Usukelo Lokuphumelela Ngokwezinto Eziphathekayo
NGUMBHALELI KAVUKANI! ETAIWAN
‘IMALI ayinakuluthenga ulonwabo!’ Nangona inkoliso yabantu ngandlel’ ithile ivumelana naloo nkcazelo, uninzi lusabila lusoma lusukela ubutyebi bezinto eziphathekayo njengendlela yobomi obonwabisa ngakumbi. Ngaba sikho isizathu esibangela ukuba bangenjinjalo? Ngapha koko, kubonakala ukuba isicombululo kwiingxaki ezininzi zoluntu sixhomekeke ekuphumeleleni ngokwezinto eziphathekayo.
Khawuthelekelele indlela ihlabathi engelahluke ngayo ukuba ndoda nganye, umfazi nomntwana bebenandipha ubomi obuphumelelayo ngokwezinto eziphathekayo! Bekungasayi kuphinda kubekho mpatho mbi nokubandezeleka kwezigidi ezihlala ebugxwayibeni nasematyotyombeni. Kwakhona, bekungasayi kuphinda kubekho ngxaki yokungabi namakhaya ngoku ethwaxa onke amazwe, afumileyo nahlwempuzekileyo.
Yaye kuthekani ngempilo entle, ebaluleke gqitha kulonwabo? Nangona inzululwazi yezonyango ihambela phambili isenza inkqubela ngokukhawuleza, abantu abangakumbi nangakumbi bafumanisa ukuba abakwazi ukuhlawulela iinkonzo zayo. Kwelinye icala, indlala nokungondleki ziseyingxaki yomhla nezolo kwizigidi zabantu. Ukuba ukuphumelela bekwesamele ehlabathini lonke, wonk’ ubani ebeya kuba nethuba lokuphila ubomi obunempilo ngakumbi, yaye ngaloo ndlela obonwabe ngakumbi—akunjalo na?
Kwanomhlaba ngokwawo ubuya kungenelwa. Njani? Sithetha nje imekobume yomhlaba yonakaliswa zizinto ezingcolisayo ezibulalayo, ngokuyinxalenye ezibangelwa kukutshiswa kwezibaso ezakheke ngaphantsi komhlaba. Ukanti, esinye isizathu esichaziweyo sokuba kungazanywa ubugcisa obufunekayo bokusebenzisa iintlobo zamandla ezicoceke ngakumbi sikukuba bubiza imali eninzi kakhulu. Ukutshatyalaliswa kwamahlathi emvula ashinyeneyo, okusesinye isisongelo esixhomis’ amehlo kwizinto eziphilileyo nendawo eziphila kuyo, nako kubekek’ ityala kakhulu kwiimeko zezoqoqosho.
Ekubeni ukuphumelela ngokwezinto eziphathekayo kusenokubonakala kuzicombulula iingxaki zethu ezininzi kuze kunciphise ukubandezeleka okuninzi, akumangalisi ukuba abantu bebesoloko benxulumanisa ubutyebi nolonwabo. Ngokomzekelo, nangona abantu baseNtshona ngokwesithethe bebulisana ngokuthi “Happy New Year!” ngoSuku Lonyaka Omtsha, amaTshayina, ebudeni bexesha lokubhiyozela uNyaka Omtsha, ngokuqhelekileyo athi “Kung hsi fa tsai” omnye komnye, enqwenelelana ‘ukufumana ubutyebi!’ Ewe, alinakuphikwa elokuba siphila kwihlabathi apho abantu bekubeka ukusukela ukuphumelela ngokwezinto eziphathekayo kwindawo yokuqala ephakamileyo, ukuba akukho kweyona iphakamileyo. Ukuphumelela okanye ukusilela ngokufuthi kubonakala kwizinto eziphathekayo umntu anazo.
Ngoxa ukufumana nokunandipha ukuba nezinto eziphathekayo kungaphosakalanga kona ngokwako, ngaba zinokuqinisekisa ulonwabo? Kufanele kugqalwe njengokubaluleke kangakanani? Ngaba ngokwenene izinto eziphathekayo zisisikhokelo esisa kwihlabathi elilunge ngakumbi?