Elona Gcisa Lingakhathalelwanga Lexesha Lethu

“Indalo bubugcisa bukaThixo.”—Sir Thomas Browne, ugqirha wenkulungwane ye-17.

ULEONARDO DA VINCI, uRembrandt, uvan Gogh—la ngamagama aziwa zizigidi zabantu. Nakubeni usenokuba akuzange ubone namnye umzobo wawo wantlandlolo, la madoda uwazi njengawona magcisa aphum’ izandla. Ngokungathi kunjalo, ubugcisa bawo, buwenze akafa.

Azoba into entle emangalisayo, umfanekiso ochukumisayo, asikrobisa ubuhle obukwindalo, nto leyo ephembelele ababukeleyo batsho bakhupha esabo isakhono sokuzoba. Sisathe phithi koko ayethe phithi kuko—nangona sisenokuba siphila kwiinkulungwane ezahlukeneyo.

Sisenokuba asingomagcisa okanye iincutshe kubugcisa, kodwa sekunjalo siyakwazi ukubona umfanekiso omhle. Njengegcisa esibuka umsebenzi walo, nathi siyakwazi ukubona into entle. Ubuchule bethu bokubona imibala, ukumila kwento, uhlobo elulo nokukhanya sisenokukuthabatha lula, kodwa kuyinxalenye yobomi bethu. Ngokungathandabuzekiyo siyakuthanda ukuhombisa amakhaya ethu ngezinto okanye ngemifanekiso enomtsalane. Nangona amehlo engaphakelani, obu buchule bokukwazi ukubona into entle busisipho olunaso uluntu oluninzi. Yaye busisipho esinokusisondeza ngakumbi kuMdali wethu.

Isipho Sobuhle

Ubuchule bokukwazi ukubona into entle bulolunye uphawu kwiimpawu ezininzi ezahlula uluntu kwizilwanyana. Incwadi ethi Summa Artis—Historia General del Arte (Inqaku Elingobugcisa Eliqulethe Konke—Imbali Eqhelekileyo Yobugcisa) ithi “umntu unokuchazwa njengesilwanyana esikwaziyo ukubona into entle.” Kuba sahlukile thina ezilwanyaneni, indalo siyibona ngendlela eyahlukileyo. Ngaba inja iyakuxabisa ukutshona kwelanga okubukekayo?

Ngubani owasenza ngaloo ndlela? IBhayibhile ichaza ukuba “uThixo wamdala umntu ngokomfanekiselo wakhe; wamdala ngokomfanekiselo kaThixo.” (Genesis 1:27) Oku akuthethi ukuba abazali bethu bokuqala babefana noThixo. Kunoko uThixo wabapha iimpawu anazo. Olunye lwezo mpawu bubuchule bokuxabisa into entle.

Ngenkqubo ethile entsonkothileyo, ubuchopho bomntu buyakwazi ukuphawula into entle. Okokuqala, izivamvo zethu zithumela ebuchotsheni inkcazelo ephathelele isandi, ivumba, imibala nokumila kwezinto ezithimba ingqalelo yethu. Kodwa ubuhle buzodlula lee ezo nkcazelo, ezisixelela nje oko kwenzekayo kwindawo esingqongileyo. Umthi, intyatyambo okanye intaka asiyiboni ngendlela isilwanyana esiyibona ngayo. Nangona ezi zinto zisenokuba akukho nto ziza kusinceda ngayo okwelo xesha, ziyasiyolisa ngandlel’ ithile. Ubuchopho bethu busenza sikuphawule ukuxabiseka kobuhle bazo.

Obu buchule bushukumisa iimvakalelo zethu ibe buhlaziya ubomi bethu. UMary, ohlala eSpeyin, ukhumbula kakuhle enye ingokuhlwa yangoNovemba kwiminyaka embalwa edluleyo xa wayemi kufuphi nelinye ichibi ebukele ukutshona kwelanga. Uthi: “Kwakubhabha imihlambi yamahemu isiza ngakum omnye emva komnye. Amawaka ezi ntaka ayenqumla isibhakabhaka esibomvu engathi sisigcawu. Ukufuduka kwawo kwaminyaka le esuka eRashiya naseScandinavia kuwazise kule ndawo yokuphumla yaseSpeyin. La yayingamava amnandi kangangokuba zaphalala kum iinyembezi.”

Kutheni Sinesiphiwo Sobuhle?

Ebantwini abaninzi ubuchule bokubona into entle ngokucacileyo balatha kubukho boMdali onothando, ofuna indalo yakhe ekrelekrele inandiphe umsebenzi wakhe. Hayi indlela okusengqiqweni nokwanelisa ngayo ukugqala ubuchule bethu bokubona into entle njengobuvela kuMdali onothando. IBhayibhile ichaza ukuba “uThixo uluthando,” yaye uphawu lothando kukwabelana nabanye. (1 Yohane 4:8; IZenzo 20:35) UYehova kuyamvuyisa ukwabelana nathi ngobugcisa bakhe bokuyila. Ukuba uncuthu lwengoma lwalungazange lweviwa okanye umzobo omhle wawungazange ubonwe, ngesingathethi ngobuhle bazo. Ubugcisa budalelwe ukuba kwabelwane ngabo yaye bunanditshwe—abunamtsalane xa kungekho bantu babubukelayo.

Ewe, uYehova wadala izinto ezintle ngenjongo—ukuba kwabelwane ngazo yaye zinanditshwe. Enyanisweni, ikhaya labazali bethu bokuqala laliyipaki enkulu eyiparadisi eyayibizwa ngokuba yiEden—oko kukuthi “uYolo.” UThixo akawuzalisanga umhlaba ngobugcisa bakhe nje kuphela kodwa ukwanike uluntu ubuchule bokunikela ingqalelo kubo luze lubuxabise. Yaye hayi indlela eziseninzi ngayo izinto ezintle ezisamele zibonwe! Njengoko uPaul Davies watshoyo, “maxa wambi kubonakala ngathi imvelo ‘yayisenza umgudu okhethekileyo’ ukuze ivelise ummandla wendalo obangel’ umdla nonemveliso.” Ummandla wendalo siwufumana ubangel’ umdla yaye uchumile ngenxa yokuba uYehova ‘wenza umgudu’ wokusidala ukuze sikwazi ukuwuhlolisisa yaye siwunandiphe.

Akumangalisi ukuba, ukuphawula ubuhle bemvelo—nomnqweno wokubuxelisa—kuqheleke kuzo zonke iindidi zabantu, ukususela kubantu bamandulo ababezoba imifanekiso yezilwanyana emiqolombeni ukusa kwabo Benza Imizobo Echukumisayo. Kumawaka eminyaka eyadlulayo, abemi bakumntla weSpeyin bazoba imifanekiso yezilwanyana ecacileyo kwimiqolomba yaseAltamira, eCantabria. Kangangexesha elingaphezu kwenkulungwane elidluleyo, aBenzi Bemizobo Echukumisayo benjenjeya benikel’ umva amagumbi abazobela kuwo baza bazama ukuzoba iintyatyambo ezimibala iqaqambileyo okanye ukuguquguquka kweentlobo zokukhanya emanzini. Kwanabantwana abaselula bayazazi izinto ezintle. Enyanisweni, uninzi lwabo xa lunikwe iikrayoni nephepha luyakuthanda ukuzoba nantoni na oluyibonayo efike kuqala ezingqondweni zalo.

Kule mihla, abantu abakhulu abaninzi bakhetha ukuyifota into entle eyabachukumisayo ukuze bayikhumbule. Kodwa nangaphandle kokusebenzisa ikhamera, iingqondo zethu ziyakwazi ukukhumbula imifanekiso emihle ekusenokwenzeka ukuba sasiyibone kumashumi eminyaka adlulayo. Ngokucacileyo, uThixo wasenza sakwazi ukunandipha ikhaya lethu elingumhlaba, alihombise kakuhle. (INdumiso 115:16) Noko ke, sikho esinye isizathu sokuba uThixo esenze sakwazi ukubona into entle.

‘Iindawo Zakhe Zibonwa Kakuhle’

Ukulwenza nzulu uxabiso lwethu ngomsebenzi okwindalo kunokusinceda simazi uMdali wethu, esingqongwe yimisebenzi yezandla zakhe. Ngesinye isihlandlo uYesu wakha waxelela abafundi bakhe ukuba bondele iintyatyambo zasendle ezikhula kwelaseGalili. Wathi: “Gqalani iinyibiba zasendle, ukuhluma kwazo; azibulaleki, azisonti nokusonta; ke ndithi kuni, noSolomon kubo bonke ubunewunewu bakhe, wayengavathiswanga nanjenganye kuzo ezi.” (Mateyu 6:28, 29) Ubuhle bentyatyambo yasendle engabalulekanga kunokusikhumbuza ukuba uThixo akazibethi ngoyaba iimfuno zentsapho yoluntu.

Kwakhona uYesu wathi unokumqonda umntu “ngeziqhamo,” okanye ngemisebenzi yakhe. (Mateyu 7:16-20) Ngaloo ndlela, kunokulindelwa ukuba imisebenzi kaThixo yobugcisa iya kusenza sibuqonde ubuntu bakhe. Ziziphi ‘ezinye zeendawo zakhe ezinokubonwa kakuhle kwasekudalweni kwehlabathi’?—Roma 1:20.

Umdumisi wadanduluka wathi: “Hayi, ukuba zininzi izenzo zakho, Yehova! Zonke ziphela uzenze ngobulumko.” (INdumiso 104:24) Ubulumko bukaThixo bunokubonakala nakwimibala ayisebenzisileyo “ukuzoba” iintyatyambo nezilo zomhlaba. “Umbala uyolisa ingqondo namehlo,” watsho njalo uFabris noGermani kwincwadi yabo ethi Colore, Disegno ed estetica nell’arte grafica (Umbala—Ukuyila Nobugcisa Bokuzoba). Imibala eyeleleneyo neyahlukeneyo, ebukekayo emehlweni nehlaziya ingqondo, ikho kuyo yonke indawo. Kodwa mhlawumbi eyona inomtsalane yimibala ekhazimlayo—imibala eqaqambileyo efana neyomnyama—ebubungqina obuphawulekayo bokuyila ngobulumko.

Imibala ekhazimlayo ngokukhethekileyo iqheleke kwiingcungcu.a Yintoni eyenza iintsiba zazo zikhazimle ngolu hlobo? Iintsiba zazo ezingaphezulu ezahlukileyo xa zigqatswe kukukhanya kwelanga ziba nemibalabala efana neyomnyama—ngokungathi koko kwenziwa yiglasi ekuthiwa yiprism. Amagama aqhelekileyo eengcungcu, anjengeruby, isapphire ne-emerald, ngokucacileyo ayayifanela imibala yazo ebomvu krwe, ezuba neluhlaza ehombisa ezi ntaka zifana namatye anqabileyo. Kwincwadi yakhe ethi Hummingbirds uSara Godwin wabuza: “Yintoni injongo yobuhle bezi zilwanyana zibukekayo?” Uyaphendula: “Izazinzulu zigqibe kwelithi, abunantsingiselo ngaphandle nje kokutsala ingqalelo yabazibukeleyo.” Ngokuqinisekileyo, akukho gcisa lingumntu lakha lakhupha le mibala inje ngokuba injalo!

Sinokuwabona amandla kaThixo kwiingxangxasi ezinkulu, kumaza alatyuzayo, namandla amaza angaselunxwemeni okanye kwimithi emide yehlathi entlithwa luqhwithela. Lo msebenzi usemgangathweni unokuyolisa njengendawo ezolileyo. Umfundi ngezityalo nezilwanyana odumileyo waseMerika uJohn Muir wakha wachaza imiphumo yoqhwithela kwiqela lemithi eyiDouglas firs kwiSierra Nevada yaseKhalifoniya:

“Nangona ingekakhuli ngokwaneleyo, yayimalunga nomlinganiselo weenyawo ezili-100 [iimitha ezingama-30] ukuphakama, yaye iinkcochoyi zayo ezithambileyo, eziyokozela amagqabi ziya ngapha nangapha ngesantya esikhulu. . . . Iinkcochoyi ezincinane zintlithwa zizikhukula ezinamandla, zigobela emva naphambili, ziya ngapha nangapha, umzobo ongathethekiyo wamagophe ame nkqo nathe tyaba.” Njengoko umdumisi wabhalayo kumawaka eminyaka eyadlulayo, ‘umoya ovuthuzayo udumisa uYehova’—oku kusibonisa amandla akhe akhethekileyo.—INdumiso 148:7, 8.

Intaka ibisoloko iluphawu lothando kubantu baseJapan. Ihemu elihle laseJapan, umdaniso walo obukekayo neqabane lalo undiliseke njengomdaniso othile. Ezi ntaka zixabiseke gqitha kangangokuba eJapan ziye zagqalwa “njengezinto zesikhumbuzo sokwemvelo esikhethekileyo.” Ekubeni amahemu ehlala ngambini ubomi bawo bonke yaye esenokuphila iminyaka engama-50 okanye ngaphezulu, abantu baseJapan bawagqala njengomfuziselo womtshato onyanisekileyo.

Kuthekani ngothando lukaThixo? Okubangel’ umdla kukuba iBhayibhile ithelekisa inkuselo kaYehova yothando kwabo banyanisekileyo neyentaka engumzali osebenzisa amaphiko akhe ukukhusela amantshontsho akhe kwimozulu embi. IDuteronomi 32:11 ithetha ngokhozi ‘olundanda phezu kwamathole alo, lawolula amaphiko alo, lawathabatha, lawathwala ngamaphiko alo.’ Ukhozi olungumzali lenza ezi zinto ukukhuthaza amantshontsho alo ukuba ashiye indlwane abhabhe. Nangona kungafane kubonwe oku, zikho iingxelo ngeenkozi ezibamba amantshontsho azo ngamaphiko.—INdumiso 17:8.

Njengoko siqwalasela ihlabathi lokwemvelo elisingqongileyo, siphawula imigaqo ethile esebenzayo ekwatyhila iimpawu zobuntu bukaThixo.

Ubomi Bumnandi Ngokuvangwa Kwezinto

Ukungafani kwezinto kumsebenzi wezandla zikaThixo kuyinto ebonakalayo ngoku. Ukuvangwa kwezityalo, kweentaka, kwezilwanyana nezinambuzane kubambis’ ongezantsi. Ihektare nje enye yehlathi elikweleenjiko isenokuba neentlobo ezingama-300 zemithi neentlobo zezinambuzane ezingama-41 000 ezahlukahlukeneyo; izikwere zeekhilomitha ezintathu zisenokuba likhaya leentlobo zamabhabhathane ezili-1 500; yaye umthi omnye unokuba likhaya leentlobo zamabhungane ezili-150! Yaye kanye ekubeni kungekho bantu babini bafana ncam, kunokuthethwa okufanayo ngemithi yomoki okanye izingwe. Ukungafani, luphawu oluxatyisiweyo ngabazobi abangabantu, kuyinxalenye esisiseko yemvelo.

Kakade ke, sikhankanye nje iimpawu ezimbalwa zobugcisa bemvelo. Ngokubuqwalasela ngocoselelo, sinokubona nezinye iimpawu ezininzi zobuntu bukaThixo. Kodwa ukuze senze ngaloo ndlela, kufuneka sisebenzise ubuchule bobugcisa esibunikwe nguThixo. Sinokufunda njani ukubuqonda bhetele ubugcisa boyena Mzobi ubalaseleyo?

[Umbhalo osemazantsi]

[Ibhokisi ekwiphepha 23]

Kufuneka Sazi Lowo Wasibeka Apha

Umguquleli weBhayibhile uRonald Knox wayekhe waxoxa ngezakwalizwi nesazinzulu uJohn Scott Haldane. Lo kaHaldane waqiqa ngelithi: “Kummandla wendalo onezigidi zezijikelezi-langa, ngaba bekungamele ukuba kukho ubomi ubuncinane kwisijikelezi-langa esinye?”

Lo kaKnox waphendula wathi: “Mhlekazi, ukuba amagosa aseScotland Yard ebefumene umzimba etrankini yakho, ngaba ubunokuthi kuwo: ‘Kukho izigidi zeetranki ehlabathini—ngokuqinisekileyo enye kuzo imele ukuba inomzimba?’ Ndiyacinga ukuba ebeya kuqhubeka efuna ukwazi umntu owubeke apho.”—The Little, Brown Book of Anecdotes.

Ngaphandle kokwanelisa umnqweno wethu wokufuna ulwazi, kukho esinye isizathu sokuba sifune ukwazi umntu owasibeka apha—ngoko sinokumnika imbeko emfaneleyo loo Mntu. Ngaba beliya kusabela njani igcisa elinesiphiwo ukuba umgxeki ozingcayo ebenokuchaza umzobo walo njengoye ngempazamo kwivenkile yemifanekiso? Ngokukwanjalo, ibiya kuba kokunjani kona ukudelela uMdali wommandla wendalo ukuba ubugcisa bakhe besibugqala njengento yamabona-ndenzile?

[Inkcazelo]

Courtesy of ROE/Anglo-Australian Observatory, photograph by David Malin

[Imifanekiso ekwiphepha 24]

Amahemu ebhabha

Imizobo esemiqolombeni eAltamira, eSpeyin

[Imifanekiso ekwiphepha 25]

Amahlengesi, iingcungcu neengxangxasi konke kutyhila iimpawu zobuntu beGcisa Elibalaseleyo

[Inkcazelo]

Godo-Foto

G. C. Kelley, Tucson, AZ

Godo-Foto