Ngaba IBhayibhile Ifundisa Ukukholelwa Kwilishwa?

UKUNYELISA! UKUHLEBA! Xa umntu ohlonelwayo ekuhlaleni ekholelwa kukuba igama lakhe okanye udumo lwakhe luye lonakaliswa yingxelo ethile ebubuxoki, uziva enyanzelekile ukuba awulungise loo mbandela. Usenokude abamangalele abo bamnyelisileyo.

Eneneni, ukukholelwa kwilishwa kukumhleba uThixo onguSomandla. Le mfundiso ithi uThixo ubekek’ ityala ngokobuqu kuzo zonke iintlekele namashwangusha athwaxa uluntu. Ukuba ukholelwa kwilishwa, usenokucinga ukuba uMongami Wendalo Iphela uqulunqe ucwangciso olunjengolu: ‘Namhlanje, uJohn uza kwenzakala kwingozi yenqwelo-mafutha, uFatou uza kuhlaselwa sisifo seengcongconi, indlu kaMamadou iza kutshatyalaliswa sisaqhwithi’! Ngaba ngokwenene ubunokushukunyiselwa ekubeni unqule uThixo onjalo?

Abo bakholelwa kwilishwa babuza oku: ‘Kodwa ukuba amashwa ethu akabangelwa nguThixo, abangelwa ngubani ke?’ UOusmane, umfana okhankanywe kwinqaku elingaphambili, naye wazibuza oku. Kodwa kwakungekho mfuneko yokuba athelekelele ukuze afumane inyaniso. Wafunda ukuba uThixo wayezithethelele kule ntlebendwane ngeemfundiso ezifumaneka kwiLizwi Lakhe eliphefumlelweyo, iBhayibhile. (2 Timoti 3:16) Ngoko ke, makhe siqwalasele oko iBhayibhile ikutshoyo ngalo mbandela.

Ngubani Obekek’ Ityala?

Izikhukula, izaqhwithi, iinyikima—ngokufuthi iintlekele ezinjalo kuthiwa zizenzo zikaThixo. Kodwa iBhayibhile ayitsho ukuba nguThixo owenza iintlekele ezinjalo. Khawuqwalasele intlekele eyehla kuMbindi Mpuma kwiinkulungwane ezadlulayo. IBhayibhile isixelela ukuba ekuphela komntu owasindayo kule ntlekele wanikela le ngxelo: “Umlilo kaThixo [ibinzana lesiHebhere elithetha umbane] uwe ezulwini, wayitshisa impahla emfutshane nabafana, wabadla.”—Yobhi 1:16.

Nangona le ndoda yayisoyika isenokuba yayicinga ukuba nguThixo owayebangele loo mlilo, iBhayibhile ibonisa ukuba wayengabekeki tyala. Funda uYobhi 1:7-12, ibe uya kufumanisa ukuba loo mbane wawungabangelwanga nguThixo, kodwa wawubangelwe luTshaba lwakhe—uSathana uMtyholi! Oku akuthethi kuthi onke amashwangusha enziwa nguSathana ngokungqalileyo. Kodwa kuyacaca ukuba asikho isizathu sokubek’ ityala uThixo.

Enyanisweni, ngokufuthi ngabantu abamele babekw’ ityala xa izinto zingahambi kakuhle. Ukungaphumeleli esikolweni, emsebenzini, okanye kwizinto zentlalo kusenokuba kubangelwe kukungenzi umgudu owaneleyo nokungaqeqesheki kakuhle okanye mhlawumbi ukungabi nalwazelelo ngabanye. Ngokufanayo, ukugula, iingozi nokufa zisenokuba ngumphumo wokungakhathali. Ewe, ukubopha ibhanti xa ubani eqhuba kuwanciphisa kakhulu amathuba okuba afe xa kusenzeka ingozi yenqwelo-mafutha. Ibhanti ibingenakunceda ukuba izinto bezilawulwa “lilishwa” elingenakuguquka. Unyango olufanelekileyo nococeko zikwalinciphisa kanobom inani labantu abafa ngaphambi kwexesha. Kwaneentlekele ngokuqhelekileyo ezibizwa ngokuba “zizenzo zikaThixo” eneneni, zizizenzo zabantu—utyekelo olubi lwabantu lokonakalisa umhlaba.—Thelekisa ISityhilelo 11:18.

‘Ixesha Nesihlo’

Kuyinyaniso ukuba zininzi iziganeko ezilusizi ezingaziwa kakuhle ukuba zibangelwa yintoni. Noko ke, phawula oko iBhayibhile ikutshoyo kwiNtshumayeli 9:11: “Ndabuya ndabona phantsi kwelanga, ukuba ukugidima asikokwabanamendu, imfazwe asiyeyamagorha; kananjalo isonka asisesezilumko; kananjalo ubutyebi asibobabanengqiqo; kananjalo ubabalo asilolwabanokwazi; ngokuba bonke bephela bafikelwa lixesha nasisihlo.” (Akekeliswe sithi.) Ngoko ke asikho isizathu sokukholelwa ukuba nguMdali obangela iingozi okanye abo bangamaxhoba eengozi bayohlwaywa ngandlel’ ithile.

UYesu Kristu wayiphikisa le ngcamango yelishwa. Ebhekisela kwintlekele eyayisaziwa kakhulu ngabaphulaphuli bakhe, uYesu wabuza: “Abo balishumi elinesibhozo abawelwa yinqaba eSilowam, ngaloo ndlela ibabulala, ngaba niba bangqineka bengabanetyala ngakumbi kunabo bonke abanye abantu abangabemi eYerusalem? Eneneni, ndiyanixelela, akunjalo.” (Luka 13:4, 5) Kubonakala ukuba uYesu akazange atyhole uThixo ngaloo ntlekele, kodwa wathi yayibangelwe ‘lixesha nesihlo.’

Imiphumo Emibi Yokungafezeki

Noko ke, kuthekani ngoonobangela bokufa nezifo abangaziwayo? IBhayibhile iyichaza ngokungqalileyo ngolu hlobo imeko yabantu: ‘KuAdam bonke bayafa.’ (1 Korinte 15:22) Ukususela ekubeni ukhokho wethu uAdam wathabatha ikhondo lokungathobeli ukufa kuye kwaluthwaxa uluntu. Kanye njengokuba uThixo wayelumkisile, uAdam washiyela inzala yakhe ilifa elikukufa. (Genesis 2:17; Roma 5:12) Ngoko ke, unobangela wako konke ukugula unokulandwa kukhokho wethu sonke uAdam. Nobuthathaka bethu esabuzuz’ ilifa bunendima enkulu ekuphoxekeni nasekungaphumelelini esijamelana nako ebomini.—INdumiso 51:5.

Khawucinge ngengxaki yokuhlwempuzeka. Ukukholelwa kwilishwa ngokufuthi kuye kwabangela abo bahlwempuzekileyo baziyekele kuloo meko yabo inzima. ‘Le yindlela emiselwe kwangaphambili ukuba siphile ngayo,’ bakholelwa koko. Noko ke, iBhayibhile ibonisa ukuba ukungafezeki kwabantu, kungekhona ilishwa, kubekek’ ityala. Bambi baba ngamahlwempu xa ‘bevuna oko bakuhlwayeleyo’ ngenxa yokuba ngamavila okanye ukungakwazi ukulawula izinto zabo. (Galati 6:7; IMizekeliso 6:10, 11) Izigidi ezingabalekiyo zabantu zihlwempuzekile ngenxa yokuxhatshazwa ngabalawuli ababawayo. (Thelekisa uYakobi 2:6.) IBhayibhile ithi: ‘Umntu ugunyazela umntu, kube kubi kuye.’ (INtshumayeli 8:9) Abukho ubungqina bokuba kutyholwe uThixo ngokuhlwempuzeka okanye ilishwa.

Ukukholelwa Kwilishwa—Imiphumo Yako Eyingozi

Kanti esinye isizathu esibambekayo sokungakholelwa kwilishwa koko linokukwenza kwabakholelwayo kulo. UYesu Kristu wathi: “Wonke umthi olungileyo uvelisa isiqhamo esihle, kodwa wonke umthi obolileyo uvelisa isiqhamo esingento yanto.” (Mateyu 7:17) Makhe siqwalasela esinye “isiqhamo” sokukholelwa kwilishwa—indlela okuyiphembelela ngayo imvo yabantu yembopheleleko.

Ukuziva unembopheleleko yobuqu okusengqiqweni kubalulekile. Yenye yezinto ezishukumisela abazali ukuba bondle iintsapho zabo, abasebenzi benze imisebenzi yabo ngenyameko, imizi-mveliso ivelise imveliso enexabiso. Ukukholelwa kwilishwa kunokuyidodobalisa loo mvakalelo. Ngokomzekelo, masithi inqwelo-mafutha yendoda ethile inengxaki kwivili lokuqhuba. Ukuba iziva ibophelelekile, iyayilungisa ixhalabele ubomi bayo nobabanye abakhweleyo. Kwelinye icala, umntu okholelwa kwilishwa unokuyityeshela loo ngxaki, eqiqa ngelithi iya konakala kuphela ukuba oko ‘kukuthanda kukaThixo’!

Ewe, kulula ukuba ukukholelwa kwilishwa kukhuthaze ukungakhathali, ubuvila, ukungamkeli imbopheleleko ngezenzo zikabani, nakwimikhwa emibi emininzi.

Ngaba Kungumqobo Kulwalamano Lwethu NoThixo?

Okona kubi ngakumbi kukuba ukukholelwa kwilishwa kunokumenza ubani azive engenambopheleleko kuThixo. (INtshumayeli 12:13) Umdumisi ubongoza lonke uluntu ukuba ‘luve, lubone ukuba ulungile uYehova.’ (INdumiso 34:8) UThixo ubabekela izinto ezithile abamele bahlangabezane nazo abo baya kunandipha ukulunga kwakhe.—INdumiso 15:1-5.

Enye yazo yinguquko. (IZenzo 3:19; 17:30) Ibandakanya ukuvuma iimpazamo zethu nokwenza iinguqu eziyimfuneko. Njengabantu abangafezekanga, sonke sinezinto ezininzi ekufuneka siguquke kuzo. Kodwa ukuba ubani uvakalelwa kukuba ulixhoba elingenakuzinceda lelishwa, kunzima ukubona imfuneko yokuguquka okanye azive ebekek’ ityala ngeempazamo zakhe.

Umdumisi wathi ngoThixo: “Inceba yakho ilungile ngaphezu kobomi.” (INdumiso 63:3) Kodwa, ukukholelwa kwilishwa kuye kweyisela izigidi zabantu kwelokuba nguThixo obangela ukuba zibe lusizi. Ngokuzenzekelayo, oku kuye kwenza abaninzi bamqumbela, bevala isango elikhokelela ekubeni nolwalamano olusondele ngokwenene noMdali. Ngapha koko, unokumthanda njani umntu omgqala njengobangela zonke iingxaki neemvavanyo zakho? Ngaloo ndlela ukukholelwa kwilishwa kungumqobo ophakathi kukaThixo nabantu.

Ukhululekile Kwingcinezelo Yelishwa

UOusmane oselula, okhankanywe ekuqaleni, wayekhotyokiswe kukukholelwa kwilishwa. Noko ke, xa amaNgqina kaYehova amncedayo ukuba aphicothe indlela acinga ngayo esebenzisa iBhayibhile, uOusmane washukunyiselwa ukuba ayeke ukukholelwa kwilishwa. Umphumo waba kukuva isiqabu yaye ajonge ubomi ngendlela entsha neyakhayo. Okona kubalulekileyo kukuba uye wamazi uYehova njengoThixo “onemfesane, onobabalo, ozeka kade umsindo, omninzi ngenceba nenyaniso.”—Eksodus 34:6.

Kwakhona uOusmane uye waqonda ukuba uThixo, nangona engacebi yonke into ephathelele ubomi bethu, unenjongo ethile ngekamva.a Eyesi-2 kaPetros 3:13 ithi: “Kukho amazulu amatsha nomhlaba omtsha esiwulindeleyo ngokwesithembiso sakhe, yaye kwezi kuza kuhlala ubulungisa.” AmaNgqina kaYehova aye anceda izigidi zabantu ukuze zihlakulele ithemba lokuphila ngonaphakade njengenxalenye yalo “mhlaba omtsha” uthenjisiweyo. Aya kukuvuyela ukukunceda nawe.

Njengoko ulwazi lwakho oluchanileyo lweBhayibhile lukhula, uya kuqonda ukuba ikamva lakho alixhomekekanga kwilishwa elimiselwe kusengaphambili ongenakulilawula. Amazwi kaMoses kumaSirayeli amandulo asebenza kakuhle kulo mbandela: “Ndibeke phambi kwenu ubomi nokufa, intsikelelo nesiqalekiso. Nyula ke ubomi, ukuze uphile, wena nembewu yakho; ukuba umthande uYehova uThixo wakho, uliphulaphule ilizwi lakhe, unamathele kuye.” (Duteronomi 30:19, 20) Ewe, nguwe onokugqiba ngekamva lakho. Alilawulwa lilishwa.

[Umbhalo osemazantsi]

[Imifanekiso ekwiphepha 6, 7]

Ezi ntlekele bezingezizo ‘izenzo zikaThixo’

[Inkcazelo]

U.S. Coast Guard photo

WHO

UN PHOTO 186208 /M. Grafman