Uncwadi LweBhayibhile Luyaxatyiswa Kwindawo Eyayisakuba YiSoviet Union
Ngumbhaleli kaVukani! eRashiya
EKUQALENI kowe-1991 indawo eyayisakuba yiSoviet Union eyayikho ngeloo xesha yayibunjwe yiRashiya nazezinye iiriphabliki ezili-14. Ukususela ngoko, ezi riphabliki zaba ngamazwe azimele geqe. Noko ke, iRashiya inabantu abaninzi kunala mazwe ali-14 edibene ibe umhlaba wayo mkhulu ngokuphindwe kathathu kunowawo. NgoSeptemba 1994, bekukho amaNgqina kaYehova ali-117 276 kwindawo eyayisakuba yiSoviet Union abesabelana nabamelwane bawo ngeenyaniso zeBhayibhile.
Sithetha nje nyanga nganye kushicilelwa intaphane yamaphephancwadi IMboniselo noVukani! ngesiRashiya ukuze asetyenziswe kwindawo eyayisakuba yiSoviet Union. Ukongezelela koko, kusasazwa amaphecana neencwadi ezininzi kwalapho. Into eyenza kucace mhlophe ukuba olu ncwadi lweBhayibhile luyaxatyiswa ziileta ezifika kwiofisi yamaNgqina kaYehova yaseRashiya ekufutshane naseSt. Petersburg.
Amaphephancwadi Amibala-bala Ayaxatyiswa
Enye indoda yakumbindi Siberia yabhala oku: “Ngethamsanqa ndabona IMboniselo iphethwe ngomnye endisebenza naye. Ndacela ukuba andibonise. Kuqala ndaphos’ iliso kwimifanekiso yayo ecacileyo nemibala-bala. Emva koko ndafunda ndaya phambili . . . Ndaqabuka sele ndilifunde ndaligqiba eli phephancwadi. Imibuzo yalo yayibuzwa ngendlela enik’ umdla, yaye yayibuncoko.”
Enye indoda yaseSiberia yathi: “Ngethamsanqa ndafumana inkupho ethile yephephancwadi lenu. Andifuni kube ndityibela ndinincoma, kodwa ayikho enye inkcazelo engokholo efana nale kwendakha ndazifunda.”
Omnye umongikazi waseSt. Petersburg, esisixeko saseRashiya esinkqenkqeza kwindawo yesibini ngobukhulu, wabhala oku: “Ndiyabulela ngoncuthu mazangwa longcelele lwamanqaku akuVukani! kaJanuwari 8, 1995 axubusha ngokudinwa engqondweni nasemzimbeni. La manqaku andishiya ndisenazo iingxaki zam kodwa andinika intuthuzelo endandiyifuna ngamehlw’ abomvu.”
Omnye umntwana wesikolo oneminyaka eli-17 ubudala wabhala oku: “Ndibabulela ngokungazenzisiyo bonke abo bapapasha olu ncwadi lumnandi ngolu hlobo. Xa mna nabahlobo bam sasivela kwiholo yemifanekiso eshukumayo, sabona iqela lala maphephancwadi eshiywe nje esitulweni. Sawachola. . . . Njengokuba ndandifunda IMboniselo, kwaba ngathi ndiyaphupha. Ngaba ngokwenene ikamva liya kuba nje? Ngoku ndifunda iincwadi zeVangeli ibe ndisazama ukuziqonda. Amaphephancwadi enu akucacisa kakuhle okuthethwa yiBhayibhile.”
Enye indoda eneminyaka engama-26 ubudala yathi: “Ndibamba ngazibini ngenqaku elithi ‘Ngaba Ukuzibulala Kusisicombululo?’ elikuVukani! ka-Aprili 8, 1994. Ngenxa yotyekelo endandinalo lokudandatheka nomkhwa wokuphulula amaphambili, zininzi izihlandlo endandiye ndicinge ukuzibulala ngazo. Kodwa iLizwi likaThixo nokuthandaza kuYehova kwandithintela ekuzibulaleni. Eli nqaku lalomeleza ukholo lwam kwinceba kaThixo nenkolelo endandinayo yokuba uThixo uya kundinceda ndicombulule iingxaki zam. Uyakubona ukuguquka kwam. Ufuna ndiphile. Ndiyambulela ngokundixhasa kwakhe ngeli nqaku.”
Ithetha kwangeli nqaku linye likaVukani!, enye intombazana eneminyaka eli-15 ubudala yathi: “Eli phephancwadi lindincede gqitha ebomini bam. Xa ndandineminyaka esibhozo ubudala, ndaqalisa ukuvakalelwa kukuba akusekho mntu undifunayo. Abazali bam babengenaxesha lokuthetha nam, ibe ndandizizamela ngokwam ukucombulula iingxaki zam. Ndandiyinkom’ edla yodwa. Ndandisoloko ndixambulisana nezalamane zam. Ngoko ndacinga ngokuzibulala. Hayi indlela endavuya ngayo xa ndadibana namaNgqina kaYehova!”
Elinye ibhinqa kwinxalenye yeRashiya eseYurophu lathi: “Ndaye ndeva abanye abafana ababini bexubusha ngeBhayibhile kwisikhululo sikaduladula. Ndaba nomdla ndaza ndaya kubo. Aba bafana bandinika umbhalo weMboniselo. Eli phephancwadi ndilifunda ngovuyo nangomdla, ibe ndifuna ukuyazi ngakumbi iBhayibhile. Ndifuna ukunxibelelana nani ngokufunda la maphephancwadi, ibe ndifuna ukwazi ndize ndifundisise iBhayibhile rhoqo.”
Olunye Uncwadi Oluxatyiswayo
Elinye ibhinqa eliselula laseCaucasus labhala oku: “Ibhinqa elithile langena eofisini yethu laza labalisa ngendibano ethile. Ndabona indlela elalivuya nelalinehlombe ngayo, ndaza ndanomdla. Ngosuku olulandelayo landinika incwadi ethi Unokuphila Ngonaphakade KwiParadisi Esemhlabeni. Ndakhwela kuyo ngoko nangoko. Andazi ukuba ndingayifanisa nantoni. Ndavakalelwa kukuba emva kokubhadula ebumnyameni, ndide ndawufumana umnyango ophumela ekukhanyeni. Emva kokufathula ixesha elide ngolo hlobo, ndazifumana zonke iimpendulo kwimibuzo yam kwincwadi enye kuphela. Ndiswel’ imilomo yokuchaza indlela endavuya ngayo.”
Enye indoda kuMbindi Asia yathi: “Ndilirhamente leGood News Church ehambisa ivangeli. Siziva singamahlwempu ngokwenene kwicala loncwadi lokomoya. Sicela nikhawuleze nisithumelele iincwadi, iincwadana ezinemifanekiso neencwadana ukuze sizifundisise size sizisasaze nakwabanye.”
Omnye umntu waseArmenia, kufutshane neBlack Sea, wabhala oku: “Ndaye ndafunda incwadana enemifanekiso ethi Ngaba Ngokwenene UThixo Usikhathalele?, yaye yandihlaziya ngokwenene. Ekugqibeleni ndide ndalufumana uncwadi oluza kundinceda ndifundisise iBhayibhile. Ndicela nincede nindithumelele iincwadi zokwenza olo fundisiso.”
Elinye ibhinqa eSiberia lathi: “Omnye wamaNgqina kaYehova watyelela ikhaya lethu waza wasishiyela umbhalo wencwadi ethi Oyena Mntu Ubalaseleyo Wakha Waphila. Nangona ndandingakholelwa kubukho bukaThixo kwangethuba endandisesikolweni ngalo, endakufundayo kwandikhuthazela ukuba ndicinge nzulu ndize ndiqalise ukufunda iBhayibhile.”
Omnye umama onabantwana ababini wachaza indlela anombulelo ngayo kwangale ncwadi ikwanye ingobomi bukaYesu Kristu waza wathi: “Abantwana bayayilandela ibe banomdla kuyo. Ikwenza ube nomnqweno ongakumbi wokufundisisa iBhayibhile uze ufunde uncwadi lonqulo. Le ncwadi ipapashwe yaza yenziwa ngeyona ndlela isemagqabini.”
Kunyaka ophelileyo, abantu abangama-34 608 kwindawo eyayisakuba yiSoviet Union babonisa uxabiso lwabo ngoko babekufunda ngokuthi babhaptizwe. Ngamana uncwadi olupapashwe ngamaNgqina kaYehova lungasasazwa ngokupheleleyo nangamanani amakhulu kule nxalenye yehlabathi, yaye ngamana amanye amawaka amaninzi abantu angasabela kwiinyaniso zeBhayibhile ezikulo!