Buyintoni Ubugcisa?

NGUMBHALELI KAVUKANI! ESPEYINI

YIYIPHI eyona nto intle owakha wayibona? Ngaba yayikukutshona kwelanga kweleenjiko, iintaba ezambathiswe likhephu, iintyatyambo ezininzi, imibala emihle yehlathi ekwindla?

Kuninzi lwethu sisathe thaa eso sihlandlo sikhethekileyo saxa sasithinjwe bubuhle bomhlaba. Xa amathuba evuma, siyakuthanda ukuchitha ikhefu kwindawo entle ebuparadisi, yaye siye sizame ukufota ezona zinto zibalaseleyo.

Xa uphinda ubuka obu buhle bungonakaliswanga, kukho imibuzo ethile osenokucinga ngayo. Ngaba ubuya kwaneliseka ukuba yonke imifanekiso ekwindlu yezinto zobugcisa ibibhalwe ukuba “Akaziwa Umenzi Wayo”? Masithi ubuchukunyiswe ngokunzulu yindlela eyenziwe ngayo nobuhle baloo mifanekiso, ngaba ubungenakufuna ukuqonda igcisa eliyenzileyo? Ngaba sifanele saneliseke nje kukubukela ummangaliso omhle womhlaba ukanti singazikhathazi ngeGcisa elawudalayo?

Enyanisweni, kukho abo bathi akukho nto ibubugcisa endalweni—kunoko ubugcisa bufuna ubuchule bomntu bokuyila nokuguqula izinto. Noko ke, loo nkcazelo ingobugcisa, mhlawumbi ilinganiselwe gqitha. Ngokwenene buyintoni ubugcisa?

Ukuchaza Ubugcisa

Mhlawumbi ayinakufumaneka inkcazelo engobugcisa eya kwanelisa wonke ubani. Kodwa inkcazelo efanelekileyo iyafumaneka kwiWebster’s Ninth New Collegiate Dictionary, ethi ubugcisa “kukusebenzisa kakuhle ubuchule nesakhono sokuyila izinto [ngokukhethekileyo] ukuvelisa izinto ezintle.” Ngenxa yoko sinokuthi igcisa kufuneka libe nobuchule kunye nesakhono sokuyila izinto. Xa lisebenzisa ezi ziphiwo zibini, linokuvelisa into ebukekayo okanye enomtsalane kwabanye abantu.

Ngaba obu buchule nesi sakhono sokuyila zinokubonakaliswa kwizinto zobugcisa ezenziwe ngumntu kuphela? Okanye ngaba bukwabonakala nakwindalo esingqongileyo?

Imithi ephakamileyo yaseKhalifoniya ebizwa ngokuba yiredwood esetyenziswa ekwenzeni amaplanga, iingqaqa zekorale ezinkulu zePasifiki, iingxangxasi ezinkulu kumahlathi emvula neqela lamadlelo ashushu aseAfrika angenamithi, ngeendlela ezahlukeneyo, zizonke ezi zinto zibaluleke ngakumbi eluntwini kuno-“Mona Lisa.” Ngenxa yeso sizathu, iUNESCO (United Nations Educational, Scientific, and Cultural Organization) ithi xa ibiza iRedwood National Park, eUnited States; i-Iguaçú Falls, eArgentina/Brazil; iGreat Barrier Reef, eOstreliya; neSerengeti National Park, eTanzania, yinxalenye “Yelifa Lehlabathi” loluntu.

Obu buncwane bokwemvelo bulondolozwa ngendlela efanayo nezinto zezikhumbuzo ezenziwe ngabantu. Ngoba? Kuba kufunwa ukulondolozwa nantoni na “exatyiswe kakhulu luluntu.” I-UNESCO ithi enoba bubuhle beTaj Mahal, eIndiya, iintaba zeGrand Canyon, eUnited States, zifanele zilondolozwe ngenxa yezizukulwana zexesha elilandelayo.

Kodwa akunyanzelekanga ukuba ude uye epakini ukuze ubone ubuchule bokuyila. Umzekelo obalaseleyo ngumzimba wakho. Abakroli beGrisi yamandulo babekujonga ukubunjwa komzimba womntu njengobona bugcisa, yaye bazama ukuwukrola kakuhle kangangoko banako. Ekubeni sinolu lwazi sinalo ngoku ngokusebenza komzimba, sinokubuqonda ngakumbi ubuchule obubalaseleyo obabufuneka xa wawudalwa naxa wawuyilwa.

Kuthekani ngesakhono sokuyila izinto? Khawukhangele ipikoko xa ithe naa ezo mpiko zayo, ukudubula kweentyatyambo okuthi ndijonge, okanye umbono omhle wengcungcu indanda phezulu. Ngokuqinisekileyo, ezi zinto zaba bubugcisa, kwanangaphambi kokuba zizotywe okanye zifotwe. Umbhali weNational Geographic, echukunyiswe yimisonto emsobo yentyatyambo eyitacca lily, wabuza isazinzulu esiselula ngenjongo yaloo misonto. Saphendula ngokulula nje sathi: “Kukutyhila isakhono sikaThixo sokuyila.”

Ubuchule nesakhono sokuyila izinto abuphelelanga kwindalo nje kuphela kodwa bebusoloko buphembelela abazobi abangabantu. UAuguste Rodin, umkroli odumileyo ongumFrentshi, wathi: “Igcisa lixhomekeke kwindalo. Iintyatyambo zincokola nalo ngokumana zigobela ngapha nangapha ngaloo mibala yazo ithandekayo.”

Amanye amagcisa akayifihli into yokuba akakwazi ukubukhupha bunjengokuba bunjalo ubuhle bendalo. “Izinto zobugcisa bokwenene ngoonomgogwana nje abayelele kumsebenzi ogqibeleleyo kaThixo,” watsho uMichelangelo, ojongwa njengelona gcisa libalaseleyo kwawakhe akho.

Izazinzulu, kunye namagcisa, zisenokuthabatheka bubuhle bendalo. Unjingalwazi wemathematika yemichiza, uPaul Davies, kwincwadi yakhe ethi The Mind of God, uchaza ukuba “kwanabantu abangakholelwayo ukuba uThixo ukho bayayihlonela indalo, bayathabatheka yaye bayakuhlonela ukuntsonkotha nobuhle nobuchule eyenziwe ngabo, nto leyo efana noloyiko olungokonqulo.” Kufanele kusifundise ntoni oku?

Igcisa Elenza Lo Msebenzi Mhle

Umfundi ngezobugcisa ufunda ngegcisa elithile ukuze aqonde aze axabise ubugcisa balo. Uyaqonda ukuba umsebenzi wegcisa utyhila okuthile ngalo. Ubugcisa bendalo nabo bubonisa ubuntu bomsunguli wendalo, uThixo uSomandla. Umpostile uPawulos wachaza: “Iindawo zakhe ezibe zingenakubonwa zibonwa kakuhle . . . ngezinto ezenziweyo.” (Roma 1:20) Ngaphezu koko, uMenzi womhlaba akanakuba akaziwa. Kunjengokuba uPawulos waxelela izithandi zobulumko zaseAtene zomhla wakhe ukuba, ‘[uThixo] akakude kuthi sonke ngabanye.’—IZenzo 17:27.

Ubugcisa kwindalo kaThixo abuyonto engenanjongo okanye yamabona-ndenzile. Ngaphezu kokuba buhlaziya ubomi bethu, butyhila ubuchule nesakhono sokuyila izinto nobukhulu belo Gcisa libalaseleyo, uMyili Wendalo Iphela, uYehova uThixo. Inqaku elilandelayo liza kuxubusha indlela obunokusinceda ngayo obu bugcisa ukuze silazi bhetele eli Gcisa liPhakamileyo.

[Inkcazelo Ngomfanekiso okwiphepha 19]

Musei Capitolini, Roma