Siluhlobo Olunokholo
Ukuvakalisa Iindaba Ezilungileyo Kumasimi Erayisi AseTaiwan
NGOKUQHELEKILEYO iTaiwan inezantyalantyala zemvula, nto leyo eyenza ikwazi ukufumana izivuno ezimbini ezintle zerayisi nyaka ngamnye. Noko ke, maxa wambi imvula ayini ngexesha elindeleke ngalo, zize izityalo zife. Xa oku kusenzeka, ngaba umlimi uyanikezela? Nakanye. Uyazi ukuba kufuneka inzondelelo. Ukhulisa izityalo ezitsha aze aphinde ayityale kwakhona intsimi. Ngoko ke, ukuba iimeko ziyaphucuka, umlimi ufumana isivuno esihle. Maxa wambi ukutyala nokuvuna kokomoya nako kuyafana kakhulu.
Inzondelelo Kwisivuno Sokomoya
Ukutyhubela iminyaka amaNgqina kaYehova aseTaiwan aye azibhokoxa ukuze atyale aze avune isivuno sembewu yenyaniso yeZibhalo kwiindawo ezithile ebezingabonakalisi ziqhamo. Omnye umzekelo yiNqila yaseMiao-li. Bekungekho ntsabelo ingako kumgudu obusenziwa ngamathuba athile wokunikela ubungqina kule ndawo. Ngoko ke ngowe-1973 isibini esingoovulindlela abakhethekileyo sabelwa ukuba sisebenze apho njengabashumayeli boBukumkani bexesha elizeleyo. Ekuqaleni, abanye babonakalisa umdla kwiindaba ezilungileyo. Noko ke, kungekudala loo mdla waphela. Ngoko ke aba vulindlela bakhethekileyo babelwa kwenye indawo.
Ngowe-1991 kwabelwa abanye oovulindlela abakhethekileyo ababini apho. Kodwa kwakhona kwabonakala ukuba iimeko azivumeli ukuba kukhule nto ngokomoya. Emva kweminyaka embalwa, aba vulindlela bakhethekileyo kwakhona babelwa kwintsimi apho kwakuthenjwe ukuba kuza kuba nesiqhamo. Ngaloo ndlela, lo mhlaba wayekwa nje kangangexesha elithile.
Umgudu Omtsha Owenziwayo Uvelisa Iziqhamo
NgoSeptemba 1998 kwagqitywa kwelokuba kwenziwe umgudu kwiindawo ezivelisa iziqhamo ezingakumbi kwintsimi enkulu engabelwanga bani yaseTaiwan. Kwakuza kufezwa njani oku? Ngokwabela oovulindlela abakhethekileyo bokwexeshana abangama-40 ukuba basebenze kwintsimi engabelwanga bani enabantu abaninzi.
Izixeko ezibini ezimeleneyo neNqila yaseMiao-li zaziphakathi kwentsimi eyakhethwayo kolu hlaselo. Oodade abane abangekatshati babeza kusebenza apho iinyanga ezintathu ukuze bavavanye le ntsimi. Kungekudala emva kokuba befikile, babhala iingxelo ezintle ngokuphathelele inani labantu ababenomdla ababebafumana. Xa bagqiba iinyanga zabo ezintathu zokuba ngoovulindlela kuloo ndawo, babeqhuba izifundo zeBhayibhile zamakhaya ezininzi. Kwakhona baqalisa iqela lesifundo sencwadi ngoncedo lomdala ovela kwibandla elikufuphi.
Abathathu kwaba dade benza kwacaca ukuba bangathanda ukuqhubeka benyamekela “izityalo” ezincinane ezazikhula kakuhle. Ngenxa yoko, ababini kubo bamiselwa njengoovulindlela abakhethekileyo abasisigxina, yaye owesithathu waqhubeka esebenza apho njengovulindlela othe ngxi. Umdala ovela kwibandla elikufuphi wafudukela kule ndawo ukuze abancedise. Ngabantu abangaphezu kwama-60 abaya kwintetho yesidlangalala yokuqala eyayinikelwa kuloo mmandla. Ngoku ibandla elikufuphi linceda eli qela lincinane ukuba libe neentlanganiso ezithe rhoqo zangeCawa ukongeza kwizifundo zencwadi ezahlukahlukeneyo. Kungekudala kusenokusekwa ibandla elitsha kule ndawo.
Inzondelelo Izisa Iintsikelelo Kwezinye Iindawo ZaseTaiwan
Ezinye iindawo zasabela ngendlela efanayo. KwiNqila yaseI-lan ekumntla-mpuma kwesi siqithi, kwasekwa iSifundo Sencwadi Sebandla esitsha kule ndawo apho kwakusebenza khona oovulindlela abakhethekileyo bokwexeshana.
Ngoxa wayeshumayela kwindlu ngendlu ngenye ingokuhlwa, omnye uvulindlela okhethekileyo wokwexeshana wadibana nomfana oselula waza wambonisa iphetshana elichaza iintlanganiso zebandla. Ngoko nangoko wabuza: “Ndingeza kwiintlanganiso ngokuhlwa ngomso? Ukuba kunjalo, ndifanele ndinxibe ntoni?” Lo vulindlela wazifumanisa eqhuba izifundo zeBhayibhile ezisibhozo nabantu abanomdla veki nganye. Kungekudala aba bafundi beBhayibhile abahlukahlukeneyo babesenza amalungiselelo okuba ngabavakalisi beendaba ezilungileyo, benosukelo lokubhaptizwa.
Omnye umntu kule dolophu ebehamba icawa kangangeminyaka emininzi kodwa engafumani mntu wokumfundisa iBhayibhile. Xa weva ngamalungiselelo esifundo seBhayibhile, walixhakamfula eli thuba. Wakhuthazwa ukuba alungiselele isifundo sakhe kusengaphambili. Xa lo vulindlela ukhethekileyo wokwexeshana weza kuqhuba isifundo, wafumanisa ukuba eli bhinqa lalisele liwenzile “umsebenzi walo wasekhaya” ngokuthenga incwadi yokubhala amanqaku apho wayekhuphela imibuzo ekuloo ncwadi wayeyifunda. Wandula ke wabhala iimpendulo zakhe kumbuzo ngamnye. Kwakhona wayekhuphele kwincwadi yakhe yokubhala amanqaku zonke izibhalo ezicatshuliweyo kweso sifundo. Xa lo dade weza kuqalisa isifundo, eli bhinqa lalisele lilungiselele izifundo ezintathu zokuqala!
Kwenzeka into efanayo nakwisixeko saseDongshih kumbindi waseTaiwan. Oovulindlela abakhethekileyo bokwexeshana bahambisa iincwadana ezinemifanekiso ezingaphezu kwama-2 000 kwiinyanga ezintathu ababesebenza apho. Kwinyanga yesithathu, babeqhuba izifundo zeBhayibhile ezili-16. Inxalenye enkulu yale dolophu yatshatyalaliswa yinyikima eyabetha umbindi weTaiwan ngoSeptemba 21, 1999, kodwa abanye abanomdla basaqhubeka besenza inkqubela ngokomoya, nangona befanele bahambe ixesha elinokuba yiyure ukuze baye kwiintlanganiso kwiHolo yoBukumkani ekufuphi. Ewe, inzondelelo iyafuneka ukuze kuvunwe isivuno esihle, enoba sisiqhamo sokwenyama okanye esokomoya.
[Imaphu ekwiphepha 8]
(Ukuba ufuna inkcazelo ehlahlelwe kakuhle, yiya kwimpapasho)
CHINA
Taiwan Strait
TAIWAN
[Inkcazelo]
Mountain High Maps® Copyright © 1997 Digital Wisdom, Inc.