Imithandazo Yoxolo Phakathi Kweenkumbulo Zemfazwe
NGONOVEMBA 1994, uPopu John Paul II walungiselela indibano kazwelonke eyayiseVatican. Esi yayisisihlandlo sokuthandazela uxolo lwehlabathi. Kwintetho yakhe yokuvula upopu wathi: “Enoba ziziphi na iimfazwe esibe nazo kwixesha elidluleyo nesinazo ngoku, kuyimbopheleleko nomsebenzi wethu sonke ukuba silwazise ngakumbi ulwalamano oluphakathi konqulo noxolo.”
Okuyimpoxo kukuba iinkonzo zeli hlabathi zidume ngokusilela kulo mba. UWilliam Vendley, usosiba-jikelele waloo nkomfa, wavuma ukuba “iinkonzo zingene nzulu kwiimfazwe ezikwimimandla eyahlukahlukeneyo yehlabathi.” Khawucinge ngokubulawa kwabantu eRwanda, ilizwe elinamaRoma Katolika amaninzi.
NgoMeyi 1994, uPopu John Paul II wavuma ukuba intlekele yaseRwanda “kukutshatyalaliswa kohlanga kokwenene nokuyinyaniso, ngelishwa, namaKatolika abandakanyekileyo kuko.” Ngaba ukungenelela kwamaKatolika kuye kwakuchaphazela ukukholelwa kwabantu ecaweni? UAndré Bouillot, umJesuit waseBelgium uthi: “Ukubulawa kwabantu kuye kwaluxengaxengisa ukholo lwabantu abaninzi.” Ibe banesizathu esihle sokwenjenjalo.
Ngokutsho kwengxelo yeReuters eyapapashwa kwiHerald yaseMiami, “abefundisi, oo-pastor noonongendi baphakathi kwamabanjwa angamaHutu angama-40 000 alindele ukuxoxwa kwamatyala awo ngenxa yezenzo zokutshabalalisa uhlanga.” IThe New York Times yanikela le ngxelo: “Abantu abaninzi baseRwanda bathi oobhishopu noobhishopu abakhulu babo abazange bakugxeke ngokukhawuleza okanye ngamandla ngokwaneleyo ukubulawa kwabantu yaye babesondelelene gqitha noRhulumente kaHabyarimana, owancedayo ekuqeqesheni amaqela amajoni abulalayo. Ubuncinane mnye umfundisi obanjwe nguRhulumente omtsha wamaTutsi obekw’ ityala ngokuba nenxaxheba ekubulaweni kwabantu.” Akumangalisi ukuba njengoko iTimes isongezelela, “uRhulumente omtsha uthi akafuni ukuba iCawa yamaKatolika ibe negunya njengakuqala, ibe amajoni aye abatshutshisa yaye ade abasongela ngokubavalela entolongweni abefundisi abathetha ngokuphandle nabazimeleyo.”
Ngaba uYehova uThixo uyijonga njani imithandazo yoxolo eyenziwa ngabanquli abanetyala legazi? UIsaya 1:15 uyaphendula: “Ekoluleni kwenu izandla zenu, ndiya kuwafihla amehlo am kuni; nokuba nandise ukuthandaza, andiyi kuva; izandla zenu zizele ngamagazi.”
Ngelo xesha, abakhonzi bakaYehova bokwenyaniso bayaqhubeka “bengengabo abehlabathi” kunye neemfazwe zalo. Ebudeni bokubulawa kwabantu eRwanda, amaNgqina kaYehova esizwe ngasinye ayesenza amakhaya awo imizi yokusabela kumaNgqina esinye isizwe asongelwayo, ngaloo ndlela ewakhusela ngoxa ayebeke ubomi bawo esichengeni. “Isihlwele esikhulu” samaNgqina, esithatyathwe ehlabathini lonke kuzo zonke iintlanga, sithandazela yaye simela uBukumkani bukaThixo njengobukuphela kwethemba loxolo lokwenyaniso nokunqabiseka.—Yohane 17:14; ISityhilelo 7:9; Mateyu 6:9, 10; 24:14.
[Inkcazelo Ngomfanekiso okwiphepha 18]
Luc Delahaye/Sipa Press