Ukukhulisa Umntwana Wabanye Abantu—Ngaba Kukulungele?
NGUMBHALELI KAVUKANI! EBRITANI
“UKUKHULISA umntwana wabanye abantu lilungiselelo lokunceda abantwana, asilolungiselelo lokunika isibini esingenabantwana umntwana,” utsho njalo omnye unontlalontle waseBritani. Sekunjalo, ngawaphi amalungelo ngokuqhelekileyo anawo umntwana xa ekhuliswa ngabanye abantu?
Ngaba ucinga ngokukhulisa umntwana wabanye abantu? Ngoko akujamelananga nesigqibo esingokweemvakalelo nje kuphela kodwa ujamelene neso singenakuguqulwa. Uya kuqhelana ngokunempumelelo kangakanani loo mntwana nentsapho yakho?
Ukuba ungumntwana okhuliswa ngabanye abantu, ngaba uyabazi abazali bakho bokwenene? Ukuba akubazi, nguwuphi umahluko ocinga ukuba ubuya kubakho ukuba ububazi?
Ngaba ungumama ocinga ngokunikela ngomntwana wakhe ukuba akhuliswe ngabanye abantu? Ngaba ukunikela ngomntwana wakho ukuba akhuliswe ngabanye abantu ngenene kuphela kwesicombululo yaye kunokuba yeyona ngenelo emntwaneni wakho?
Ngowe-1995, eUnited States abantwana abangaphezu kwama-50 000 babekhuliswa ngabantu abangengobazali babo, ibe abamalunga nama-8000 kubo bazalelwa kumazwe asemzini. Ngokwandayo, abantu bathabatha abantwana kumazwe asemzini ukuze babakhulise. Ngokutsho kwephephancwadi iTime, kwiminyaka engama-25 edluleyo iintsapho zaseUnited States ziye zakhulisa abantwana babanye abantu abangaphezu kwe-140 000 abazalelwa kumazwe asemzini. Amanani afanayo eYurophu ngawaseSweden angama-32 000, eHolland ngama-18 000, eJamani ngama-15 000 yaye eDenmark li-11 000.
Ngaba nawe ubandakanyekile kule meko? Ukukhulisa umntwana wabanye abantu kuthetha ukuba ubomi bakho—kungekuphela nje ubomi bomntwana—abunakuphinda bubuyele kwimeko yesiqhelo. Abazali abakhulisa umntwana wabanye abantu banezizathu zokulindela uyolo, kodwa bamele balindele iingxaki ezininzi nokuphoxeka. Ngokufanayo, intliziyo ebuhlungu eviwa ngumama ophisa ngomntwana wakhe isenokuqhubeka ibuhlungu.
Imeko nganye izisa ucelomngeni lokwakha nokuvuselela umntu oselula ngothando. Amanqaku alandelayo aza kubonisa uvuyo—nocelomngeni—olubangelwa kukukhulisa umntwana wabanye abantu.