniyo noYuda Sikariyoti, uPetros wayenyanisekile kwinkonzo yakhe kuThixo nakuKristu. Esi sono salo mpostile sasibangelwa bubuthathaka benyama, yaye waguquka ngokwenyaniso waza “walila ngokukrakra.”—Mateyu 26:69-75.
11. Ungakuchaza njani “ukuguquka,” yaye yintoni umntu afanele ayenze ukuba uguquke ngokwenyaniso?
11 Le mizekelo yandulelayo ibonisa ukuba kwanomntu owone ngokunzulu unokuxolelwa nguYehova uThixo. Kodwa sisiphi isimo sengqondo esifunekayo ukuze uxolelwe? Kubalulekile ukuba umKristu onxaxhayo aguquke ngokwenyaniso ukuze axolelwe nguThixo. Ukuguquka kuthetha “ukubuya esonweni ngenxa yokuzohlwaya ngeziphoso zexa elidluleyo” okanye “ukuzisola okanye ukuba lusizi ngoko ukwenzileyo okanye oye wasilela ukukwenza.” (Webster’s Third New International Dictionary) Umntu oguquke ngokwenyaniso uya kubonisa ukuzisola ngalo naluphi na ugculelo, intlungu, okanye iingxaki esiye isono sakhe sazizisa phezu kwegama likaYehova nentlangano yakhe. Umenzi-bubi oguqukileyo ukwafanele avelise iziqhamo ezivisisana noko, evelisa imisebenzi efanele inguquko. (Mateyu 3:8; IZenzo 26:20) Ngokomzekelo, ukuba ebeqhathe ubani othile, uya kuthabatha amanyathelo asengqiqweni okubuyisela ilahleko leyo. (Luka 19:8) UmKristu oguqukayo onjalo unezizathu ezisengqiqweni ezingokweZibhalo zokuba nentembelo yokuba uYehova uya kuxolela ngokukhulu. Ziziphi ezi zizathu?
Izizathu Zokuba Nentembelo Ekuxoleleni KukaThixo
12. INdumiso 25:11 ibonisa ukuba kungenxa yasiphi isizinzi anokuthi umntu oguqukayo athandazele ukuxolelwa?
12 Umenzi-bubi oguqukayo ngentembelo unokuthandazela ukuxolelwa ngesizinzi segama likaYehova. UDavide wabongoza: “Ngenxa yegama lakho, Yehova, xolela ubugwenxa bam, ngokuba bukhulu bona.” (INdumiso 25:11) Umthandazo ololo hlobo, ohambisana nokuguquka kulo naluphi na ugculelo umenzi-bubi aye waluzisa egameni likaThixo, ukwafanele ukuthintele ukona okunzulu kwixesha elizayo.
13. Umthandazo unayiphi indima ekuxolelweni nguThixo?
13 UYehova uThixo uyayiphendula imithandazo esuk’ entliziyweni yabakhonzi bakhe abanxaxhayo kodwa abaguqukayo. Ngokomzekelo, uYehova akazange azivale iindlebe, xa uDavide wayethandaza ngokusuk’ entliziyweni akuba ebuqondile ubunzulu besono sakhe ngokuphathelele uBhatshebha. Enyanisweni, amazwi kaDavide kwiNdumiso 51 avakalisa izibongozo zabantu abaninzi abathandekayo. Wabongoza: “Tarhu, Thixo, ngokwenceba yakho! Ngokobuninzi benceba yakho, cima ukreqo lwam! Ndixovule kunene, busuke ubugwenxa bam, undihlambulule esonweni sam. Imibingelelo kaThixo ngumoya owaphukileyo, intliziyo eyaphukileyo, etyumkileyo, Thixo, akuyi kuyidela.”—INdumiso 51:1, 2, 17.
14. IZibhalo ziqinisekisa njani ukuba uThixo uyabaxolela abo babonakalisa ukholo kwidini lentlawulelo likaYesu?
14 UThixo uyabaxolela abo babonakalisa ukholo kwidini lentlawulelo likaYesu. UPawulos wabhala: “Esinayo sikuye inkululeko ngokuhlawulelwa ngegazi lakhe, ukuxolelwa ke kweziphoso zethu.” (Efese 1:7) Ngokufanayo, umpostile uYohane wabhala: “Bantwanana bam, ndinibhalela ezi zinto, ukuze ningoni. Ukuba kukho othe wona, sinoMthetheleli kuye uYise, uYesu Kristu ilungisa. Yena usisicamagushelo sezono zethu; engesazethu zodwa, usiso nesehlabathi liphela.”—1 Yohane 2:1, 2.
15. Ukuze aqhubeke enandipha inceba kaThixo, yintoni umoni oguqukayo amele ayenze?
15 Inceba kaYehova inika umenzi-bubi oguqukayo isizinzi sentembelo yokuba unako ukuxolelwa. UNehemiya wathi: “UnguThixo wokuxolela, ubabala, unemfesane, uzeka kade umsindo, umninzi ngenceba.” (Nehemiya 9:17; thelekisa iEksodus 34:6, 7.) Kambe ke, ukuze aqhubeke enandipha inceba kaThixo, umoni umele azabalazele ukugcina umthetho kaThixo. Kunjengokuba umdumisi wathi, “mazize kum iimfesane zakho, ndiphile, ngokuba umyalelo wakho undiyolisa. Iimfesane zakho zininzi Yehova; ndiphilise ngokwamasiko akho.”—INdumiso 119:77, 156.
16. Siyintuthuzelo njani isibakala sokuba uYehova eyinikel’ ingqalelo imeko yethu yesono?
16 Isibakala sokuba uYehova eyinikel’ ingqalelo imeko yethu yesono naso siyamthuthuzela umenzi-bubi oguqukayo yaye simnika isizathu sokuthandaza enentembelo yokuba uThixo uya kumxolela. (INdumiso 51:5; Roma 5:12) Umdumisi uDavide wanikela isiqinisekiso esithuthuzelayo xa wavakalisa oku: “[UYehova uThixo] akenzi kuthi ngokwezono zethu, akasiphathi ngokobugwenxa bethu; ngokuba injengokuphakama kwezulu phezu komhlaba, ukuba namandla, inceba yakhe kwabamoyikayo; kunjengokuba kude kwempumalanga entshonalanga, ukulukhwelelisa kwakhe kuthi ukreqo lwethu; kunjengokusikwa yimfesane koyise kubantwana, ukusikwa yimfesane kukaYehova kwabamoyikayo. Ngokuba uyakwazi yena ukubunjwa kwethu, ekhumbula ukuba siluthuli.” (INdumiso 103:10-14) Ewe, uBawo wethu wasezulwini unenceba novelwano olungakumbi kwanakunomzali ongumntu.
17. Ingxelo kabani yokuthembeka kuThixo kwixesha elidluleyo inakuthanani nokuxolelwa?
17 Umoni oguqukayo unokuthandazela ukuxolelwa enentembelo yokuba uYehova akayi kuyibetha ngoyaba ingxelo yakhe yenkonzo ethembekileyo kwixesha elidluleyo. UNehemiya wayengabongozi ngenjongo yokuxolelwa isono sakhe, kodwa wawatsho wona amazwi athi: “Ndikhumbulele okulungileyo, Thixo wam.” (Nehemiya 13:31) UmKristu oguqukayo unokuthuthuzelwa ngala mazwi: “Akanantswela-bulungisa uThixo, ukude awulibale umsebenzi wenu, nomzamo wothando enalubonakalalisa kulo igama lakhe.”—Hebhere 6:10.
Uncedo Lwamadoda Amakhulu
18. Yintoni enokwenziwa ukuba isono somKristu simenze wagula ngokomoya?
18 Kuthekani ukuba umKristu uziva engakufanelekelanga ukuhlala kwiparadisi yokomoya okanye akakwazi ukuthandaza kuba isono sakhe simenze wagula ngokomoya? “Makabizele kuye amadoda amakhulu alo ibandla, athandaze wona phezu kwakhe, akuba emthambisile ngeoli, egameni leNkosi,” wabhala watsho umfundi uYakobi. “Wothi umthandazo wokholo umsindise lowo uleleyo, iNkosi imvuse; nokuba ubethe wenza izono, wozixolelwa.” Ewe, abadala bebandla banokuthandaza ngokuphumelelayo kunye nalowo ukholwa kunye nabo othi aguquke okanye bamthandazele ngethemba lokumhlaziyela kwimpilo entle yokomoya.—Yakobi 5:14-16.
19. Ukuba umntu uye wasuswa kubudlelane, yintoni amele ayenze ukuze axolelwe aze abuyiselwe?
19 Kwanokuba ikomiti egwebayo iyamsusa kubudlelane umoni ongaguqukiyo, oko akuthethi kuthi wenze isono esingaxolelekiyo. Noko ke, ukuze axolelwe aze abuyiselwe, umele ngokuthobekileyo athobele imithetho kaThixo, avelise iziqhamo ezifanele inguquko, aze enze isicelo sokubuyiselwa kubadala. Emva kokuba umkrexezi esusiwe kubudlelane kwibandla laseKorinte yamandulo, uPawulos wabhala: “Kumanele lowo unjalo oko kumkhalimela kwabona baninzi kuni; ngokokude nithi kanye senimxolela, nimthuthuzele, hleze lowo unjalo aselesuka edliwa kukuba buhlungu ngokugqithiseleyo. Kungoko ndiniyalayo, ndithi, luzinziseni uthando kuye.”—2 Korinte 2:6-8; 1 Korinte 5:1-13.
UThixo Unika Amandla
20, 21. Yintoni enokumnceda umntu oxhalabele ukuba kusenokwenzeka ukuba wenze isono esingaxolelekiyo?
20 Ukuba oothunywashe abanjengempilo enkenenkene okanye ukuxinezeleka bakwenza ube nexhala lokuba wenze isono esingaxolelekiyo, ukuphumla nokulala ngokwaneleyo kusenokuba luncedo. Noko ke, ufanele ngokukhethekileyo ukhumbule amazwi kaPetros athi: “Lonke ixhala lenu liphoseni phezu kwakhe [uThixo], ngokuba yena enikhathalele.” Yaye ungaze umvumele uSathana akudimaze, kuba uPetros wongezelela wathi: “Yibani nobungcathu, phaphani; ngokuba ummangaleli wenu, uMtyholi, uhamba njengengonyama egqumayo, efuna ubani angamginyayo; mchaseni lowo, nizimasekile elukholweni, nisazi ukuba kwaezo ntlungu ziyenzeka kubo abazalwana benu abasehlabathini. Ke kaloku uThixo walo lonke ubabalo . . . wanga angathi ngokwakhe, nakuba nive ubunzima umzuzwana, anilungise nigqibelele, anizimase, anomeleze, anisekele.”—1 Petros 5:6-10.
21 Ngoko ukuba uyazohlwaya kodwa ubunoloyiko lokuba unetyala lesono esingaxolelekiyo, khumbula ukuba iindlela zikaThixo zezobulumko, zisesikweni, yaye zezothando. Ngoko ke, thandaza kuye ngokholo. Qhubeka usitya ukudla kokomoya akulungiselelayo ‘ngomkhonzi othembekileyo noqondayo.’ (Mateyu 24:45-47) Nxulumana namanye amakholwa okunye nawo uze ube nesabelo rhoqo kubulungiseleli bamaKristu. Oku kuya kulomeleza ukholo lwakho kuze kukukhulule kulo naluphi na uloyiko lokuba uThixo usenokuba akasixolelanga isono sakho.
22. Yintoni esiza kuyiqwalasela ngokulandelayo?
22 Abo bakwiparadisi yokomoya banokuthuthuzelwa kukwazi ukuba uYehova uxolela ngokukhulu. Ukanti, abakhululekanga kwizilingo namhlanje. Mhlawumbi badandathekile ngenxa yokufelwa ngothandekayo okanye umhlobo wabo osenyongweni ugulel’ ukufa. Njengoko siza kubona, kwezi meko nakwezinye, uYehova uyabanceda aze abakhokele abantu bakhe ngomoya wakhe oyingcwele.
Zithini Iimpendulo Zakho?
◻ Bubuphi ubungqina obukhoyo bokuba uYehova ‘uxolela ngokukhulu’?
◻ Sisono esinjani esingaxolelekiyo?
◻ Zixolelwa phantsi kwaziphi iimeko izono zikabani?
◻ Kutheni abenzi-bubi abaguqukayo benokuba nentembelo yokuba baya kuxolelwa nguThixo?
◻ Luluphi uncedo abanokulufumana abenzi-bubi abaguqukayo?
[Imifanekiso ekwiphepha 10]
Ngaba uyasazi isizathu sokuba uDavide noPetros baxolelwayo kodwa yena uYuda Sikariyoti engazange axolelwe?
[Umfanekiso okwiphepha 12]
Ukufak’ isandla kwabadala bebandla kunokumnceda kakhulu umKristu ngokomoya