Xa Amazwi Esiba Zizixhobo Zokulwa
“Kukho ophololoza njengokuhlaba kwekrele.”—IMIZEKELISO 12:18.
UELAINEa uthi: “Oku kwaqala kwisithuba seeveki emva komsitho womtshato. Wathetha amazwi angenabubele, endigxeka, ezama nokundihlaza. Sasingafanelani nomyeni wam. Ubukrelekrele bengqondo yakhe nokukhawuleza kwakhe athethe kwakumenza aguqule yonke into endiyithethayo.”
Kubo bonke ubomi bomtshato wakhe uElaine wayelixhoba lokuhlaselwa ngendlela echuliweyo eyayingamenzakalisi emzimbeni nengenaluvelwano. Okulusizi kukuba, imeko yakhe ayikhange iphucuke njengoko ixesha lihamba. Uthi: “Ngoku sele sineminyaka engaphezu kweli-12 sitshatile. Akudluli suku engakhange andigxeke okanye andiphoxe, esebenzisa intetho ehlabayo nekrwada.”
IBhayibhile ayizibaxi izinto xa isithi ulwimi lunokuba ‘yinto engalawulekiyo embi, . . . ezele yityhefu ebulalayo.’ (Yakobi 3:8; thelekisa INdumiso 140:3.) Oku kuyinyaniso ngokukhethekileyo emtshatweni. Umfazi ogama linguLisa wathi: “Nabani na othi ‘intonga namatye zinokundikrwabaza amathambo kodwa amazwi akanakuze andenzakalise’ akachananga ngokupheleleyo.”—IMizekeliso 15:4.
Kwanamadoda anokuba ngamaxhoba engcwangu ebonakaliswa ngamazwi. UMike, oneminyaka emine etshate noTracy nonomtshato osele uza kuqhawuka ubuza oku: “Ngaba uyazi ukuba kunjani ukuhlala nomfazi osoloko ekubiza ngokuba ulimenemene, isidenge sesihiba okanye enye into embi gqitha? Andinakuziphinda phakathi kwabantu ababekekileyo izinto azithethayo kum. Kungeso sizathu ndingenakuthetha naye ibe ndibuya kade emsebenzini. Kubhetele gqitha kunokubuyela ekhaya.”—IMizekeliso 27:15.
Ngesizathu esilungileyo, umpostile uPawulos wawabongoza amaKristu esithi: ‘Makususwe kuni . . . ukunkqangaza nentetho etshabhisayo.’ (Efese 4:31) Kodwa yintoni ‘intetho etshabhisayo’? UPawulos uyayahlula ‘ekunkqangazeni’ (ngesiGrike, krau·geʹ), okuchaza nje ukuphakamisa ilizwi. ‘Intetho etshabhisayo’ (ngesiGrike, bla·sphe·miʹa) ibhekisela ngakumbi koko kuqulethwe ngamazwi. Ngoko ukuba ikhohlakele, inolunya, ithob’ isidima, okanye iyathuka, iba yintetho etshabhisayo—enoba kuyangxolwa okanye kuyasetyezwa.
Amanxeba Abangelwa Ngamazwi
Amazwi arhabaxa anokuwenza buthathaka umtshato, kanye njengokuba amaza olwandlekazi enokuqhekeza ilitye eliqinileyo. UGqr. Daniel Goleman ubhala athi: “Okukhona eba qatha yaye esetyenziswa rhoqo, kokukhona esiba yingozi ngakumbi. . . . Umkhwa wokugxeka nokudelela okanye ukucaphukisa ziimpawu eziyingozi ngenxa yokuba zibonisa ukuba indoda okanye umfazi iligwebile ngaphakathi iqabane layo.” Njengoko uthando luphela, indoda nomfazi baba “ngabo batshate ngokusemthethweni, kungekhona ngokweemvakalelo,” njengoko enye incwadi ikubeka. Ekuhambeni kwexesha, basenokuwuqhawula ngokupheleleyo loo mtshato.
Noko ke, izithuko, zisenokungachaphazeli umtshato nje kuphela. Umzekeliso weBhayibhile uthi: “Ekubulalekeni kwentliziyo umoya uthi dakumba.” (IMizekeliso 15:13) Uxinezeleko olubangelwa luthotho lwamazwi ahlungisayo lunokuyichaphazela kanobom impilo kabani. Ngokomzekelo, uhlolisiso olwenziwa yiYunivesithi yaseWashington (eUnited States) lwatyhila ukuba umfazi osoloko ethukwa unokuchanabeka ngakumbi kumkhuhlane, kwiingxaki zesinyi, kwisigulo ekuthiwa yiyeast infection, nakwiinkathazo zesisu namathumbu.
Abafazi abaninzi abaye banyamezela ukuxhatshazwa ngamazwi nangokwasemzimbeni bathi amazwi enzakalisa ngakumbi kunamanqindi. UBeverly uthi: “Imikrwelo endiba nayo xa endibethile iyaphela, kodwa andisokuze ndizilibale izinto ezimbi azithethayo ngendlela endikhangeleka ngayo, indlela endipheka ngayo, nendlela endibagcina ngayo abantwana.” UJulia uvakalelwa ngendlela efanayo. Uthi: “Ndiyazi ukuba kukhangeleka kungekho ngqiqweni, kodwa ndikhetha ukuba andibethe ndize ndilibale kunokuba kuqengqeleke iiyure ndicinga ngezinto azithethileyo kum.”
Kodwa kutheni abanye abantu bethuka baze bagxeke lowo bathi bayamthanda? Inqaku elilandelayo lixubusha lo mbuzo.
[Umbhalo osemazantsi]
a Wambi amagama akolu ngcelele lwamanqaku aguquliwe.
[Amagama acatshulweyo akwiphepha 20]
“Ndikhetha ukuba andibethe ndize ndilibale kunokuba kuqengqeleke iiyure ndicinga ngezinto azithethileyo kum”
[Amagama acatshulweyo akwiphepha 20]
“Ngaba uyazi ukuba kunjani ukuhlala nomfazi osoloko ekubiza ngokuba ulimenemene, isidenge sesihiba okanye enye into embi gqitha?”