Abantu Abaselula Bayabuza . . .

Uhlobo Olwahlukileyo Lomculo Werock—Ngaba Lundilungele?

“Zikho iingoma endizithandayo ezithetha ngeengxaki namava awahlukahlukeneyo esijamelana nawo thina bantu abaselula.”—UGeorge oneminyaka eli-15 ubudala.a

“Luhlobo lomculo oluphakathi kwe-pop nomculo onesingqi esinamandla.”—UDan oneminyaka eli-19 ubudala.

“Luhlobo olutsha. Lwahlukile. Alungomculo oqhelekileyo noxhaphakileyo.”—UMaria oneminyaka eli-17 ubudala.

UHLOBO olwahlukileyo lomculo werock. Ulutsha oluninzi luyakunandipha ukuluphulaphula. Bambi abakhulileyo luyabaphazamisa. Ibe mhlawumbi inkoliso yabazali inofifi nje okanye ayazi nowathwethwa ngalo.

Kuyavunywa ukuba, akulula ukuluchaza ngokwenene oko lukuko olu hlobo lwahlukileyo lomculo werock. Ngokuqhelekileyo, yayingumculo wolutsha olwalufuna into eyahlukileyo, engafaniyo nomculo oqhelekileyo nothandwayo odlalwa kakhulu kunomathotholo. Bambi bathi waqala xa amaziko kanomathotholo eekholeji zasekuhlaleni anika ithuba amaqela asenokuba akalinikwa ithuba lokudlala iingoma zawo—amaqela omculo awayeqhayisa ngelokuba akawuguqulanga umculo wawo ukuze uthengwe ngamashishini omculo. Isizukulwana esitsha seemvumi siye sazikhaba ngaw’ omane iinkampani ezinkulu zokurekhoda neendlela ezikhawulezayo zokurhweba, ezinjengeevidiyo zomculo. Kwakhona, sabhala iingoma ngemibandela ekunqabileyo ukuba ikhankanywe kwiingoma ezisencotsheni ezingama-40.

Ngokungafaniyo nomculo onesingqi esinamandla okanye umculo werap, olu hlobo lwahlukileyo lomculo werock akusoloko kulula ukuluqonda okanye ukulwahlula. Kwaneengcungela zomculo azivumelani ngelokuba luyintoni ngokwenene olu hlobo lwahlukileyo lomculo werock. Oku kungenxa yokuba, njengoko igama lawo libonisa, luquka izandi, iimeko neemvakalelo ezahlukahlukeneyo. Omnye umfana wathi: “Kunzima ukuluchaza. Luquka iindidi ezahlukahlukeneyo zomculo wezi mini.” Omnye umntwana waba nobuganga bokunikela le nkcazelo: “Alusoloko lunesingqi esinamandla okanye lusezantsi, lunesingqi esikhawulezayo okanye esithe chu, lusonwabisa okanye lukruqula.” Omnye oselula wavuma wathi: “Andiqinisekanga nokuba ndinokuthi ndiyaluthanda uhlobo olwahlukileyo lomculo we-rock ngenxa yokuba andiqinisekanga ngoko lukuko.”

Enoba luyintoni na, ukuthandwa kohlobo olwahlukileyo lomculo werock kuye kwanda ukusa kwinqanaba lokuba uninzi lweemvumi zawo ezithandwayo ngoku zigqalwa njengenxalenye yeemvumi eziqhelekileyo. Kwakhona, kubonakala ngathi abazali abalugatyi kangako kunomculo onesingqi esinamandla okanye ezinye iintlobo ezigqabhuz’ iindlebe zomculo werock. Eneneni, bambalwa abazali ababonakala bewazi amaqela okanye imixholo yeealbham yolu hlobo lwahlukileyo lomculo. Sekunjalo, kufuneka uwulumkele lo mculo.

Yintoni Enomtsalane Kuwo?

Ngokomzekelo, khawucinge ngesizathu sokuba ulutsha oluninzi kangaka lutsaleleke kulo mculo. Kwabaninzi ngumbandela nje wokulandela abahlobo babo. Kwakhona ubangela into yokuncokola okanye ezinye izinto, ezinjengokubolekisana ngeekhasethi nee-CD.

Noko ke, kulutsha oluninzi, sisandi somculo noko kuthethwa ngamazwi ohlobo olwahlukileyo lomculo werock okulwenza lutsaleleke ngakumbi kuwo. Ngokukhethekileyo, ulutsha oluninzi lufumanisa ukuba luyawazi amava neemvakalelo zabaqambi beengoma. Amanqaku asekuqaleni kwiphephancwadi iTime athi ngalo mbandela: “Ngoxa iingoma zomculo we-pop ngokufuthi zithetha ngothando, amazwi ohlobo lwawo olwahlukileyo ngokuqhelekileyo athetha ngeemvakalelo ezibuhlungu: ukuphelelwa lithemba, inkanuko, ukudideka. . . . Ukuba ukwishumi elivisayo okanye ukwiminyaka yama-20 ubudala, intsapho yakho isenokuba iqhawule umtshato. Uhlobo olwahlukileyo lomculo luye lwayindlela yokuvakalisa iimvakalelo, uthetha ngokungqalileyo ngemibandela engaconjululwayo yokungakhathalelwa nokungabikho kokusesikweni.” Ngenxa yoko, umdlali wamacwecwe wakwanokholeji oneminyaka engama-21 ubudala uthi: “Lwaba nomtsalane kum nabahlobo bam ngenxa yokuba isizukulwana sethu sikruqukile lihlabathi. Akukho nto iphucukileyo siza kuyifumana emva kokuba sigqibile esikolweni.”

Ngokufanayo olunye ulutsha olungamaKristu luye lwaluthanda uhlobo olwahlukileyo lomculo werock. Ngokuzenzekelayo, inkoliso iye yaziphepha iingoma ezinesingqi esinamandla, ezikhuthaza imvukelo, ugonyamelo, okanye ukuziphatha okubi. Sekunjalo, amanye ala maKristu aselula akaqiniseki ngeengoma ezibonakala zingenabungozi kangako. UDan oselula wagqabaza wathi: “Zimbi iimvumi zingamafanasini awaziwayo okanye zisebenzisa iziyobisi, ibe amazwi eengoma zazo abonisa indlela yazo yokuphila.” Omnye oselula, ogama linguJack, uthi: “Wambi ala maqela anembono yokuba akukho mntu uwakhathaleleyo, iingxaki zawo, okanye ikamva lolutsha lwanamhlanje, ngoko akuvakalisa kwiingoma zawo oko. Ezinye azikhuthazi okanye zinike ithemba.”

Isilumkiso

IBhayibhile isixelela ukuba “ihlabathi liphela lilele emandleni alowo ungendawo,” uSathana uMtyholi. (1 Yohane 5:19) Ngoko, akumele kukumangalise ukuba umculo uyenye yeendlela uSathana azisebenzisayo ukulahlekisa abantu abaselula. Amanqaku angaphambili alo lindixesha nephephancwadi eliliqabane lakhe, IMboniselo, aye asibonisa ngokuphindaphindiweyo esi sibakala.b Izilumkiso eziye zanikelwa ngokuphathelele umculo onesingqi esinamandla nowerap zikwafanelekile xa kufikelelwa kuhlobo olwahlukileyo lomculo werock. Njengoko iBhayibhile isitsho, “onobuqili uyakuqonda ukunyathela kwakhe.”—IMizekeliso 14:15.

Phakathi kwezinye izinto, akukho ngqiqweni ukuhamba nomndilili xa kufikelela kumculo owuthandayo. Phawula lo mgaqo weBhayibhile, onokubhekisela ekuvumeleni abanye bakwenzele izigqibo: “Anazi na ukuthi ukuba nihlala nizinikela kuye nabani na njengamakhoboka ukuze nimthobele, ningamakhoboka akhe ngenxa yokuba nimthobela?” (Roma 6:16) KumKristu oselula, into ebalulekileyo asikuko okwamkelekileyo koontanga bakhe kodwa koko “kwamkelekileyo eNkosini.” (Efese 5:10) Ngaphezu koko, luhlobo olunjani lolutsha olutsaleleke kuhlobo olwahlukileyo lomculo werock? Ngaba lulutsha olukhangeleka lonwabile, lulungelelene yaye lunomdla kwizinto zokomoya? Okanye ngaba ubukhulu becala luthandwa lulutsha olunganelisekanga, olungonwabanga, okanye olunomsindo?

Liyinyaniso elokuba lumbi ulutsha olonwabileyo noluneempawu ezithandekayo zobuntu lusenokutsaleleka kuhlobo olwahlukileyo lomculo werock. Kodwa khawucinge ngoku: AmaKristu, aselula nakhulileyo, alindelwe likamva eliqaqambileyo. (2 Petros 3:13) Umpostile uPawulos usikhumbuza ngokuqiniseka kokuzaliseka kwamadinga kaThixo, esithi: ‘Akunakwenzeka ukuba uThixo axoke.’ (Hebhere 6:18) Ngoko, kunayiphi ingenelo, ukuzichanaba kwimbono emfiliba nengakhiyo ngekamva evakaliswa zezinye iingoma zohlobo olwahlukileyo lomculo werock? Ngaba ukuzinikela kumculo ovakalisa uloyiko, nokuphelelwa lithemba kunokuba yingozi kukholo lwakho? Ngaphezu koko, kunokuyichaphazela njani indlela ovakalelwa ngayo ukuzondla ngokuthe ngcembe ngomculo ololo hlobo?

Khetha

Oku akuthethi ukuthi wonke umculo ekuthiwa “luhlobo olwahlukileyo” usoloko uyingozi okanye awufanelekanga kwaphela. Kodwa masithi ufumanise ukuba uthile ebezama ukukutyisa ityhefu. Nangona ubungenakuyeka ukutya, ngokuqinisekileyo ubuya kukuhlolisisa ngenyameko ukutya kwakho, akunjalo na? Ukwazi ukuba uSathana uzama ukutyhefa imbono nesimo sakho sengqondo ngokufanayo kufanele kukwenze uwulumkele umculo owukhethayo. Njengoko iBhayibhile isitsho, “indlebe iyakucikida ukuthetha, ikhuhlangubo liyakuva ukudla.” (Yobhi 34:3) Kunokulandela ngokumfamekileyo umndilili, wuhlole umculo owuthandayo.

Unokukwenza njani oko? Ibhokisi enomxholo othi “Isikhokelo Sokukhetha Umculo” inamanye amacebiso aluncedo osenokuzama ukuwasebenzisa. Kwakhona, zama ukubuza abazali bakho abangamaKristu ngoko bakucingayo ngomculo owuthandayo. (IMizekeliso 4:1) Isenokukumangalisa indlela abaya kukuphendula ngayo! Kakade ke, abazali bakho badala kunawe. Kuyaqondakala ukuba basenokungawuthandi umculo owuthandayo. Kodwa ukuba abawuthandi umculo owuthandayo ukusa kwinqanaba lokuba bawubone ungafanelekanga, uthob’ isidima, okanye ulizothe, ngaba ufanele ungakukhathaleli oko bakuthethayo ngawo? IBhayibhile ithi: “Ukuze eve osisilumko, aqokele afunde.”—IMizekeliso 1:5.

Khawucinge ngendlela lo mculo okuchaphazela ngayo. Ngaba ukwenza uzive unomsindo, unemvukelo, okanye udandathekile? Ukuba kunjalo, ezi zizilumkiso ongamele uzityeshele! Kutheni ungafuni umculo okwenza ukhululeke, okuthuthuzelayo, okanye okuchwayitisayo?

Umculo usoloko utshintshatshintsha. Kungekudala, olunye uhlobo lomculo luza kuba ngumculo wala maxesha. Kodwa ungathi swii noku kutshintshatshintsha. Yiba ngoqondayo uze ukhethe xa kufikelelwa kumculo owuthandayo. Qiniseka ukuba oko ukuphulaphulayo kufanelekile yaye kuyakha. (Filipi 4:8) Ngoko umculo unokuba yinxalenye exabisekileyo nenandiphekayo yobomi bakho!

[Imibhalo esemazantsi]

[Amagama acatshulweyo akwiphepha 29]

“Ngoxa iingoma zomculo we-pop ngokufuthi zithetha ngothando, amazwi ohlobo lwawo olwahlukileyo ngokuqhelekileyo athetha ngeemvakalelo ezibuhlungu: ukuphelelwa lithemba, inkanuko, ukudideka.”—Iphephancwadi iTime

[Ibhokisi ekwiphepha 30]

Isikhokelo Sokukhetha Umculo

◆ Hlola isingxobo sealbham. Ngokufuthi oku kuya kukuchazela lukhulu ngaloo mculo nangeemvumi ezo. Walumkele amaqweqwe ealbham abonisa ugonyamelo, imifanekiso enobudemon, indlela yokunxiba nokuzilungisa eyothusayo, okanye abantu abahamba ze.

◆ Cinga ngoko kuthethwa ngamazwi engoma. Loo mazwi achaza iingcinga neendlela zokuphila zeemvumi. Zifuna ube naziphi iimbono?

◆ Isandi somculo sibonisa imeko neemvakalelo iimvumi ezithanda ukuba ube nazo—udandatheko, uvuyo, ukungathobeli, ukuvuseleleka ngokwesini, ukuzola okanye ukuphelelwa lithemba.

◆ Cinga ngabantu ngokuqhelekileyo abatsaleleke kwelo qela lomculo. Ngaba ubungathanda ukunxulunyaniswa nelo qela labantu nezimo zengqondo zalo?

[Umfanekiso okwiphepha 30]

Ulutsha oluninzi luzazi ngamazwi iingoma zanamhlanje