Indlela Esinga Ekuchacheni
NGENXA yomphumo wokuhlaselwa sisifo sentliziyo, kuyinto eqhelekileyo ukuba ubani azive esoyika yaye exhalabile. Ngaba siza kuphinda sindihlasele? Ngaba ndiza kuba ngumlwelwe okanye ndiza kungcungcuthekiswa yintlungu ndize ndiphelelwe ngamandla ndize ndibe nkene-nkene?
UJohn, okhankanywe kwinqaku lethu lesibini, wayenethemba lokuba njengoko ixesha lalihamba, isifuba esasiqaqamba imihla ngemihla sasiza kudamba. Kodwa emva kweenyanga ezimbalwa, wathi: “Ukuza kuthi ga ngoku asikadambi. Oko, kunye nokudinwa ngokukhawuleza nokuguquguquka kokubetha kwentliziyo yam, kundenza ndisoloko ndizibuza, ‘Ngaba ndisemngciphekweni wokuhlaselwa kwakhona?’”
UJane, waseUnited States, nowayengumhlolokazi oselula ngexesha lokuhlaselwa kwakhe sisifo sentliziyo, wavuma: “Ndandicinga ukuba ndandingenakuphila okanye sasiza kuphinda sindihlasele ndize ndife. Ndandisoyika, ekubeni ndandinabantwana abathathu endandimele ndibanyamekele.”
UHoroshi, waseJapan, wabalisa oku: “Kwandothusa ukuxelelwa ukuba intliziyo yam yayingenakuphinda isebenze ngohlobo eyayisebenza ngalo ngaphambili; umlinganiselo wokumpompa kwayo wehla ngama-50 ekhulwini. Ndandiphantse ndiqiniseke ukuba eminye imisebenzi ndandimele ndiyinciphise njengomlungiseleli wamaNgqina kaYehova, kuba ndandinokwenza umsebenzi ongaphantsi malunga nesiqingatha salowo ndandifudula ndiwenza.”
Xa ubani ephelelwa ngamandla, usenokuhlaselwa kukudandatheka nakukuziva engungantweni ngamathuba athile. UMarie, ongummi waseOstreliya oneminyaka engama-83 ubudala owayezinikele ixesha elizeleyo kumsebenzi wokushumayela wamaNgqina kaYehova, ekhalaza wathi: “Ukungabi namandla okusebenza ngendlela endandisebenza ngayo ngaphambili kwakundenza buhlungu. Kunokunceda abanye, ngoku ndandifuna uncedo.” EMzantsi Afrika, uHarold wagqabaza wathi: “Ndandingakwazi ukusebenza iinyanga ezintathu. Eyona nto ndandinokuyenza yayikukuhamba nje esitiyeni. Oko kwakutyhafisa!”
Kwakufuneka utyando lokuxokomezela imithambo emva kokuba uThomas, waseOstreliya, wahlaselwa okwesibini sisifo sentliziyo. Wathi: “Andikwazi ukuzinyamezela iintlungu, yaye ukwenziwa utyando olukhulu ndandingafuni nokukucinga.” UJorge, waseBrazil, emva komphumo wotyando wagqabaza wathi: “Ngenxa yokuba ndilihlwempu, ndandisoyika ukuba ndandiza kushiya umfazi wam yedwa engenamncedi. Ndandicinga ukuba ndandingaz’ ukuphila thuba lide.”
Ukuchacha
Yintoni eye yanceda abaninzi bachacha baze babuyela kwimeko yabo yesiqhelo? UJane wathi: “Xa ndandiziva ndisoyika, ndandisoloko ndithandaza kuYehova ndilahlele umthwalo wam kuye ndize ndiwuyekele kuye.” (INdumiso 55:22) Umthandazo unceda ubani azuze amandla noxolo lwengqondo nto ezo ezifunekayo xa ujamelene namaxhala.—Filipi 4:6, 7.
UJohn noHiroshi babenenxaxheba kwiinkqubo zokubuyisela abantu kwimeko yabo yesiqhelo. Ukutya okufanelekileyo nomthambo kwazomeleza iintliziyo zabo, khon’ ukuze bobabini baqalise ukusebenza kwakhona. Yaye ukuchacha kwabo ngokweemvakalelo nangokwasengqondweni bathi kwabangelwa yinkxaso yamandla omoya kaThixo.
Ngenkxaso yabazalwana bakhe abangamaKristu, uThomas wafumana inkalipho yokujamelana notyando lwakhe. Wathi: “Ngaphambi kokwenziwa utyando, umveleli wandityelela saza sathandaza. Ngomoya othobeke kakhulu, wacela kuYehova ukuba andomeleze. Ngobo busuku ndacinga ngomthandazo wakhe ndaza ndaziva ndisikelelwe kakhulu kukuba nabadala abanjengaye oluthi uvelwano lwabo ngamaxesha anzima ngokweemvakalelo lube yinxalenye yenkqubo ephilisayo.”
UAnna, waseItali, wahlangabezana nodandatheko ngale ndlela: “Xa ndidimazekile, ndicinga ngazo zonke iintsikelelo endandizifumana njengomnye wabakhonzi bakaThixo neentsikelelo ezizayo phantsi koBukumkani bukaThixo. Oku kundinceda ukuba ndiphinde ndizole.”
UMarie unombulelo ngoncedo lukaYehova. Intsapho yakhe ibimxhasa, yaye uthi: “Abazalwana noodade bam bokomoya, ngamnye enomthwalo wakhe, bazipha ixesha lokuza kundityelela, benditsalel’ umnxeba okanye bethumela amakhadi. Ndandinokuhlala njani ndibuhlungu ngothando olungako abalubonakalisayo?”
Ukungabi Nasithukuthezi
Kuye kuthiwe intliziyo echachayo ayifanele ibe nesithukuthezi. Inkxaso yentsapho nabahlobo iba nendima enkulu, eqinisekileyo ekuchacheni kwabo baneentliziyo ezimele zichache ngokoqobo nangokufuziselayo.
UMichael, waseMzantsi Afrika, wagqabaza wathi: “Kunzima ukucacisela abanye ukuba kunjani ukungabi nathemba. Kodwa xa ndisiya kwiHolo yoBukumkani, inkxalabo ebonakaliswa ngabazalwana ichukumisa ngeyona ndlela yaye iyandikhuthaza.” UHenry, waseOstreliya, naye womelezwa luthando olunzulu nolwazelelelo olwaboniswa libandla. Wathi: “Ndandiwafuna ngokwenene loo mazwi obubele nalukhuthazo.”
UJorge wayixabisa inkxalabo enzulu eyaboniswa ngabanye ngokunceda intsapho yakhe ngemali de wakwazi ukuzisebenzela. UOlga, waseSweden, ngokufanayo waluxabisa uncedo olwanikelwa kuye nakwintsapho yakhe ngabazalwana noodade bakhe abaninzi bokomoya. Bambi bamyela evenkileni, ngoxa abanye babemcocela indlu yakhe.
Ngokufuthi, abanesigulo sentliziyo bamele bangabi nenxaxheba kakhulu kwimisebenzi ebebeyithanda. USven, waseSweden, wathi: “Maxa wambi ndandimele ndingabi nanxaxheba kubulungiseleli xa kuvuthuza umoya okanye kubanda, njengoko kwakubangela ukuba imithambo ibe nenkantsi. Ndiyaluxabisa ulwazelelelo amaNgqina esikhonza nawo alubonisayo ngalo mbandela.” Yaye xa elele ebhedini, uSven uyakwazi ukuphulaphula iintlanganiso ngenxa yokuba ngothando abazalwana bayazishicilela kwiteyiphu. “Bayandazisa ngoko kuqhubekayo ebandleni, yaye oko kundenza ndizive njengonenxaxheba.”
UMarie, nangona elele ngandletyana nye ebhedini, uziva esikelelekile ukuba abo afundisisa nabo iBhayibhile besiza kuye. Ngaloo ndlela unokuqhubeka exubusha ngekamva elimangalisayo ajonge phambili kulo. UThomas unombulelo ngenkxalabo eboniswayo ngaye: “Abadala baye baba nolwazelelo baza banciphisa izabelo ezithile abandinika zona.”
Iintsapho Zifuna Inkxaso
Izinto zisenokuba nzima kumalungu entsapho ngendlela efanayo neyomguli. Ayaxinezeleka yaye oyika gqitha. Ngokuphathelele ixhala awayenalo umfazi wakhe, uAlfred, waseMzantsi Afrika, wathi: “Xa ndandivela esibhedlele, umfazi wam wayendivusa amaxesha amaninzi ebusuku ukubona enoba ndandiphilile kusini na, yaye wayeye andinyanzele ukuba ndiye kwagqirha rhoqo emva kweenyanga ezintathu ukuze ndixilongwe.”
IMizekeliso 12:25 ithi ‘isithukuthezi esisentliziyweni siyenza igobe.’ UCarlo, waseItali, uphawula ukuba ukususela ekuhlaselweni kwakhe sisifo sentliziyo, umfazi wakhe onothando nonenkxaso “wadandatheka.” ULawrence, waseOstreliya, wathi: “Enye yezinto emele inikelwe ingqalelo kukuba iqabane lakho liyanyanyekelwa. Iqabane lisenokucinezeleka gqitha.” Ngaloo ndlela, sifanele sicinge ngeemfuno zabo bonke abakuloo ntsapho, kuquka nabantwana. Imeko isenokubenzakalisa ngokweemvakalelo nangokwasenyameni.
UJames, okhankanywe kwinqaku lethu lesibini, waba yinkom’ edla yodwa emva kokuba uyise ehlaselwe sisifo sentliziyo. Wathi: “Ndandicinga ukuba ndandingenakuze ndiphinde ndonwabe kuba ndandicinga ukuba ngoxa ndonwabile, kusenokwenzeka into embi.” Ukuvakalisa uloyiko lwakhe kuyise nokuba nonxibelelwano oluhle nabanye kwamthob’ izibilini. Ebudeni belo xesha uJames wenza enye into eyaba nomphumo omkhulu ebomini bakhe. Wathi: “Ndalwandisa ufundisiso lwam lobuqu lweBhayibhile nokulungiselela iintlanganiso zethu zamaKristu.” Kwiinyanga ezintathu kamva wahlulela ubomi bakhe kuYehova waza walufuzisela ngokubhaptizwa emanzini. Uthi: “Ukususela ngoko, ndiye ndakhulisa ulwalamano olusondele kakhulu kuYehova. Ngokwenene zininzi izinto endimele ndimbulele ngazo.”
Ngoxa ejamelene nomphumo wokuhlaselwa yintliziyo, ubani umele afumane ithuba lokubuhlolisisa kwakhona ubomi. Ngokomzekelo, imbono kaJohn yaguquka. Wathi: “Uyabubona ubuze bosukelo lokuzingca lwehlabathi uze uyibone indlela olubaluleke ngayo uthando lwentsapho nabahlobo nendlela esibaluleke ngayo kuYehova. Ulwalamano lwam noYehova, intsapho yam nabazalwana noodade bokomoya luye lwabaluleka ngakumbi ngoku.” Ebalisa ngengcinezelo ngenxa yokwenzekayo, walek’ umsundulo esithi: “Andinako nokukuthelekelela ukujamelana noku ngaphandle kwethemba lethu lexesha xa ezi zinto ziya kulungiswa. Xa ndidimazeka, ndicinga ngekamva, yaye okwenzekayo ngoku kubonakala kungeyonto inkulu kangako.”
Njengoko sinamava amahlandinyuka endlela esinga ekuchacheni, aba basindileyo kuhlaselo lwesifo sentliziyo banethemba eliqiniselwe eBukumkanini esafundiswa nguYesu Kristu ukuba sibuthandazele. (Mateyu 6:9, 10) UBukumkani bukaThixo buza kuzisela uluntu ubomi obungunaphakade obufezekileyo kwiparadesi esemhlabeni, ngoko isifo sentliziyo nazo zonke ezinye iziphene ziya kube zipheliswe ngonaphakade. Ihlabathi elitsha lisemnyango. Eneneni, obona bomi bumnandi busendleleni!—Yobhi 33:25; Isaya 35:5, 6; ISityhilelo 21:3-5.
[Umfanekiso okwiphepha 25]
Inkxaso yentsapho nezihlobo iba nendima ebalulekileyo ekuchacheni