Apho UGawulayo Angubhubhani
KWIMINYAKA engaphantsi kweli-15, uGawulayo uye wabangela ukungonwabi nokuphelelwa lithemba kuwo onke amazwekazi asemhlabeni. Kwiminyaka nje embalwa, le bhombu ingokwebhayoloji iye yaqhushumba. IWHO (World Health Organization [INtlangano Yezempilo Yehlabathi]) iye yaqikelela ukuba ehlabathini lonke bangama-5 000 abantu abasulelwayo suku ngalunye. Oku kuthetha ukuba ngabantu abangaphezu kwabathathu mzuzu ngamnye! Amazwe achaphazeleka kakhulu ngahlwempuzeke gqitha, lawo abizwa ngokuba ngamazwe asakhasayo. IWHO ichaze kusengaphambili ukuba ngomnyaka wama-2000, amaxhoba angama-90 ekhulwini ane-HIV yaye ekugqibeleni nama-90 ekhulwini amaxhoba kaGawulayo aya kufunyanwa kula mazwe.
Abona Bantu Bathwaxeka Ngokugqithiseleyo
URose wayeneminyaka engama-27 ubudala yaye etshatile enabantwana abathathu xa umyeni wakhe wasuka wagula ngequbuliso. Ngemva kweenyanga ezithile kamva wafa. Ngelo xesha kwakungaqinisekwanga ngonobangela wokufa komyeni wakhe. Oogqirha bamxilonga baza bathi unesifo sephepha. Izalamane zathi uthakathiwe. Izalamane zomyeni wakhe zaqalisa ukuthabathela kuzo izinto zikaRose. Abantu basemzini wakhe bathabatha abantwana bakhe ngenkani ngoxa wayengekho endlwini. URose wanyanzeleka ukuba abuyele kwilali yakowabo. Kwiminyaka emibini kamva waqalisa ukuhlaselwa kukuhlanza nalurhudo. Kwakungona aqondayo ukuba umyeni wakhe wabulawa nguGawulayo nokuba naye wayosulelwe. URose wafa kwiminyaka emithathu kamva, eneminyaka engama-32 ubudala.
Amabali abuhlungu njengeli ayinto eqhelekileyo ngoku. Kweminye imimandla iintsapho ziphela kwaneelali ziye zatshayelwa zathi tu.
“Eyona Ngxaki Yezempilo Yakha Yankulu Yexesha Lethu”
Oorhulumente bamazwe asakhasayo abakwazi tu kwaphela ukumelana nale meko. Ngenxa yokungabi namali nokubakho kwezinye izinto ezingxamisekileyo ezifunekayo nezibiza imali eninzi, uGawulayo uzingqine eyeyona ngxaki inkulu engundaba-mlonyeni. Ukudodobala kwezoqoqosho ehlabathini lonke, ukunqongophala kokutya, iintlekele ezingokwemvelo, iimfazwe, amasiko asekuhlaleni, kunye neenkolelo kuphela ziyongezelela kule ngxaki. Iindleko zokunikela inyameko ekhethekileyo kwabagula zizifo zikaGawulayo eziquka amayeza nezixhobo ziphakamile. Uninzi lwezibhedlele ezikhulu kungoku nje zizele zimi ngeembambo, ziyaphelelwa, yaye azinabasebenzi baneleyo. Uninzi lwabaguli abanoGawulayo ngoku luthunyelwa ekhaya ukuze luye kufela khona ngenjongo yokuvulela indawo inyambalala yabanye abaguli abafuna ukuncedwa. Kukho ukwanda okothusayo kwezinye izifo ezongezelelekileyo ezinxulumene noGawulayo ezinjengesifo sephepha. Amanye amazwe anikele ingxelo yokuba abantu ababulewe sisifo sephepha baphindaphindeke kabini kwiminyaka emithathu edluleyo, yaye abanoGawulayo abafikelela kuma-80 ekhulwini abalaliswe esibhedlele bakwanaso nesifo sephepha.
Umphumo Aba Nawo UGawulayo Ekuhlaleni
Ubhubhani onguGawulayo uchaphazela kungekuphela nje inkqubo yezempilo kodwa nazo zonke iinkqubo zezoqoqosho nezebutho labantu. Abanokuba ngama-80 ekhulwini kwabo bosulelweyo baneminyaka ephakathi kwe-16 nama-40 ubudala, abona bantu banemveliso kwibutho labantu. Uninzi lwabaxhasi beentsapho lukobu budala. Inkoliso yeentsapho ixhomekeke kubo, kodwa njengoko begula baze ekugqibeleni bafe, abancinane gqitha nabalupheleyo bashiyeka bengaxhaswa bani. Kulo naliphi na ibutho labantu baseAfrika, xa abazali bomntwana besifa, ngokuqhelekileyo loo mntwana ukhuliswa ngamalungu asondeleyo entsapho. Noko ke, namhlanje, xa abazali besifa, utatomkhulu nomakhulu okanye ezinye izalamane ezisaphilayo ngokufuthi ziba sezaluphele gqitha okanye sezisindwa kakade ngumthwalo wokuzama ukunyamekela iintswelo zabantwana bazo. Le meko iye yakhokelela ekubeni kubekho iinkedama ezininzi nokwanda kwabantwana abahlala esitratweni. IWHO ichaza kusengaphambili ukuba kumazwe akumazantsi eSahara eAfrika kuphela, ngabantwana abangaphezu kwezigidi ezili-10 abaya kuba beziinkedama ekupheleni kwale nkulungwane.
Amabhinqa asifumanisa singcungcuthekisa yaye singumthwalo onzima kakhulu isibetho esibangelwa nguGawulayo. Ikakhulu ngamabhinqa aye afunwe ukuze anyamekele abagulayo nabafayo imini nobusuku—oku kongezelela kuyo yonke eminye imisebenzi yasekhaya abamele bayenze.
Oko Kwenziwayo
Ngasekuqaleni kweminyaka yee-1980, amagosa amaninzi aseburhulumenteni, ethabath’ icala ngenxa yamabala abekwa wona uGawulayo akazange abe nankathalo engaqondi ukuba wayeza kwanda kangaka. Noko ke, ngowe-1986 urhulumente waseUganda waqalisa ukulwa idabi elinxamnye noGawulayo. Ebudeni beminyaka esithoba edluleyo, ilizwe laseUganda liye lanconywa ngokuba “nawona macebo matsha okuthintela ukwanda kukaGawulayo asetyenziswayo namhlanje.”
Namhlanje, kukho imibutho yesizwe neyezizwe ngezizwe kunye namasebe angaphezu kwama-600 ajongene nokuzama ukulawula ukunwenwa kukaGawulayo eUganda. La masebe entlalo-ntle aye aseka amaziko afundisa ngoGawulayo kulo lonke elo lizwe. Ulwazi ngesibetho esibangelwa nguGawulayo luye lwaziswa kwingqalelo yabantu ngemidlalo yeqonga, ngemidaniso, ngeengoma, ngeenkqubo zikanomathotholo nezikamabonwakude, ngamaphephandaba, nangomnxeba. Ukongezelela ekunyamekelweni ekhaya nasekuncedweni ngezinto eziphathekayo, abo banoGawulayo kunye nabahlolokazi neenkedama banikwa amacebiso.
KumaNgqina kaYehova, ukunyamekela iinkedama nabahlolokazi kujongwa njengenxalenye yonqulo lwamaKristu. (Yakobi 1:27; 2:15-17; 1 Yohane 3:17, 18) Ibandla aliyithabatheli kulo imbopheleleko yamalungu entsapho yokunyamekela iintsapho zawo. Kodwa ukuba akukho malungu asondeleyo entsapho, okanye ukuba iinkedama nabahlolokazi abakwazi kuzixhasa, ngothando ibandla liyabanceda.
Ngokomzekelo, uJoyce wayengomnye wamaNgqina kaYehova owayehlala eKampala, elikomkhulu laseUganda. Wayelixhoba likaGawulayo waza wafa ngoAgasti 1993. Ngaphambi kokuba afe wabhala le ngxelo ilandelayo: “Ndakhula ndingumProtestanti ndaza kamva ndatshata nomKatolika. Noko ke, ndandibabona abaninzi ecaweni yam beziphethe kakubi, yaye ngoko ndayeka ukuya ecaweni. Udadewethu omdala wayefundisisa iBhayibhile namaNgqina kaYehova, yaye xa wayeze kutyelela, wandixelela ngezinto awayezifunde eBhayibhileni.
“Umyeni wam wayeyichase gqitha into yokuba ndifundisisa iBhayibhile. Nabazali bam baqalisa ukundichasa, ngokukodwa utata. Le nkcaso yaqhubeka kangangeminyaka emibini, kodwa ayizange indityhafise, njengoko ndandeyisekile kukuba ndandifunda inyaniso. Xa ndaxelela umyeni wam ukuba ndandifuna ukubhaptizwa, waba nomsindo. Wandiphatha kakubi waza wandixelela ukuba ndiphume ndiphele kuloo mzi. Ngoko ndahamba ndaya kuzihlalela ndedwa kwindlu encinane eqeshisayo.
“Ngemva kwexesha elithile umyeni wam wandicela ukuba ndibuye. Kungekudala emva kokuba ndibuyile waqalisa ukuba buthathaka nokugula. Ndandimangalisiwe, kuba wayengumntu osoloko esempilweni. Ekugqibeleni safumanisa ukuba unoGawulayo. Ngowe-1987 wafa. Ngeli xesha ndandisele ndinguvulindlela othe ngxi [umhambisi wevangeli wexesha elizeleyo], yaye nangona ngoku ndandingumhlolokazi onabantwana abahlanu, ndaqhubeka nenkonzo yobuvulindlela.
“Kwiminyaka emine kamva, ngowe-1991, ndaphawula ukuba ndandosulelwe ngumyeni wam ngoGawulayo. Impilo yam yaqalisa ukuba nkenenkene yaye ulusu lwam lwaphuma amaqhakuva, ndancipha ngokukhawuleza, ibe ndahlaselwa ngumkhuhlane owawubetha ubuyelela. Ndaqhubeka nobuvulindlela yaye ndandiqhuba izifundo zeBhayibhile ezingama-20, kodwa njengoko ndandisiya ndiphelelwa ngamandla, kwafuneka ndizinciphise zibe li-16. Abasixhenxe kwaba bafundi ekugqibeleni babhaptizwa.
“Andizange ndizive ndililolo okanye ndidandathekile, njengoko ibandla lalindixhasa ngokwenene. Ekugqibeleni, kwafuneka ndiphoswe zezinye iintlanganiso ngenxa yokuba buthathaka emzimbeni. Abazalwana bandirekhodela zona kwikhasethi, yaye ndandiqhubeka ndisondliwa ngokomoya. Abadala bebandla benza uludwe ukuze oodadewethu bokomoya batshintshisane ngokunyamekela iimfuno zam yaye bade bahlale nam ubusuku bonke. Noko ke, kwakukho nto ithile eyayindikhathaza—abantwana bam. Ndandizibuza ukuba ‘Kuza kwenzeka ntoni kubo xa sendingasekho?’
“EAfrika izinto zomntu ofileyo ngokufuthi zithatyathwa zizalamane, ngoko ndathandaza ngokuzingisileyo kuYehova ngako oku. Ndagqiba kwelokuba ndiyithengise indlu yam ndize ndakhe amagunjana okuqeshisa ukuze abantwana bam basoloko benendawo yokufaka intloko yaye babe nengeniso ethe rhoqo. Abazalwana ebandleni bandithengisela indlu yam yaye bakwazi ukundithengela esinye isiza, baza bandakhela loo magumbi. Ndahlala kwelinye lawo yaye ndaziva ndixolile ndakuqonda ukuba abantwana bam babeza kunyanyekelwa.
“Izalamane zam zaziligqabi ngumsindo ngenxa yokuba ndithengise indlu, yaye zaqalisa ukundimangalela. Kwakhona, abazalwana beza kundinceda yaye bawunyamekela lo mbandela. Saphumelela kwelo tyala. Nangona ngoku ndiziva ndibuthathaka gqitha, intlangano kaYehova enothando kunye nethemba loBukumkani zindigcina ndiqhubeka. Ngenxa yemeko yam ngoku ndilaliswe esibhedlele. Ndisenabo oodade bokomoya ecaleni kwam abanyamekela iimfuno zam imini nobusuku, njengoko isibhedlele singenakulungiselela ukutya neebhedi ezaneleyo.”
Ngemva kokuchitha iinyanga ezintandathu esesibhedlele, uJoyce wathunyelwa ekhaya. Ngemva kweentsuku ezimbini wafa. Abantwana bakhe abahlanu ngoku banyanyekelwa ngudade onguvulindlela ebandleni naye onabakhe abantwana abathathu.
Isicombululo
EUganda, apho uGawulayo sele engubhubhani, uMongameli uYoweri Kaguta Museveni wathi: “Ndikholelwa ekubeni eyona ndlela ilungileyo yokusabela kwisisongelo sikaGawulayo nezinye izifo ezidluliselwa ngeentlobano zesini kukuphinda siqinisekise ekuhleni nangokungafihlisiyo imbeko, intlonelo kunye nembopheleleko wonke ubani amele ayibonise kummelwane wakhe.” Ngamafutshane, singathi kukho imfuneko yokuba umntu anamathele kwiqabane elinye kwilungiselelo lomtshato. Wonke ubani uyavuma ukuba le kuphela kwendlela yokuzikhusela nanokulawulwa ngayo uGawulayo. Noko ke, bambalwa abakholelwayo ukuba kunokwenzeka ukuba kuphilwe ngaloo milinganiselo yokuziphatha.
AmaNgqina kaYehova aphakathi kwabo banganeli nje ukukholelwa ukuba kunokwenzeka ukuba baphile ngaloo ndlela yokuziphatha kodwa abayiqheliselayo. Ukongezelela, njengoJoyce, akholelwa kwidinga likaThixo lamazulu amatsha nomhlaba omtsha apho kumi ubulungisa. (2 Petros 3:13) Kwihlabathi elicociweyo kubo bonke ubungendawo, uYehova uThixo uya kwandula azalisekise idinga elibhalwe kwiSityhilelo 21:4: “Azisule uThixo zonke iinyembezi emehlweni abo, kungabi sabakho kufa, kungabi sabakho nasijwili, nakukhala, nantlungu; ngokuba izinto zokuqala zigqithile.”
[Umfanekiso okwiphepha 19]
Ubawo uthabatha unyana wakhe, obulewe nguGawulayo, ukuze aye kungcwatywa
[Inkcazelo]
WHO/E. Hooper