Ndakhetha Umsebenzi Obhetele

Kubalisa uPlamen Kostadinov

PHANTSE kwasemini emaqanda xa ndandivuka. Phantsi kwakuzele amakhoba yaye isitya sokugalela uthuthu esasiphuphuma sasitsho ngevumba elibophileyo. Ndandingonwabanga njengokuba ndandinjalo kwitheko endandikulo phezolo. Ndandidandathekile yaye ndandililolo. Ndandiphila nje ubomi obungenanjongo. Makhe ndikubalise ngesizathu sokuba ndide ndibe kule meko ilusizi kangaka.

Xa ndandineminyaka eli-14 ubudala ndandifuna ukwenza umsebenzi wokuzoba. Kwakungehlobo lowe-1980. Utata wayesandul’ ukundixelela ukuba ndamkelwe kwikholeji yokuzoba kwidolophu yaseTroyan, eBulgaria. Ndavuya kakhulu. Ekupheleni kwaloo nyaka, ndafuduka kwidolophu yasekhaya iLovech ndaya eTroyan.

Ndandikuthanda ukuhlala kude nabazali bam ndize ndenze nantoni na endandifuna ukuyenza. Ndaqalisa ukutshaya yaye ngamanye amaxesha ndandinxila nabahlobo bam basesikolweni. Esikolweni yayingavumelekanga into yokutshaya nokusela. Eyona nto yayisithi chatha kulonwabo lwam yayikukophula loo mithetho.

Ndaya ndikuthanda ngakumbi ukuzoba. Ndandiphum’ izandla kubuchule bam bokuzoba yaye ndandinqwenela ukwaziwa ngokuzoba. Emva kokuba ndigqibe iminyaka emihlanu kwisikolo saseTroyan, ndafuna ukuqhubeka ndifunda kwiSikolo Sokuzoba saseSofia, ikomkhulu leBulgaria. Yayilelona ziko lokuqeqesha lidumileyo kwiBulgaria yonke. Ngowe-1988, ndamkelwa kwesi sikolo njengomnye wabafundi abasibhozo abaphumeleleyo kwabaye bakhethwa kulo lonke elo lizwe. Ndandinelunda kuba ndiphumelele. Ngenye imini ndazijonga esipilini ndaza ndathi ndiqinisekile, ‘Ngoku Plamen izicacele into yokuba uza kuba ngumzobi odumileyo!’

Ngaphambi Kokuba Ndifunde Inyaniso

Ngokukhawuleza ndaqalisa ukunxiba iimpahla ezimnyama, ndakhulisa iinwele neendevu. Abantu abaninzi babecinga ukuba le yindlela umzobi afanele akhangeleke ngayo. Ndalinganisa indlela endandicinga ukuba yindlela yokuphila yabazobi baseBohemia. Oko kwakuquka ukuqesha igumbi kwindawo yabazobi neyayihlala inezinto ezithe saa nexineneyo. Emva koko ndaba nekati enamantshontsho amathathu nentshontsho lenja. Ndandikuthanda nokudyakraza ngemali.

Sekunjalo, ndaqhubeka ndikuthanda ukuzoba. Ndandisoloko ndizoba imifanekiso eyayibonisa indlela endandiphila ngayo. Ndandizobile nasemadongeni egumbi lam. Ndicinga ukuba esi yayisisiqalo somsebenzi endandiwuthanda.

Ixesha elininzi ndandisoloko ndilichitha emathekweni kunye nabantwana endandifunda nabo. Sasidla ngokudibana kwigumbi lam, siphulaphule umculo size sizinkcinkce ngotywala, sasikwenza oko naxa silungiselela iimviwo. Sasidla ngokuncokola ngomculo, ukuzoba nangenjongo yobomi. Sasisoloko sithetha ngamandla angaphaya kwawemvelo nangezidalwa eziphila kweminye imimandla. Ezi ncoko zethu zazindenza ndicinge ngezinto ezintsha endiza kuzizoba. Ndandifuna ukuhlala ndonwabile, kodwa ndandisonwaba nje xa ndinxilile. Ngokuqhelekileyo ngosuku olulandelayo kwakungabikho kwanto ebonisa ukuba bendonwabile.

Emva kokuba ndiphile ubomi obunjalo kangangeminyaka emalungu nelishumi, ndaziva ndinganelisekanga. Nangona imizobo yam yayinemibalabala emihle kodwa ndandingenathemba yaye ndandililolo ngokugqithisileyo. Amaphupha am okuba ngumzobi odumileyo aqalisa ukufiphala. Ndandixinezelekile yaye ndandingazi ukuba ndimele ndenze ntoni ukuze ubomi buqhubeke. Ndingathi elo yayilixesha lokuqala kwebali lobomi bam.

Inyaniso Yandihlangula

Ngowe-1990 ndagqiba ekubeni ndibonise ngemizobo yam eLovech. Ndamema uYanita endandifunda naye kwisikolo saseSofia ekubeni naye engowaseLovech. Emva koko, mna noYanita saya kwivenkile yokutyela eyayikufutshane. Njengokuba sasincokola wathetha ngezinto awayezifunde kwisifundo sakhe seBhayibhile namaNgqina kaYehova. Wandichazela ngehlabathi elitsha ekwakuprofetwe ngalo eBhayibhileni. Oku kwakubangel’ umdla kum.

UYanita waqhubeka nesifundo sakhe seBhayibhile eSofia yaye ngamanye amaxesha wayendiphathela iincwadi zeBhayibhile. Andiyilibali indlela endayifunda ngomdla ngayo incwadana enemifanekiso ethi, “Uyabona! Izinto Zonke Ndizenza Ntsha” yaye ngeentsuku nje ezingephi ndayifunda ndayigqiba incwadi ethi Unokuphila Ngonaphakade KwiParadisi Esemhlabeni.a Zange kube nzima ukwamkela ukuba uThixo ukho yaye kamsinya nje emva koko ndandifuna ukwazi indlela endimele ndithandaze ngayo. Ndisawukhumbula nangoku umthandazo wam wokuqala. Ndaguqa ngamadolo ndaza ngokunyanisekileyo ndachazela uYehova izinto ezindixhalabisayo. Ndandiqinisekile ukuba undiphulaphule. Ukonwaba nokuba seluxolweni kwathabathel’ indawo ukuba lilolo kwam.

ESofia, uYanita wandazisa kwesinye isibini esitshatileyo esingamaNgqina kaYehova. Sacela ukundiqhubela isifundo seBhayibhile yaye sandimemela kwiintlanganiso. Ndisayikhumbula nangoku intlanganiso yokuqala endaya kuyo ngoJuni 1991. Ndafika kwangethuba, iiyure ezimbini ngaphambi kwexesha lokuqalisa yaye ndalinda kwipaki ethile encinane. Ndisoyika, ndingakhululekanga yaye ndithandabuza, ndazibuza enoba babeza kundamkela kakuhle kusini na. Ndothuka ndakufumanisa ukuba, bonke abantu bandamkela ngezandla ezishushu nakuba ndandikhangeleka njengabantu baseBohemia. Ukususela ngoko, ndaya kwiintlanganiso rhoqo yaye ndandiqhutyelwa isifundo kabini ngeveki.

Kwandivuyisa gqitha ukufumana kwam iBhayibhile yokuqala. Ndandiqala ebomini bam ukukhe ndifunde into ekhwankqisa nechukumisa njengobulumko obukwiNtshumayelo yaseNtabeni. Njengokuba ndandiqhubeka ndifunda, ndazibonela ukuba iLizwi likaThixo linamandla okuguqula umntu njengokuba kubonisiwe kumaEfese 4:23 athi: “Mawahlaziyeke amandla engqondo yenu.” Ndayeka ukutshaya ndaza ndatshintsha nendlela exazalala endandikhangeleka ngayo. Ndanditshintshe ngokupheleleyo kangangokuba ngenye imini xa uTata wayeza kudibana nam kwisitishi sikaloliwe eLovech, wadlula kum engaboni ukuba ndim.

Ndacinga nangokulungisa igumbi endandihlala kulo. Ndakhupha ubugoxo obabulapho, ndasusa imizobo ndaza ndayeka ukuzonwabisa ngokutshaya. Ndandivakalelwa kukuba ndicoce yonk’ into. Ndazipeyinta zamhlophe iindonga ndaza ndasusa nesidalwa esingaqhelekanga esinamehlo amathathu endandisizobe eludongeni.

Abahlobo bam bandishiya kwesinomhlwa kodwa ngokukhawuleza bathatyathelw’ indawo ngabantu abaninzi endadibana nabo kwiintlanganiso zamaKristu, abasengabahlobo bam endibathandayo nanamhlanje. Ngenxa yokuba nabahlobo abandakhayo ndakhawuleza ukwenza inkqubela. NgoMatshi 22, 1992, ndabhaptizwa kwindibano yokuqala yamaNgqina kaYehova eBulgaria eyayiqhutyelwa kwisixeko sasePlovdiv.

Ukubuyela ELovech

Nangona ndandisazi ukuba kuza kuba nzima ngomntu ozobayo ukuba aziphilise kwidolophu encinane, ndagqiba ekubeni emva kokuba ndiphumelele apho ndiza kubuyela eLovech. Ndaqonda ukuba kwakuza kuba nzima kum ukuba nomsebenzi ondanelisayo wokuzoba ndize kwangaxeshanye ndibe nexesha lokubeka uBukumkani bukaThixo kwindawo yokuqala ebomini bam. Ndagqiba ekubeni nditshintshe umsebenzi ndize ndibe litsha-ntliziyo elifundisa iBhayibhile. Ngoxa ndandisekwiSikolo Sokuzoba uYanita owaphumelela kwiminyaka emithathu ngaphambi kwam wayesele engumfundisi onenzondelelo wenyaniso eseBhayibhileni eLovech. Yayinguye yedwa iNgqina apho.

Xa ndabuyela eLovech, kwakukho iqela elincinane labantu ababefunda iBhayibhile namaNgqina kaYehova. Ndandikuthanda kakhulu ukutyelela abantu kwindlu ngendlu ndize ndithethe nabo ngethemba lekamva endandisele ndilamkele. Ndagqiba ekubeni ndenze lo msebenzi ixesha elizeleyo.

Noko ke, ekuhambeni kwexesha kwaya kusiba nzima. Ngowe-1994 ukubhaliswa kwethu ngokusemthethweni njengentlangano yonqulo kwarhoxiswa yaye amaziko eendaba aphum’ iphulo enyoka amaNgqina.b AmaNgqina ayesoloko ebizelwa kwisikhululo samapolisa yaye uncwadi lwethu lwahluthwa. Ebudeni belo xesha lalinzima sasingakwazi ukuya kwiintlanganiso zebandla esidlangalaleni. Nakuba kwakunjalo, sasisiba nazo rhoqo iintlanganiso kwigumbi elizizikwemitha ezili-12 elayame kwindlu kaYanita. Ngesinye isihlandlo kwanela abantu abangama-42 kwelo gumbi lincinane. Ukuze singaphazamisi abamelwane sasivala iifestile ngoxa sicula iingoma zoBukumkani. Ngamanye amaxesha xa iqondo lobushushu liphezulu ngaphandle kwakusiba shushu kuze kufume ngaphakathi kwelo gumbi kodwa sasikuvuyela ukuba kunye.

Iintsikelelo Ezivela KuYehova

Ndamhlonela gqitha uYanita ngenxa yenzondelelo yakhe ngonqulo lokwenyaniso yaye ekuhambeni kwexesha saqalisa ukuthandana. Satshata ngoMeyi 11, 1996. Nangona ubuntu bethu bungafani, siyaphelelisana. Ngoyena mhlobo nomncedi wam usenyongweni. Ndiyambulela uYehova ngokundinika inkosikazi ‘exabiso layo lingaphezulu lee kwelekorale.’—IMizekeliso 31:10.

Abanye ababengabahlobo bam baqhubeka bengabazobi, indlela yokuphila endakha ndaphupha ngayo. Noko ke, ndiyabulela kuba ndakhetha umsebenzi endiwujonga njengobhetele. Ndiye ndanceda abantu abaninzi bafumana injongo yobomi yaye sithethanje bangabazalwana noodadewethu bokomoya. Udumo nokwaziwa njengomzobi andinakuluthelekisa neentsikelelo endizifumanayo kuba ndikhonza uYehova. Ndiyavuya kuba ndiye ndamazi ngokusondeleyo uMzobi omkhulu, uYehova uThixo.

[Imibhalo esemazantsi]

[Umfanekiso okwiphepha 12]

Ndikunye nenkosikazi yam uYanita