Lityala Likabani?

UMNTU wokuqala, uAdam, waqalisa olu tyekelo. Emva kokuba onile wathi kuThixo: “Umfazi owandinika ukuba abe nam, nguye ondinikileyo kuwo umthi, ndadla ke.” Ngelivakalayo, wayesithi: “Asilotyala lam!” Umfazi wokuqala, uEva, wenza okufanayo xa wathi: “Inyoka indilukuhlile, ndadla ke.”—Genesis 3:12, 13.

Ngaloo ndlela kwaqala kumyezo wase-Eden ukwala kwabantu ukwamkela imbopheleleko ngezenzo zabo. Ngaba wakha wanetyala lokwenza oku? Xa kuvela iingxaki, ngaba ngokukhawuleza utyhola abanye? Okanye ngaba uyayiphonononga imeko ukuze ubone ukuba ngubani ngokwenene obekek’ ityala? Kubomi bemihla ngemihla, kulula gqitha ukungena kumgibe wokutyhola abanye ngeempazamo zethu kwanokuthi, “Asilotyala lam!” Makhe sikhangele kwiimeko eziqhelekileyo size sibone oko abanye badla ngokukwenza. Okubaluleke ngakumbi, cinga ngoko ubuya kukwenza phantsi kweemeko ezifanayo.

Iingxaki Zemali

“Asilotyala lam—luqoqosho, abantu abangathembekanga boshishino, ukuphakama kwamaxabiso ezinto zokuphila,” basenokutsho abanye xa bezifumana bengene kwenzulu ingxaki yemali. Kodwa ngaba ngokwenene ezi zizibakala ezinokubekw’ ityala? Mhlawumbi iimeko ezingaqinisekanga ziye zabakhokelela kushishino oluthandabuzekayo okanye oluyingozi. Maxa wambi ukunyoluka kunokwenza kungabaluleki ukuwuhlolisisa umbandela, baze abantu bazifumane bentyumpantyumpeka kwiimeko ezinobungozi, besiba ngamaxhoba koosomaqhingana. Bayalilibala iqhalo elithi, “Ubuhle bekhiwane ziimpethwana.” Bazingela icebiso abafuna ukuliva, kodwa xa bejamelana neengxaki zezoqoqosho, bafuna umntu ongomnye abaza kumbeka ityala. Ngelishwa, oku, ngamanye amaxesha kuyenzeka kwanasebandleni lamaKristu.

Bambi baye babanjiswa ziinkqubo zotyalo-mali ezingebobulumko okanye ezingaqondakaliyo, ezifana nokuthenga iidayimani ezingekhoyo, ukufaka imali kwiinkqubo ezingundaba-mlonyeni zikamabonwakude eziye zakhawuleza zaphelel’ emoyeni, okanye ukuxhasa ishishini lokwakha izindlu eliye latshona. Umnqweno ogqithiseleyo wobutyebi usenokuba wenze safiphala kwinkumbulo yabo isiluleko seBhayibhile esithi: “Ke abo banga bangaba zizityebi, beyela ekuhendweni, nasesabatheni . . . bazibhodloza ngobuhlungu obuninzi.”—1 Timoti 6:9, 10.

Inkcitho engalawulekiyo isenokukhokelela kwiingxaki zemali. Bambi bavakalelwa kukuba bamele bakhangeleke njengabantu abakulindixesha wakutshanje wefashoni, babe neeholide ezibiza imali eninzi, batye kwindawo zokutyela eziphucuke gqitha, baze bathenge “izinto zokudlala” zakutshanje zabantu abakhulu—iinqwelo-mafutha zokuzonwabisa, amaphenyane, iikhamera, nezixhobo zestereo. Kambe ke, ngelinye ixesha abanye basenokukwazi ukuzifumana ezi zinto ngokucwangcisa ngobulumko nangokulondoloza imali. Kanti abo bangxamele ukuba nazo ezi zinto basenokuzifumana betshone abavela nangonwele ematyaleni. Ukuba kunjalo, lityala likabani? Ngokucacileyo baye balityeshela icebiso eliphilileyo leMizekeliso 13:18 elithi: “Unobuhlwempu nocukucezo ophulukene noqeqesho.”

Ukudaniswa Ngabantwana

Abanye abazali basenokuthi: “Ngabadala ababekek’ ityala ngabantwana bam abashiye inyaniso. Abazange banikele ingqalelo eyaneleyo kubantwana bam.”

Abadala banembopheleleko yokwalusa nokunyamekela umhlambi, kodwa kuthekani ngabazali ngokwabo? Ngaba bangumzekelo omhle ekubonakaliseni iziqhamo zomoya kaThixo kuzo zonke iinkqubano zabo? Ngaba isifundo seBhayibhile sentsapho besiqhutywa ngokuthe rhoqo? Ngaba abazali bebebonakalisa inzondelelo ngenkonzo kaYehova yaye benceda nabantwana babo ukuyilungiselela? Ngaba bebezilumkele izinxulumani zabantwana babo?

Ngokufanayo, kulula ngomzali ukuba athi ngokuphathelele umsebenzi wesikolo: “Ngootitshala ababekek’ ityala ngokungenzi kakuhle konyana wam esikolweni. Bebengamfuni unyana wam. Ibe kakade esiya sikolo sinomgangatho ophantsi wemfundo.” Kodwa ngaba umzali uye wanxibelelana ngokusondeleyo nesikolo? Ngaba umzali ebenomdla kuludwe lwezifundo zomntwana wakhe? Ngaba umsebenzi wakhe wesikolo owenziwa ekhaya ubucwangcisiwe, kwaye ngaba uncedo belunikelwa xa elufuna? Ngaba ingxaki engunobangela sisimo sengqondo okanye ukunqena komntwana okanye umzali?

Kunokuba abazali batyhole inkqubo yesikolo, kunokuba luncedo ngakumbi ukuba bathabathe amanyathelo okuqinisekisa ukuba abantwana babo banesimo sengqondo esilungileyo kwanokuba bayawasebenzisa amathuba abawafumanayo okufunda esikolweni.

Ukusilela Ukukhula Ngokomoya

Ngamanye amaxesha sikhe sive omnye esithi: “Ngendomelele ngokomoya, kodwa asilotyala lam ukuba ndingenjalo. Abadala abanikeli ngqalelo yaneleyo kum. Andinabahlobo. Umoya kaYehova awukho kweli bandla.” Ngelo xesha, abanye ebandleni banabo abahlobo, bonwabile, kwaye benza inkqubela entle ngokomoya; ibe ibandla lisikelelekile ngokukhula nempumelelo ngokomoya. Ngoko kutheni abanye besiba neengxaki nje?

Bambalwa abantu abafuna ukuba zizinxulumani ezisondeleyo nomntu obonakalisa umoya wokulandula nowokukhalaza. Ulwimi olubukhali, noluhlabayo kunye nokukhalaza ngokuzingisileyo kunokudimaza kakhulu. Bengafuni ukutsalelwa emva ngokomoya, abanye basenokulusikel’ umda unxulumano lwabo nabantu abanjalo. Ethabatha oku njengembonakaliso yokubanda kwebandla, omnye usenokuqalisa imfuduko, okokuqala etshintshela kwelinye ibandla, aphinde aye kwelinye, aye kwelinye kwakhona. Njengemihlambi efudukayo kumathafa aseAfrika esoloko ifuna amadlelo aluhlaza, la maKristu “afudukayo” asoloko efuna ibandla elilungileyo. Olunjani lona ulonwabo ebeya kuba nalo ukuba, kunoko, ebekhangele iimpawu ezintle kwabanye aze azame ukubonakalisa ngokuzeleyo iziqhamo zomoya kaThixo kubomi bawo!—Galati 5:22, 23.

Bambi bakwenza oku ngokwenza umgudu okhethekileyo wokuncokola nomntu owahlukileyo kwintlanganiso nganye kwiHolo yoBukumkani baze bamncome ngokunyanisekileyo ngokuhle akwenzayo. Kusenokuba kukuziphatha kakuhle kwabantwana bakhe, ukuya rhoqo ezintlanganisweni zamaKristu, amagqabaza alungiselelwe kakuhle kwiSifundo seMboniselo, ukubuk’ iindwendwe kwakhe ngokuvumela iSifundo Sencwadi Sebandla kunye neentlanganiso zenkonzo yasentsimini ukuba ziqhutyelwe kwikhaya lakhe, njalo njalo. Ngokukwenza usukelo lwakho ukujonga ngaphaya kweempawu zokungafezeki, ngokuqinisekileyo uya kufumana iimpawu ezibalaseleyo kubazalwana noodade abangamaKristu. Oku kuya kwenza bakuthande, kwaye uya kufumanisa ukuba akuswelanga bahlobo banyanisekileyo.

Isingxengxezo Sokugqibela

“Yintando kaThixo.” “NguMtyholi obekek’ ityala.” Mhlawumbi isingxengxezo sokugqibela kukubek’ ityala uThixo okanye uMtyholi ngokusilela kwethu. Kuyinyaniso kona ukuba uThixo okanye uSathana basenokuphembelela ezinye zeziganeko ebomini bethu. Noko ke, abanye bakholelwa ekubeni ngathi yonke into, ilungile okanye ingalunganga, ebomini babo ingumphumo wokungenelela kukaThixo okanye uSathana. Kuba ngathi akukho nto eye yenzeka kubo engumphumo wezenzo zabo. “Ukuba uThixo uyafuna ukuba ndibe nala nqwelo-mafutha intsha, uya kuqinisekisa ukuba ndiyayifumana.”

Abo banjalo ngokuqhelekileyo baphila ubomi babo ngokungakhathali, besenza izigqibo zemali nezinye becinga ukuba uThixo wobahlangula. Ukuba izenzo zabo zokungalumki ziphumela kwintlekele, yezoqoqosho okanye yolunye uhlobo, babek’ ityala kuMtyholi. Ukwenza into ngobutyhuthutyhuthu ngaphandle ‘kokubala indleko’ kuqala uze utyhole uSathana ngokusilela, okanye okude kwakubi nangakumbi, ulindele ukuba uYehova angenelele, akuyi kubonakalisa ikratshi nje kuphela kodwa kwakhona kuchasene neZibhalo.—Luka 14:28, 29.

USathana wazama ukwenza uYesu acinge ngaloo ndlela aze angazivi ebophelelekile ngezenzo Zakhe. Ngokuphathelele isilingo sesibini, uMateyu 4:5-7 unikela le ngxelo: “Eze uMtyholi, amthabathe amse kuwo umzi ongcwele, ammise eluchochoyini lwetempile, athi ke kuye, Ukuba unguNyana kaThixo, ziphose ezantsi; kuba kubhaliwe kwathiwa, Uya kuziwisela umthetho ngawe izithunywa zakhe zasemazulwini, zikufukule ngezandla, hleze ubetheke ngonyawo lwakho etyeni.” UYesu waqonda ukuba wayengenakulindela uYehova ukuba angenelele ukuba wayenokuthabatha inyathelo ekwakucaca ukuba liyingozi, nelalisenokuba kukuzibulala. Ngenxa yoko, waphendula wathi: “Kubhaliwe kanjalo kwathiwa, Uze ungayihendahendi iNkosi uThixo wakho.”

Abo bathambekele ekubekeni ityala uMtyholi okanye uThixo ngezenzo zabo ezithandabuzekayo bafana kakhulu nabalandeli bolwazi ngeenkwenkwezi, abathi bathabathel’ indawo uThixo okanye uMtyholi ngeenkwenkwezi. Beqiniseke ngokupheleleyo ukuba phantse yonke into eyenzekayo ayilawulwa ngabo, bayawutyeshela umgaqo olula ochazwe kweyabaseGalati 6:7 othi: “Into athe wahlwayela yona umntu, wovuna kwayona.”

Ukujamelana Nenyaniso

Akukho namnye onokukhanyela ukuba siphila kwihlabathi elingafezekanga. Iingxaki ezixutyushwe apha zezokwenene. Abantu basengasiqhatha emalini. Abanye abaqeshi basenokusidlel’ indlala. Abantu esiqhelene nabo basenokubaphembelela kakubi abantwana bethu. Abanye ootitshala nezinye izikolo zifanele ziphuculwe. Abadala maxa wambi basenokuba nothando nenkathalo engakumbi. Kodwa simele siwuvume umphumo wokungafezeki nokuba, njengoko iBhayibhile ichaza, “ihlabathi liphela lilele kongendawo.” Ngoko akukho ngqiqweni ukulindela ukuba umendo wethu uya kusoloko ulungile ngalo lonke ixesha ukutyhubela ubomi.—1 Yohane 5:19.

Ukongezelela, simele sikwamkele ukungafezeki nokusikelwa kwethu imida yaye siqonde ukuba kumaxesha amaninzi iingxaki zethu zingumphumo wobuyatha bethu. UPawulos wabongoza amaKristu aseRoma esithi: “Ndithi kubo bonke abaphakathi kwenu, mabangazicingeli ngaphezu koko bamelwe kukuzicingela ngako.” (Roma 12:3) Elo cebiso lisebenza ngokufanayo kuthi namhlanje. Xa okuthile kungahambi kakuhle ebomini bethu, asiyi kuthi ngokukhawuleza silandele ookhokho bethu uAdam noEva size sithi: “Asilotyala lam!” Kunoko, siya kuzibuza oku, ‘Yintoni engebendiyenze ngokwahlukileyo ukuphepha lo mphumo ungonwabisiyo? Ngaba ndiye ndenza isigqibo esilungileyo ngalo mbandela ndaza ndafuna isiluleko kumthombo onobulumko? Ngaba omnye umntu okanye abantu ababandakanyekileyo ndiye ndabathabatha njengabamsulwa, ndibaphatha ngesidima?’

Ukuba silandela imigaqo yobuKristu size senze isigqibo esilungileyo, siya kuba nabahlobo abaninzi neengxaki ezimbalwa. Uninzi lweengxaki ezingeyomfuneko kubomi bethu bemihla ngemihla ziya kushenxiswa. Siya kufumana uvuyo kwiinkqubano zethu nabanye kwaye asiyi kukhathazwa ngumbuzo othi: “Lityala likabani?”

[Imifanekiso ekwiphepha 28]

Abazali banokwenza okuninzi ukunceda abantwana babo bakhule ngokomoya