Ukukhonza Oyena Mzobi Mkhulu Kunabo Bonke
NGOXA ndandiyintwazana eneminyaka esixhenxe ubudala, ndaqalisa ukuzibuza: ‘Kutheni kuza kwenzeka ndife nje? Ngaba kunokwenzeka ukuba ndikuphephe ukufa?’ Ndaye ndaxelelwa ukuba uThixo uyabathabatha abantu abalungileyo ngenxa yokuba efuna ukuba babe naye ezulwini. Ndisamkhumbula omnye endandifunda naye eklasini edanduluka esithi: “Kulunge ngakumbi ukuba ube ngumntu ombi kuba umntu olungileyo ufa kuqala!”
Ndandikuthanda ukuzoba, ngoko ndaqalisa ukufunda ngobugcisa. Esikolweni, ndandingenalo ithuba lokucinga ngemibandela engokonqulo, nditsho nexesha lokuba ndibe nomdla kuyo. Enyanisweni, ndandiqhele ukuxelela abahlobo bam ukuba ukuze ubani abe ngowonqulo, akufuneki lwazi luphakame kangako. Xa ndathi ndagqiba izifundo zam zobugcisa, ndafumana isithuba somsebenzi wobufundisi-ntsapho kwizifundo zobugcisa kwisikolo semfundo ephakamileyo.
Ndandiwuthanda umsebenzi wam ibe ndandikwanomdla kuncwadi lwaseItali nolwamanye amazwe, kumculo wabadlali abambalwa nowabodidi oluphezulu, nomculo weopera. Ekuphela kwento eyayiyeyonqulo endayifunda ngelo thuba yayizizifundo eziqhutywa ngemifanekiso zabazobi abathile ababephila ngamaxesha awahlukahlukeneyo. Ndandula ke ndafunda oko kwakuthethwa kukuba ngumntu onendumasi, ukuba kwakunjani na ukubonisa kukabani oko wayekwenza, oko kwakuthetha kona ukuba ngohlonelwa gqitha, odunyiswayo nothandwayo njengomzobi.
Ngelo xesha, umsebenzi wezobugcisa wawuthetha lukhulu kum, ekubeni kwakulapho endathi ndafumana khona ubukhulu becala ulwaneliseko nenjongo yokuphila. Kodwa imibuzo endazibuza yona xa ndandineminyaka esixhenxe yayisekho engqondweni yam. Ngenzondelelo ndaqhubeka ndisenza uphando ngento ethile enzulwana, into ethile endandingenako ukuyicacisa okwelo xesha. Ndandingumfundi okhutheleyo ibe ndacela iintanda-bulumko ukuba zindichazele okungakumbi. Ngako konke endinako, ndandifuna impendulo eqinisekileyo ngemibuzo yam.
Ndandisenako oku kudideka xa ndathi ndatshata. Emva kokuzalwa kwentombi yam, uphando lwam ngenyaniso lwaye luqina ngakumbi. Ndazama ukuyifumana ngokuzoba, ukubhala imibongo, ukuphulaphula umculo, ukufunda iincwadi. Ngalo lonke ixesha ndisiya ekonsathini ndize ndiphulaphule ukudlalwa komculo wengabula-zigcawu, ngokuzenzekelayo engqondweni yam kwakusithi qatha uThixo, uMntu Ophakamileyo endandingamazi, ndize ndimbulele. Ebudeni belo xesha, ngokufuthi ndandidla ngokumdumisa uThixo ngenxa yezinto ezintle endandizithanda—umntwana wam oleleyo, iindawo zomhlaba ezinemibala emihle. Ndandidla ngokukhalaza ndithi, “Elinjani lona ihlazo, lokuba izifundo zobugcisa, ebezifanele ukuba zibalaselise izinto ezininzi ezintle, zibe zinokusetyenziswa kangaka ukuchaza ukufa endaweni yobomi!” Yimbi imibongo ebalaseleyo nemidlalo yeqonga ziziingoma nje zokubonisa iingcamango ezingemyoli okanye intlekele; yimbi yeyona misebenzi yobuchule emihle yokuzoba ibalaselise ukufa kunobomi nobuhle babo. Kutheni kunjalo nje?
Ezi ngcamango zahlukahlukeneyo zandenza ndabuhlungu gqitha ibe ngokuthe ngcembe ndaye ndiphelelwa ngumdla. Ndandikwelo nqanaba ngethuba awathi amaNgqina kaYehova andityelela. Njengoko ndandiwaphulaphule, kwabonakala ngathi athetha nam ngolwimi olutsha. Idinga likaThixo lokwenza umhlaba ube yiparadisi lavakala njengomculo oyolisayo ezindlebeni zam. Ndaqalisa ukufunda iBhayibhile. Kulapho endathi ekugqibeleni ndazifumana iimpendulo kwimibuzo endandingazange ndiyeke ukuzibuza yona ukususela oko ndandineminyaka esixhenxe ubudala. UThixo akafuni ukuba abantu bafe kodwa unenjongo yokubasikelela abakhonzi bakhe ngokubanika ubomi obungunaphakade emhlabeni!
Oko kwenzeka ngowe-1973. Kunyaka olandelayo ndazahlulela kuYehova ndaza ndabhaptizwa. Kwakungeyondlwan’ iyanetha ukuthabathel ‘indawo isimo sam sokuba ngotyhuthuzelayo noqhutywa ziimvakalelo ngokuba nomoya wothando lokwenyaniso lobuzalwana, ukuthabathel’ indawo ukuba ngozingcayo ngokuba ngongazicingeliyo, ndize endaweni yokuzanelisa ngokobuqu ndibe nomoya wokuzincama! Kwafuneka ndizincame. AmaNgqina kaYehova aye andinceda kakhulu, njengokuba zenjenjalo neentlanganiso ezaziqhutyelwa kwiHolo yoBukumkani.
UMzobi Omkhulu uye wawashenxisa amathandabuzo nokudideka ebendinako. Hayi indlela endimbulela ngayo! Kungenxa yoko endithe, ukususela ngoSeptemba 1984, ndathabatha inkonzo yobuvulindlela obuthe ngxi, ndichitha iiyure ezinga-90 nyanga nganye ekushumayeleni iindaba ezilungileyo zoBukumkani bukaThixo.
Ukukhonza uMzobi Omkhulu noMdali, uYehova, ndawonye nentsapho yam kuyanelisa ngokwenene. Ngolangazelelo silindele ixesha laxa aya kuzoba owona mfanekiso mhle wakha wakho; xa ekugqibeleni eshenxisa inkqubo endala, engendawo engcolisa negubungele lo mhlaba. Ukufa akusayi kubakho, ibe iya kwandula ke imisebenzi yobugcisa isetyenziselwe ngokupheleleyo ubomi. Ngoko, bubuhle kuphela obuya kubonakaliswa, kuba ngenkqubo entsha kaThixo yobulungisa, imbandezelo nentlungu ziya kube zishenxiswe ngonaphakade.—Linikelwe.